Сайт посвященный церковной истории

Святая София и

Великий Новгород

История и

современность

История и современность

Кликни на квадрат справа, чтобы открыть вкладки сайта

Перепечатка в интернете разрешена при условии наличия активной ссылки на сайт " Святая София и Великий Новгород: История и современность".

Служба святому благоверному князю Феодору Ярославичу

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: Небе́сных чино́в:

Род пра́вых благословля́яй Вы́шний,/ благослови́ и тебе́ благослове́нием Свои́м благосты́нным,/ благове́рный кня́же Фео́доре,/ и я́коже на земли́ пред челове́ки,/ си́це на Небеси́ пред А́нгелы и ду́хи пра́ведных/ прославля́ет тя Свое́ю благода́тию.

Был еси́ красе́н те́лом и ду́хом,/ егда́ жил еси́ в ми́ре сем,/ я́ко крин посреде́ те́рния,/ ны́не же и па́че красе́н еси́,/ егда́ те́ло твое́ зде облече́ся в нетле́ние,/ ду́хом же пребыва́еши на Небеси́/ со ду́хи пра́ведных.

Веселя́хуся о тебе́, кня́же Фео́доре,/ сро́дницы твои́, боля́ре и сы́нове росси́йстии,/ приспе́вшу вре́мени прия́ти тебе́ бра́чный вене́ц,/ но мы ны́не весели́мся сугу́бо,/ я́ко увенча́н еси́ венце́м сла́вы безсме́ртныя/ и мо́лишися о нас ко Го́споду.

Пра́вым подоба́ет похва́ла,/ я́коже ца́рствующий пое́т проро́к./ Тем и мы, Дави́ду внима́я,/ тебе́, ве́рный ра́бе Госпо́день,/ мзду пра́ведничу прии́мшаго,/ похва́льными пе́сньми ублажа́ем.

Сла́ва, глас то́йже:

Сла́ва Тебе́, Го́споди Бо́же наш,/ прия́вшему ду́шу благове́рнаго кня́зя Фео́дора в кро́вы Небе́сныя/ и прославля́ющему те́ло его́ на земли́ нетле́нием,/ по вели́цей Твое́й ми́лости.

И ны́не, Богоро́дичен:

Услы́шавши Елисаве́т целова́ние Твое́, Мари́е,/ возопи́ от ра́дости гла́сом ве́лиим:/ отку́ду мне сие́,/ да прии́де Ма́ти Го́спода моего́ ко мне?/ Мы же, слы́шаще глаго́лы Твоего́ Сы́на,/ я́же суть глаго́лы живота́ ве́чнаго,/ с ра́достию та́кожде вопие́м:/ отку́ду нам сие́,/ я́ко Тобо́ю роди́ся нам Спас.

На стихо́вне стихи́ры, глас 2.

Подо́бен: До́ме Евфра́фов:

Честна́ пред Го́сподем смерть твоя́,/ блаже́нне Фео́доре,/ а́ще бо от те́ла/ душе́ю и разлучи́лся еси́,/ но душа́ твоя́ в руце́ Его́.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Горе́ли бы́ша к тебе́ любо́вию/ росси́йстии сы́нове,/ ви́дяще благочести́ва ко́рене/ о́трасль благочести́вую,/ но вя́щше возлюби́ тя Царь ца́рствующих.

Стих: Возвесели́тся пра́ведник о Го́споде/ и упова́ет на Него́.

Тече́ние жития́ твоего́/ в кра́ткое вре́мя соверши́л еси́,/ но Бо́гу дово́льно угоди́л еси́,/ сего́ ра́ди вшел еси́/ в ра́дость жи́зни ве́чныя.

Сла́ва, глас 2:

Всеще́дрый пра́ведных/ Мздовоздая́телю Го́споди,/ пое́м и сла́вим Твою́ неизрече́нную бла́гость,/ ея́же уго́дника Твоего́ Фео́дора/ сподо́бил еси́.

И ны́не, Богоро́дичен:

Недове́домая воплоще́ния Бо́жия та́йна/ Тобо́ю, Де́во,/ я́сно ми́ру откры́ся,/ сего́ ра́ди, благодаря́ще, пое́м Ти:/ ра́дуйся, недове́домыя та́йны Бо́жия открове́ние.

По Ны́не отпуща́еши: тропа́рь, глас 8, пи́сан на вели́цей вече́рни. Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 4.

Подо́бен: Я́ко до́бля:

Почита́я ли́ки пра́ведных,/ правове́рно и благоче́стно в ми́ре сем сконча́вшихся,/ велича́ем в Тро́ице сла́вимаго Бо́га,/ те́мже и тебе́, кня́же Фео́доре,/ ве́ру и благоче́стие це́ло соблю́дшаго,/ и целому́дрием твои́м Бо́гу угоди́вшаго,/ и во оби́телех Небе́сных/ с пра́ведными торжеству́ющаго,/ единогла́сно почита́ем.

Подража́я твои́м роди́телем,/ и́мже бысть зако́н Бо́жий благ/ па́че ты́сящ зла́та и сребра́,/ прилепи́лся еси́ усе́рдно тому́жде/ и поуча́лся еси́ в нем со тща́нием,/ соблюда́я же его́ в твое́м се́рдцы,/ пра́вою стезе́ю ходи́л еси́,/ и сию́ благода́ть обре́л еси́,/ да ны́не тя во святы́х почита́ем.

И в ю́ношеских ле́тех сый, кня́же Фео́доре,/ соверше́нно разуме́л еси́,/ ка́ко му́дрыя де́вы внидо́ша на брак:/ украси́л еси́ свети́льник твой/ неугаса́ющим доброде́телей еле́ем,/ его́же в кра́ткой жи́зни стяжа́л еси́,/ и та́ко вшел еси́ невозбра́нно/ на брак Жениха́ Небе́снаго/ и наслажда́ешися гла́са веселя́щихся.

Великоле́пный брак тебе́ на земли́ готовля́ху/ сро́дницы и дру́зи твои́,/ неве́дуще Бо́жия Про́мысла,/ я́ко Бог благоволи́ избра́ти тя,/ во е́же тебе́ безбра́чну/ служи́ти на бра́ке Сы́на Его́ Единоро́днаго,/ а́може и Небе́сныя си́лы/ со благогове́нием тща́тся прини́кнути,/ трисвяту́ю песнь воспева́юще.

Сла́ва, глас 2:

Хвали́ Бо́га твоего́, Росси́е,/ я́ко призира́я на тя о́ком Своего́ благоутро́бия/ и прославля́я тя уго́дники Свои́ми,/ нетле́нием телесе́ удивля́ющими,/ причте́ к их ли́ку и благове́рнаго кня́зя Фео́дора,/ и́же ку́пно с ни́ми о свои́х единове́рных/ Ему непреста́нно мо́лится.

И ныне, Богоро́дичен.

Вход, проки́мен дне и чте́ния.

При́тчей чте́ние (гла́вы 10, 3 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же е́сть ка́мений многоце́нных,/ все же честно́е недосто́йно ея́ есть./ Долгота́ бо дни́й и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да, честна́я бо реку́,/ и блаже́н челове́к, и́же пути́ моя сохрани́т:/ исхо́ди бо мои́, исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим,/ я́ко аз, прему́дрость, устро́их сове́т/ и ра́зум, и смы́сл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящии люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́,/ Послу́шайте мене́ и па́ки, честна́я бо реку́,/ и отве́рзу от усте́н пра́вая, я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

При́тчей чте́ние (гла́вы 10 и 11):

Уста́ пра́веднаго ка́плют прему́дрость,/ язы́к же непра́веднаго поги́бнет./ Устне́ муже́й пра́ведных ка́плют благода́ти,/ уста́ же нечести́вых развраща́ются./ Ме́рила льсти́вая – ме́рзость пред Го́сподем,/ вес же пра́ведный прия́тен Ему́./ Иде́же а́ще вни́дет доса́ждение, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их, и поползнове́ние отрица́ющихся упасе́т их./ Не по́льзуют име́ния в день я́рости, пра́вда же изба́вит от сме́рти./ У́мер пра́ведный, оста́ви раска́яние,/ нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́, в нече́стие же па́дает непра́вда./ Пра́вда муже́й пра́вых изба́вит их, безсове́тием же пленя́ются беззако́ннии./ Сконча́вшуся му́жу пра́ведну, не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет, вме́сто же его́ предае́тся нечести́вый./ Во усте́х нечести́вых сеть гра́жданом, чу́вство же пра́ведных благопоспе́шное./ Во благи́х пра́ведных испра́вится град, и в поги́бели нечести́вых ра́дование./ Во благослове́нии пра́вых возвы́сится град, усты́ же нечести́вых раекопа́ется./ Руга́ется гра́жданам лише́нный ра́зума,/ муж же му́дрый безмо́лвие во́дит.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет изчита́ется,/ седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 4:

Стецы́теся, росси́йстии наро́ди,/ ублажи́м досто́йными похвалы́ благове́рнаго Фео́дора,/ нетле́нием телесе́ на земли́ процвета́ющаго/ и душе́ю предстоя́щаго Престо́лу Бо́жию.

Пра́ведный Госпо́дь во всех словесе́х Свои́х/ утверди́ я и на рабе́ Свое́м, кня́зе Фео́доре:/ горя́щаго к Нему́ любо́вию возлюби́/ и и́щущему Его́ даде́ благода́ть.

Храня́й пра́ведныя Своя́, а́ки зе́ницу о́ка,/ храня́ше и пра́ведника Своего́, Фео́дора,/ е́же не преткну́ти ему́ ноги́ своея́ о ка́мень беззако́ния/ во всех путе́х его́.

Предви́дев Всеве́дущий Влады́ка/ тве́рдое его́ усе́рдие,/ е́же пребы́ти ему́ во вся дни живота́ своего́ в целому́дрии,/ прия́т его́ от земли́ пре́жде бра́чнаго сочета́ния/ в ра́достная селе́ния де́вственников.

Приспе́вшу вре́мени блаже́нныя кончи́ны его́,/ бысть плач, и рыда́ние, и во́пль мног,/ но мы ны́не, ви́дяще его́ во святы́х Бо́гом просла́вленнаго,/ преложи́м плач на ра́дость,/ рыда́ние на весе́лие,/ вопль на пра́зднственное восклица́ние.

Сла́ва, глас то́йже:

Да облеку́тся в студ и срамоту́/ и́же не ве́руют бы́ти чудесе́м Бо́жиим./ Се, в пе́рвых чу́до:/ я́ко тле́нию естество́м подлежа́щее кня́зя Фео́дора те́ло/ чу́ждо есть истле́ния.

И ны́не, Богоро́дичен:

Ра́дуйся, Богоро́дице Де́во,/ я́ко Симео́ном Прорече́ннаго/ на паде́ние и на воста́ние мно́гим/ Тобо́ю получи́ти сподо́бихомся.

На стихо́вне стихи́ры, глас 2:

Украси́вый не́бо звезда́ми,/ украси́ Росси́ю нетле́нными телесы́ Свои́х уго́дников,/ в ни́хже просла́ви/ и благове́рнаго кня́зя Фео́дора.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Я́ко фи́никс, процве́л еси́, кня́же Фео́доре,/ на земли́ нетле́нием,/ на Небеси́ же безсме́ртною сла́вою,/ ю́же от сложе́ния ми́ра угото́ва Бог лю́бящим Его́.

Стих: Возвесели́тся пра́ведник о Го́споде/ и упова́ет на Него́.

Доброде́тельми, я́ко крыла́ми,/ на Не́бо возлете́л еси́/ и ду́шу твою́ я́ко же́ртву чи́сту/ Бо́гу предста́вил еси́,/ оста́вив нам утеше́нием нетле́нное твое́ те́ло,/ е́же благогове́йно лобыза́ем.

Сла́ва, глас то́йже:

Вели́ких даро́в сподо́бил еси́, Влады́ко, кня́зя Фео́дора,/ я́ко пра́во ходи́ пред Тобо́ю;/ сподо́би тех и нас, моля́щихся Тебе́ приле́жно,/ и наста́ви нас, да хо́дим пред Тобо́ю/ вы́ну путе́м пра́вым.

И ны́не, Богоро́дичен:

Соврати́ся род челове́ческий от пути́ и́стины,/ и скита́шеся, я́ко овча́ поги́бшее,/ но Ты, Де́во, показа́ла еси́ Сы́ном Твои́м/ путь, и́стину и живо́т.

На благослове́нии хле́бов, по Ны́не отпуща́еши: тропа́рь свята́го, два́жды. Та́же Богоро́дице Де́во: еди́ножды.

Тропа́рь свята́го, глас 8:

От благочести́ваго ко́рене о́трасль благочести́вая прозя́бл еси́/ и, сконча́вся в ю́ности, ле́та до́лга твои́ми доброде́тельми испо́лнил еси́,/ благове́рный кня́же Фео́доре,/ сего́ ра́ди Владе́ющему времена́ми мо́лимся,/ да моли́твами твои́ми пода́ст нам долготу́ лет/ и низпосле́т стране́ на́шей ве́лию и бога́тую ми́лость.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 8:

Блаже́н и треблаже́н еси́, кня́же Фео́доре,/ в млады́х бо ле́тех твои́х си́це в доброде́телех преуспе́л еси́,/ я́ко и ве́тхим де́ньми диви́тися довле́ет:/ между́ земноро́дными жи́тельствуя,/ чисте́йшим А́нгелом подража́тель яви́лся еси́,/ сего́ ра́ди по успе́нии твое́м и торжеству́еши ны́не с ли́ки А́нгельскими.

Сла́ва, и ны́не, Богоро́дичен:

Вели́чие вои́стинну сотвори́ Тебе́ Си́льный, Де́во Всечи́стая,/ сокрове́нное от ве́ка та́инство Тебе́ откры́/ и, я́же хотя́ше, Тобо́ю соде́я./ Сего́ ра́ди Тя усе́рдно в си ублажа́ем.

По 2-м стихосло́вии седа́лен, глас 2:

На земли́ живя́, земна́я му́дрствовати презира́л еси́,/ но, слу́шая сло́ва спаси́тельнаго,/ весь ум твой вперя́л еси́ в Го́рняя,/ сего́ ра́ди и сам ны́не в Го́рних водворя́ешися.

Сла́ва, и ны́не, Богоро́дичен:

Недоуме́ет всяк язык досто́йными Тя ублажи́ти похвала́ми, Всесвята́я Влады́чице,/ из Твои́х бо ложе́сн про́йде Спас и Изба́витель ми́ра.

По полиеле́и седа́лен, глас 7:

Насажде́нному дре́ву при исто́чницех вод,/ е́же дае́т плод во вре́мя свое́/ и его́же лист не отпа́дает,/ подо́бен еси́, свя́те Фео́доре,/ водвори́лся бо еси́ в ме́сте све́тле, в ме́сте зла́чне, в ме́сте поко́йне,/ иде́же гла́сы пра́зднующих шумя́т, я́ко ре́чная устремле́ния,/ сие́ весе́лие твое́ не оты́мется от Тебе́ во ве́ки безконе́чныя.

Сла́ва, и ны́не, Богоро́дичен:

Ма́терь Тя Бо́жию бы́ти ве́руя/ и благода́ти неизрече́нныя испо́лнену испове́дуя, Преблагослове́нная Де́во Мари́е,/ с Гаврии́лом вопие́м Ти:/ ра́дуйся, Благода́тная, Госпо́дь с Тобо́ю.

Степе́нна 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Что́ возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 104.

По 50-м псалме́ стихи́ра, глас 6:

Ве́лию красоту́ творя́ше Ааро́ну ми́ро,/ сходя́щее на браду́ его́/ и на оме́ты оде́жды его́,/ но мно́го па́че вя́щшую красоту́ твори́т благода́ть Бо́жия,/ на кня́зя Фео́дора излия́нная,/ подаю́щая те́лу его́ нетле́ние,/ душе́ же его́ сла́ву безсме́ртную.

Кано́н свято́му на 8, глас 8.

Песнь 1

Ирмо́с: Ди́вному Бо́гу вели́чия принесе́м,/ и великоле́пно с на́ми/ да воспое́т земля́ и не́бо/ я́сно сла́ву Его́.

Я́ко еле́нь жела́ет на исто́чники водны́я,/ си́це жела́ше душа́ твоя́, кня́же Фео́доре, к Бо́гу,/ И́же и прия́ тя с любо́вию и сотвори́ насле́дника Ца́рствия Своего́.

Кра́ткое жи́зни твоея́ име́л еси́ тече́ние,/ но по́двигом до́брым в зако́не Бо́жии подвиза́лся еси́/ и ве́ру соблю́л еси́,/ сего́ ра́ди отложи́ся тебе́ вене́ц сла́вы безсме́ртныя.

Ди́вный, Го́споди, во святы́х Твои́х,/ ди́вен еси́ вои́стинну и во святе́м Твое́м кня́зе Фео́доре,/ и́бо в не́мощнем естестве́ челове́честем/ вышеесте́ственную си́лу Твою́ соверша́я,/ дал еси́ те́лу его́ нетле́ние.

Богоро́дичен: Чу́дно бысть, е́же огне́м опаля́тися купине́ и не сгара́ти;/ чу́дно же и сие́ вои́стинну,/ я́ко Де́вою безсе́менно зачала́ и родила́ еси́ Сы́на Бо́жия/ и по рожде́нии Его́ па́ки Де́ва пребыла́ еси́./ Те́мже Тя, я́ко Ма́терь Бо́жию и Де́ву, благоче́стно велича́ем.

Песнь 3

Ирмо́с: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди.

И́стинная лоза́ виногра́да Христо́ва был еси́, кня́же Фео́доре,/ сего́ ра́ди и в кра́ткое вре́мя мног плод доброде́телей израсти́л еси́.

Дозре́вшим твои́х доброде́телей гро́здием,/ еще́ тебе́ мла́ду су́щу,/ да не ка́ко же́стокия страсте́й бу́ри повредя́т я,/ преселе́н еси́ в вертогра́д Небе́сный.

Коль пра́веден и щедр еси́, Благоутро́бный Влады́ко,/ в мздовоздая́нии Твои́м пра́ведником!/ Довле́ет и еди́н о́браз:/ ка́ко пра́ведника Твоего́ Фео́дора уще́дрил еси́.

Богоро́дичен: От утро́бы ма́тере Себе́ Бо́гу посвяти́ла еси́, Отрокови́це,/ и усе́рдием Ему́ служи́ла еси́,/ тем Тебе́ и Бог воздаде́ по правоте́,/ я́ко Тя вси ро́ди Богоро́дицею ублажа́ют.

Седа́лен, глас 8:

Исхо́д твой, кня́же Фео́доре, от сея́ вре́менныя жи́зни,/ мно́гия источи́ сле́зы от о́чию сыно́в росси́йских,/ но Оте́ц щедро́т и Бог вся́кия уте́хи награди́ их изоби́льно весе́лием,/ возложи́в на свято́е твое́ те́ло оде́жду нетле́ния, во вя́щшее увере́ние,/ я́ко ты по исхо́де твое́м в ра́дости пребыва́еши.

Сла́ва, и ны́не, Богоро́дичен:

Усумне́ся обру́чник Твой Ио́сиф, ви́дев Тя непра́здну,/ но а́бие разреши́ся сумне́ние,/ егда́ извеще́н бысть от А́нгела,/ я́ко заче́ншееся в Тебе́ от Ду́ха есть Свя́та.

Песнь 4

Ирмо́с: Услы́шах слух си́лы Твоея́,/ и возвесели́ся се́рдце мое́ о Го́споде.

Хваля́шеся иногда́ ева́нгельский ю́ноша пред Го́сподем,/ я́ко вся за́поведи соблюде́ от ю́ности своея́,/ но не послу́ша Го́спода, ма́лое сотвори́ти ему повелева́ющаго,/ и не и́де вслед Его́,/ ты же, блаже́нне Фео́доре, и, не хваля́ся, повеле́ний Госпо́дних слу́шал еси́/ и Ему́ с весе́лием после́довал еси́.

Даны́ бы́ша тебе́ от Го́спода тала́нты душе́вныя и теле́сныя,/ и́хже во бла́го употребля́я,/ в кра́ткое вре́мя мно́гое приобре́тение Ему́ сотвори́л еси́,/ сего́ ра́ди и введе́ тя, я́ко раба́ блага́го и ве́рнаго, в ра́дость Свою́.

Слу́шаяй моли́твы пра́ведных Твои́х, Го́споди,/ услы́ши моли́тву и пра́ведника Твоего́ Фео́дора,/ ю́же прино́сит Тебе́ о ро́де свое́м.

Богоро́дичен: С ра́достию гото́ва су́щи к званию,/ на не́же избра́ Тя Вы́шний, Де́во Мари́е,/ со смире́нием Гаврии́лу рекла́ еси́:/ се раба́ Госпо́дня./ Мы же, Тя си́це смири́вшуюся, Влады́чицею ны́не почита́ем.

Песнь 5

Ирмо́с: Я́ко Бо́га ино́го, Бла́же,/ па́че Тебе́, не зна́ем,/ к Тебе́, Све́ту Незаходи́мому, от но́щи у́тренююще,/ воспева́ем Тя, Человеколю́бче.

В ма́лых днех жития́ твоего́, блаже́нне Фео́доре,/ вели́ких свети́ло яви́лся еси́ доброде́телей,/ и́миже Бог благоугожда́ется.

Све́тлу ду́шу твою́ хотя́ предста́вити Бо́гу,/ чистоту́ в житии́ твое́м соблю́л еси́,/ сего́ ра́ди по твое́м успе́нии вшел еси́,/ а́може ничто́же нечи́сто вхо́дит.

Ра́ди пра́ведных Твои́х, Го́споди,/ простира́еши лучи́ Твоея́ ми́лости на гре́шныя:/ озари́ у́бо и нас, недосто́йных рабо́в Твои́х, луча́ми Твоего́ благоутро́бия/ ра́ди пра́ведника Твоего́ Фео́дора.

Богоро́дичен: Егда́ Гаврии́л благовести́ Тебе́, Неискусому́жная Де́во,/ я́ко во чре́ве Твое́м зачне́ши и роди́ши Сы́на Бо́жия,/ с ве́рою отвеща́ла еси́:/ бу́ди Мне по глаго́лу твоему́./ Сего́ ра́ди по ве́ре Твое́й и бысть Тебе́ благослове́ние Вы́шняго,/ Тобо́ю же и вси лю́дие,/ и́же сиде́ша во тьме и се́ни сме́ртней,/ узре́ша свет ве́лий.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

И мя́гкия нося́й оде́жды, кня́же Фео́доре,/ си́це житие́м твои́м в кра́ткое вре́мя Бо́гу угоди́л еси́, я́ко мно́гим диви́тися,/ и́же угоди́ша Ему́, долговре́менно облача́ющеся во вре́тище.

Уве́рен быв, я́ко и златотка́нныя ри́зы о́бщему подлежа́т тле́нию,/ потща́лся еси́ в животе́ твое́м из доброде́телей истка́ти себе́ ри́зу нетле́ния,/ в не́йже ны́не красу́ешися.

Коле́на се́рдца на́шего преклоня́я,/ благодаре́ние Тебе́ возсыла́ем, Человеколю́бче,/ я́ко те́ло кня́зя Фео́дора, тле́нию по естеству́ подлежа́щее,/ обле́кл еси́ в ри́зу нетле́ния,/ и́мже умножа́ется сла́ва всея́ Росси́и.

Богоро́дичен: Позлаще́нными доброде́телей ри́зами/ оде́янна и преиспещре́нна была́ еси́ на земли́, Пренепоро́чная,/ сего́ ра́ди и Бог Сло́во во утро́бе Твое́й/ благоволи́ облещи́ся в плоть челове́ческую.

Конда́к, глас 4:

В благоче́стии рожде́нна,/ в стра́се Бо́жии воспита́на,/ в житии́ целому́дрие стяжа́вшаго,/ по успе́нии же нетле́нием телесе́ просия́вшаго,/ благове́рнаго кня́зя Фео́дора во святы́х почита́я,/ смире́нно мо́лимся Тебе́, Всеси́льный Влады́ко,/ да и во ве́ки прославля́еши святы́ми Твои́ми/ страны́ на́ша росси́йския.

И́кос:

Досто́йно и пра́ведно есть ра́доватися тебе́, свя́те Фео́доре, на Небеси́,/ я́ко неизрече́нную благода́ть от Бо́га получи́л еси́,/ мы же ра́дуемся на земли́,/ я́ко тя и́мамы те́плаго к Бо́гу моли́твенника,/ и от ра́дости си́це зове́м:/ ра́дуйся, похвало́ росси́йская.

Песнь 7

Ирмо́с: В нача́ле зе́млю основа́вый/ и Небеса́ сло́вом утверди́вый,/ благослове́н еси́ во ве́ки, Го́споди, Бо́же оте́ц на́ших.

Я́ко чи́стое доброде́телей зерца́ло был еси́ на земли́, кня́же Фео́доре,/ сего́ ра́ди Вы́шний, восприя́в ду́шу твою́ в черто́г Свой Небе́сный,/ оста́ви нам о́браз, нетле́нное твое́ те́ло,/ да после́дуем стопа́м твои́м.

Не стыди́мся хвали́тися, пра́ведниче Бо́жий,/ я́ко моли́тва твоя́ к Бо́гу мно́го мо́жет поспешествова́ти нам во благо́е:/ ве́мы бо, я́ко моли́твы пра́ведных прия́тны Ему́.

Хва́лим, пое́м и благослови́м Тебе́, Го́споди,/ я́ко призира́еши на Росси́ю с высоты́ свята́го жили́ща Твоего́/ и посеща́еши ю, я́ко виногра́д Твой,/ его́же насади́ десни́ца Твоя́.

Богоро́дичен: Блажи́м Тя, Богоро́дице Де́во,/ и блажи́ти никогда́ не престае́м:/ благослове́нна бо Ты еси́ в жена́х/ и благослове́н Плод чре́ва Твоего́.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

Блаже́н еси́, кня́же Фео́доре,/ я́ко сый посреде́ волну́ющагося душетле́нных страсте́й мо́ря,/ к ти́хому приста́нищу в кра́ткое вре́мя безбе́дно дости́гл еси́.

А́ще и устремля́хуся ми́ра сего́ во́лны, е́же потопи́ти ю́ность твою́,/ но ничто́же успе́ша:/ ковче́г бо тебе́ бысть чистота́,/ корми́ло – Правосла́вная ве́ра,/ ко́тва 14 – тве́рдая на Бо́га наде́жда,/ ве́трило – любо́вь к Бо́гу и бли́жним.

Прославля́ем Тя, Го́споди Бо́же,/ я́ко, удивля́я хоте́ния Твоя́ во святы́х Твои́х,/ удиви́л еси́ хоте́ние Твое́ и в благове́рнем кня́зе Фео́доре.

Богоро́дичен: Удивля́хуся волсви́ еги́петстии си́ле чудотво́рнаго жезла́ Моисе́ова,/ мы же удивля́емся Тебе́, Мари́е:/ ка́ко Невмести́маго все́ми во утро́бе Твое́й вмести́ла еси́?

Песнь 9

Ирмо́с: Благослове́н Госпо́дь, Бог Изра́илев,/ воздви́гнувши рог спасе́ния нам/ в дому́ Дави́дове, о́трока Своего́,/ в ни́хже посети́ нас Восто́к с высоты́/ и напра́вил ны есть на путь ми́ра.

Ви́дяще тя росси́йстии сопоста́ты,/ лета́ми доспева́ющаго ко изощре́нию меча́ на вы́и их,/ не можа́ху не смуща́тися:/ ты бо, душе́внаго сопоста́та, еще́ млад сый, победи́ти в си́лах был еси́;/ сего́ ра́ди кре́пкий во бране́х Госпо́дь/ и причте́ тя, я́ко до́браго во́ина,/ к Безпло́тному Своему́ во́инству.

Несумне́нная наде́жда был сыново́м росси́йским к защище́нию оте́чества,/ но Прему́дрый о всех Промысли́тель/ благоволи́ тя прия́ти безмяте́жна в поко́й Свой,/ Росси́ю же защити́ти руко́ю бра́та твоего́, свята́го Алекса́ндра.

Благослове́н еси́, Го́споди Бо́же наш,/ я́ко ве́си пути́ непоро́чных,/ и достоя́ние их во ве́ки пребыва́ет,/ его́же прича́стником бы́ти сподо́бил еси́/ и непоро́чнаго кня́зя Фео́дора.

Богоро́дичен: Призира́яй на смире́нныя рабы́ Своя́ Вы́шний/ призре́ и на Твое́ смире́ние, Пречи́стая Де́во,/ и превознесе́ Тя па́че всех дще́рей сыно́в челове́ческих.

Свети́лен, глас 8:

Прекра́сный доброде́телей храм на земли́ быв, благове́рный князь Фео́дор/ оста́ви нам по свое́м успе́нии те́ло свое́, украше́нное нетле́нием,/ душе́ю же вни́де в храм нерукотворе́нный.

Сла́ва, и ны́не, Богоро́дичен:

Вели́ким благодаре́нием до́лжни мы Тебе́, Влады́чице:/ еди́на бо Ты от земноро́дных яви́лася еси́/ досто́йна прия́ти во утро́бу Твою́ Сы́на Бо́жия,/ Его́же Оте́ц посла́ на зе́млю разруши́ти зако́нную кля́тву/ и пода́ти ве́чное всем благослове́ние.

На хвали́тех стихи́ры, глас 6:

Приника́я в бе́здну суде́б Бо́жиих,/ удивля́емся чу́дному Его́ о пра́ведных Свои́х смотре́нию:/ о́чи бо Его́ вы́ну на них/ и у́ши Его́ вы́ну в моли́тву их,/ и прославля́ет их вре́менно и ве́чно,/ я́коже ви́дим смотре́ние Его́ и о тебе́,/ благове́рный кня́же Фео́доре,/ те́мже тя ублажа́ем.

Я́же кра́сная суть ми́ра сего́,/ вся сия́ бы́ша в руку́ твое́ю,/ егда́ на земли́ сей обита́л еси́;/ егда́ же и от ми́ра сего́ изше́л еси́,/ вся па́ки восприя́л еси́ блага́я, пра́ведным угото́ванная,/ вшел бо еси́ в зе́млю обетова́нную,/ я́же не ме́дом и млеко́м тече́т,/ но есть Ца́рство Небе́сное;/ сего́ ра́ди тя ублажа́ем.

От кня́жеския кро́ве произше́д в мир сей,/ кня́жескую сла́ву име́л еси́ насле́дие:/ вене́ц гото́вяшеся главе́ твое́й,/ порфи́ра рамена́м твои́м,/ ски́петр рука́м твои́м,/ по успе́нии же те́лу твоему́ даде́ся нетле́ние/ и душе́ твое́й ве́чное блаже́нство,/ сего́ ра́ди тя ублажа́ем.

А́ще и в млады́х ле́тех сконча́лся еси́,/ но испо́лнил еси́ ле́та до́лга:/ ста́рость бо честна́ немноголе́тна,/ ниже́ в числе́ лет изчита́ется,/ и во́зраст ста́рости есть житие́ нескве́рное,/ в не́мже до кончи́ны пребы́л еси́;/ ны́не же на Небеси́, и па́ки живе́ши,/ и молишися о нас ко Го́споду,/ сего́ ра́ди тя ублажа́ем.

Сла́ва, глас то́йже:

Ра́ди кро́ткаго раба́ Твоего́ Дави́да,/ по за́поведей Твои́м пред Тобо́ю ходи́вшаго,/ мно́гия ро́ду изра́ильскому явля́л еси́ благодея́ния, Бо́же наш,/ благоде́телен у́бо бу́ди и нам,/ ра́ди незло́биваго раба́ Твоего́ Фео́дора,/ тече́ние жи́зни своея́/ по за́поведем Твои́м соверши́вшаго.

И ныне, Богоро́дичен:

Взыгра́ся се́рдце Твое́, Де́во,/ весе́лием на земли́,/ егда́ в рождестве́ Сы́на Твоего́/ велегла́сно А́нгели воспе́ша:/ сла́ва в Вы́шних Бо́гу, и на земли́ мир,/ в челове́цех благоволе́ние./ Весели́ся и ны́не на Небеси́,/ я́ко и мы ту́южде песнь о Тебе́ Бо́гу воспева́ем.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на песни 3-я и 6-я на 8. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 4: Пра́ведник, я́ко фи́никс, процвете́т, я́ко кедр, и́же в Лива́не, умно́жится. Ева́нгелие от Матфе́я, зача́ло 105. Прича́стен: В па́мять ве́чную:

Моли́тва

Святы́й благове́рный вели́кий кня́же Фео́доре! Ты от кня́жеския кро́ве происше́д в мир сей, кня́жескую сла́ву навсегда́ име́л еси́ насле́довати, и вся кра́сная ми́ра сего́ бы́ша в руку́ твоею́, егда́ на земли́ сей обита́л еси́. Но ты, а́ще и в млады́х ле́тех сконча́лся еси́, но испо́лнил еси́ ле́та до́лга и душе́внаго сопоста́та, еще́ млад сый, победи́ти в си́лах был еси́. И чистоту́ в житии́ твое́м соблю́л еси́, чесо́ ра́ди Кре́пкий во бра́нех Госпо́дь и причте́ тя, я́ко до́браго во́ина, к Безпло́тному Своему́ во́инству в Небе́сных оби́телех, Росси́ю же защити́ руко́ю бра́та твоего́, свята́го благове́рнаго вели́каго кня́зя Алекса́ндра Не́вскаго. Сего́ ра́ди мо́лим тя, Небе́сный во́ине Христо́в: даждь и нам позна́ти, сколь ничто́жно и преходя́ще все жите́йское и сколь бли́зок всегда́ до́лжен бы́ти се́рдцу на́шему Бог наш, да вы́ну помышля́ем о Го́рнем, не о земно́м, да неусы́пно и́щем ве́чнаго Небе́снаго оте́чества, да прославля́ем Бо́га жи́знию и дела́ми на́шими и с му́жеством отража́ем стре́лы по́хоти, греха́ и собла́знов. Ты из среды́ волну́ющагося душе́вных страсте́й мо́ря к ти́хому приста́нищу в кра́ткое вре́мя безбе́дно дости́гл еси́, и, а́ще устремля́хуся ми́ра сего́ во́лны, е́же потопи́ти неви́нную ю́ность твою́, но ничто́же успе́ша, ковче́г бо тебе́ бысть чистота́, корми́ло – Правосла́вная ве́ра, ко́тва – тве́рдая на Бо́га наде́жда, ве́трило – любо́вь к Бо́гу и бли́жнему. Мо́лим тя, уго́дниче Бо́жий, усво́й и нам эти сво́йства своя́ и доброде́тели, охлажда́й по́хоти се́рдца на́шего, помога́й нам в борьбе́ со страстьми́ на́шими, исхода́тайствуй нам у Го́спода реши́тельное отвраще́ние от поро́ков, постоя́нство в доброде́тели, терпе́ние в бе́дствиих, великоду́шие в го́рестех, тве́рдую на Бо́га наде́жду во всех обстоя́тельствех настоя́щая жи́зни, любо́вь к враго́м, жела́ние добра́ всем, любя́щим и ненави́дящим нас. Ты, увере́н быв, я́ко златотка́нныя ри́зы о́бщему подлежа́т тле́нию, потща́лся еси́ в животе́ твое́м из доброде́телей истка́ти себе́ ри́зу нетле́ния, в не́йже ны́не красу́ешися, внуши́ и нам, да отвраща́емся от всех мирски́х удово́льствий, от вся́кия плотски́я похо́ти, от всея́ земны́я сла́вы и от вся́каго тле́ннаго сокро́вища, да презира́ем обольще́ние ро́скоши, и гнуша́емся обая́ния ле́сти и поро́ка, и да ра́дуемся, егда́ те́рпим за Христа́ лише́ния, уничиже́ния, гоне́ния, презре́ния, клевету́ и озлобле́ние. Горя́ху к тебе́, святый́ кня́же, любо́вию росси́йския сы́нове, ви́дяще тя, от благочести́ваго ко́рене отра́сль благочести́вую, и великоле́пный брак тебе́ на земли́ гото́вляху сро́дницы и дру́зи твои́, не ве́дуще Бо́жия Про́мысла, я́ко Бог благоволи́л избра́ти, во е́же тебе́ безбра́чну служи́ти на бра́це Сы́на Его́ Единоро́днаго, и ты, святы́й благове́рный кня́же, предвари́в нас в Ца́рстве благода́ти, привлецы́ и нас свое́ю любо́вию в Ца́рство Небе́сное, бу́ди для нас ору́дием человеколю́бия и бла́гости Бо́жией, отклоня́й от нас и́стинная бе́дствия, утеша́й нас в го́рестех и печа́лех, укрепля́й свои́м предста́тельством у Го́спода си́лы ве́рныя на доброде́лание во сла́ву И́́мене Бо́жия и в преспе́яние Ца́рства Христо́ва, да процвета́ют здра́вием к благоде́нствию и возраста́ют от си́лы в си́лу и от сла́вы в сла́ву вси наро́ди земли́ Росси́йския, да бу́дут всегда́ одушевле́ни благоче́стием, пра́вдою, му́жеством, пре́данностию оте́честву и всеми доброде́тельми, да и мы вме́сте с тобо́ю удосто́имся превозноси́ти бла́гость, любо́вь и милосе́рдие Еди́наго, в Тро́ице Святе́й сла́вимаго Бо́га, Отца́ и Сы́на и Ду́ха Свята́го, ны́не, и при́сно, и во ве́ки веко́в. Ами́нь.