Сайт посвященный церковной истории

Пути

Великого Новгорода

История и

современность

Яндекс.Метрика

Перепечатка в интернете разрешена при условии наличия активной ссылки на сайт " Пути Великого Новгорода: История и современность".

Святитель Евфимий                                                                                                           Святитель Иона

Святитель Иоанн,

архиепископ Новгородский (1186)

 

Празднование 20 (7) сентября и местное - воскресение после праздника иконы Божией Матери Знамение

Тропарь, глас 8.

 

Днесь светло красуется славнейший великий Новград, имея мощи твоя в себе, святителю Иоанне, яко солнечныя лучи испущающия, и подающия исцеления, притекающим с верою к тебе. Молися Христу Богу избавити град сей невредим, от варварскаго пленения, и междоусобныя брани, и огненнаго запаления, святителю богомудре и чудоносче, небесный человече и земный ангеле; да сошедшеся любовию в память твою, светло празднуем, в песнех и пениих радующеся, и Христа славяще, тебе таковую благодать даровавшаго исцелений, и великому Новуграду заступление и утверждение.

 

Кондак, глас 4.

 

Возвеселися явленно честная Церковь Христова, в память днесь приснословущаго святителя Иоанна, от великаго Новаграда возсиявшаго, и всю страну удивившаго преславными чудодеянии, всеми добродетельми украсившагося. И по преставлении бо честное тело его обретеся нетленно, источающее велия чудеса. Темже зовем ему: о, всеблаженне! Моли Христа Бога непрестанно о всех нас. 

 

Величание.

 

Величаем тя, святителю отче Иоанне, и чтим святую память твою, ты бо молиши за нас Христа Бога нашего.

 

Молитва, читаемая в Новгородском Софийском соборе.

 

О, всехвальный святителю Христов и чудотворче Иоанне! Приими сие малое моление от нас грешных, к тебе прибегающих, и теплым твоим предстательством умоли Господа и Бога нашего Иисуса Христа, яко да призрев на ны милостивно, дарует нам согрешений наших вольных и невольных прощение, и по велицей Своей милости избавит нас от бед, печалей, скорби и болезней  душевных и телесных, обдержащих нас; да подаст земли плодоносие, и вся, яже на пользу настоящаго жития нашего потребная; да дарует нам скончати житие сие привременное в покаянии, и да сподобит нас грешных и недостойных Небеснаго Царствия Своего, со всеми святыми славити Его безконечное милосердие, со Безначальным Его Отцем и Святым и Животворящим Его Духом, во веки веков. Аминь.