Сайт посвященный церковной истории
Святая София и
Великий Новгород
История и
современность
История и современность
Кликни на квадрат справа, чтобы открыть вкладки сайта
Перепечатка в интернете разрешена при условии наличия активной ссылки на сайт " Святая София и Великий Новгород: История и современность".
НОВГОРОДСКАЯ ПЕРВАЯ ЛЕТОПИСЬ МЛАДШЕГО ИЗВОДА
(Комиссионный, Академический, Толстовский списки)
В лѣто 6848 [1340]. Преставися князь великыи Иванъ Данилович на Москвѣ, в чернцех и въ скимѣ; и поидоша вси князи в Орду: сынъ его Семеонъ, Василии Ярославьскыи, Костянтинъ Тфѣрьскыи, Костянтинъ Суздальскыи съ иными /л.207об./ князи. из Новагорода ходивше молодци, воеваша Устижну и пожгоша; нь угонивше, отъимаша у лодѣиниковъ полонъ и товаръ; потом же и Бѣлозерьскую волость воеваша. Того же лѣта, мѣсяца июня въ 7, на память святого мученика Федота, въ вторник на Троичькои недѣли, загорѣся на Розважи улици в поли, за святымъ Федоромъ, и погорѣ Неревьскыи конець даже и до святого Якова, а сѣмо и до Чюдинцевѣ улици, и церкви вси и дворове; оттолѣ вержеся в город, и погорѣ дворъ владыченъ, церкви святыя Софѣя и что дворовъ в городѣ и церквии, и Людинъ конець и до святого Алексия, тако же и церкве и домове, а сѣмо и до Прускои улицѣ. Тако бяше великъ и лют пожаръ, с бурею и с вихромъ, яко мнѣти уже концина, по водѣ огнь горя хожашеи много людии истопи на Волховѣ. И перевержеся огнь чресъ Волхово на ону сторону, и тамо въскорѣ до вечернии погорѣ вся стороиа от Федорова ручья въ Славно и до поля, и церкви каменыи и древяныи, и домове. Изо многых церквии не успѣша выносити ни иконъ, ни книгъ, такоже ни из домовъ; а хотя кто что вынеслъ или на поле, или на ого/л.208./роды, или въ греблю, или в лодьи, или в учаны, то все пламенемь взялосъ; а иное, что хотя кто вынеслъ, злии человѣци разграбиша, иже бога не боятся, ни чають въскресениа мертвымъ, ни суда божиа, ни възданиа но дѣлом; не токмо же то, что у человѣкъ, у своеи братии у крестиянъ, пограбиша, а иных надъ своимъ товаромъ побиша, а товаръ собѣ поимаша, нь и въ святыхъ церквах, идеже бы всякому християнину, хотя бы и свои дом повергя, а церкьви и постереци; нь пакы мы в покаяниа мѣсто горшее зло створимъ, а видяще казнь божию над ними: въ церкви святых 40 мученикь, иже бѣ устроена и украшена иконами и писменемъ и кованиемъ и крутою, запершись въ церкви, товаръ весь, чии бы ни былъ, то все разграбиша, а иконъ и книгъ не даша носити; да якоже сами избигоша изъ церкви, все пламенемъ взялося, и сторожа два убиша. А у святои Богородици в Торгу попъ сгорѣ; а инии глаголют, убиша и над товаромъ: понеже церковь вся погорѣ, и иконы и книгы, сего же ни власѣ огнь не прикоснуся; а товаръ всь разграбиша. А въ святои Пятници сторожь сыномъ сгорѣ; по том же пожару /л.208об./ и церковь та падеся, другая святою мученику Бориса и Глѣба на Подолѣ; много и людии погорѣ в домех: вборзѣ бо огнь заялъ; а великыи мостъ сгорѣ всь по воду; а изъ святои Софѣи не успѣша иконъ всѣх выносити; и много бысть пакости. Того же лѣта и Смолнескъ погорѣ всь, ночь на Спасовъ день. Того же лѣта дѣлаша опять мостъ новъ чресъ Волъхово. В то же лѣто прииде князь Семеон из Орды и насла на Торжокъ дани брати, и почаша силно дѣяти. Новоторжьци же прислаша с поклономъ в Новъгород; и послаша Матфѣя Валфромѣевича, и Терентия Даниловича с братомъ, и Валфромѣя посадница сына Остафьева, и Федора Авраамова с полкы; и ѣхавши, изгониша Торжокъ безъ вѣсти, и изимаша намѣстьниковъ Михаила князя Давыдовица, Ивана Рыбкина сына, и борцовъ, Бориса Сменова сына, и жены их и дѣти, и сковаша я. И сѣдѣша мѣсяць в Торжьку, городутвердивше, а ко князю послаша преже того Кузъму Твердиславля из Новагорода с жалобами: «еще не сѣд у насъ на княжении, а уже боярѣ твои дѣют силно». И посылаху в Новъгород ис Торжьку, что быша новгородцѣ всѣли на конѣ /л.209./ в Торжокъ; и не восхотѣша чернь. Посем же видѣвше новоторжци, даждь не прибудет из Новаграда рати, въсташа чернь на бояръ, а ркуще: «почто есте новгородцовъ призвалѣ, и они князи изималѣ; намъ в томъ погинути». И съкрутивщеся въ брони, нашедши силою на дворы, выимаша у воевод намѣстьникы княжи и борци и жены их, и новгородцовъ выпровадиша нз города; а бояре новоторьскыи прибѣжаша в Новъгород толко дущею, кто успѣлъ; а домы их разграбиша и хоромы розвозиша, а Смена Внучка убиша на вѣцѣ, потомъ и села их пуста положиша. Тои же зимѣ мѣсяца декабря въ 6. на Николинъ день убиша брянци князя Глѣба Святъславица; и в то время и митрополит ту бяше, и не возможе уняти их, нь вышедше изъ церкви святого Николы. Тои же зимѣ прииде князь Семеонъ с полкы в Торжокъ со всею землею Низовьскою; новгородци же почаша копити волость всю в город, а ко князю послаша владыку и Авраама тысячкого съ иными бояры, и доконцаша миръ по старымъ грамотамъ, на всеи воли повгородчкои, и крестъ цѣловаша; а князю даша боръ по волости,/л.209об./ а на новоторжцех 1000 рублевъ; бяше же ту и митрополит; и присла князь намѣстьникъ в Новъгород.
В лѣто 6849 [1342]. Побилъ владыка Василии святую Софѣю свинцомъ что была погорѣла, и иконы исписа, и кивот доспѣ. Тои же зимѣ прииха митрополит Феогнастъ, родом Гричинъ, в Новъгород, со многыми людьми; тяжко же бысть владыцѣ и монастыремъ кормомъ и дары. Тои же зимы умре цесарь Озбякъ поганыи. Тои же зимѣ умре князь великыи Гѣдименъ Литовьскыи поганыи. Тои же осени постави владыка теремъ великыи. Тои же зимы приихалъ Михаилъ" княжичь Олександрович со Тьфѣри в Новъгород ко владыцѣ, сынъ хрестьныи, грамотѣ учится. Сего же лѣта хлѣбъ бысть дешевъ, а скотъ рогатыи помре.
В лѣто 6850 [1342]. Прислаша плесковици послы к Новугороду съ поклономъ: «идет на нас рать нѣмечкая до полна ко Плескову; кланяемся вам, господѣ своеи, обороните нас». Новгородци же, не умедляще ни мала, поѣхаша вборзѣ в великую пятницю, а и иныи в великую суботу, а обьчины вси попечатавъ; и яко быша на Мелетовѣ, прислаша плесковицѣ с поклоном: «вамъ кланяемся; ра/л.210./ти к нам нѣту, есть рать нѣмечкая, да ставят город я а рубежи на своеи земли»; и хотѣша ити къ Плескову, и потомъ, послушавше молбы их, възвратишася в Новъград вси здрави. Того же лѣта заложи владыка Василии церковь святое Благовѣщение на Городищи, порушеную повелѣниемъ великаго князя Семена Ивановича, в Петрово заговѣние в понедѣльник, мѣсяца мая въ 27, на святого Климента творца канономъ. Того же лѣта повелѣ сольяти владыка Василии колоколъ великыи къ святѣи Софѣи и приведе мастьры с Москвѣ, человѣка добра, именемъ Борѣса. Того же лѣта предашася плесковици Литвѣ, отвергъшеся Новаграда и великаго князя; приведоша собѣ из Литвы князя Олгерда, Гедиминова сына, с Литвою; а Олександра Всеволодица преже того выпровадили бяху. Олгердъ же повелѣ крестити сына своего, и наркоша имя ему въ святомъ крещении Андрѣи, и посади его въ Плесковѣ, а самъ поѣха в Литву. Того же лѣта бишаг плесковицѣ Нѣмець, угонивше под их городкомъ под Новымъ на рубежи, избиша их съ 300. Приходиша же Нѣмци силою великою с порокы ко Изборьску и стояша под городом 11 день, и мало не взяша его; нь Нѣмцовъ много побиша, /л.210об./ и убиша же ту Воинева сына Литовьскаго князя, и нѣколико Литвы [и] изборянъ паде; и отъидоша Нѣмци. Того же лѣта загорѣся в Новѣгородѣ на Даньславли улици, и погорѣ по берегу и до гребли, а в гору до святых 40 и досвятых Кузмы и Дамиана, а церкви 3 сгорѣша: святыи Никола и святыи Яковъ каменая, ту и сторожь сгорѣ, и муж добръ сгорѣ Есифъ Давыдович; 3-я святыи Георгыи; и много зла створися. Людие же, боящеся, не смѣяху в городѣ жити, нь по полю, а инии по рли живяху, друзии же по брегу 6 в учанех; и бѣ видѣти всь град движащеся, и бѣгаша по недѣлю и боле, и много пакости бысть людемъ и убытка от лихых людии, иже бога не боятся. Владыка же съ игумены и с попы замысли пост, и хожаху съ кресты по манастырем и по инымъ церквамъ всь град, молящеся богу и пречистѣи его матери, дабы отвратилъ от нас праведныи гнѣвъ свои. Того же лѣта ходи въ орду князь Семеонъ к поганому Зянибѣку, иже бѣ сѣлъ на царствѣ, убивъ два брата своя; и прииде в Русь опя.ть князь. Мѣсяца октября преставися рабъ божии Валфромѣи, посадникъ новгородчкыи, сынъ Юрья Мишинича, на память святых /л.211./ мученикъ Маркияна и Мантуриа, въ 25; и положиша тѣло его в отнѣ гробѣ, владыка Василии съ игумены и с попы. Покои, господи, душю его съ всѣми святыми. Того же лѣта Лука Валфромѣевъ, не послушавъ Новаграда, митрополица благословениа и владычня, скопивъ съ собою холоповъ збоевъ, и поѣха за Волокъ на Двину, и постави городокъ Орлиць; и скопивши Емцанъ, и взя землю Заволочкую по Двинѣ, всѣ погосты на щитъ. В то же время сынъ его Онцифоръ отходилъ на Волгу, Лука же въ двусту выиха воеватъ, и убиша его заволочанѣ. И прииде вѣсть в Новъгород: «Лука убиенъ бысть», и въсташа чорныи люди на Ондрѣшка, на Федора на посадника Данилова, а ркуци, яко тѣ заслаша на Луку убити; и пограбиша ихъ домы и села. А Федоръ и Ондрѣшко побѣгоша в Копорью в городокъ, и тамо сѣдѣша зиму всю и до великого говѣниа. И в то время прииха Онцифоръ, би чоломъ Новуграду на Федора и на Ондрѣшка: «тѣ заслаша моего отца убити»; и владыка и Новгород послаша анхимандрита Есифа с бояры в Копорью по Федора и по Ондрѣшка, и онѣ приихаша и ркоша: «не думалѣ есме /л.211.об./ на брата своего на Луку, что его убити, ни засылати на его». И Онцифоръ с Матфѣемъ созвони вѣце у святѣи Софѣи, а Федоръ и Ондрѣшко другое созвониша на Ярославли дворѣ. И посла Онцифоръ с Матфѣемъ владыку на вѣце и, не дождавше владыцѣ с того вѣца, и удариша на Ярослаль дворъ, и яша ту Матфѣя Козку и сына его Игната, и всадиша въ церковъ, а Онцифоръ убѣжа съ своими пособникы; то же бысть в утрѣ, а по обѣдѣ доспѣша всь город, сия Вперёдсобѣ, а сиа собѣ; и владыка Василии с намѣстником Борисом доконцаша миръ межи ими; и възвеличанъ бысть крестъ, а диаволъ посрамленъ бысть.
В лѣто 6851 [1343]. Поидоша плесковици въ воину съ княземъ Остафьемь, въ 5 тысящь, к городу къ Медвѣжьи головѣ, в Нѣмечькую землю, и воеваша плесковици 8 днии, 8 ноцѣи; и бысть на озерѣ на Острѣчнѣ, на Сшествие святого духа, надгониша Нѣмци и поставиша полкъ противъ плесковиць, а пьсковици собѣ сташа; и бысть побоище велико. Богъ пособи князю Остафью с мужи плесковици, убиша у них князя, и велневиць много побиша и Нѣмець побиша; и пьсковиць убиша, поса/л.212./дника Кормана Кюра, Олуферья и иных бояръ. Покои, господи, душю их съ святыми. А Данила, посадникъ пьсковьскыи, обрѣзавъ брони на собѣ, и побѣже. Того же лѣта митрополит Фегнастъ Гричинъ ходи въ Орду к цесарю к поганому к Женьбѣку, и обадиша его Калантаи къ цесареви, ограбиша его, а самого яша и измучиша, а ркущи: «даваи дань полѣтнюю»; онъ ся в то не да, и положи посула 6 сот рублевь и выиде на Русь здравъ. Того же лѣта мѣсяца августа въ 8 день, на память святого отца Емельяна, коньцана бысть церкви каменая на Городищи святое Благовѣщение архиепископомъ новгородчкымъ Васильемь; а священа бысть того же мѣсяца въ, на память святого мученика Евтихия. А даи, госпоже, ему здѣ много лѣт жити в семь вѣцѣ, а въ ономъ, госпоже, постави одесную себе, иже много трудися о церкви твоеи.
В лѣто 6852 [1344]. Бысть мятежь за Наровою великъ: избиша Чюдь своихъ бояръ земьскых, и въ Колываньскои земли и в Ругодивьскои волости, 300 их; потом Вперёдних велневицѣ съ юрьевци и избиша Чюди 14000, а избытокъ убѣжа в Островьскую землю; тамо по них ходиша велневици въ Островьскую землю, их же не взяша, но сами биты /л.212об./ отъидоша.
В лѣто 6853 [1345]. Заложи владыка Василии святу Пятницю, что порушилася в великыи пожаръ, повелѣниемь раба божиа Андрѣя, сына тысячкого, и Павла Петриловица. Того же дни заложи владыка Василии церковь святую Кузмо и Дамиана, повелѣниемъ раба божиа Онаньи Куритскаго, на Кузмодемьяни улици, на другои недѣли по велицѣ дни. Того же лѣта поновлена бысть церкви святыи Георгии, покровенъ бысть новым свинцомъ, при великомъ князи Семеонѣ Ивановичѣ, промысломъ божиимъ и поспѣшениемъ святого мученика христова Георгиа, замышлениемъ архимандрита Есифа. Того же лѣта свершена бысть церки святая Пятница, на память святого отца Семеона столпъника.
Того же лѣта свершена бысть церкви святыи Козма и Дамианъ, на память святых Козмо и Дамиана, в осенинѣ. Того же лѣта въста угъ вѣтръ съ снѣгомъ и внесе лед въ Волхово, и выдра 7 городень, на память святого архистратига Михаила, о обѣднѣи, толко успѣлъ посадникъ переити со всѣмъ вѣцемъ на Торговую сторону. Тогда отъяша посадничьство от Остафья Дворянинца и даша посадничьство Матфѣю Валъфромѣевичю; божиею благодатью не бысть междю /л.213./ ими лиха. Того же лѣта створися в Литвѣ замятня велика: изгони город Вилно Алгердъ с братом Кестутиемъ, и князь великыи Евнутии перевержеся чресь стѣну и бѣжа въ Смолнескъ, а Наримонтъ бѣжа в Орду къ цесарю. Прибѣжа князь Евнутии въ Смолнескъ, побывъ ту мало, и поиха к великому князю Семеону на Москву, и ту его крести князь Семеонъ въ имя Отца и Сына и святого Духа, и наречено бысть имя ему Иоанъ.
В лѣто 6854 [1346]. Поиха владыка Василии на Москву къ князю и к митрополиту зватъ князя великаго в Новъгород, и тамо митрополит Фегнастъ благослови архиепископа новгородчкого Василья и дасть ему ризы хрестьцаты. Тои же зимы прииха князь Семеонъ в Новъгород на столъ, на Федоровѣ недѣли, на Зборъ, сѣде на столѣ своем, правнукъ храбраго князя Александра; побывъ 3 недѣли в Новѣгородѣ, и поѣха на Низъ о цесаревѣ орудьи. Того же лѣта прииха князь Литовьскыи Олгердъ съ своею братьею съ князи и со всею Литовьскою землего, и ста в Шелонѣ, на усть Пшаги рѣкы, а позывая новгородцовъ: «хочю с вами видѣтися; лаялъ ми посадникъ вашь Остафеи Дворяниць, назвал мя псомъ». /л.213об./ И взя Шелону и Лугу на щитъ, а с Порховьского городка и съ Опоки взя окупъ; а новгородци выихаша противу ему в Лугу и, въспятившеся въ город, позвониша вѣче и убиша Дворяниньца посадника на вѣцѣ, а ркуще, яко «в тобѣ волость нашю взяша».
В лѣто 6855 [1347]. Погорѣ Славно от Сменова двора от Бѣсъкова по Нутнои улици.
В лѣто 6856 [1348]. Магнушь, король Свѣйскыи, прислалъ к новгородцом, рекъ: «пошлите на съѣздъ свои философы, а язъ пошлю свои философы, дажь поговорят про вѣру, увѣдают, чья будет вѣра лучыли: аще ваша будет вѣра лучьши, язъ иду в вашю вѣру; аще ли будет наша вѣра лучши, вы пойдите в мою вѣру, и будем всѣ за одинъ человѣкъ; или не поидете в одиначьство, язъ хощю ити на вас со всею моею силою». Владыка же Василии и посадникъ Федоръ Данилович и тысячкыи Аврамъ и вси новгородци, погадавше, отвѣчаша Магънушю: «аще хощеши увѣдати, коя вѣра лучши, наша ли или ваша, пошли къ Цесарьскому граду к патриарху, занеже мы прияли от Гричь правовѣръную вѣру, а с тобою не спираемся про вѣру; а коя будет обида межи нами, а о томъ шлем к тобѣ на съѣздъ». И посла/л.214./ша новгородци к Магнушю Авраама тысячкого, Кузму Твердиславля и иных бояръ. Аврам же со своими другы прииха в Ориховець и хотѣ поихати к Магнушю, а Магнушь тогда былъ в Березовомъ островѣ со всею своею силою. Орѣховци же биша челомъ Аврааму, чтобы не ѣхалъ от них из городка; и поиха к Магнушю Кузма Твердиславль с другы. Магнушь же отвѣчаль Кузмѣ: «обиди ми с вами нитут ни коеи, поидите в мою вѣру; а не поидете, иду на васъ со всею моею силою»; и отпусти Кузму с другы. Доихавше же Орѣховца, затворишася в городки вси, а Магнушь приступилъ къ городку ратью со всею своею силою; а Ижеру почалъ крестити въ свою вѣру, а которыи не крестятся, а на тых рать пустилъ. Слышавши же новгородци се, что король отпустилъ рать на Ижеру, послаша противу их Онцифора Лукиница, Якова Хотова, Михаилу Фефилатова, с малою дружиною; молитвами же святыя богородица и святыа Софѣя пособиемъ и святою мученику Бориса и Глѣба помощью, богъ пособи Онцифору: избиша Нѣмцовъ 500, а иныхъ живых изимаша, а перевѣтниковъ казниша; и приихаша новгородци вси здрави, развѣ 3 человѣкы убиша новгородцовъ /л.214об./. Посадникъ же Федоръ Данилович и намѣстьници князя великаго и вси новгородци и плесковиць немного и новоторжьци и вся волость Новгородская поихаша в Ладогу, а ко князю Семеону Ивановичю послаша послы, ркуще: «поиди, господине, к нам оборонять своея отчины; идеть на нас король свѣискыи на крестъномъ цѣловании». Князь же великыи Семеонъ отвѣт дал новгородцом: «радъ, поѣду к вам». Медливъ же князь долго, поиха в Новъгород; отъихавши от Торжьку до Ситна, и поиха взадъ на Москву, а в Новъгород посла брата своего Ивана. Князь же Иванъ прииха в Новъгород, и не поиха к новгородцомъ в Ладогу. А в то время Магнушь король взя Орѣховець на Спасовъ день; Авраама же и Кузму и иных бояръ 8 взялъ к собѣ, а иных эсѣх пустилъ из городка, а самъ поиде от городка прочь, а в Орѣховцѣ оставивъ рать. Князь же Иванъ, слышавъ яко взят бысть Орѣховиць от Нѣмцовъ, поиха из Новагорода взадъ, не принявъ владычня благословлениа и новгородчкого челобитья. Новгородци же поихаша из Ладоги и сташа у Ворѣховца. В то же время нощи загорися на Волосовѣ улицѣ, на преставление Иоанна Богослова, и пого/л.215./рѣ улица Волосова не вся, Дыбрыня улица не вся же, а Пруская улица добрѣ горѣ, и церковъ святая Богородица огорѣ, Чюдинцева улица и до поля, и Людгоща, церквии древяных сгорѣ 4; а пръвѣе того, тои же осенѣ, загорѣся Фларевь на Люгощи улици, и сгори церковъ одина въ обѣдъ год. Того же лѣта боголюбивыи архиепископъ новгородчкыи Василии повелѣ подписати церковь святого Въскресения на Деревяницѣ, и концаша на зачатие Ивана Крестителя. Тои же осенѣ сташа новгородци под Орѣховымъ, въ госпожино говѣнье, и стояша до великаго заговѣнья и приступиша к городу с приметомъ в понедѣльник чистои недѣли; милостью божьею и святѣи Софѣи заступлениемъ, молитвами пресвятыя владычиця богородица нашея, силою креста честнаго, на нь же уповаша, и святою мученику христову Бориса и Глѣба помощью, свитающу о вторнику, взяша город, на память святыя 15 и честныя главы обрѣтение Иоанна 6 Предтеча, а Нѣмець исѣкоша, а иных живыхъ изымаша, а братью свою новгородцовъ посадиша, Якова Хотова, Олександра Борисовича, въ Орѣховомъ.
В лѣто 6857 [1349]. Прииде король краковьскыи со многою силою, и взяша лестью землю /л.215об./ Волыньскую и много зло крестианомъ створиша, а церкви святыя претвориша на латыньское богумерзъское служение.
В лѣто 6858 [1350]. Ходиша новгородци воевать на Нѣмечкую землю, с Борисовым сыномъ с намѣстьницимъ, с тысячкымъ съ Иваном с Федоровицем, с воеводами съ Михаиломъ с Даниловичемь, съ Юрьем съ Ивановичемъ, съ Яковомъ с Хотовым, и приидоша къ городу к Выбору в понедѣлник мѣсяца марта въ 21 день, и пожгоша посадъ всь. На другыи же день выидоша Нѣмци из города, и удариша на нихъ новгородци, и побѣгоша Нѣмци в город, и убиша ту нѣсколко Нѣмець, и волость около города воеваша и пожьгоша, а Нѣмець иссѣкоша много, и жонъ и дѣтии, а иных живых изимаша; и приихаша в Новъград вси здрави. Того же лѣта ходиша новгородци въ Юрьевъ, и розмѣнишася Нѣмци, что поималѣ въ-Рѣховомъ, Свѣю на Аврама и на Кузму и на Олександра и на Ондрѣя и на дружину их, что былѣ за моремъ у Свѣискаго короля у Магнуша; и приихаша в Новъград вси здрави, милостью божиею, силою креста честнаго, на нь же уповаша; а приихаша мѣсяца июня въ 9 день, на память святого мученика Александра. Сего же мѣсяца въ 16 день отъяша посадничь/л.216./ство у Федора Даниловича и даша Онцифору Лукину. Того же лѣта владыка Василии поставилъ полату камену у себе на дворѣ, подлѣ Рожество. Того же лѣта выгониша новгородци из Новагорода Федора посадника и брата его Михаилу и Юрья и Ондрѣяна, а домы их розграбиша, и Прускую улицю всю пограбиша; а Федоръ и Михаило и Юрьи и Ондрѣянъ побѣгоша въ Пьсковъ, мало побывши, поихаша в Копорью.
В лѣто 6859 [1351].
В лѣто 6860 [1352]. Бысть моръ силенъ велми въ Плесковѣ. Того же лѣта приихаша послове плесковьскыи в Новъгород, зовуще владыку Василья к собѣ, дабы их благословилъ, и владыка услуша молбы их, поиха к нимъ, и, приихавши, благослови их; и идя изо Пьскова в Новъгород, преставися на пути, на рѣцѣ на Узѣ, мѣсяца июля въ 3 день, на память святого мученика Акинфа, вторник въ 9 час дни. Того же лѣта постави владыка Моиси церковь камену въ имя святыя богородица Успение на Волотовѣ. Того же лѣта А пакы с молбою введоша Моисия архиепископа на свои ему столъ къ святѣи Софѣи. Того же лѣта бысть моръ силенъ в Новѣградѣ, прилучися приити на ны, по человѣколюбию божию, праведному суду его; вниде смерть в люди тяжка и напрасна, от госпожина дни почалося нольнѣ и до велика дни, множество бещислено /л.216об./ людии добрых помре тогда. Сице же бысть знамение тоя смерти: хракнеть кровью человѣкъ и до треи день бывъ да умрет. Не токмо же въ едином Новѣградѣ бысть сиа смерть, мню, яко по лицю всея земъля походи; и ему же богъ повелѣ, тъ умре, а его же снабди, сего кажа наказует, да прочее дни о господѣ цѣломудрено и безъгрѣшно поживемъ. Тои же веснѣ преставися Феогнастъ митрополит всея Руси, много поболивъ.
В лѣто 6861 [1353]. Преставися князь великыи Семеонъ Иванович всея Руси, и два сына его. Того же лѣта послаша послы свои архиепископъ новгородчкыи Моиси въ Цесарьгород къ цесарю и к патриарху, прося от них благословения и исправления о неподобных вещех, приходящих с насилиемъ от митрополита. Того же лѣта послаша новгородци свои посол Смена Судокова ко цесарю в Орду, прося великого княжениа Костянтину князю Суздальскому; и не послуша их цесарь и дашеть Ивану князю Ивановичю великое княжение. И пребыша без мира новгородци с великимъ княземъ полтора года, нь зла не бысть никакого же.