Перепечатка в интернете разрешена при условии наличия активной ссылки на сайт " Святая София и Великий Новгород: История и современность".
Святитель Евфимий, архиепископ Новгородский
Тропарь,глас 4.
Избран быв Богови от юности, святителю Евфимие, и сего ради архиерейства саном почтен быв, упасл еси люди, иже тебе Богом врученныя; темже и по преставлении чудес дарования от Господа приял еси исцеляти различныя недуги. Того моли о нас, совершающих честную память твою, да тебе вси непрестанно ублажаем.
Кондак,глас 8.
Яко архиереем сопрестольник и святителем изрядный поборник был еси, святителю Евфимие, не престай сохраняя отечество твое, град же и люди, иже тебе верою почитающия и честным мощем твоим покланяющияся, да велегласно тебе вси вопием: радуйся, святителю Богомудре!
Величание.
Величаем тя, святителю отче Евфимие, и чтем святую память твою, ты бо молиши за нас Христа Бога нашего.
Молитва, читаемая в Никольском Вяжищском монастыре.
Отче святителю Евфимие! Ты от юности твоея Христа возлюбил еси, и, благодатию Его укрепляемь, вся плотская мудрования умертвил еси, чистым же житием и кротким нравом Господеви угодил еси, и по благодати Его на престоле святительства подвизаяся, явился еси пастве Христове Великаго Новаграда пастырь добрый, душу твою о стаде твоем полагаяй. Темже и по смерти твоей прослави тя Пастыреначальник Христос подаянием чудес, от тебе истекающих, образ добродетельнаго жития в тебе нам показуя. Темже и аз грешный и унылый, (к раце мощей твоих припадая), молюся тебе усердно: даждь ми руку помощи,воздвигни мя молитвами твоими из глубины греховныя; се бо волнами страстей плотских и иными тьмочисленными житейскими треволнении обуреваюся. Буди убо мне многогрешному теплый ко Христу предстатель и молитвенник, да и аз, от потопления греховнаго избавлен, ко пристанищу непорочнаго жития благодатию Христовою достигну, и чистым житием прославлю Спасителя моего, кровию Своею мене искупившаго; и тако житие скончав, получу жизнь вечную во Царствии Небеснем, идеже славится пречестное и великолепое имя Отца и Сына и Свягаго Духа, ныне и присно и во веки веков. Аминь.
