Сайт посвященный церковной истории

Пути

Великого Новгорода

История и

современность

Яндекс.Метрика

Перепечатка в интернете разрешена при условии наличия активной ссылки на сайт " Пути Великого Новгорода: История и современность".

Служба преподобному Антонию Римлянину

 

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: Небе́сных чино́в:

 

Преподо́бных вели́ких отце́в,/ о́тче Анто́ние, стопа́м после́довал еси́/ и, я́ко безпло́тен, во пло́ти подви́гся в труде́х,/ о́браз мно́гим в доброде́телех был еси́,/ отону́дуже и даро́в чудес от Христа́ сподо́бился еси́,/ исцели́ти челове́ков разли́чныя неду́ги./ Моли́ спасти́ся душа́м на́шим.

 

Наста́вник мона́шествующих,/ о́тче Анто́ние, был еси́,/ себе́ пе́рвее без кро́ве Бо́гови же́ртву принося́,/ воздержа́нием, и любому́дрием,/ и смире́ния высо́кими нра́вы,/ и безме́рным лоще́нием врага́ посрами́л еси́, преподо́бне./ Моли́ спасти́ся душа́м на́шим.

 

Светоно́сная твоя́ па́мять,/ преподо́бне о́тче Анто́ние,/ испо́лнена ра́дости и весе́лия яви́ся,/ отону́дуже свяще́нная ча́да твоя́, соше́дшеся,/ па́мять твою́ духо́вно пра́зднующе,/ прославля́ем Го́спода, тебе́ та́ко просла́вльшаго.

 

Сла́ва, глас 8:

 

Днесь Вели́кий Но́вград,/ я́ко но́ваго Авраа́ма,/ пресе́льника тя пресла́вно, о́тче, прие́м, ра́дуется,/ блаже́нна же оби́тель,/ иму́щи мо́щи твоя́ в себе́, зело́ весели́тся:/ от Ри́ма бо на ка́мени по вода́м прише́л еси́ в Вели́кий Но́вград./ Тем, па́мять твою́ торжеству́юще,/ воспева́ют Бо́га,/ тебе́ дарова́вшаго сте́ну сим неразори́му,/ мы же, ча́да твоя́,/ твои́м повеле́нием наставля́еми,/ ны́не пресла́вное твое́ успе́ние пра́зднующе,/ мо́лимся спасти́ся душа́м на́шим.

 

И ны́не, Богоро́дичен.

 

На стихо́вне стихи́ры, глас 2.

Подо́бен: До́ме Евфра́фов:

 

От земны́х к Небе́сным оби́телем пресла́вно,/ о́тче, преше́л еси́/ и та́мо пра́ведных че́сти сподо́бился еси́,/ с ни́миже моли́ся/ спасти́ся душа́м на́шим.

 

Стих: Честна́ пред Го́сподем/ смерть преподо́бных Его.

 

Теле́сная чу́вства воздержа́нием, о́тче, умертви́л еси́,/ тем и на ка́мени по вода́м ше́ствие творя́,/ Вели́каго Нова́гра́да дости́гл еси́,/ и оби́тель в нем сотвори́л еси́,/ и учени́к мно́жества Христу́ приве́л еси́.

 

Стих: Блаже́н муж, боя́йся Го́спода,/ в за́поведех Его́ восхо́щет зело́.

 

Ста́до твое́,/ тебе́ почита́ющих, преподо́бне,/ и твое́ успе́ние пра́зднующих,/ на Боже́ственное тех возвыша́я раче́ние,/ в Боже́ственную жизнь всели́.

 

Сла́ва, и ны́не, глас то́йже. Самогла́сен:

 

Храм прече́стен Бо́жии Ма́тери,/ я́коже Сама́ восхоте́, воздви́гл еси́/ и та́мо мно́жества учени́к собра́л еси́,/ в нем воспева́ти Влады́чицу Богоро́дицу./ Е́йже моли́ся, мо́лимся, преподо́бне Анто́ние,/ не оста́вити нас, си́рых,/ я́коже обе́щался еси́,/ свяще́нное твое́ ста́до избавля́ти от се́тей вра́жиих,/ да Тебе́ вси, я́ко чадолюби́ва отца́,/ пе́сньми непреста́нно почита́ем,/ прося́ще от Христа́ Бо́га прия́ти тобо́ю ве́лию ми́лость.

 

Тропа́рь пи́сан на вели́цей вече́рни.

 

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 6.

 

Подо́бен: Всю отложи́вше:

 

Мирски́я молвы́, преподо́бне, возненави́дев,/ Христа́ еди́наго возлюби́л еси́/ и, того́ Крест на ра́мо взем, поне́сл еси́,/ Боже́ственно вооружи́вся,/ зми́я вселука́ваго сле́зными ту́чами потопи́л еси́./ Плотски́я стра́сти воздержа́нием, му́дре, ми́мо текл еси́,/ терпе́нием же, и посто́м, и ча́стыми моли́твами/ плоть твою́ ду́ху покори́л еси́./ Безстра́стием души́ и ума чистото́ю/ по́двиг трудо́в твои́х от Него́ стяжа́л еси́./ Те́мже, пра́зднующе па́мять твою́, мо́лим тя:/ моли́ся Го́сподеви поми́ловатися душа́м на́шим.

 

Преподо́бне о́тче Анто́ние,/ любве́ ра́ди Христо́вы/ вся, я́же на земли́, оста́вил еси́./ По́стническими труды́ твое́ житие́ уясни́л еси́./ Воздержа́нием и слеза́ми душе́вное о́ко очи́стил еси́./ Ум твой безстра́стием просвети́л еси́/ и Боже́ственным смире́нием украси́л еси́./ Собра́л еси́ мона́шествующих мно́жества/ и уче́нии твои́ми, я́ко не́коею ле́ствицею восхо́дною на Не́бо,/ на высоту́ доброде́телей возве́л еси́./ Те́мже ны́не, ча́да твоя́,/ о́крест ра́ки твоея́ предстоя́ще,/ любе́зно вопие́м ти:/ моли́ся Го́сподеви, преблаже́нне,/ поми́ловатися душа́м на́шим.

 

Богому́дре о́тче Анто́ние,/ ди́вно от Ри́ма возсия́л еси́, я́ко со́лнце,/ и Бо́жиим манове́нием на ка́мени по вода́м, я́ко безпло́тен,/ Вели́каго Нова́града дости́гл еси́,/ храм прече́стен Ма́тери воздви́гл еси́,/ и учени́к мно́жества собра́л еси́/ в нем воспева́ти Влады́чицу Богоро́дицу,/ и оби́тель ве́лию созда́л еси́,/ в не́йже трудолю́бно подвиза́лся еси́,/ посто́м, и бде́нием, и злострада́нием,/ и е́же на земли́ лега́нием,/ чистоту́ име́я душе́вную и теле́сную/ и па́мять сме́ртную, преподо́бне о́тче наш./ Моли́ спасти́ся душа́м на́шим.

 

Сла́ва, глас 8:

 

Прииди́те, мона́хов мно́жества,/ днесь псало́мская пе́ния и цве́ты духо́вныя принесе́м,/ я́ко вои́стинну мона́хов удобре́нию/ и преподо́бным спожи́телю,/ хва́ляще, си́це рцем:/ ра́дуйся, свети́льниче многосве́тлый,/ возводя́ ко Христу́ мона́хов мно́жества,/ ра́дуйся, Вели́каго Нова́града похвала́ и утвержде́ние,/ и всех ве́рных благоути́шное приста́нище,/ и очище́ние боля́щих во гресе́х,/ на Боже́ственное тех возвыша́я раче́ние./ Те́мже, пречестну́ю твою́ и святу́ю/ и А́нгелом гове́йную обстоя́ще ра́ку,/ любе́зно облобыза́ем,/ преподо́бне о́тче наш Анто́ние,/ Боже́ственнаго человеколю́бия получи́ти/ твои́ми к Бо́гу моли́твами,/ и ми́ру мир испроси́/ и душа́м на́шим ве́лию ми́лость.

 

И ны́не, Богоро́дичен: Царь Небе́сный:

 

Та́же вход. Проки́мен дне. Чте́ния три.

 

Прему́дрости Соломо́ни чте́ние (главы 5 и 6):

 

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ десни́цею покры́ет я́ и мы́шцею защити́т их./ Прии́мет всеору́жие – рве́ние свое́/ и вооружи́т тварь в месть враго́м./ Облече́тся в броня́ пра́вды и возложи́т шлем – суд нелицеме́рен./ Прии́мет щит непобеди́мый – преподо́бне./ Поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка, облако́в на наме́рение по́летя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же пото́пят я́ на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества и гордя́щимся о наро́дех язык,/ я́ко дана́ есть от Го́спода держа́ва вам/ и си́ла от Вы́шняго.

 

Прему́дрости Соломо́ни чте́ние (глава́ 3):

 

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние, они же суть в ми́ре./ Ибо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле наказа́ни бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют,/ и, я́ко и́скры по сте́блию, потеку́т./ Су́дят язы́ком и облада́ют людьми́, и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных его́/ и посеще́ние во избра́нных его́.

 

Прему́дрости Соломо́ни чте́ние (глава́ 4):

 

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть,/ восхище́н бысть, да не зло́ба измени́т ра́зума его́/ или лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных его́/ и посеще́ние во избра́нных его́.

 

На лити́и стихи́ры, глас 6:

 

Возсия́ днесь пресве́тлая и всепра́зднственная па́мять твоя́,/ преподо́бне Анто́ние,/ созыва́ющи многочи́сленное по́стник сосло́вие/ и преподо́бных ликостоя́ния,/ А́нгелы с челове́ки, я́ко вои́стинну/ к похвале́нию в Тро́ице покланя́емаго Бо́га на́шего./ сего́ ра́ди ве́рою притека́юще к честне́й ра́це моще́й твои́х,/ исцеле́ния оби́льна прие́млем,/ те́мже мо́лим тя:/ душе́вное нам здра́вие при́сно подава́й,/ Тебе́ ве́рно ублажа́ющим.

 

Днесь похва́льную песнь в па́мяти твое́й,/ о́тче, Тебе́ прино́сим,/ приими́, и предвари́ к Бо́гу моли́твами твои́ми,/ и изба́ви нас от шу́яго стоя́ния,/ и десна́го предстоя́ния сподо́би,/ да тя вси, я́ко те́пла засту́пника, досто́йно ублажа́ем,/ о́тче преподо́бне Анто́ние.

 

Днесь Вели́кий Но́вград,/ я́ко но́ваго Авраа́ма пресе́льника,/ тя пресла́вно, о́тче, прие́м, ра́довашеся./ Блаже́нна же и оби́тель, иму́щи в себе́ честны́я мо́щи твоя́,/ отону́дуже истека́ют ве́рным исцеле́ния,/ блаже́ни же ученицы́ твои́,/ и́же себе́ такова́го учи́теля стяжа́вше/ и такова́ отца́ ча́да нареко́шася,/ Анто́ние пречу́дне,/ моли́твенниче о душа́х на́ших.

 

Сла́ва, глас 6:

 

Све́тлая и всепра́зднственная днесь возсия́ нам,/ я́коже второ́е со́лнце,/ всех празднолю́бных собо́ры просвеща́ет/ и тьму отго́нит дре́вняго помраче́ния/ честна́я па́мять Анто́ния чу́днаго,/ Вели́кий Но́вград созыва́ющи/ к честне́й и чудотво́рней его́ ра́це./ Тем, со стра́хом и ра́достию облобыза́юще, мо́лимся,/ я́коже кро́ткому Дави́ду,/ оте́честву на́шему на проти́вныя одоле́ние дарова́ти/ и ми́ра ми́рови испроси́ти/ и душа́м на́шим ве́лию ми́лость.

 

И ны́не: Богоро́дице, Ты еси́ лоза́ и́стинная:

 

На стихо́вне стихи́ры, глас 1, самогла́сны:

 

Преподо́бне о́тче Анто́ние,/ соше́дшеся любо́вию в па́мять твою́/ ко всечестне́й твое́й и чудотво́рней ра́це,/ све́тло торжеству́юще, во гла́сех пе́сненных пою́ще,/ дави́дски глаго́лем:/ блаже́н муж, боя́йся Го́спода,/ непоро́чно бо в путе́х Госпо́дних ходи́л еси́./ Те́мже с преподо́бными водворя́яся,/ Го́сподеви моли́ся поми́ловатися душа́м на́шим.

 

Стих: Честна́ пред Го́сподем/ смерть преподо́бных его́.

 

Днесь в па́мять соше́дшеся, бра́тие,/ духо́вно почти́м честна́го отца́ на́шего Анто́ния,/ и́же посто́м те́ло свое́ изнури́в,/ воздержа́нием же стра́сти охуди́в/ и бде́нием ум очи́стив,/ моли́твою же ду́шу просвети́в,/ нището́ю на Небесе́х сокро́вище себе́ некра́домо стяжа́:/ послуша́нием Бо́га благопослушли́ва име́,/ чистото́ю жили́ще Пресвята́го Ду́ха быв./ Его́же ра́ди враго́в шата́ния Христо́с низложи́,/ и́же и да́рует нам мир и ве́лию ми́лость.

 

Стих: Блаже́н муж, боя́йся Го́спода,/ в за́поведех его́ восхо́щет зело.

 

Преподо́бне и Богоблаже́нне о́тче наш Анто́ние,/ благода́тию Свята́го Ду́ха ум твой озари́в,/ от Него́же пресве́тлыми заря́ми се́рдце твое́ просвети́в,/ светови́ден весь вои́стинну был еси́,/ искуси́теля же вся́чески победи́л еси́,/ Те́мже ны́не на Небесе́х лику́еши со А́нгелы/ и со все́ми святы́ми./ Поминай нас, всегда́ блажа́щих тя на земли́/ и пресвято́е твое́ успе́ние почита́ющих.

 

Сла́ва, глас 8:

 

Мона́хов мно́жества/ наста́вника тя почита́ем, о́тче наш Анто́ние:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

 

И ны́не, Богоро́дичен.

 

Тропа́рь, глас 4:

 

Ве́тхий Рим, оте́чество твое́, оста́вив,/ на ка́мень, я́ко на ле́гкий кора́бль, возше́л еси́/ и на нем па́че естества́, а́ки безпло́тен, по вода́м ше́ствовал еси́,/ промышле́нием Боже́ственнаго ра́зума направля́емь,/ Вели́каго Нова́града дости́гл еси́/ и, оби́тель в нем сотвори́в,/ те́ло твое́ в ней предложи́л еси́, я́ко дар освяще́н./ Тем мо́лим тя, о́тче Анто́ние:/ моли́ Христа́ Бо́га, да спасе́т ду́ши на́ша.

 

Сла́ва, и ны́не, Богоро́дичен: Еже от ве́ка утае́ное:

 

НА У́ТРЕНИ

На Бог Госпо́дь: тропа́рь, два́жды. Сла́ва, и ны́не, Богоро́дичен.

 

По 1-й стихоло́гии седа́лен, глас 1.

 

Подо́бен: Ка́мени запеча́тану:

 

Мона́шеское житие́ измла́да, преподо́бне, возлюби́в,/ и Христу́ от души́ после́довав, Богому́дре Анто́ние,/ и отсю́ду просия́в доброде́тельным твои́м житие́м,/ в моли́твах, и поще́ниих, и бде́ниих мона́хов о́браз был еси́ вели́кий./ Те́мже вопие́м ти:/ сла́ва Да́вшему́ ти кре́пость,/ сла́ва Венча́вшему́ тя,/ сла́ва Даю́щему́ тобо́ю всем исцеле́ние.

 

Сла́ва, и ны́не, Богоро́дичен:

 

Упова́ние христиа́н, Пресвята́я Де́во,/ Его́же роди́ла еси́, Бо́га, па́че ума́ же и сло́ва,/ непреста́нно моли́ с Вы́шними си́лами/ пода́ти оставле́ние грехо́в на́ших всех и исправление жития́/ ве́рою и любо́вию при́сно Тя славящим.

 

По 2-й стихоло́гии седа́лен, глас 8.

 

Подо́бен: Прему́дрости:

 

От земны́х на Небе́сная помы́слив,/ и делом соверши́л еси́ ко Го́споду любо́вь,/ подо́бяся мо́лнии, от восто́ка до за́пада преходя́,/ я́коже други́й Авваку́м несе́н бысть А́нгелом с пи́щею в Вавило́н./ Ты же Боже́ственнаго про́мысла А́нгелом на ка́мени, я́ко на корабли́,/ Вели́каго Нова́града дости́г, и храм пречу́ден Бо́жия Ма́тере созда́л еси́,/ и оби́тель ве́лию воздви́гл еси́ в сла́ву Христа́ Бо́га,/ и мона́хов мно́жества собра́л еси́./ Но егда́ был еси́ в жи́зни, пе́клся и́ми, я́ко при́сный оте́ц,/ та́ко и ны́не, о́тче преподо́бне Анто́ние,/ моли́ Христа́ Бо́га согреше́ний оставле́ние дарова́ти/ пра́зднующим любо́вию святу́ю па́мять твою́.

 

Сла́ва, и ны́не, Богоро́дичен:

 

Небе́сную дверь и киво́т, пресвяту́ю го́ру, све́тлый о́блак воспои́м,/ неопали́мую купину́, слове́сный рай, Е́вы воззва́ние,/ вселе́нныя всея́ ́вели́кое сокровище,/ я́ко спасе́ние в Ней соде́лася ми́рови и оставле́ние дре́вних согреше́ний./ сего́ ра́ди вопие́м Ей:/ моли́ся Сы́ну Твоему́, прегреше́ний оставле́ние дарова́ти/ благоче́стно покланя́ющимся всесвято́му рождеству́ Твоему́.

 

По полиеле́и седа́лен, глас 4:

 

Вели́кий Но́вград торжеству́ет о Бо́зе досто́йно в па́мять твою́, о́тче Анто́ние,/ моли́твами твои́ми спаса́еми от искуше́ний, и бед,/ и вся́каго преще́ния, находя́щаго на ны./ И па́ки, преподо́бне, не преста́й моля́ся Христу́ Бо́гу спасти́ся душа́м на́шим.

 

Сла́ва, и ны́не, Богоро́дичен:

 

Мно́гими прегреше́ньми аз, блу́дный, ум помрачи́в,/ вопию́ Твоему́ кре́пкому заступле́нию, Богоро́дице:/ просвети́ души́ мое́й зе́ницы, возсия́й ми покая́ния све́тлую зарю́/ и облецы́ мя во ору́жие све́та, Де́во Богороди́тельнице Чи́стая.

 

Та́же степе́нна, 1-й антифо́н 4-го гласа. Проки́мен, глас 4: Честна́ пред Го́сподем/ смерть преподо́бных его́: Стих: Блаже́н муж, боя́йся Го́спода: Ева́нгелие преподо́бническое.

 

По 50-м псалме́ стихи́ра, глас 6:

 

Преподо́бне о́тче Анто́ние,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ без поро́ка поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

 

Кано́н Пресвяты́я Богоро́дицы, на 6, глас 2: Нетре́ну, необы́чну: И преподо́бнаго кано́н, на 8, глас 2.

 

Песнь 1

 

Ирмо́с: Грядите, лю́дие,/ пои́м песнь Христу́ Бо́гу,/ разде́льшему мо́ре и наста́вльшему люди,/ я́же изведе́ из рабо́ты еги́петския,/ я́ко просла́вися.

 

А́гнче незло́бивый, отве́рзи ми устне́ недосто́йнии,/ язы́к мой уясни́, и се́рдце мое́ просвети́,/ и ум мой озари́ све́том Твоего́ Богоразу́мия,/ да возмогу́ воспева́ти па́мять преподо́бнаго Анто́ния,/ его́же на земли́ удиви́л еси́.

 

Мно́гим милосе́рдием и щедро́тами,/ Соде́телю тва́ри и веко́в Тво́рче, моле́бное пе́ние приими́,/ и проще́ние на́ших согреше́ний да́руй/ Твоего́ уго́дника преподо́бнаго Анто́ния моле́нием,/ и тишину́ се́рдцу моему́.

 

Све́тлое и богоуго́дное житие́ твое́, я́ко свет, вои́стинну на земли́ пока́зася,/ Боже́ственную бо ви́дети све́тлость, Анто́ние, сподо́бился еси́./ Те́мже и, ви́димая вся оста́вив, Непостижи́маго зре́ти сподо́бился еси́.

 

Богоро́дичен: Мои́х прегреше́ний, Влады́чице, плени́цу расто́ргни,/ Твоего́ Сы́на и Го́спода моля́щи,/ и томя́щий мя грех, Присноде́во, низложи́,/ я́ко да воспева́ю Тя всегда́, Всенепоро́чная, Тобо́ю спаса́емь.

 

Песнь 3

 

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

 

Жезло́м доброде́телей стра́стное мо́ре пресе́к/ и го́рдаго врага́, я́коже друга́го фарао́на, моли́твою твое́ю погрузи́в,/ избра́нное твое́ ста́до но́ваго Изра́иля невре́дно соблюди́, Анто́ние преподо́бне.

 

Возлюби́л еси́, блаже́нне, всено́щное бде́ние,/ и моли́тву непреста́нну, и любо́вь нелицеме́рну,/ си́ми очища́я ум твой, ду́шу же просвеща́я, те́ло твое́ смиря́л еси́/ и ко дневны́м трудо́м благопоко́рно устроя́л еси́.

 

Храм тя, вси ве́рнии, Ду́ха Пресвята́го ве́мы,/ храм боголе́пен Бо́жии Ма́тери воздви́гл еси́, и огра́ду ве́лию устро́ил еси́,/ и мона́хов мно́жества совокупи́л еси́,/ в не́мже ны́не всяк неду́г моли́твами твои́ми отгоня́ется.

 

Богоро́дичен: Во ины́х жена́х ма́ти, донде́же де́ва, не позна́ся,/ ни ма́ти по рождестве́ де́вствовати сподо́бися,/ на Тебе́ же, Девома́ти, обоя́ устро́ишася./ Тем весе́лием ду́ха воспева́ю:/ несть непоро́чны, па́че Тебе́, Влады́чице.

 

Ин Конда́к, глас 2:

 

Я́ко звезда́, возсия́л еси́ от Ри́ма,/ и, доше́д Богоспаса́емаго Вели́каго Нова́града,/ ту в нем оби́тель сотвори́л еси́,/ и, це́рковь поста́вив,/ созва́ и́нок мно́жество./ С ни́миже моли́ о нас, чту́щих па́мять твою́, да зове́м ти:/ ра́дуйся, преподо́бне о́тче Анто́ние.

 

Седа́лен, глас 8.

 

Подо́бен: Прему́дрости:

 

А́нгельски на земли́ пожи́в, Богому́дре Анто́ние,/ ли́ком по́стническим счи́слился еси́:/ Крест бо на ра́мена твоя́ взем, после́довал еси́ Влады́це Христу́,/ и стра́сти душетле́нныя воздержа́нием, преподо́бне, увяди́л еси́,/ и был еси́ духо́вно прия́телище и сосу́д чи́ст Го́сподеви./ Те́мже вопие́м ти:/ моли́ Христа́ Бо́га грехо́в оставле́ние дарова́ти/ пра́зднующим любо́вию пречестну́ю и святу́ю па́мять твою́.

 

Сла́ва, и ны́не, Богоро́дичен:

 

Я́ко Всенепоро́чная Неве́ста Творцу́,/ я́ко Неискусобра́чная Ма́ти Изба́вителя,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище и бесо́м игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная Нетле́нная,/ отжени́ о́блак страсте́й и вы́шняго прича́стия сподо́би/ и све́та невече́рняго моли́твами Твои́ми.

 

Песнь 4

 

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

 

Умертви́в себе́ ми́рови, жизнь равноа́нгельну на земли́ пожи́л еси́, пресла́вне,/ и, я́ко дар освяще́н, Влады́це, Анто́ние, твою́ ду́шу чи́сту предста́вил еси́,/ и Боже́ственнаго Ца́рствия досто́йно, о́тче, получи́л еси́.

 

Ве́трилом, о́тче, воздержа́ния окриля́емь, стра́стныя тьмы отбежа́в/ и к безстра́стия путе́м наставля́емь, к Све́ту невече́рнему́ восте́кл еси́/ и, от сего́ озари́вся, нетле́ния бога́тство насле́довал еси́, Анто́ние преподо́бне.

 

Вели́кий Но́вград ны́не весе́лием, о́тче, красу́ется,/ име́я мо́щи твоя́ в себе́, преподо́бне Анто́ние,/ ученицы́ же твои́, твоему́ житию́ ревну́юще,/ о твое́й па́мяти ра́дующеся, Го́сподеви пою́т:/ сла́ва си́ле Твое́й, Го́споди.

 

Богоро́дичен: И́стинную Тя сень свиде́тельствоваша многоразли́чными о́бразы,/ я́ве показу́юще воплоще́ннаго из Тебе́ Еди́наго от Тро́ицы, Пречи́стая,/ неизме́нно, Богома́ти Чи́стая, и мир обно́вльша.

 

Песнь 5

 

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́ ино́го Бо́га не зна́ем.

 

Возше́д на высоту́ доброде́телей, до́лу влеку́щия стра́сти оплева́л еси́,/ сла́дость показу́я спасе́ния,/ о́тче преподо́бне Анто́ние, ста́ду твоему́ проси́ грехо́в проще́ния.

 

Место проше́ния, о́тче, со тща́нием исполня́я,/ храм боголе́пен Бо́жия Ма́тере воздви́гл еси́,/ в не́мже ны́не пра́здничною ра́достию мона́хов мно́жества веселя́тся,/ па́мять твою́ прославля́юще.

 

Не забу́ди ста́да твоего́, е́же, му́дре, собра́л еси́/ и в жи́зни сей упасл еси́ благоче́стно,/ и ны́не потщи́ся, о́тче наш Анто́ние, да привлече́ши во огра́ду Небе́сную.

 

Богоро́дичен: Упра́ви ум мой, Влады́чице, тружда́ющийся в пучи́не скорбе́й/ и потопля́емый наше́ствием тлетво́рных страсте́й./ Спаси́ к Тебе́ прибега́ющаго,/ ины́я бо по́мощи, Чи́стая, ра́зве Тебе́, не зна́ем.

 

Песнь 6

 

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

 

От земны́х к Небе́сным оби́телем пресла́вно возше́л еси́, Богому́дре Анто́ние,/ и та́мо зре́ти неизрече́нных сподо́бился еси́,/ и́хже о́ко не ви́де, и у́хо не слы́ша, и на се́рдце челове́ку не взы́де,/ и́же угото́ва Бог лю́бящим его́.

 

Дрема́ния очи́ма твои́ма отню́д не дал еси́, к Бо́гу все твое́ жела́ние впери́в/ и тому́ невозвра́тно от души́ после́довав,/ нощь жития́ непреткнове́нно преми́нул еси́,/ виде́нии Боже́ственными окормля́емь, блаже́нне Анто́ние,/ в Боже́ственную жизнь всели́лся еси́.

 

Вели́каго святи́теля Ники́ты, блаже́нне Анто́ние, благослове́ния сподо́бився,/ духо́внаго нака́зания поуче́ние от него́ восприя́л еси́,/ бу́рею бо греха́ не погрузи́лся еси́, и в ти́хо приста́нище дости́гл еси́ Небе́снаго Ца́рствия,/ и та́мо я́сне наслажда́ешися Боже́ственнаго виде́ния.

 

Богоро́дичен: Обетша́вшия ны го́рьким дре́ва пре́жде вкуше́нием/ и па́дшияся поползе́нием, Пречи́стая, обнови́ла еси́,/ Зижди́теля ро́ждши, Сло́во Ипоста́сное, Де́во Ма́ти Влады́чице.

 

Конда́к, глас 8.

 

Подо́бен: Взбра́нной:

 

Ри́мское воспита́ние, Вели́кому же Нову́гра́ду благода́тное процвете́ние,/ мно́гими бо труды́ и по́двиги в нем Бо́гу угоди́л еси́./ сего́ ра́ди чуде́с дарова́ний от Него́ сподо́бился еси́,/ и те́ло твое́ мно́гими ле́ты соблюде́ нетле́нно./ Мы же, сие́ лобыза́юще, ра́достно от души́ вопие́м ти:/ ра́дуйся, о́тче Анто́ние.

И́кос:

 

Ка́ко возмогу́ исчести́ премно́гая твоя́ чудеса́?/ Или́ ка́ко изрещи́ жесто́кое твое́ житие́?/ Не и́мам бо се́рдца чи́ста, я́ко сие́ сра́мными дея́ньми оскверни́х/ и ду́шу мою́ лука́выми по́мыслы осмради́х./ Но оба́че дерза́ю воспева́ти, а́ще ты ми пода́си сло́во, недосто́йному твоему́ рабу́,/ ты бо земны́й А́нгел и Небе́сный челове́к во пло́ти обре́лся еси́, преподо́бне./ На земли́ бо о тле́нных небре́гл еси́/ и Христу́ от души́ после́довал еси́/ боле́зньми, и труды́, и зе́льным воздержа́нием, и злострада́нием, и на земли́ лега́нием./ Посто́м, и бде́нием, и моли́твами о́браз был еси́ твои́м ученико́м/ и сего́ ра́ди сосу́д чист и оби́тель Ду́ха Пресвята́го яви́лся еси́./ Тем тя чтим, ра́дуйся, о́тче Анто́ние.

 

Песнь 7

 

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

 

От гра́да и оте́че́ства твоего́ пресе́льник был еси́,/ к Бо́гу ру́це простира́я, спасе́ние обре́т;/ вода́м же послужи́вшим Тебе́ Бо́жиим манове́нием, Вели́каго Нова́гра́да дости́гл еси́,/ иде́же бя́ше уго́дно Влады́це./ Ему́же ны́не ра́достно пое́ши:/ благослове́н Бог оте́ц на́ших.

 

Вели́каго Нова́гра́да архиере́я, и христолюби́вых люде́й,/ и мона́хов мно́жества ра́дости испо́лнил еси́ и духо́внаго весе́лия/ твои́м ди́вным и чрезъесте́ственным прехожде́нием:/ на ка́мени бо, я́ко на корабли́, прише́л еси́, Спу́тника, о́тче, Христа́ обре́т./ К Нему́же ны́не ра́достно зове́ши:/ благослове́н Бог оте́ц на́ших.

 

Лику́ют собра́ния мона́шествующих/ и веселя́тся наро́дов мно́жества Вели́каго Нова́гра́да/ в честне́м преставле́нии Анто́ния всеблаже́ннаго,/ моле́бный соверша́юще пра́здник, ра́достно от души́ вопию́т:/ благослове́н Бог оте́ц на́ших.

 

Богоро́дичен: Пещь проо́бразова́шеТвое́ рождество́, Всенепоро́чная:/ о́троки бо не опали́, я́коже ложесна́ Твоя́, огнь непостоя́нный./ Те́мже мо́лим Тя: огня́ ве́чнаго изба́ви рабы́ Твоя́.

 

Песнь 8

 

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела, я́ко Го́спода,/ и превозноси́те во вся ве́ки.

 

Авраа́мский стяжа́в нрав, прему́дре,/ от страны́ Ри́мския пресе́льник был еси́ Вели́каго Нова́гра́да/ и та́мо Бо́га узре́л еси́, обещава́юща Тебе́ воздая́ние бога́тно./ Тем, весели́ся, усе́рдно Христу́ вопие́ши:/ благослови́те, вся дела́, Го́спода и превозноси́те его́ во ве́ки.

 

На земли́ пожи́в, я́ко А́нгел, с пло́тию, я́ко безпло́тен,/ безпло́тныя враги́ под но́ги покори́л еси́,/ чистоту́ стяжа́л еси́ посто́м, и бде́нием, и моли́твами./ Те́мже со А́нгелы на Небесе́х све́тло ликуя, Христу́ вопие́ши:/ благослови́те, вся, Го́спода и превозноси́те его́ во ве́ки.

 

Рим оте́чество твое́ пропове́дует, преподо́бне,/ Вели́кий же Но́вгра́д хва́лится тобо́ю, прие́м от Го́спода сокро́вище некра́домое:/ помо́щника бо вели́каго, блаже́нне Анто́ние, тя восприе́м,/ с ли́ки мона́шескими ны́не весели́тся./ Те́мже, па́мять твою́ пра́зднующе, ра́достно вопие́м:/ благослови́те, вся дела́, Го́спода и превозноси́те его́ во ве́ки.

 

Богоро́дичен: Вели́кому та́инству рождества́ Твоего́ кто не удиви́тся, Богоро́дице?/ Или́ кий язы́к земны́й или́ ум безпло́тных изрещи́ возмо́жет?/ Па́че бо естества́ и смы́сла, Богоро́дице, Зижди́теля роди́ла еси́.

 

Песнь 9

 

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, еди́ному́дренно пе́сньми велича́ем.

 

Всегда́ к ра́це моще́й твои́х приступа́юще, любе́зно целу́ем и от души́ вопие́м:/ о́тче преподо́бне Анто́ние, моли́ся приле́жно Христу́ Бо́гу за град и лю́ди,/ скорбь нашу на ра́дость премени́ти и грехо́в проще́ние испроси́ти,/ да тя непреста́нно велича́ем.

 

Вели́кому Анто́нию тезоимени́т был еси́, блаже́нне Анто́ние,/ и того́ житию́ подража́л еси́, равноа́нгельно во оби́тели Пресвять́ія Богоро́дицы пожи́л еси́,/ те́мже и ра́вну по́честь от Бо́га сподо́бился еси́ прия́ти,/ с ни́мже ны́не на Небесе́х весели́шися./ И нас помина́й, пра́зднующих па́мять твою́,/ да тя непреста́нно велича́ем.

 

Ны́не на Тебе́ чу́до ве́лие ви́дится и у́жаса испо́лнено:/ ка́ко погребе́но вои́стинну мно́го лет соблюде́ся невреди́мо, преподо́бне Анто́ние,/ твое́ многотру́дное те́ло, во гро́бе лежа́щее Бо́жиим мановением?/ Я́коже Сам весть, сла́вящия его́ прославля́ет.

 

Богоро́дичен: Исцели́ла еси́ сокруше́ние, Всенепоро́чная, и ве́тхое страда́ние земны́х,/ Бо́га ро́ждши, Царя́ Христа́, поне́сшаго пло́тию неду́ги на́ша./ Те́мже Тя, вси ро́ди, Де́во Влады́чице, ублажа́юще, Богоневе́сто, велича́ем.

 

Свети́лен.

 

Подо́бен: Со ученики́:

 

Христо́ву ны́не престо́лу предстоя́, преподо́бне,/ с Богома́терию, Пречи́стою Де́вою, моля́ся не преста́й/ побе́ды на ва́рвары христолюби́вому во́инству на́шему дарова́ти,/ и душе́вное спасе́ние, и ми́ру смире́ние, Анто́ние Богому́дре.

 

Сла́ва, и ны́не, то́йже.

 

На хвали́тех стихи́ры, глас 1.

 

Подо́бен: Всехва́льнии му́ченицы:

 

О́тче Богому́дре Анто́ние,/ ты вся́ко на земли́ Христа́ возлюби́л еси́,/ и Того́ Боже́ственным стопа́м после́довати возжела́л еси́:/ Крест бо на ра́мо взем, после́довал еси́, преподо́бне./ И ны́не на Небесе́х со А́нгелы Тро́ице предстои́ши, Богови́дче,/ Е́йже моли́ся дарова́ти душа́м на́шим/ мир и ве́лию ми́лость.

 

О́тче прему́дре Анто́ние,/ Тебе́ Бог показа́ па́стыря слове́сному Своему́ ста́ду/ и украси́л еси́ пречу́дне це́рковь Бо́жия Ма́тере,/ в не́йже и до ны́не лежа́т пречестны́я твоя́ мо́щи,/ во гро́бе неразруши́мы,/ исцеле́ния подаю́т с ве́рою притека́ющим./ И ны́не моли́ся дарова́ти душа́м на́шим/ мир и ве́лию ми́лость.

 

О́тче преподо́бне Анто́ние,/ испроси́ я́же к Бо́гу моли́твами твои́ми/ Це́ркви утвержде́ние,/ мона́хом удобре́ние,/ во́инству на́шему побё́ды на враги́/ и всем ве́рою притека́ющим/ во оби́тель Пресвяты́я Бо́жия Ма́тере по́мощь./ К Не́йже моли́ся дарова́ти душа́м на́шим/ мир и ве́лию ми́лость.

 

Сла́ва, глас 8:

 

Мона́хов мно́жества/ наста́вника тя почита́ем, о́тче наш Анто́ние:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

 

И ны́не, Богоро́дичен: Влады́чице, приими́:

 

Славосло́вие вели́кое. И отпу́ст.

 

НА ЛИТУРГИ́И слу́жба вся преподо́бническая.

 

Моли́тва

 

Па́стырю предо́брый и наста́вниче наш, преподо́бне о́тче Анто́ние! Ты, во пло́ти еще сый, Боже́ственным манове́нием управля́емь, ве́тхий Рим, оте́чество твое́, и род твой оста́вил еси́, и отту́ду чуде́сным по вода́м на ка́мени, я́ко на ле́гцем корабли́, прише́ствием твои́м се́мо освяти́л еси́ град сей, и в нем храм Бо́жией Ма́тери воздви́гл еси́, труды́ же и по́двиги твои́ми просвети́л еси́ оби́тель сию, ея́же и основа́ние тобо́ю бысть, умно́жил еси́ в ней ча́да твоя́, о́бразом до́брых дел и уче́нием наставля́яй их; тем и нетле́нием моще́й твои́х и чуде́с сия́нием просла́ви тя Бог, Ему́же безпло́тен со Безпло́тными предстоя́, ра́дуешися и, ра́дуяся, о притека́ющих к чудотво́рней ра́це твое́й и мо́щи твоя́ усты́ же и се́рдцем лобыза́ющих моли́шися. Ты и ны́не, я́ко име́яй дерзнове́ние ко Влады́це Христу́, бу́ди моли́твенник и хода́тай о предстоя́щих сих рабе́х твои́х, честны́м твои́м моще́м кла́няющихся и прося́щих от Тебе́ ми́лостиваго заступле́ния. Ей, мо́лим тя, слуго́ Христо́в и уго́дниче, главы́ и сердца́ на́ша преклоня́юще Тебе́: не пре́зри убо́гаго сего́ моле́ния на́шего, но при́зри на ны ми́лостивно, коего́ждо потре́бу исполня́я, боля́щим здра́вие, путеше́ствующим в пути благопоспе́шество, пла́вающим ско́рое и безбе́дное пла́вание да́руя; оби́тель же сию́ от вся́ких бед, внеза́пно находя́щих, сохрани́ и в ней живу́щих и тружда́ющихся, ку́пно же и им благоде́ющих, от вся́ких напа́стей свободи́, да вси твои́ми моли́твами на земли́ богоуго́дно поживе́м и Небе́снаго Ца́рствия насле́дницы бу́дем, досто́йни славосло́вити Всесвяту́ю Тро́ицу, Отца́ и Сы́на и Свята́го Ду́ха, в безконе́чныя ве́ки. Ами́нь.