Сайт посвященный церковной истории

Святая София и

Великий Новгород

История и

современность

История и современность

Кликни на квадрат справа, чтобы открыть вкладки сайта

Перепечатка в интернете разрешена при условии наличия активной ссылки на сайт " Святая София и Великий Новгород: История и современность".

Служба преподобному Ефрему Перекомскому

НА ВЕЧЕ́РНИ

На Го́споди, воззва́х:стихи́ры глас 5.

Подо́бен: Ра́дуйся:

Преподо́бне о́тче Ефре́ме,/ любо́вию Боже́ственною разжиза́емь,/ оте́чество и род оста́вил еси́/ и, в пусты́ню дости́г/ и та́мо ма́лу хлеви́ну созда́в,/ в ней до́бре подвиза́лся еси́./ Те́мже и по преставле́нии твое́м/ благода́ть от Го́спода прия́л еси́ чуде́с,/ моли́ спасти́ся тебе́ почита́ющим.

Преподо́бне о́тче Ефре́ме,/ любве́ ра́ди учи́теля твоего́,/ вся, я́же на земли́, преоби́дел еси́,/ и, в пусты́ню всели́вся,/ пло́ти по́хотное мудрова́ние умертви́л еси́,/ и по́стническими труды́ твое́ житие́ уясни́л еси́./ Отону́дуже и ученики́ собра́в,/ ревну́ющия твоему́ житию́,/ сих Христу́ приве́л еси́,/ Его́же моли́ спасти́ всех, тебе́ пою́щих.

И́же непра́ведно разбо́йнически/ наше́дших на оби́тель твою́, преподо́бне,/ хотя́щих оскорби́ти ученики́ твоя́,/ ты же от ке́ллии я́ко тех ви́дел еси́,/ то́кмо жезла́ ударе́нием устраши́л еси́./ Отону́дуже, я́ко позна́вше свое́ безчелове́чное суровство́,/ со студо́м бе́гству устреми́шася./ Христу́ моли́ся спасти́ ду́ши на́ша.

Сла́ва, глас 6:

На у́стьи Вере́нды,/ на о́строве водвори́вся, преподо́бне,/ и в пусты́ню безмо́лвия вшед,/ та́мо ке́ллию созда́л еси́,/ в не́йже Небе́сное бога́тство стяжа́л еси́,/ слеза́ми у́бо постя́ся,/ ра́достию пожина́еши плоды́ трудо́в твои́х./ Те́мже оби́тель, ю́же труды́ твои́ми стяжа́л еси́,/ со ученики́ не оста́ви,/ но ми́лостивно посеща́й,/ Христу́, о́тче Ефре́ме, моли́ся спасти́ ду́ши на́ша.

И ны́не, пра́здника.

Вход. Проки́мен дне. И чте́ния три преподо́бническая

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от на́с ше́ствие, сокруше́ние;/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их,/ и я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (гла́вы 5, 6):

Пра́ведницы во ве́ки живу́т,/ и в Го́споде мзда́ их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь, паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, суди́и, конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́/ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На стихо́вне стихи́ры, глас 2

Подо́бен: Доме Евфра́фов:

Я́ко преходя́щую жизнь/ на земли́ презре́в, блаже́нне,/ та́мо сподо́бился еси́ улучи́ти/ жизнь Боже́ственную/ и тоя́ сия́ние прия́л еси́, Богоно́се.

Стих: Честна́ пред Го́сподем/ смерть преподо́бных Его́.

Любве́ ра́ди Христо́вы,/ преподо́бне Ефре́ме,/ пло́ти рачи́тельное умертви́л еси́ мудрова́ние/ и ду́шу, от страсте́й свобо́дну,/ Бо́гу предста́вил еси́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Бо́дренными моли́твами/ и сле́зными исто́чники/ Це́рковь ве́рных/ обогати́л еси́,/ Богоблаже́нне Ефре́ме.

Сла́ва, глас 8:

Мона́хов мно́жества/ наста́вника тя почита́ем, о́тче наш Ефре́ме:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ны́не, пра́здника.

Тропа́рь, глас 4:

От ю́ности твоея́ весь Бо́гови порабо́тился еси́, блаже́нне,/ и Того́ ра́ди любве́ оте́чество и род оста́вил еси́,/ в пусты́ню всели́вся,/ в не́йже жесто́кое житие́ показа́в,/ и чуде́с дарова́ния от Бо́га прия́л еси́,/ Ефре́ме преподо́бне./ Моли́ Христа́ Бо́га, да спасе́т ду́ши на́ша.

НА У́ТРЕНИ

На Бог Госпо́дь:тропа́рь пра́здника, два́жды. Сла́ва,свята́го. И ны́не,пра́здника.

По 1-й стихоло́гии седа́лен, глас 4:

Ю́ность твою́, преподо́бне, воздержа́нием увяди́л еси́,/ стра́сти теле́сныя, я́ко пле́нника ху́да, связа́в, ду́хови повину́л еси́,/ и сего́ ра́ди, о́тче Ефре́ме, Христо́с чудесы́ пресла́вно тебе́ венча́ет,/ еди́н, прославля́яй святы́х Свои́х.

Сла́ва, и ны́не, Богоро́дичен:

Умертви́ся вся кре́пость моя́ от мно́жества безме́рных зол мои́х/ и, мно́гими скорбьми́ одержи́м, уже́ отча́яхся,/ но помози́ ми, Влады́чице, Ефре́ма блаже́ннаго предста́тельством,/ я́ко ра́дость ро́ждшая, пла́чущим утеше́ние.

По 2-й стихоло́гии седа́лен, глас 5.

Подо́бен: Собезнача́льное:

По́стника Госпо́дня пе́сньми почти́м,/ я́ко умертви́вша вся прило́ги страсте́й/ воздержа́нием тве́рдым и кре́пким терпе́нием вои́стинну/ и посрами́вша зе́ло сопроти́внаго всю горды́ню,/ ны́не моля́щася Го́сподеви поми́ловатися душа́м на́шим.

Сла́ва, и ны́не, Богоро́дичен:

Ужа́сно чу́до зача́тия и несказа́нен о́браз рождества́/ в Тебе́ позна́ся, Присноде́во Чи́стая,/ ужаса́ет мой ум и удивля́ет помышле́ние:/ сла́ва Твоя́, Богоро́дице, во всех простре́ся, ко спасе́нию душ на́ших.

По полиеле́и седа́лен, глас 4:

Я́ко со́лнце, возсия́л еси́ заря́ми всему́ ми́ру,/ издале́ча чудесы́ твои́ми, чудотво́рче Ефре́ме,/ светоно́сче блаже́нне, преподо́бных похвало́.

Сла́ва, и ны́не, Богоро́дичен:

В кров Твой, Де́во, вен прибега́юще, вопие́м Ти:/ мольбу́ приими́ от нас и не преста́й моля́щися Человеколю́бцу/ спасти́ся рабо́м Твои́м.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́.Стих: Что́ возда́м Го́сподеви о всех, я́же воздаде́ ми?

Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудов твоих,/ демонския погубил еси́ полки/ и а́нгельский дости́гл еси́ чины,/ и́хже житию́ без поро́ка поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

Кано́н пра́здника на 6 и преподо́бнаго Ефре́ма на 8, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Смири́лся еси́ Христа́ ра́ди, о́тче,/ и, Крест взем, от оте́чества и сро́дник, я́ко от зми́я, бе́гал еси́./ Отону́дуже в пусты́ню вшед,/ в не́йже трудолю́бно подвиза́лся еси́, преподо́бне.

От ю́ности твоея́, о́тче Ефре́ме,/ ум к Бо́гу впери́в,/ тле́нными нетле́нная, я́ко до́брый купе́ц, искупи́л еси́,/ те́мже, ны́не соше́дшеся, па́мять твою́ почита́ем.

Христо́вым раче́нием, о́тче Ефре́ме, па́че огня́ распала́емь,/ настоя́щая, я́ко ничто́же су́щая, презре́л еси́,/ сего́ ра́ди в поко́ища всели́лся еси́, иде́же пра́ведных ду́ши веселя́тся.

Богоро́дичен: Боля́ща исцели́ душе́ю же и те́лом, Влады́чице, раба́ Твоего́,/ блаже́ннаго Ефре́ма моле́нием:/ Тебе́ бо Предста́тельницу вси су́щии в печа́ли стяжа́хом,/ я́ко ро́ждшую спасе́ние на́ше.

Катава́сия пра́здника.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик Себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Сна твои́ма очи́ма не дал еси́, блаже́нне Ефре́ме,/ ни ве́ждома дрема́ния,/ до́ндеже сподо́бился еси́ пра́ведных селе́ния,/ е́же угото́ва Бог, преподо́бне, лю́бящим Его́.

Бо́дренными твои́ми моли́твами, о́тче Ефре́ме,/ и жесто́ким воздержа́нием Го́споду на земли́ до́бре угоди́л еси́,/ сего́ ра́ди стра́шен враго́м и сла́вен челове́ком был еси́.

Ра́йскую жизнь и та́мо святы́х весе́лие всегда́ во уме́ твое́м помина́я, преподо́бне,/ в слеза́х и воздыха́ниих всю твою́ жизнь, о́тче Ефре́ме, проше́л еси́,/ сего́ ра́ди и по сме́рти от Христа́ чудесы́ просла́вился еси́.

Богоро́дичен: Источа́еши исцеле́ний струи́ боля́щим, Де́во, всю́ду:/ Тя бо исто́чник показа́ милосе́рдия, Влады́чице,/ И́же ми́лости Госпо́дь, из Тебе́ рожде́йся па́че ума́.

Седа́лен, пи́сан по 1-й стихоло́гии.

Песнь 4

Ирмо́с: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Житие́ твое́, о́тче Ефре́ме, чу́дно на земли́ показа́л еси́,/ вели́ко поще́ние и смире́ние,/ сего́ ра́ди та́мо вели́чество насле́довав,/ моли́ спасти́ся от бед пою́щим тя.

Се́ргия вели́каго житию́ после́дуя, преподо́бне,/ те́мже того́, ели́ко мо́щно, именова́ние от жития́ стяжа́л еси́,/ Ефре́ме пребога́те.

Посто́м и моли́твами те́ло твое́ изнури́л еси́/ и сего́ ра́ди сподо́бился еси́ ви́дети неизрече́нная блага́я, я́же святы́м угото́вана,/ с ни́миже, о́тче Ефре́ме, о нас моли́ся.

Богоро́дичен: Кров, и заступле́ние, и прибе́жище бу́ди ми, Де́во, рабу́ Твоему́/ и исцели́ мя от безме́рных зол воспева́ти, Пречи́стая:/ сла́ва Рождеству́ Твоему́.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Чи́сто житие́ твое́ от ю́ности потща́лся еси́, преподо́бне, сохрани́ти,/ те́мже, чистоту́ твою́ ви́дев, Пресвяты́й Дух в тя всели́ся.

Я́ко преоби́дев тле́нная, ве́чная, о́тче, сподо́бился еси́ прия́ти/ по нело́жному словеси́: проси́те и прии́мете./ И е́же я́ко проси́л еси́, сия́ по досто́инству прия́л еси́.

Ме́сто, е́же сподо́бися прия́ти честны́я мо́щи твоя́, преподо́бне, освяти́ся,/ и по мно́гим страна́м прославля́емо есть,/ я́ко в себе́ мо́щи твоя́ име́ет.

Богоро́дичен: Не преста́й моля́щи, Его́же родила́ еси́, Богоневе́сто, я́ко Спа́са и Влады́ку,/ разреше́ние пода́ти ско́рбем и боле́знем,/ к ра́дости нетле́нней мя возведи́, проща́я ми согреше́ния.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Твое́ вели́кое жити́е и чистоту́,/ к сим же безме́рное смире́ние прови́дев, Пресвяты́й Дух/ сла́вна тя, о́тче, всем показа́./ Те́мже, от сего́ жития́ ко о́ному ве́ку преше́д,/ полу́чил еси́ с пра́ведными весе́лие.

Днесь начина́ема свяще́нная па́мять твоя́, преподо́бне Ефре́ме, весели́т ученики́ твоя́,/ воспева́ющия любо́вию по́двиги твоя́ и честно́е успе́ние сла́вящия, торжеству́юще,/ и́хже моли́твами твои́ми, о́тче, соблюди́.

Разбо́йницы пе́рвее прише́дше тебе́ оскорби́ти, преподо́бне,/ но ты, тех разуме́в лука́вство, воздви́гнути тем дре́во рекл еси́,/ не могу́щим же мно́гим тебе́ еди́ному проти́витися./ Те́мже, я́ко посра́млени про́чее, со стра́хом отбежа́ша,/ па́че побежде́ни бы́вше, не́жели победи́ша.

Богоро́дичен: Твою́ пода́ждь ми по́мощь/ и изба́ви мя, Влады́чице, от бед и скорбе́й, и прегреше́ний мои́х,/ Я́же всех ро́ждшая избавле́ние.

Конда́к, глас 8

Подо́бен: Взбра́нной:

А́нгельскому житию́ поревнова́в, преподо́бне,/ вся земна́я оста́вив, ко Христу́ прите́кл еси́/ и, Того́ за́поведьми огра́ждся,/ яви́лся еси́ столп непоколеби́м от вра́жиих напа́даний./ Тем зове́м ти:/ ра́дуйся, Ефре́ме, свети́ло пресве́тлое.

И́кос:

И́же в ме́ртвеннем те́ле А́нгельскому уподо́блься житию́ па́че естества́/ и с те́ми на Небесе́х лику́я,/ прииди́те, вси ве́рнии, воспое́м преподо́бнаго Ефре́ма:/ той бо, я́ко уме́ты, вмени́ мирска́я вся кра́сная, я́ко да Небе́сных получи́т,/ вшед на го́ру, я́коже дре́вле Моисе́й и вели́кий Илия́,/ посто́м очи́щся, сподо́бися ви́дети Тро́йческую све́тлость/ не во мра́це, ни в ви́хре, но во све́те благода́ти Бо́жия./ Тем и чуде́с лучи́ испуща́я све́тло/ и ре́ки исцеле́ния источа́я ве́рным от гро́ба, я́ко неду́гов исцели́тель,/ ра́дуйся, о́тче Ефре́ме, свети́ло пресве́тлое.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Источа́ет чудеса́ честна́я ра́ка твоя́, преподо́бне, преизоби́лующи благода́тию,/ ве́рою приходя́щим здра́вие да́рует, Христу́ от души́ вопию́щим:/ благослове́н еси́, Го́споди, Бо́же оте́ц на́ших.

Дре́вним о́нем вели́ким отце́м, в посте́ провозсия́вшим,/ житие́м подо́бяся, преподо́бне, в пусты́ню всели́лся еси́/ и та́мо в поще́ниих многа́ ле́та пребы́л еси́.

Я́ко и́стиннаго и кро́ткаго Пастыренача́льника Христа́/ незло́бивое овча́, о́тче Ефре́ме, был еси́,/ те́мже незло́бив к хотя́щим тебе́ озло́бити был еси́, Христо́ви вопия́:/ Бо́же, благослове́н еси́.

Богоро́дичен: Обощре́ны боле́зни ран мои́х от безме́рных мои́х прегреше́ний, Влады́чице,/ веду́т в смерть душе́вную и теле́сную,/ но исхи́ти, я́ко сильна́, вся́ких скорбе́й и неду́гов.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Из мла́да, преподо́бне о́тче, потща́лся еси́/ твою́ со́весть и се́рдце с душе́ю чи́стою Го́сподеви предста́вити./ Те́мже и Христо́с чудесы́ тебе́ прославля́ет, Тому́ вопию́ща:/ Го́спода воспева́йте, дела́, и превозноси́те Его́ во вся ве́ки.

Ны́не пусты́ня весе́лием, о́тче, красу́ется,/ иму́щи мо́щи твоя́ в себе́, Ефре́ме преподо́бне,/ ученицы́ же твои́, твоему́ житию́ ревну́юще,/ о твое́й па́мяти ра́дующеся, Творцу́ вопию́т:/ Го́спода воспева́йте, дела́, и превозноси́те Его́ во вся ве́ки.

В пусты́ни, преподо́бне, иде́же селе́ние име́л еси́,/ та́мо прече́стен храм в сла́ву Христо́ву воздви́гл еси́,/ в нем прославля́тися пречи́стому Того́ и́мени и всем вопи́ти:/ Го́спода воспева́йте, дела́, и превозноси́те Его́ во вся ве́ки.

Богоро́дичен: Све́щниче Све́та трисо́лнечнаго су́щи,/ заре́ю благоутро́бия Твоего́ тьму отыми́ прегреше́ний мои́х, Богороди́тельнице,/ избавле́ние ну́ждных боле́зней подаю́щи/ ве́рою пою́щему и превознося́щему пречи́стое Твое́ рождество́.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

От пусты́ннаго жития́ к преми́рному и ве́чному житию́ я́ко преше́д, блаже́нне,/ не преста́й моля́ Изба́вителя от разли́чных напа́стей и бед изба́вити/ любо́вию честно́е твое́ успе́ние ны́не пе́сньми сла́вящих.

Певце́в, и́скреннею любо́вию пою́щих/ и ве́рою тебе́ пе́ние хвале́ния принося́щих, преблаже́нне Ефре́ме,/ от вся́ких бед и скорбе́й избавля́й, да тя вси любо́вию велича́ем.

От рук мои́х недосто́йных ма́лое сие́ пе́сненное хвале́ние/ принося́щаго ти с любо́вию, приими́, блаже́нне Ефре́ме:/ не бо возмого́х проти́ву твоего́ вели́чества украси́ти,/ но ма́лое сие́, я́ко вели́ко, приими́,/ да тебе́ всегда́ велича́ем в пе́снех.

Богоро́дичен: Пе́ние с пе́снию и хвале́ние исплете́ное от боле́зненныя души́/ приношу́ с любо́вию Тебе́, ро́ждшей Христа́, естество́м Бо́га,/ е́же благоприя́тно прии́мши, проше́ния моя́, Богоро́дице, испо́лни/ и моли́твами Твои́ми соблюди́.

Свети́лен:

А́нгельскаго жития́ жела́я, удали́л еси́ себе́ в пусты́нях/ и, стра́сти покори́в плотски́я, ра́вен А́нгелом яви́лся еси́,/ о́тче наш Богоно́се Ефре́ме.

Богоро́дичен:

Держа́вным Твои́м покро́вом от враго́в наве́та/ нас, Чи́стая, Твои́х раб, соблюди́ всех невре́дных,/ Тя бо еди́ну и́мамы прибе́жище в ну́ждах.

На хвали́тех стихи́ры на 4, глас 8.

Подо́бен: О, пресла́внаго чудесе́:

Преподо́бне о́тче Ефре́ме,/ ты, и́го Христо́во на ра́мо взем,/ до́блественне наи́тие вра́жие попра́л еси́./ Сего́ ра́ди тя,/ ве́рнии вси, почита́ем,/ о преблаже́нне, мона́шествующих похвало́./ Те́мже Христа́ непреста́нно моли́/ спасти́ ду́ши на́ша.

Ве́рою соше́дшеся вси,/ я́ко по́стника тя Христо́ва почита́ем, Ефре́ме:/ ра́дуяся у́бо, ше́ствовал еси́ в пусты́ню непроходи́мую, му́дре,/ наста́вник был еси́ че́стен./ Те́мже тебе́ мы ве́рою взыва́ем,/ блаже́нне, по́стников похвало́:/ о нас моли́ся ко Го́споду,/ поми́ловатися душа́м на́шим.

Преподо́бне о́тче наш,/ бу́дущия ра́ди жи́зни/ при е́зере на о́строве Переко́ме всели́лся еси́,/ ника́коже боя́ся неви́димых враго́в,/ мно́гажды толца́ния творя́щих к тебе́,/ ты же моли́твами сих без ве́сти твори́л еси́,/ о терпели́вый душе́ю,/ в пу́сте ме́сте, чу́дное овча́,/ Христа́ А́гнца Па́стыря име́я./ Те́мже тя ве́рою вси чтим и ублажа́ем.

Сла́ва, глас то́йже. Самогла́сен:

На Не́бо теку́щую возше́д колесни́цу, чу́дне, доброде́телей,/ дости́гл еси́ кра́йнее житие́ воздержа́нием,/ из пусты́ни смотря́я Вы́шняго

Иерусали́ма красоты́/ и, боле́зненным подвиго́м досто́йно по́чести прие́м,/ с Небе́сными ра́дуешися чинонача́лии, преблаже́нне,/ ве́чных благи́х насле́дник/ и Ца́рствия жи́тель быв./ Моли́ся, преподо́бне Ефре́ме, Спа́су всех/ умири́ти мир и спасти́ ду́ши на́ша.

И ны́не, пра́здника. Славосло́вие вели́кое.

На Литурги́и слу́жба преподо́бническая.