Кликни на квадрат справа, чтобы открыть вкладки сайта
Перепечатка в интернете разрешена при условии наличия активной ссылки на сайт " Святая София и Великий Новгород: История и современность".
НОВГОРОДСКАЯ ПЕРВАЯ ЛЕТОПИСЬ МЛАДШЕГО ИЗВОДА
(Комиссионный, Академический, Толстовский списки)
В лѣто 6635 [1127]. Заложи церковь камену святого Иоанна Всеволод в Новѣгородѣ, на Петрятинѣ дворѣ, въ имя сына своего. В то же лѣто паде метыль густъ по земли и по водѣ и по хоромомъ по двѣ нощи, а по 4 дни. Того же лѣта- обложи игуменъ Антонии в Новѣгородѣ тряпезницю камену. В том же лѣтѣ вода бяше велика въ Волховѣ, а снѣгъ лежа /л.101об./ до Яковля дни; а на осенъ поби морозъ все обилье; и бысть голод чресъ зиму, рожь осминка по полугривнѣ .
В лѣто 6636 [1128]. Преставися игуменъ Кюрьякъ святого Георгиа. Того же лѣта преставися Иоанн, сынъ Всеволожь, внукь Мьстиславль, априля въ 16. В то же лѣто даша посадничьство в Новѣгородѣ Завиду Дмитровичю. Того же лѣта о лютѣ бяше: ржи осминка по гривнѣ, и ядяхут людие листъ липовыи, кору березову, инии молиць истолъкше, мятуче с пелми и съ соломою; инии ушь, мох, конину; и тако другъ съ другомъ падаше мертвъ от глада, трупие по улицамъ, по торгу, по путемъ, всюду; и наяша наимитовъ возити мертвых из города; понеже бы смрады, нѣлзѣ вылѣсти. Туга и бѣда на всѣх, отець и мати чадо свое всажаше даромъ гостемъ, и ово их изомроша, а друзии разидошася по чюжимъ землямъ. И тако по грѣхомъ погыбе земля наша. В то же лѣто вода бысть велика въ Волховѣ, и хоромъ много разъноси. И князь Полочькыи Борисъ Всеслалич умре; и Завидъ Дмитрович посадникъ новгородчькыи умре.
В лето 6637 [1129] Прииде ис Кыева Данила посадницать Новугороду.
В лѣто 6638 [1130]. Иде Всеволод с новогородци на Чюдь /л.102./ зимѣ, в говѣние, и самых исѣче, а хоромы пожже, а жены и дѣти приведе домовь. И в том же лѣтѣ ходи къ отцю Кыеву. В то же лѣто концаша церковь святого Иоанна. Того же лѣта, идущи изъ заморья гость, потопе лодѣи 7, и сами истопоша и товаръ, а друзии вылѣзоша, нь нази; а из Дони приидоша здрави. Того же лѣта отвержеся архиепископъ Иоанн новгородчкыи, сѣдѣ лѣт 20, и поставиша архиепископа Нифонта, мужа свята и зѣло боящася 6 бога; и прииде Новугороду мѣсяца генваря въ 1 день, на святого Василья, на обѣднюю. А Петрилу даша иосадничьство в Новѣгородѣ.
В лѣто 6639 [1131]. Бысть знамение въ солнци, в вечернюю годину, марта въ 30. В то же лѣто, на зиму, иде Всеволод на Чюдь; и створися пакость велика, и много добрых мужь избиша въ Клинѣ новгородцовъ, генваря въ 23, в суботу. Того же лѣта Антона постави игуменомъ архиепископъ Нифонтъ.
В лѣто 6640 [1132]. Преставися Мьстиславъ Володимириць в Киевѣ, въ 14 априля; а Ярополкъ сѣде на столѣ, братъ Мьстиславль. В то же лѣто ходи Всеволодъ в Русъ Переяславлю, повелѣниемъ Ярополцимъ, а цѣловавъ крестъ к новгородцомъ, яко «хощю у вас умрети». И рече Юрги и Андрѣи: «се Ярополкъ, брат наю, и по смерти своеи /л.102об./ хощеть дати Киевъ Всеволоду, братану своему»; и выгониста ис Переяславля. И прииде опять Новугороду; и бысть въстань велика в людех; и приидоша плесковици и ладожанѣ Новугороду, и выгониша князя Всеволода из города; и пакы, сдумавше, въспятиша и опять Устьяхъ; а Мирославу даша посадницать въ Плесковѣ, а Рагуиловѣ в Ладозѣ.
В лѣто 6641 [1133]. Бысть знамение въ солнци пред вечернею. В том же лѣтѣ обновиша мостъ чресъ Волхово, рушивше; и церкви срубиша 2 древяны на Торговищи: святыя Богородица и святого Георгиа, при князи Всеволодѣ. Того же лѣта, на зиму, иде Всеволодъ с новгородци на Чюдь, и взя город Гюргевъ, на память святого Микифора, февраля въ 9.
В лѣто 6642 [1134]. Почаша молвитѣ о сужальстѣи воинѣ новгородци, и убиша муж свои и вергоша с мосту в суботу пянтикостьную.
Того же лѣта погорѣ Торговыи полъ, от ручья Плотничкаго до конець Холма, якоже преже бяше погорѣлъ; а церквии честных 10 сгорѣ, августа въ 4. Того же лѣта ходи Всеволод с новгородци, хотя брата своего посадити в Суждалѣ, и воротишася на Дубнѣ опять; и на том же пути отъяша посадничьство у Петрплѣ и даша Иванкови Павловичю. /л.103./ А Изяславъ иде къ Кыеву; и раздрася вся земля Руская. Того же лѣта порубиша новгородцевъ за моремъ в Дони. Иде Исаия игуменъ с посломъ в Киевъ, и прииде опять с митрополитом Михаиломъ Новугороду, мѣсяца декабря въ 9. И в то же лѣто, на зиму, иде Всеволод на Суздаль ратью, и вся новгородчкая область, мѣсяца декабря въ 31; и сташа дние злѣи: мразъ, въялица, страшно зѣло. И бишася на Жданѣ горѣ, и много ся зла створи: и убиша посадника новгородчкаго Иванка, мужа зѣло храбра, мѣсяца генваря въ 26, и Петрила Микулиница, и много добрых мужь, а суждалець болши; и створше миръ, и приидоша опять. И пустиша митрополита Кыеву, мѣсяца февраля въ 10, в мясопустную недѣлю, а на Суждаль идуще, не пустиша его, а онъ молвяше имъ: «не ходите, мене богъ послушаеть». И, пришедши, даша посадничьство Мирославу Гюрятиничю.
В лѣто 6643 [1135]. Ходи Мирославъ посадникъ из Новагорода мирить киянъ с черниговци, и прииде, не успѣвъ ничто же: силно бо възмутилася земля Руская; Ярополкъ к собѣ зваше новгородцовъ, а Черниговьскыи к собѣ; и бишася, и поможе богъ Олговичю с черниговьци, и многы /л.103об./ кыянѣ овы изсѣце, а другыя изимаша руками, мѣсяца августа. И не то бяше зло, нь паче болши почаста вои копити и Половци и вся Русь. В то же лѣто заложи в Новѣгородѣ князь Всеволод со архиепископомъ Нифонтомъ церковь камену святыя Богородица на Торговищи. Того же лѣта Ирожьнѣтъ заложи церковь святого Николы на Яковли улицѣ. В то же лѣто, на зиму, иде в Русь архиепископъ новгородчкыи Нифонтъ с лучьшими мужи и заста кыянѣ с черниговци стояще противу себѣ, множество вои; и божиею волею смиришася Мирославъ преставися до владыкы, генваря въ 28; а епископъ прииде февраля въ 4; а посадничьство даша Костянтину Микулиницю.
В лѣто 6644 [1136]. Новгородци призваша плесковиць и ладожанъ и сдумаша, яко сгонити князя своего Всеволода, и всадиша и въ епископль дворъ с женою и сдѣтьми и с тѣщею, мѣсяца маия въ 28; и сторожѣ стрежаху въ день и нощь 30 муж съ оружиемъ. И сѣдѣ 2 мѣсяца, и пустиша из города июля въ 15, а Володимира, сына его, прияша. А се вины его творяху: 1, не блюдет смердъ; 2, «чему хотѣлъ еси сѣсти въ Переяславли»; 3-е, «ѣхалъ еси с полку предѣ всѣх, а того много; на початыи велѣвъ ны ко Всеволодку /л.104./ приступити, а пакы отступити велит»; и не пустиша его, донелѣже инъ князь будеть. Тогда же сгорѣ церкви святого Въскресениа в манастырѣ.
В то же лѣто прииде Новугороду киязь Святославъ Олговиць ис Чернигова, от брата Всеволодка, мѣсяца июля въ 19, на сборъ святыя Еуфимиа. Том же лѣтѣ убиша Юрга Жирославица и с мосту свергоша. В то же лѣто святиша церковь святого Николы великымъ священиемъ, въ 5 декабря. В то же лѣто оженися Святославъ Олговиць в Новѣгородѣ, и вѣнцася съ своими попы у святого Николы; а владыка Нифонтъ его не вѣнца, ни попомъ, ни чернцмъ не да на свадбу ити, глаголя: «не достоить ти ея поняти». В то же лѣто стрѣлиша князя милостьницѣ Всеволожи, но живъ бысть.
В лѣто 6645 [1137].Вперёдю мѣсяца марта въ 7, бѣжа Костянтинъ посадникь ко Всеволоду, инѣхь добрых мужь нѣколко; и вдаша посадничьство Якуну Мирославицю въ Новѣгородѣ. В то же лѣто прииде князь Мьстиславич Всеволод въ Плесковъ, хотя сѣсти в Новѣгородѣ опять на столѣ своем, позванъ отаи новгородчкыми мужи и плесковици, приятели его: «поиди, княже, тебе хотять опять». И яко услышано бысть се, яко Всеволод Плесковѣ 6 /л.104об./ с братом Святополкомъ, и мятежь бысть великъ в Новѣгородѣ: не въсхотѣша людье Всеволода; и побѣгоша друзии къ Всеволоду Плескову, и взяша на розъграбление домы их, Костянтинъ, Нѣжатинъ, инѣхъ много, и еще же ищуще то, кто Всеволоду прияеть боляръ, то имаша на них с полторѣ тысяцѣ гривенъ, и даша купцѣ крутитися на воину; досягоша и не виноватых. Потом же Святославъ Олговиць совокупи всю землю Новгородчкую, и брата своего Глѣбька, куряны с Половци, идоша на Плесковъ прогонити Всеволода. И не покорѣшася плесковици имъ, ни выгнаша от себе князя, но бяхуть ся устреглѣ, засѣклѣ осѣкы всѣ; и сдумавше князь и людье на пути, въспятившеся на Дубровнѣ, и еще рекше: «не проливаите крови съ своею братьею, неглѣ богъ како управит своимъ промысломъ». Тогда же преставися князь Всеволод Мьстиславиць мѣсяца февраля въ Плесковѣ, и яшася плесковици по брата его Святополка; и не бѣ мира с ними, ни суздалци, ни смолняны, ни с полочаны, ни с кыяны. И стоя все лѣто осминка великая по 40 рѣзанъ.
В лѣто 6646 [1138]. Мѣсяца марта въ 9, на 40 святыхъ, бысть громъ велии, яко слышахомъ вси /л.105./ чисто, в ызъбѣ сѣдяще. В то же лѣто выгнаша князя Святослава Олговица из Новагорода, мѣсяца априля въ 17, сѣдѣвша два лѣта безъ 3 мѣсяць. И пакы в то же лѣто слашася по Юрга Володимириця Суздалю; а въ 23 того же мѣсяца положиша А людье: солгаша бо, яко Святополкъ у города со плесковици; и выступиша весь град къ Синилищю, и не бысть ничтоже, а Святославлюю прияша в Новѣгородѣ с лучьшими мужи, а самого Святослава яша на пути смолнянѣ и стрѣжаху его на Смядынѣ в манастырѣ, якоже и жену его в Новѣгородѣ у святои Варварѣ в манастырѣ, ждущу Ярополку оправы съ Всеволодкомъ. В то же лѣто вниде князь Ярославъ, сынъ Юргевъ, внукъ Володимирь, и Суздаля в Новъгород на столъ, мая въ 10; и съ плесковици смиришася. Того же лѣта преставися в Киевѣ князь Ярополкъ, и сѣде на столѣ брат его Вячеславъ.
В лѣто 6647 [1139]. Прииде князь Юрги из Суздаля къ Смоленьску и зваше новгородцовъ на Киевъ на Всеволодка, и не слушаша его. И тогда бѣжа Ростиславъ къ Смоленьску къ отцю изъ Новагорода, септября въ 1, сѣдѣвъ лѣто и 4 мѣсяци; и разгнѣвася Юрги, идя опять къ Суздалю и взя Новыи торгъ. /л.105об./ И послаша новгородци къ Киеву по Святослава по Олговица, заходивше ротѣ; и бѣ мятежь в Новѣгородѣ, а Святослава долго не бяше. Того же лѣта вниде князь Святославъ Олговиць к Новугороду и сѣде на столѣ мѣсяца декабря въ 25.
В лѣто 6648 [1140]. Марта въ 20 бысть знамение въ солнци, и толико оста, якоже бысть новъ мѣсяць 4 днии, пакы до захода наполнися. Того же лѣта поточиша в Киевъ ко Всеволоду Костянтина Микулиница, и пакы по немь поиха муж 6, оковавше, Полюда Гостятиница, Дѣмьяна и иных колко.
В лѣто 6649 [1141]. Априля въ 1 бысть знамение на небеси дивно велми: 6 круговъ, 3 около, а 3 около оба полы солнца, и стоя мало не весь день. В то же лѣто приидоша ис Кыева от Всеволода по брата Святослава вести в Киевъ; а «сына моего, рече, приимете собѣ князя». И яко послаша епископа по сына его и много лѣпших людии, а Святославу рѣша: «а ты пожди брата, то же поидеши»; он же убоявъся новгородцовъ: «аще мя прельстивше имут», и бѣжа отаи нощию, и Якунъ с ними бѣжа. И Якуна яша на Плесѣ, и пришедше и сѣмо с братомъ его Прокопьею, мало не до смерти, я обнаживше, яко мати родила, и свергоша и /л.106./ с мосту; нь богъ избави, и прибреде ко брегу, и к тому его не биша, но взяша у него 1000 гривенъ, а у брата его 100 гривенъ, такоже и у иныхъ имаша; и заточиша Якуна в Чюдь с братомъ, оковавше руцѣ к шии. И послѣд приведе я к собѣ Юрги и жены ею из Новагорода, и у себе я держаше в милости. И разгнѣвався Всеволод, и прия вся, и епископа и гость. И сѣдѣша новгородци безъ князя 9 мѣсяць; и призваша изъ Суздаля Судилу, Нѣжату, Страшка, оже бяху бѣжалѣ из Новагорода, Святослава дѣля и Якуна, и даша посадничьство Судилѣ в Новѣгородѣ. И послаша по Юргя князя къ Суздалю, и не иде, но посла сынъ свои Ростислава, яко преже бысть. В то же лѣто вииде Ростиславъ Юргевич в Новъгород на столъ ноября въ 26.
В лѣто 6650 [1142]. ... епископа и купцѣ и послы новгородъскыя не пущахут из Руси, а онѣ не хотяху иного князя, развѣ Святополка; и вда имъ Святополка изъ своею руку; воротивъся Юргью, яко пустилъ сынъ свои Новугороду. И услышася в Новѣгородѣ, яко Святополкъ идет к нимъ со всими людьми своими, и яша Ростислава, и всадиша въ епискупль дворъ, сѣдѣвша 4 мѣсяци. /л.106об./ Тогда вниде Святополкъ в Новъгород, въ 19 априля; и пустиша Ростислава къ Юргю. В то же лѣто приходиша ѣмь и воеваша область Новгородчкую; избиша ладожанѣ 400 и неВперёдмужа. Въ то же лѣто приходи свѣискыи князь съ пискупомъ въ 60 шнекъ на гость, иже суть изъ заморья шли въ 3 лодиях; и бишася, и не успѣша ничтоже, и отлучиша их 3 лодьи, избиша их полтораста.
В лѣто 6651 [1143]. Стоя вся осенъ дожтева, от Госпожина дни до Корочюна, тепло, дождь; и бысть вода велика велми въ Волховѣ, и повсюду сѣно и дрова рознесе, озеро [морози ], и бысть морозъ нощи, и изълома вѣтръ, и внесе въ Волхове, и поломи мостъ, а 4 городнѣ безъ вѣсти занесе. В то же лѣто оженися князь Святополкъ в Новѣгородѣ, и приведе изъ Моравы, межи Рожествомъ и Крещением. В то же лѣто ходиша Корѣла на ѣмъ, и отбѣжаша; 2 лоиву избилѣ.
В лѣто 6652 [1144]. Дѣлаша мостъ весь чресъ Волхово, по сторонѣ ветхаго, новъ весь. В то же лѣто исписаша честно притворы вся въ святѣи Софѣи, в Новѣгородѣ, архиепискупом Нифонтомъ. Тогда же даша посадничьство Нѣжатѣ Твердятицю. В то же лѣто свершиша церковь камену святѣи Богородици на Торговищи, в Новѣ/л.107./городѣ .
В лѣто 6653 [1145]. Стояста 2 недѣлѣ полнѣ, яко искря гуце, теплѣ велми, пред жатвы, и потомъ наиде дождь, яко не видихомъ ясна днн ни до зимы; и много убо жита и сѣна, и не удолѣша; а вода бысть болши третьяго лѣта на ту осень; а на зиму не бысть снѣга велика, ни ясна дни, и до марта. В то же лѣто утопоста 2 попа, и не да епископъ над ними пѣти. В то же лѣто заложиша церковь камену на Смядинѣ, Бориса и Глѣба, въ Смолнескѣ. Того же лѣта ходиша вся Руская земля на Галиць и много попустошиша области их, а города не взяша ни одиного, и възвратишася, ходиша же из Новагорода в помощь кияномъ, воеводою Неревиномъ, и възвратишася с любовию.
В лѣто 6654 [1146]. Преставися в Руси Всеволод мѣсяца июля; и сѣде на столѣ его брат Игорь. и сѣдѣ 2 недѣлѣ; негодоваху его людие, и въздаша людие вѣсть къ Изяславу Мьстиславицю въ Переяславлю, и прииде с вои, и бишася; и поможе богъ Изяславу, и сѣде Изяславъ на столѣ; и Игоря самого яша въ пятои день по побоищи, и порубиша и; а на осень вымолиша и пострищися, и пострижеся. Тогда же даша посадьничьство в Новѣгородѣ Костянтину /л.107об./ Микулиницю, у Нѣжатѣ отъяше. Того же лѣта сдѣлаша 4 церкви: святую мученику Бориса и Глѣба в городѣ, и святого пророка Ильи, и святую апостолу Петра и Павла на Холмѣ, и святую Козмы и Дамиана.
В лѣто 6655 [1147]. На осень ходи Святополкъ со всею областью Новгородчкою на Юргя, хотя ити на Суздаль, и воротишася на Новѣмъ торгу роспутья дѣля. В томь же лѣтѣ преставися на зимѣ Костянтинъ посадникъ новгородчкои, и даша Судилови Иванковичю опять. Тогда преставися игуменъ Антонъ. Того же лѣта даша игуменьство Андрѣови по Антонѣ. Того же лѣта убиша киянѣ князя Игоря Олговича.
В лѣто 6656 [1148]. Бысть дождь съ градом и громомъ июия въ 27, в недѣлю, зажьже громъ церковъ святыя Богородица въ Звѣринцинѣ манастырѣ. В то же лѣто ходи архиепископъ Нифонтъ къ Суздалю мира дѣля къ Юргеви; и приятъ и с любовию Гюрги, и церковь освяти Богородицю великымъ священиемъ, и новоторжьци выправи вси и гость цѣлъ, и посла съ честью Новугороду; но мира не дасть. Тои же осени присла Изяславъ сына своего Ярослава ис Кыева, и прияша и новгородци, а Святополка выведе злобы его ради и дасть ему Володимирь. Тои же зимѣ прииде Изяславъ Нову/л.108./городу, сынъ Мьстиславль, ис Кыева, иде на Юрга к Ростову с новгородци; и много воеваша людеи Гюрговъ, и по Волзѣ взяша 6 городовъ, даждь и до Ярославля попустошиша, а головъ взяша 7000, и воротѣшася роспутья дѣля.
В лѣто 6657 [1149]. Иде архиепископъ новгородчкыи Нифонтъ в Русь, позвань есть Изяславомъ и Климомъ митрополитомъ: ставилъ бо его бяше Изяславъ съ епископы Рускыя области, не славъши къ Цесарюграду; а Нифонтъ тако молвяше: «не достоины есть сталъ, аще благословенъ А есть от великаго сбора, ни ставьленъ»; а онъ про то не борзо отрядивъ его, нь посади в Печерьскомъ манастырѣ, дондеже Юрьи прииде. В то же лѣто Юрьи прииде на Киевъ, позванъ Святославомъ Олговицемъ, и бишася у Переяславля, и переяславци сѣдоша на щитѣ, научениемъ Гюрговымъ; и сѣде Юрги в Киевѣ, а Изяславъ бѣжа въ Володимирь 2. На том же лѣтѣ 3 идоша даньници новгородстѣи в малѣ, и посла князь Барладьскаго с вои, и бишася в малѣ нѣгдѣ, и сташа новгородци на островѣ, а онѣ противу сташа, и начаша город чинитѣ в лодияхъ; идоша новгородци к нимъ въ третии день, и бишася; и много их паде обоих, нь суздалець 15 боле /л.108об./ и бещисла. На ту же зиму приидоша ѣмь на Водь ратью в тысящи; и услышавше новгородци идоша по них въ 500 с воеводою и неВперёд мужа.
В лѣто 6658 [1150]. Прииде архиепископъ Нифонтъ, пущенъ ис Кыева Гюргемъ княземъ; и ради быша новгородци.
В лѣто 6659 [1151]. Побѣди Изяславъ с Вячеславомъ Юрья у Переяславля, иуля въ 1. На ту зиму преставися княгиня Изяславляя. В то же лѣто архиепископъ Нифонтъ поби святую Софѣю свиньцемъ всю прямь и извистию омаза всю около. Тогда же создаша 2 церкви: святого Василья и святого цесаря Костянтина и матери его Олены.
В лѣто 6660 [1152]. Априля въ 23 загорѣся церкви святого Михаила срѣд Торга, и много бысть зла;и погорѣ всь Торгъ и дворы до ручья, а сѣмо и до Славна, и сгорѣ церквии 8, 9 -я Варязьская.
В лѣто 6661 [1153]. Иде боголюбивыи архиепископъ Нифонтъ в Ладогу п заложи церковь святого Климента. В то же лѣто заложи Аркадии игуменъ святыя богородица Успение и состави собѣ монастырь; и бысть крестияномъ прибѣжище и аггелом радость.
В лѣто 6662 [1154]. Мѣсяца марта изъгнаша новгородци князя Ярослава, въ 26, и введоша Мьстислава, сына Ростиславля, априля въ 17. В то же лѣто поста/л.109./виша церковь святого Савы. И в то же лѣто преставися Изяславъ в Киевѣ, ноября въ 14. Тогда же иде Ростиславъ из Новагорода в Киевъ на столъ, оставивъ сына своего в Новѣгородѣ; и вознегодоваша новгородци, зане не створи имъ наряда, но болши раздра, и показаша путь сынови его по немъ. Тогда же послаша владыку Нифонта с передними мужи къ Юрьеви по сынъ, и введоша Мьстислава, сына Юрьева, генваря въ 30. Тои же зимѣ преставися Вечеславъ в Киевѣ. Тогда же иде Ростиславъ ис Кыева, сѣдевъ недѣлю, к Чернигову, и побѣдиша и. прельстивше; и сѣде Изяславъ Давыдовиць в Киевѣ на столѣ.
В лѣто 6663 [1155]. На вербьницю прииде князь Юрьи къ Кыеву и сѣде на столѣ, а Изяславъ изъбѣжа Давыдовиць к Чернигову; и прия Юрьи сынъ его в миръ с любовию, и волости имъ раздая достоиныя; и бысть тишина въ Рустѣи земли.
В лѣто 6664 [1156]. Съгнаша новгородци Судила с посадничьства, и по изгнании 5 день умре; и потомъ даша посадничьство Якуну Мирославичю. Тои же веснѣ преставися архиепископъ Нифонтъ новгородчкыи, априля въ 21: шелъ бо бяше къ Кыеву противъ митрополита; инии же мнози глаголаху, яко, лупивъ святую Софѣю, пошелъ /л.109об./ къ Цесарюграду; много глаголаху на нь, нь собѣ на грѣх. О семъ бы разумѣти комуждо нас: которыи епископъ тако украси святую Софѣю, притворы исписаа, кивот створи и всю извну украси; и въ Пьсковѣ святого Спаса церковь созда камену, другую в Ладозѣ святого Климента. Мню бо, яко не хотя богъ, по грѣхомъ нашимъ, дати пам на утѣшение гроба его, отведе и къ Кыеву. и тамо преставися; и пакы ту положиша и в Печерьстѣмъ манастырѣ. В то же лѣто собрася всь град людии, изволѣша собѣ епископомь поставити мужа свята и богомъ изъбрана именемь Аркадиа; и шед весь народ, пояша из манастыря святыя Богородица, и князь Мьстиславъ Юрьевич, и весь крилосъ святыя Софѣя, и вси попове городстѣи, игумены и чернци, и введоша и, и поручивше ему епископью въ дворѣ святыя Софѣя, дондеже приидеть митрополит в Русь; и тогда поидеши ставится. В то же лѣто
поставиша заморьскыи купци церковь святую Пятницю на Торговиши.