Сайт посвященный церковной истории

Пути

Великого Новгорода

История и

современность

Яндекс.Метрика

Перепечатка в интернете разрешена при условии наличия активной ссылки на сайт " Пути Великого Новгорода: История и современность".

Служба благоверному великому князю Александру Невскому

 

На Ма́лой Вече́рни

 

Стихи́ры, глас 1.

 

Подо́бен: Всехва́льнии му́ченицы:

 

От благочести́ваго ко́рене/ святопома́занная розга́ произше́д,/ плод произнесе́ себе́ преподо́бия и пра́вды,/ преми́рно благоуха́я ве́рно от души́ чту́щия тя./ О ни́хже со А́нгелы Христу́ моли́ся, блаже́нне,/ дарова́ти мир и ве́лию ми́лость.

 

Земны́х всех возгнуша́вся,/ к Небе́сным ду́хом прилепи́л еси́ себе́./ Тем, безпло́тных подража́в житие́,/ со святы́ми все́ми водвори́лся еси́;/ с ни́миже, преподо́бне, Христу́ моли́ся/ па́мять твою́ творя́щим/ пода́ти мир и ве́лию ми́лость.

 

Благоче́стием и ве́рою пресве́тло укра́шен,/ я́ко благочести́в князь, и преизря́ден, и преимени́т,/ Пресвяты́я Тро́ицы побо́рник был еси́;/ от Нея́же, просвети́вся,/ чуде́с свет ми́ру провозсия́л еси́/ и моли́твенник яви́лся еси́ о душа́х на́ших.

 

Сла́ва, глас 6:

 

Преподо́бне о́тче Алекса́ндре,/ из мла́да возлюби́в Христа́,/ Богоимени́т венцено́сец был еси́,/ преподо́бием и пра́вдою све́тло укра́шен,/ ми́лостынями же и чистото́ю/ простра́нное селе́ние был еси́ Ду́ха Свята́го./ Ему́же непреста́нно моли́ся,/ о е́же сохрани́ти Оте́чество твое́ и град твой,/ от пога́ных необори́мым бы́ти/ и сыново́м Росси́йским спасти́ся.

 

И ны́не, пра́здника, глас 8:

 

Дави́д провозглаша́ше Тебе́, Пречи́стая,/ прови́дя освяще́ние вхо́да Твоего́ в храм,/ в не́мже концы́, днесь пра́зднующе, славосло́вят Тя, Всепе́тая:/ я́же бо пре́жде рождества́ Де́ва/ и по рождестве́ пребы́вши нетле́нна, Ма́ти Сло́ва жи́зни./ Днесь в хра́ме Заха́рия весели́тся, восприе́м Тя, Влады́чице,/ и свята́я святы́х ра́дуются,/ подъе́мши Тя, исто́чника жи́зни на́шея./ Сего́ ра́ди и мы псало́мски вопие́м Ти:/ о нас моли́ Сы́на Твоего́ и Бо́га на́шего/ дарова́ти нам ве́лию ми́лость.

 

На стихо́вне стихи́ры, глас 2.

 

Подо́бен: До́ме Евфра́фов:

 

Дом Свята́го Ду́ха/ поспеше́нием благода́ти/ Алекса́ндр яви́ся;/ те́мже, ны́не соше́дшеся,/ тому́ воспои́м песнь.

 

Стих: Честна́ пред Го́сподем/ смерть преподо́бных Его́.

 

Ра́дуйся, князе́й ру́сских похвало́/ и во́инов соблюде́ние,/ ва́рваров побежде́ние,/ сиро́т и вдов засту́пниче/ и гра́да на́шего утвержде́ние.

 

Стих: Блаже́н муж, боя́йся Го́спода,/ в за́поведех Его́ восхо́щет зело́.

 

Приими́ ны́не пе́ние/ люде́й твои́х, блаже́нне,/ и моля́щимся ти у Христа́/ испроси́ от грехо́в избавле́ние,/ да ублажа́ем тя при́сно.

 

Сла́ва, глас 8:

 

Богому́дре Алекса́ндре, вели́кий кня́же,/ блаже́н еси́, я́ко блаже́нство насле́довал еси́,/ его́же ра́ди вся земна́я презре́в,/ неотло́жно того́ взыску́я, ни́щия удовли́л еси́,/ сиро́т пита́тель, пле́нных свободи́тель был еси́./ Тем в нестаре́емую ра́дость вшел еси́ Го́спода твоего́,/ Ему́же со А́нгелы предстоя́,/ моли́ ве́рою пою́щия тя/ гобзова́ние щедро́т пода́ти и грехо́в оставле́ние.

 

И ны́не, пра́здника, глас 4:

 

Прииди́те, вси ве́рнии,/ еди́ну Непоро́чную восхва́лим,/ от проро́ков пропове́данную и в храм приведе́нную,/ пре́жде век пронарече́нную Ма́терь/ и в после́дняя ле́та я́вльшуюся Богоро́дицу./ Го́споди, моли́твами Ея́/ мир Твой пода́ждь нам и ве́лию ми́лость.

 

По Трисвято́м тропа́рь, глас 4: Я́ко благочести́ваго: Сла́ва, и ны́не, пра́здника ( зри день сей ни́же ).

Та́же, ектения́ ма́лая: Поми́луй нас, Бо́же:

 

И отпу́ст.

 

На Вели́цей Вече́рни

 

Стихосло́вим Блаже́н муж: 1-й антифо́н. На Го́споди, воззва́х: стихи́ры на 8: пра́здника, 3; и Алекса́ндра, 5.

 

Стихи́ры Алекса́ндра, глас 2.

 

Подо́бен: Ки́ими похва́льными:

 

Ки́ими похва́льными венцы́/ венча́ем блаже́ннаго Алекса́ндра?/ люде́й благове́рных держа́ву и князе́й правосла́вных похвалу́,/ ди́внаго в чудесе́х, безпло́тных сожи́теля,/ исто́чника Боже́ственных исцеле́ний неисчерпа́емаго,/ реку́ чуде́с мно́гих,/ проли́тие дарова́ний духо́вных./ Его́же ра́ди Христо́с земли́ Росси́йстей/ да́рует мир и ве́лию ми́лость.

 

Ки́ими похва́льными венцы́/ увязе́м блаже́ннаго Алекса́ндра?/ благоче́стия управле́ние, ерети́ческих уче́ний обличе́ние,/ Це́ркве све́тлое украше́ние,/ врача́ прему́драго и Богоприя́тна,/ исцеля́юща неду́ги и боле́зни на́ша./ Его́же ра́ди враго́в шата́ния Христо́с низложи́,/ име́яй ве́лию ми́лость.

 

Ки́ими смире́нными устна́ми/ воспое́м Алекса́ндра прему́драго?/ со́лнца пресве́тлаго, Всечестны́я Тро́ицы моли́твенника,/ печа́льных утеше́ние и отча́янных засту́пника,/ похвалу́ земли́ Росси́йския,/ реку́ ми́лости вои́стинну и больны́х врача́ безме́здна,/ смире́ния Христо́ва подража́теля,/ подаю́щаго нам ве́лию ми́лость.

 

Ки́ими духо́вными пе́сньми/ воспое́м пресла́внаго?/ свети́льника незаходи́маго Со́лнца мы́сленнаго,/ пра́вды пра́вило, весе́лие земли́ Росси́йския,/ кре́пость гра́да на́шего и забра́ло,/ сиро́т пита́теля, оби́димых засту́пника,/ столпа́ пресве́тлаго, просвеща́ющаго нас чуде́с светлостьми́/ и подаю́ща ве́лию ми́лость.

 

Сла́ва, глас 6:

 

Всяк град и страна́,/ сла́вному гра́ду на́шему сра́дуйтеся/ и псало́мски восплещи́те рука́ми вку́пе,/ духо́вно торжество́ днесь пра́зднующе:/ се у́бо ди́вный наш врач и спаси́тель, Алекса́ндр вели́кий,/ Небе́снаго врачевства́ цельбы́ предлага́ет/ и к непреста́нным цельба́м ти́хо созыва́ет/ не хи́тростьми челове́ческими, не обвяза́нием,/ но де́йством Свята́го Ду́ха,/ душе́вное и теле́сное исцеле́ние па́че естества́ подава́я./ Его́же и прие́млюще/ дово́льно, всяк род и во́зраст сла́вим Христа́ Бога́,/ подаю́щаго нам его ра́ди ве́лию ми́лость.

 

И ны́не, пра́здника, глас 8:

 

По рождестве́ Твое́м, Богоневе́сто Влады́чице,/ пришла́ еси́ в храм Госпо́день воспита́тися/ во свята́я святы́х, я́ко освяще́нна:/ тогда́ и Гаврии́л по́слан бысть к Тебе́, Всенепоро́чней,/ пи́щу Тебе́ принося́./ Небе́сная вся удиви́шася, зря́ще Ду́ха Свята́го, в Тя все́льшася./ Те́мже, Пречи́стая и Нескве́рная,/ Я́же на Небеси́ и на земли́ сла́вима,/ Ма́ти Бо́жия, спаси́ род наш.

 

Вход. Проки́мен дне. И чте́ния.

 

Прему́дрости Соломо́новы чте́ние (глава́ 3):

 

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние;/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их,/ и я́ко всепло́дие же́ртвенное прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.

 

Прему́дрости Соломо́новы чте́ние (гла́вы 5, 6):

 

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости, испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

 

Прему́дрости Соломо́новы чте́ние (глава́ 4):

 

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

 

На литии́ стихи́ры, глас 3.

 

Подо́бен: Поста́виша:

 

3емля́ на́ша и страна́, блаже́нне,/ чудеса́ твоя́ возвеща́ют и воспева́ют у́бо всю́ду:/ Христо́с бо тя нам свети́льника показа́,/ просвеща́юща ду́ши на́ша.

 

Глас 4:

 

Лю́дие и кня́зи,/ вку́пе бога́тии и убо́зии, ра́дуйтеся,/ све́тлое днесь торжество́ пра́зднующе о́бщаго засту́пника,/ блаже́ннаго Алекса́ндра:/ воспева́йте у́бо, и́стиннии безмо́лвницы и прости́и лю́дие,/ о́бщаго предста́теля, и помо́щника,/ и мо́лебника о душа́х на́ших.

 

Глас 5:

 

Богоприя́тне и преподо́бне Алекси́е,/ от ложе́сн поро́д свят Бо́гу нарече́н еси́,/ благи́ми де́лы све́тло украси́лся еси́,/ ми́лостынями и чистото́ю сосу́д Свята́го Ду́ха был еси́:/ И́мже де́йствуеши пресла́вная чудеса́/ с ве́рою приходя́щим ко свято́му твоему́ гро́бу.

 

Боговенча́нный Алекса́ндре,/ страны́ на́шей держа́ва светоно́сная,/ князе́й похвала́ велехва́льная,/ христиа́н побо́рниче непобе́дный,/ о ни́хже, жив сый, ду́шу твою́ полага́л еси́,/ си́це и по сме́рти неотсту́пно Оте́чество твое́ сохраня́й,/ на ага́ряны моли́твами твои́ми спосо́бствуя.

Богому́дре Алекса́ндре преподо́бне,/ егда́ ре́вностию Бо́жиею разже́гся,/ в зе́млю ше́ствовати неве́дущих Бо́га не отрица́лся еси́/ и та́мо прише́ствием твои́м безбо́жнаго царя́ удиви́л еси́,/ христоимени́тым же лю́дем тишину́ исхода́тайствовал еси́./ Тем и днесь к Бо́гу хода́тайствуй о нас,/ да уще́дрит ны в День Су́дный.

 

Сла́ва, глас 2:

 

Прииди́те, Христоимени́тии собо́ри,/ Богопочте́нии кня́зи и благове́рнии/ ку́пно же со святи́тели и Христолюби́вое мно́жество,/ све́тло соста́вльше, псало́мскую песнь/ Боже́ственному сему́ венцено́сцу Алекса́ндру принесе́м, реку́ще:/ ра́дуйся, Тро́ицы побо́рниче великоимени́тый;/ ра́дуйся, крестоно́сных князе́й похвало́ Боговенча́нная;/ ра́дуйся, христиа́н рог Богоно́сный,/ о ни́хже Христу́ моля́ся, не оскуде́й/ дарова́ти мир и ве́лию ми́лость.

 

И ны́не, пра́здника, глас 5:

 

Возсия́ день ра́достен и пра́здник всече́стен:/ днесь бо, Я́же пре́жде рождества́ и по рождестве́ Де́ва пребы́вши,/ в храм Госпо́день приво́дится./

 

И ра́дуется Заха́рия ста́рец, роди́тель Предте́чев,/ и вопие́т ве́село:/ прибли́жися, Предста́тельница скорбя́щих, в храм святы́й,/ я́ко свята́, освяти́тися во оби́телище Всецаря́./ Да весели́тся Иоаки́м пра́отец, и А́нна да ра́дуется,/ я́ко принесо́ша Бо́гу, я́ко триле́тствующую Ю́ницу, непоро́чную Влады́чицу./ Ма́тери, сра́дуйтеся, де́вы, взыгра́йте, и непло́ды, сликовству́йте,/ я́ко отве́рзе нам Небе́сное Ца́рство пронарече́нная Всецари́ца,/ ра́дуйтеся, лю́дие, и весели́теся.

 

На стихо́вне стихи́ры, глас 1.

 

Подо́бен: Небе́сных чино́в:

 

Я́ко ве́лие со́лнце,/ яви́лся еси́, блаже́нне, вселе́нней,/ чудесы́ стра́шными просвеща́я весь мир./ Тем вси, соше́дшеся,/ Христа́ воспои́м, спаса́ющаго ны от бед/ моли́твами твои́ми.

 

Стих: Честна́ пред Го́сподем/ смерть преподо́бных Его́.

 

Све́том сия́я Боже́ственныя благода́ти,/ и чудоде́йствуеши непреста́нно./ И ны́не моли́ Христа́ Бо́га, блаже́нне Алекса́ндре,/ изба́вити от бед ду́ши на́ша.

 

Стих: Блаже́н муж, боя́йся Го́спода,/ в за́поведех Его́ восхо́щет зело́.

 

Не от Ри́ма возсия́л еси́,/ ни от Сио́на, Богому́дре,/ но в Росси́йстей земли́ яви́лся еси́,/ чудотво́рец пресла́вен,/ исцеле́ние подава́я неоску́дно/ всем, приходя́щим с ве́рою.

 

Сла́ва, глас 1. Самогла́сен:

 

Ра́дуйся и весели́ся, гра́де Влади́мире,/ и све́тло торжеству́й, и лику́й Христо́ва Це́рковь,/ в не́йже положено́ честно́е те́ло блаже́ннаго Алекса́ндра,/ те́ло драго́е, те́ло пресла́вное,/ те́ло, чудеса́ точа́щее всем, приходя́щим с ве́рою./ Прииди́те, вси лю́дие, прииди́те, ве́рнии, поклони́мся,/ тецы́те и собери́теся,/ и псало́мски того́ воспои́м, ра́дующеся,/ и облобыза́ем че́стно мо́щи ди́внаго врача́ на́шего,/ печа́льных при́сную уте́ху и отча́янных наде́жду,/ похвалу́ земли́ Росси́йстей,/ посо́бника на враги́, и всем челове́ком засту́пника,/ и моли́твенника о спасе́нии душ на́ших.

 

И ны́не, пра́здника, глас 6:

 

Днесь собо́ри ве́рных, соше́дшеся,/ духо́вне да торжеству́ем,/ и Богоотрокови́цу, Де́ву и Богоро́дицу,/ в храм Госпо́день приводи́му, благоче́стно восхва́лим,/ предъизбра́нную от всех родо́в,/ во оби́телище всех Царя́ Христа́ и Бога́./ Де́вы, свещи́ нося́ще, предъиди́те,/ Присноде́вы чту́ще честно́е происхожде́ние;/ ма́тери, печа́ль всю отложи́вше, ра́достно спосле́дствуйте/ Ма́тери Бо́га быва́ющей и ра́дости ми́ра Хода́таице:/ вси у́бо ра́достно, е́же ра́дуйся,/ со А́нгелом возопие́м Обра́дованней,/ при́сно моля́щейся о душа́х на́ших.

 

На благослове́нии хлебо́в тропа́рь свята́го, два́жды, и пра́здника. А́ще несть бде́ния, глаго́лем тропа́рь свята́го. Сла́ва, и ны́не, пра́здника.

 

Тропа́рь свята́го, глас 4:

 

Я́ко благочести́ваго ко́рене/ пречестна́я о́трасль был еси́, блаже́нне Алекса́ндре:/ яви́ бо тя Христо́с, я́ко не́кое Боже́ственное сокро́вище Росси́йстей земли́,/ но́ваго чудотво́рца, пресла́вна и Богоприя́тна./ И днесь соше́дшеся в па́мять твою́ ве́рою и любо́вию,/ во псалме́х и пе́ниих ра́дующеся, сла́вим Го́спода,/ да́вшаго тебе́ благода́ть исцеле́ний,/ Его́же моли́ спасти́ град сей,/ и держа́ве Росси́йской Богоуго́дней бы́ти,/ и сыново́м Росси́йским спасти́ся.

 

Сла́ва, и ны́не, пра́здника, глас то́йже:

 

Днесь благоволе́ния Бо́жия предображе́ние/ и челове́ков спасе́ния пропове́дание,/ в хра́ме Бо́жии я́сно Де́ва явля́ется/ и Христа́ всем предвозвеща́ет./ Той и мы велегла́сно возопии́м:/ ра́дуйся, смотре́ния/ Зижди́телева исполне́ние.

 

На У́трени

 

На Бог Госпо́дь: тропа́рь пра́здника, два́жды. Сла́ва, свята́го, и ны́не, пра́здника.

 

По 1-м стихосло́вии седа́лен, глас 4.

 

Подо́бен: Удиви́ся Ио́сиф:

 

Ра́дуйся, я́ко вторы́й Фессало́нь в Росси́йстей земли́,/ сла́вный гра́де Влади́мире,/ и любе́зными пе́сньми вку́пе лику́й, Боже́ственная Це́рковь,/ в не́йже пречестно́е те́ло Алекса́ндра, прему́драго, блаже́ннаго/ подае́т разли́чно всем исцеле́ние./ И сего́ ра́ди возопии́м к нему́:/ моли́твами твои́ми, блаже́нне,/ исцели́ неду́ги и боле́зни на́ша/ и вся́ческих изба́ви искуше́ний/ ве́рою и любо́вию па́мять твою́ восхваля́ющих.

 

Сла́ва, и ны́не, пра́здника, глас 1.

 

Подо́бен: Ка́мени запеча́тану:

 

Свята́я святы́х, Богоро́дице, су́щи,/ досто́йно приведе́ся жи́ти во свята́я,/ я́ко одушевле́н Госпо́день киво́т/ и Свята́го Ду́ха и́стинно вмести́лище Боже́ственное, Де́во Ма́ти./ Те́мже всели́ся в Тя, И́же Отцу́ единоро́дный/ и Свято́му Ду́ху соесте́ственный,/ Твой Сын неискусому́жно,/ обоготвори́в все челове́чество.

 

По 2-й кафи́зме седа́лен, глас 3.

 

Подо́бен: Красоте́ де́вства:

 

Благода́рно зове́м вси Христо́ву уго́днику ми́лостивому,/ незло́бивому и кро́ткому,/ приле́жно моля́щеся любо́вию:/ разруши́ брань страсте́й на́ших,/ и отжени́ де́монская мечта́ния, блаже́нне,/ и моли́ Бо́га дарова́ти нам ве́лию ми́лость.

 

Сла́ва, и ны́не, пра́здника, глас 4.

 

Подобен: Яви́лся еси́ днесь:

 

Весе́лия днесь вселе́нная испо́лнися вся/ в благознамени́том пра́зднице Богоро́дицы, зову́щи:/ Та есть сень небе́сная.

 

Велича́ние:

 

Велича́ем тя,/ благове́рный кня́же Алекса́ндре,/ и чтим свято́е успе́ние твое́,/ и ны́не мо́лиши за нас/ Христа́, Бо́га на́шего.

По полиеле́и седа́лен, глас 8.

 

Подо́бен: Прему́дрости:

 

Дух Святы́й тя, блаже́нне, наста́ви/ Оте́чествие твое́ па́ствити на па́житех спаси́тельных,/ и Христо́с свети́льника тя показа́ я́ве:/ сего́ ра́ди лику́й и весели́ся со дерзнове́нием,/ я́ко сугу́быя венцы́ от Венцеда́вца прии́м.

Сла́ва, и ны́не, пра́здника:

 

Пре́жде зача́тия, Чи́стая, освяти́лася еси́ Бо́гу/ и, ро́ждшися на земли́, дар принесла́ся еси́ ны́не Ему́,/ исполня́ющи оте́ческое обеща́ние:/ в Боже́ственнем же хра́ме, я́ко су́що Боже́ственный храм,/ от младе́нства чи́сте со свеща́ми све́тлыми отдана́ бы́вши,/ яви́лася еси́ прия́телище непристу́пнаго и Боже́ственнаго све́та./ Вели́ко вои́стинну предше́ствие Твое́, еди́на Богоневе́сто и Присноде́во.

А́ще ли кто изволи́т пе́ти по́сле отда́ния пра́здника Святы́я Богоро́дицы, глаго́лет по седа́льнах, Сла́ва, и ны́не, Богоро́дичны сия́.

 

По 1-м седа́льне, Богоро́дичен:

 

Удиви́ся Ио́сиф, е́же па́че естества́ зря/ и внима́ше мы́слию, и́же на руно́ дождь, в безсе́менном зача́тии Твое́м, Богоро́дице,/ купину́, огне́м неопали́мую, жезл Ааро́нов прозя́бший./ И свиде́тельствуя, обру́чник201 Твой и храни́тель свяще́нником взыва́ше:/ Де́ва ражда́ет и по рождестве́ па́ки Де́ва пребыва́ет.

 

По 2-м седа́льне, Богоро́дичен:

 

Красоте́ де́вства Твоего́ и пресве́тлой чистоте́ Твое́й/ Гаврии́л, удиви́вся, вопия́ше Ти, Богоро́дице:/ ку́ю Ти похвалу́ принесу́ досто́йную?/ что же возъимену́ю Тя? недоумева́ю и ужаса́юся./ Те́мже, я́ко повеле́н бых, вопию́ Ти:/ ра́дуйся, Благода́тная.

По полиеле́и, Богоро́дичен:

 

О Тебе́ ра́дуется, Благода́тная, вся́кая тварь,/ А́нгельский собо́р и челове́ческий род,/ освяще́нный хра́ме и раю́ слове́сный, де́вственная похвало́,/ из Нея́же Бог воплоти́ся и Младе́нец бысть, пре́жде век Сый Бог наш:/ ложесна́ бо Твоя́ Престо́л сотвори́ и чре́во Твое́ простра́ннее Небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

 

Степе́нна, 1-й антифо́н 4-го гла́са. Проки́мен: Честна́ пред Го́сподем смерть преподо́бных Его́. Стих: Что возда́м Го́сподеви о всех, я́же воздаде́ ми. Вся́кое дыха́ние: Ева́нгелие от Матфе́я, зача́ло 43.

 

По 50-м псалме́ стихи́ра самогла́сна, глас 6:

 

Прииди́те, вси лю́дие,/ хвалу́ принесе́м блаже́нному, вопию́ще си́це:/ ра́дуйся, пресве́тлый сто́лпе, просвеща́я нас чуде́с светлостьми́;/ ра́дуйся, ро́сный о́блаче, пла́мень погаша́яй страсте́й/ и ороша́яй ве́рных мы́сли, Боже́ственный Алекса́ндре.

 

Кано́н пра́здника со ирмосо́м на 6: И свято́му два кано́на, на 8.

 

А́ще ли вне попра́зднства изво́лит настоя́тель пе́ти благове́рному кня́зю Алекса́ндру, пое́м кано́н Богоро́дице со ирмосо́м на 6, глас 2: Нетре́ну, необы́чну: (во Окто́ихе).

 

Кано́н Алекса́ндру, глас 4.

 

Песнь 1

 

Ирмо́с: Моря́ чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

 

Прии́мша в свое́м се́рдцы, Бла́же,/ Твою́ благода́ть духо́вную тве́рдо прему́драго повеле́ния/ и в ду́ши благочести́вых вложи́вшаго,/ похвала́ми даждь ублажи́ти Алекса́ндра пресла́внаго.

 

Свети́льниче многосве́тлый Росси́йския земли́,/ чудесы́, я́коже со́лнце второ́е, сия́я,/ всех нас помина́й, соверша́ющих па́мять твою́, Алекса́ндре блаже́нне.

 

Це́ркве был еси́ Христо́вы красота́, блаже́нне,/ пе́нием бо сию́ украси́л еси́, пресла́вне./ И ны́не мо́лим тя:/ свободи́ ны от вся́кия бра́ни бори́теля, пою́щия тя, Алекса́ндре.

 

Богоро́дичен: Ра́дуйся, благода́ти Исто́чниче;/ ра́дуйся, ле́ствице и дверь Небе́сная;/ ра́дуйся, свети́льниче, и ста́мно злата́я, и горо́ несеко́мая,/ Де́во, Жизнода́вца Христа́ ми́ру ро́ждшая.

 

Други́й кано́н свято́му, глас 8.

 

Песнь 1

 

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

 

Досто́йными похвала́ми воспе́ти пресла́внаго чудотво́рца/ ум и смысл да́руй ми, Христе́ Бо́же,/ я́ко да воспою́, ра́дуяся, па́мять его́.

Пе́сньми и пе́ньми духо́вными восхва́лим блаже́ннаго,/ и честну́ю его́ и многоцеле́бную ра́ку, обстоя́ще,/ любе́зно облобыза́ем, и си́це вопие́м:/ ра́дуйся, Оте́честву твоему́ пресве́тлый свети́льниче.

 

Богому́дре Алекса́ндре, а́ще тя и напосле́док лет/ новопросвеще́нная Росси́йская страна́ возрасти́,/ но дре́вних че́сти сподо́бился еси́, дарова́ние чуде́с досто́йно прие́м.

 

Богоро́дичен: Зако́н кроме́ есте́ственных, Де́во,/ родила́ еси́ Законода́вца Бо́га, Челове́ка бы́вша:/ Того́, я́ко бла́га, моли́, Всенепоро́чная, на́ша беззако́ния презре́ти.

 

Катава́сия : Христо́с ражда́ется:

 

Песнь 3

 

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Во весь мир про́йде сла́ва чуде́с твои́х, блаже́нне,/ и́миже просвети́л еси́ вселе́нную,/ от всех напа́стей избавля́я при́сно.

 

Благочести́ваго и венцено́снаго Алекса́ндра,/ соше́дшеся, по достоя́нию восхва́лим,/ я́ко чуде́с пода́теля оби́льнаго и Го́споду моля́щася о всех нас.

 

Исто́чник чуде́с гроб твой яви́ся неисчерпа́емый,/ от него́же ре́ки исцеле́ний излива́еши/ ве́рно па́мять твою́ творя́щим, блаже́нне.

Богоро́дичен: Ты еди́на на земли́ преесте́ственных благи́х Хода́таица, Ма́ти Бо́жия, была́ еси́:/ тем Ти, ра́дуйся, зове́м.

Ин

 

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ еди́не Человеколю́бче.

 

Свети́льник све́та яви́лся еси́, Алекса́ндре Боже́ственный,/ неду́гов глубо́кую тьму разруша́я всегда́/ заре́ю све́тлою чуде́с, прему́дре.

Престо́лу предстои́ши благода́ти, со все́ми А́нгелы ра́дуяся днесь/ и ми́ру исцеле́ния раздава́я бога́тство,/ спаси́ всех нас моли́твами твои́ми, блаже́нне.

 

Жития́ твоего́ све́тлость, преподо́бне,/ всем Бог я́ве показа́ возжже́нием свещи́ у гро́ба твоего́./ Те́мже прибега́ющии к тебе́ с ве́рою, вси просвеща́ются.

 

Богоро́дичен: Я́ко вои́стинну Госпо́дь воцари́ся в Ца́рствие неотпа́дающее/ и облече́ся псало́мски из Тебе́, Богома́ти, в кра́сное благоле́пие, плоть святу́ю,/ е́юже смерть прия́т и разруши́ ея́ ца́рство.

 

Седа́лен, глас 8:

 

Я́ко звезда́ многосве́тлая, от восто́ка произше́д,/ яви́лся еси́ све́тлаго ра́ди жития́ твоего́/ и чистоты́ душе́вныя и теле́сныя сосу́д Свята́го Ду́ха;/ и сего́ ра́ди по успе́нии твое́м от мно́гих лет/ во гро́бе нетле́нны обрето́шася святы́я твоя́ мо́щи,/ от ни́хже источа́еши ре́ки чуде́с исцеле́ний ве́рно зову́щим ти:/ ра́дуйся, благове́рный вели́кий кня́же Алекса́ндре.

 

Сла́ва и ны́не, пра́здника, глас 4:

 

Непоро́чная А́гница и нескве́рный черто́г,/ в дом Бо́жий Богоро́дица Мариа́м с весе́лием вво́дится пресла́вно,/ Ю́же А́нгели Бо́жии дорино́сят ве́рно,/ и вси ве́рнии блажа́т при́сно/ и благода́рственно пою́т Ей непреста́нно ве́лиим гла́сом:/ на́ша сла́ва и спасе́ние Ты еси́, Всенепоро́чная.

 

А́ще ли несть попра́зднства, глаго́лем: Сла́ва, и ны́не, Богоро́дичен:Я́ко Всенепоро́чная Неве́ста Творцу́:

 

Песнь 4

 

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Кто любо́вь твою́ и ми́лость ко всем челове́ком, па́че же к ни́щим изглаго́лет?/ и по сме́рти у́бо, я́ко жив, просте́рл еси́ ру́ку твою́/ и прия́л еси́ от иера́рха сви́ток грехо́в проще́ния.

 

Днесь день свята́го пра́зднственный/ мно́гия созыва́ет на весе́лие духо́вное, и трапе́зу,/ и пи́щу нетле́нныя жи́зни Боже́ственнаго наслажде́ния.

 

К Боже́ственному све́ту ны́не преста́вился еси́,/ све́та сын возлю́блен быв,/ в ра́дости и красоте́ с ли́ки А́нгельскими ны́не ра́достно лику́еши, блаже́нне.

 

Богоро́дичен: Све́та Твоего́ блиста́ньми озари́, Отрокови́це Всенепоро́чная,/ е́же в нощи́ страсте́й искуше́нии одержи́мое се́рдце мое́,/ пра́вды Со́лнце Свет возсия́вши.

 

Ин

 

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Заре́ю Трисо́лнечныя благода́ти сия́я,/ све́тле твой пра́здник творя́щих озари́/ и страстна́го омраче́ния де́монскаго изба́ви, Алекса́ндре пресла́вне.

 

Источи́л еси́ ре́ки чуде́с, блаже́нне,/ ве́рных напая́ющия сердца́/ и му́тныя во́ды многобо́жия изсуша́ющия.

Архиере́и и свяще́нницы, мона́си и прости́и,/ и ста́рцы со ю́нотами, и весь во́зраст, све́тло предъигра́йте/ и па́мять блаже́ннаго в пе́снех возвели́чите.

 

Богоро́дичен: Име́ю Тя помо́щницу и не постыжду́ся, Пречи́стая Ма́ти Бо́жия,/ име́ю Тя предста́тельницу и враг мои́х не убою́ся.

 

Песнь 5

 

Ирмо́с: Ты, Го́споди, мой Свет,/ в мир прише́л еси́,/ Свет святы́й, обраща́яй из мра́чна неве́дения/ ве́рою воспева́ющия Тя.

Досточу́дная и пресла́вная па́мять твоя́/ возсия́ в Росси́йстей земли́, блаже́нне,/ и ра́достно ве́рных весели́т собо́ры.

 

Отверзо́шася тебе́ две́ри Еде́мския,/ и несказа́нен свет и Трисия́нен возси́я, блаже́нне,/ в неподви́жнем Ца́рствии Небе́снем,/ и пра́ведных весе́лие прия́л еси́ ра́дуяся.

 

Ны́не Алекса́ндр вели́кий, сиро́т и вдов ми́лостивый печа́льник,/ Оте́чествие свое́ и вся вку́пе я́ве созыва́ет:/ прииди́те, собра́вшеся, я́ко о́бщему засту́пнику све́тло торжеству́ем.

 

Богоро́дичен: Сый в зра́це Бо́жии,/ Пребоже́ственный всели́ся во чре́во Твое́,/ в зрак мой облече́ся Госпо́дь, Пренепоро́чная.

 

Ин

 

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Прия́л еси́ исцеле́ний благода́ть, Алекса́ндре сла́вне,/ су́щим в беда́х подава́еши здра́вие твои́м заступле́нием;/ тем ра́тных де́рзость низложи́ и ми́ру подава́й чудеса́.

 

Я́ко звезда́ светла́ яви́ся непреле́стная,/ плене́нных свободи́тель, и ни́щих богати́тель,/ и боля́щих врач, Руси́ побо́рник и гра́да на́шего утвержде́ние.

 

Яви́ся в Росси́йстей земли́ чудотво́рец, пресла́вен Алекса́ндр блаже́нный,/ я́ко всесве́тел свети́льник сия́я во всем ми́ре/ и во мра́це страсте́й озаря́я вся.

 

Богоро́дичен: Ме́ртвости и тли изба́вила еси́ челове́чество,/ естество́м бо Жизнода́вца и Бо́га без се́мене родила́ еси́, Де́во Всенепоро́чная,/ на благоде́яние восхваля́ющих Тя ве́рно.

 

Песнь 6

 

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

 

Твоя́ свята́я па́мять, Алекса́ндре, вселе́нную весели́т,/ созыва́ющи ве́рныя в честны́й храм твой,/ в не́мже ны́не ра́достию совоку́пльшеся, тя мо́лим:/ язы́ческаго наше́ствия изба́ви лю́ди твоя́, пресла́вне.

 

Весе́лия днесь вся испо́лнися Росси́йская земля́,/ в наро́читый день пра́здника пресла́внаго чудотво́рца, Алекса́ндра блаже́ннаго:/ соблюда́ет бо Оте́чество свое́ вы́ну ненаве́тно.

 

Сиро́т и вдов засту́пника и в беда́х непобори́маго помо́щника,/ пе́сньми Алекса́ндра ублажи́м, сла́вяще:/ пра́зднующих бо па́мять его́ ве́село от бед избавля́ет и скорбе́й.

 

Богоро́дичен: Святы́й Иису́с всели́ся во утро́бу Твою́,/ во святы́х, Де́во, почива́яй/ и прославля́яй ве́рою и́стинною сего́, Отрокови́це, сла́вящия.

Ин

 

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся:/ к Тебе́ бо возопи́х, и услы́ши мя,/ Бо́же спасе́ния моего́.

 

От пречестна́го ко́рене изра́сл еси́ ветвь, пресла́вне,/ и благоче́стно на земли́ пожи́л еси́, и прия́телище чи́сто Ду́ха яви́лся еси́,/ освяща́я ве́рою притека́ющия ти, блаже́нне.

 

Доброде́телем поло́жника и благочести́вым князе́м удобре́ние,/ Це́рковь сла́вит тя и воспева́ет, блаже́нне:/ моли́твами твои́ми пода́ждь чту́щим любо́вию до́блести твоя́ и боре́ния/ лю́тых прегреше́ний оставле́ние.

И́же в беда́х и в ско́рбех су́щии, к ра́це твое́й притека́юще,/ прие́млют честна́я дарова́ния, от в тебе́ живу́щия благода́ти:/ ты бо ми́ру при́сно источа́еши исцеле́ние.

 

Богоро́дичен: Су́щи Пресвяты́й храм, Богоро́дице,/ Исто́чник родила́ еси́, Пренепоро́чная, неисчерпа́емый, Влады́чице.

 

Конда́к, глас 8.

 

Подо́бен: Я́ко нача́тки:

 

Я́ко звезду́ тя пресве́тлу, почита́ем,/ от восто́ка возсия́вшую и на за́пад прише́дшую:/ всю бо страну́ сию́ чудесы́ и добро́тою обогаща́еши/ и просвеща́еши ве́рою чту́щия па́мять твою́, Алекса́ндре блаже́нне./ Сего́ ра́ди днесь пра́зднуем твое́ успе́ние, лю́дие твои́ су́щии:/ моли́ спасти́ Оте́чество твое́ и вся притека́ющия к ра́це моще́й твои́х/ и ве́рно вопию́щия ти:/ ра́дуйся, гра́ду на́шему утвержде́ние.

 

Икос:

 

Ве́лий чудотво́рец яви́лся еси́ Росси́йския земли́, блаже́нный Алекса́ндре,/ неви́димо Христо́вы лю́ди посеща́я и исцеле́ния подава́я бога́тно/ всем от души́ приходя́щим и согла́сно вопию́щим си́це:/ ра́дуйся, сто́лпе пресве́тлый, просвеща́я нас чуде́с светлостьми́;/ ра́дуйся, велехва́льнаго краля́ победи́вый посо́бием Бо́жиим;/ ра́дуйся, свободи́вый град Псков от неве́рных;/ ра́дуйся, лати́нская уче́ния презре́вый и преле́сть их в ничто́же вмени́вый;/ ра́дуйся, я́ко восприя́л еси́ в тле́нных ме́сто нетле́нная;/ ра́дуйся, Све́та Непристу́пнаго зри́телю;/ ра́дуйся, я́ко лику́еши со А́нгелы;/ ра́дуйся, о́блаче ро́сный, ве́рных мы́сли ороша́яй;/ ра́дуйся, те́мных страсте́й прогони́телю;/ ра́дуйся, Росси́йстей земли́ засту́пниче;/ ра́дуйся, гра́ду на́шему заступле́ние.

 

Песнь 7

 

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

 

Днесь Це́рковь Христо́ва, пра́зднующи Алекса́ндрово торжество́, бы́вшее о Бо́зе,/ соше́дшимся вои́стинну источа́ет исцеле́ние,/ приле́жно моля́щимся и любо́вию пою́щим его́.

 

Во всех страна́х произы́де веща́ние:/ я́ко на́шего гра́да яви́ся чудотво́рец пресла́вен,/ источа́я исцеле́ний мно́жество, всем прося́щим те́пле.

Днесь весе́лия исполня́ется храм Бо́га на́шего,/ в не́мже лежа́т честны́я мо́щи блаже́ннаго,/ и вси притека́ющии облобыза́ют со стра́хом святу́ю раку пресла́внаго и прие́млют исцеле́ние.

 

Богоро́дичен: Вы́шняго освяще́нное Бо́жие селе́ние, ра́дуйся,/ Тобо́ю бо даде́ся ра́дость, Богоро́дице, вопию́щим Ти:/ благослове́на Ты в жена́х еси́, Всенепоро́чная Влады́чице.

 

Ин

 

Ирмо́с: От Иуде́и доше́дше, о́троцы,/ в Вавило́не иногда́/ ве́рою Тро́ическою/ пла́мень пе́щный попра́ша, пою́ще:/ отце́в Бо́же, благослове́н еси́.

 

Я́ко звезда́, сия́я кра́сно, блаже́нне,/ заре́ю доброде́телей и мно́гим бысть просвеще́ние./ Тем и нас просвети́, вопию́щих ти:/ ра́дуйся, Алекса́ндре благоче́стне.

 

Ны́не, сте́кшеся от всех стран и градо́в,/ свяще́нницы, и мона́си, и прости́и, бога́тии и убо́зии/ и вку́пе вси, ра́дующеся, хвалу́ воздади́м Христу́/ и уго́днику Его́, Алекса́ндру пресла́вному.

 

Чудесы́ у́бо твои́ми, я́ко цвет, процве́л еси́, блаже́нне,/ и исцеле́ния подава́еши притека́ющим в кров твой, му́дре и досточу́дне.

Богоро́дичен: От де́вственных ложе́сн Твои́х вопло́щся, Бог яви́ся на спасе́ние на́ше./ Те́мже Тя Ма́терь ве́дуще, Богоро́дице, правове́рно вопие́м Ему́:/ оте́ц на́ших Бо́же, благослове́н еси́.

 

Песнь 8

 

Ирмо́с: Ру́це распросте́р, Дании́л/ львов зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

 

А́нгельстии чи́ни хва́лят тя, пресла́вне,/ и челове́честии ро́ди пою́т непреста́нно,/ творя́ще ве́рно па́мять твою́, Алекса́ндре великоимени́те.

Тебе́ в чудесе́х сла́вна Росси́йским страна́м показа́ Бог, Алекса́ндре,/ и украси́ тя Небе́сными дарми́:/ Того́ моли́ поми́ловати всех нас.

 

Побе́ды истинноимени́т, вои́стинну ве́рным лю́дем в беда́х/ и кре́пок помо́щник яви́лся еси́, Алекса́ндре блаже́нне.

Богоро́дичен: Свяще́нный Тя проро́к благообра́зно пропове́да,/ Дверь, и Го́ру, и Сень, и Зе́млю святу́ю, и О́блак све́та,/ из Него́же во тьме су́щим возсия́ Со́лнце, Де́во, Еди́н Светода́вец.

 

Ин

 

Ирмо́с: Богоглаго́ливии о́троцы в пещи́,/ со огне́м пла́мень попира́юще, по́яху:/ благослови́те, дела́ Госпо́дня, Го́спода.

 

Я́ко у́тро, я́ко день све́тлый, твой пра́здник яви́ся, просвеща́я на́ша сердца́/ и всех, с ве́рою восхваля́ющих тя, Алекса́ндре пресла́вне.

День спасе́ния и пра́здник весе́лия наста́,/ стеце́мся, ве́рнии, очи́стивше вку́пе ду́ши и телеса́:/ се бо нас призыва́ет Алекса́ндр Боже́ственный.

 

Струя́ происхо́дит по моли́тве твое́й, Алекса́ндре, исцеле́ний вся́ческих,/ и омыва́ет скве́рны страсте́й, и гное́ния лю́тых очища́ет,/ и всех ве́рных напая́ет сердца́, любо́вию чту́щих тя, пресла́вне.

 

Богоро́дичен: О́бразы нося́щи дре́вле Рождества́ Твоего́, Де́во Ма́ти,/ пещь у́бо ю́ношей не опали́,/ та́кожде и о́гнь Боже́ственный утро́бы Твоея́, Чи́стая.

 

Песнь 9

 

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

 

Красе́н те́лом и душе́ю, и благоче́стием сия́я, сла́вне, Боже́ственнаго ра́зума,/ орга́н был еси́ Свята́го Ду́ха:/ и по сме́рти у́бо к безсме́ртной жи́зни/ и неконча́емому блаже́нству преше́л еси́, ра́дуяся, Алекса́ндре Богому́дре.

 

Я́ко светоза́рное, блаже́нне, со́лнце, возсия́в от за́пада,/ и всю заря́ми благоче́стия Росси́йскую зе́млю просвети́л еси́,/ и отгна́л еси́ тьму глубо́кую ерети́чествующих, Алекса́ндре пресла́вне.

 

Твое́ свято́е преставле́ние днесь све́тло пра́зднуем:/ испо́лни ра́дости и весе́лия восхваля́ющия тя, Алекса́ндре великоимени́те.

 

Богоро́дичен: Све́том мя Твоего́ милосе́рдия во тьме неразу́мия лежа́щаго озари́,/ еди́на Светода́вца ро́ждшая,/ Изба́вителя и Бо́га, святы́х венча́вшаго.

Ин

 

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бысть простра́ннейшее небе́с:/ тем Тя, Богоро́дицу,/ А́нгелов и челове́к чинонача́лия велича́ют.

 

Ве́лий щит и кре́пость в Росси́йстей земли́, Алекса́ндре, обре́лся еси́,/ правосла́вному же наро́ду на́шему похвале́ние и сла́ва во всех язы́цех./ И ны́не мо́лимся ти:/ сохраня́й Оте́чество твое́ от язы́ка чужда́го.

 

Незаходи́маго све́та луча́ми, во тьме су́щим сия́я, сла́вне,/ к просвеще́нию весе́лия наста́ви ны, пою́щия тя.

 

Блаже́нный Алекса́ндре, ка́ко тя возмо́жем воспе́ти досто́йно?/ Не мо́жет бо язы́к челове́ческий изглаго́лати твоя́ разли́чная исцеле́ния/ и мно́гая дарова́ния всем челове́ком.

 

Богоро́дичен: Я́ко у́тро, те́мным и блудя́щим, Де́во,/ возсия́ пра́вды Со́лнце, Христо́с,/ Его́же на рука́х Твои́х носи́ла еси́, Чи́стая.

 

Свети́лен.

 

Подо́бен: Жены́, услы́шите:

 

Слы́шана бысть во всех страна́х превели́кая сла́ва твоя́,/ и тогда́ жены́ Моави́тския страша́ху де́ти своя́ гро́зным твои́м и́менем./ И ны́не, блаже́нне, враги́ на́ша неви́димо устраша́й,/ ополча́ющияся на Христолюби́вое твое́ во́инство.

 

Сла́ва, и ны́не, пра́здника.

 

А́ще ли по отда́нии пра́здника пое́тся свято́му, глаго́лем: Сла́ва, и ны́не,

Богоро́дичен сей:

 

Сове́та Вели́каго А́нгела О́тча, родила́ еси́ Христа́,/ препе́тая Отрокови́це, Царя́ сла́вы:/ Его́же Крест, апо́столи пропове́давше, просвети́ша язы́ки/ и научи́ша Тя, Богоро́дицу, сла́вити и покланя́тися Твоему́ Рождеству́.

 

На хвали́тех стихи́ры, глас 8.

 

Подо́бен: О, пресла́внаго чудесе́:

 

О, пресла́внаго чудесе́!/ сия́нием Ду́ха Свята́го просве́щся, Алекса́ндре Богому́дре,/ уче́ния лати́нская презре́в, и пре́лесть их обличи́в,/ и саме́х укори́в, и чу́жди ве́ры пра́выя наре́к,/ и де́рзость их в ничто́же вмени́в./ И сего́ ра́ди от Христа́ Бо́га прия́л еси́ воздая́ние в Ца́рствии Небе́снем,/ со А́нгелы ликовствова́ние/ и с пра́ведными ра́дование;/ и ны́не моли́ спасти́ся душа́м на́шим.

 

О, ка́ко возмогу́ досто́йно похвали́ти/ или́ я́сно изглаго́лати пресла́вная чудеса́/ блаже́ннаго и сла́внаго Алекса́ндра?/ подае́т бо разли́чная исцеле́ния/ не то́кмо приходя́щим к ра́це моще́й его́,/ но и в да́льних страна́х/ призыва́ющих его́ никогда́же оставля́ет./ Тем и повсю́ду хва́льно и́мя его́,/ и ны́не мо́лит умири́ти мир/ и спасти́ всех нас.

 

О, ка́ко возмо́жем воспе́ти блаже́ннаго Алекса́ндра,/ я́ко апо́стола и я́ко пропове́дника?/ вся́ко у́бо ерети́ческое нече́стие попра́л есть,/ свое́ же Оте́чество до́бре упра́вив и соблюде́,/ хра́мы разоре́ныя воздви́гнув, пе́ния испо́лни/ и распуже́ныя лю́ди собра́ в до́мы своя́,/ и ни́щим, и сирота́м, и вдова́м бысть печа́льник,/ и в беда́х засту́пник./ И ны́не мо́лит о спасе́нии душ на́ших.

 

Сла́ва, глас 2:

 

Прииди́те, вси язы́цы,/ восплещи́те рука́ми, ликовству́юще,/ прииди́те, вси Росси́йстии лю́дие,/ свяще́нницы, и мона́си же, и прости́и,/ духо́вне свесели́мся в наро́читом пра́зднице блаже́ннаго Алекса́ндра,/ и многоцеле́бную его́ ра́ку, обстоя́ще, любе́зно облобыза́ем,/ и того́, я́ко цве́ты, пе́сньми и хвала́ми увязе́м, реку́ще:/ ра́дуйся, земли́ Росси́йстей похвало́;/ ра́дуйся, сла́вному гра́ду Влади́миру утвержде́ние;/ ра́дуйся, наро́ду правосла́вному помо́щниче;/ ра́дуйся, Оте́честву твоему́ заступле́ние/ и моли́твенниче о душа́х на́ших.

 

И ны́не, пра́здника, глас 2:

 

Днесь в храм приво́дится Всенепоро́чная Де́ва,/ во оби́телище Всецаря́ Бо́га/ и всея́ жи́зни на́шея Пита́теля;/ днесь чисте́йшая святы́ня,/ я́ко триле́тствующая ю́ница,/ во свята́я святы́х вво́дится./ Той возопи́им, я́ко А́нгел:/ ра́дуйся, еди́на в жена́х Благослове́нная.

 

Славосло́вие вели́кое. И отпу́ст.

 

На Литурги́и

 

Блаже́нны пра́здника, песнь 5-я на 4 и свята́го песнь 6-я на 4. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех,/ я́же воздаде́ ми. Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода,/ в за́поведех Его́ восхо́щет зело́. Стих: Си́льно на земли́/ бу́дет се́мя его́. Ева́нгелие от Матфе́я, зача́ло 43. Прича́стен: В па́мять ве́чную бу́дет пра́ведник: