Кликни на квадрат справа, чтобы открыть вкладки сайта
Перепечатка в интернете разрешена при условии наличия активной ссылки на сайт " Святая София и Великий Новгород: История и современность".
В лѣто 6580. [1072] Пренесоша святая страстотерпца Бориса и Глѣба. Совокупившеся Ярославци: Изяславъ, Святославъ, Всеволод, митрополитъ же бѣ в то время Георгии, и епископи: Петръ переяславьскыи, Михаилъ юрьевьскыи, Федосии игуменъ Печерьскыи, Софронии святого Михаила игуменъ, Германъ игуменъ, и прочии вси игумени, и створивше праздникъ свѣтелъ, положиша я в новую церковъ, юже созда Изяславъ, яже стоить и нынѣ. Въземши бо первое Бориса въ древянѣ рацѣ Изяславъ, Святославъ, Всеволод, /л.95./ вземши на рама своя и понесоша, предидущими чернци и свѣща держаща в руках, и по них диаконы с кандѣлы, посемъ прозвутеры, и по нихъ епископи с митрополитомъ, и по нихъ с ракою идоша. И принесъши в новую церковъ, отверзоша раку; исполнися церкви благоуханиа и вони благы. Видѣша же се и прославиша бога. И митрополита ужасть обдержаше: бѣ бо нетвердо вѣру держаше к нима; и пад ниць, просяше прощениа. И цѣловавше мощи его, вложиша в раку камену. Посем же, вземше Глѣба в рацѣ камени, въставиша на сани; имше за ужа, везоша и. И яко быша въ дверех, и абие ста рака, не идущи; и повелѣша народомъ звати: «господи, помилуи», и повезоша и; и положиша я мѣсяца маия въ 2. И отпѣвше литургию, обѣдаша братья вси на купъ, коиждо съ бояры своими, и с любовию великою. Бѣ тогда Вышегород держа Чюдинъ, а церковь Лазарь. Посемь разидошася въ своя сы.
В лѣто 6581 [1073]. Въздвиже диаволъ котору въ братьи; а сии Ярославици бывши междю собою в распрѣ велици: Святославъ со Всеволодомъ на Изяслава. Изиде ис Кыева Изяславъ; Святославъ и Всеволод внидоста в Кыевъ мѣсяца марта въ 22, и сѣдоста на Берестовѣмъ на столѣ, /л.95об./ преступивше заповѣдь отню. Святославъ же бѣ начало выгнанию братню, желая болшая власти; Всеволода бо прельсти, глаголя, яко «Изяславъ сватится со Всеславомъ, мысля на наю; да аще его не варивѣ, имать наю прогнати»; и та възостри Всеволода на Изяслава. Изяславъ же иде в Ляхы съ имѣниемъ многымъ и съ женою, уповая богатствомъ многымъ, глаголя, яко «симъ налѣзу воя», еже все взяша Ляхове у него, показавше ему путь от себе. А Святославъ сѣде в Киевѣ, прогнавъ брата своего, преступивъ заповѣдь отню, паче же божию. Великъ бо есть грѣх преступающе заповѣдь отца своего; ибо исперва приступиша сынове Хамовѣ на землю Сифову, по лѣтех 400 отмщение прияша от бога; от племени бо Сифова суть Еврѣи, иже избивше Хананѣиско племя, и въсприяста свои жеребѣи, свою землю. И пакы преступи Исавъ заповѣдь отца своего, и прия убииство: не добро бо есть преступати предѣла чюжаго. В се же лѣто основана бысть церкви Печерьскаяго манастыря игуменомъ Федосиемъ и епископомъ Михаиломъ; а митрополиту Георгию сущю тогда въ Гречьскои земли, а Святославу в Кыевѣ сѣдящю.
В лѣто 6/л.96./582 [1074]. Преставися Федосии, игуменъ Печерьскаго монастыря. Скажем же и успение его мало. Федосии бо имѣяше обычаи: внегда же приходящу постному времени, в недѣлю масленую, в вечеръ, по обычаю цѣловавъ братью и поучивъ их, како проводити имъ постъное время въ молитвахъ в нощьных, такоже и въ дневных, и блюстися от помыслъ лукавых и от бѣсовьскаго насияниа; «бѣси бо всивають помышления чернцемъ, похотѣниа лукава, влагающе ему помыслы, и тѣмъ врежаеми бывают имъ молитвы. Да приходящая таковыи мысли возбраняют знамениемь крестнымъ, глаголюще: господи Иисусе христе, сыне божии, помилуи нас, аминь. И къ симъ въздержание имѣти от многаго брашна; въ ядении мнози и в питьи безмѣрнемъ и възрастают помыслы лукавии, помыслом же възрастъшим, стваряет грѣх. Тѣм же, рече, противитѣся бѣсовьскому дѣиству и пронырьства их, и блюстися от лѣности и от многа сна, и бодру быти на пѣние церковное и на преданиа отечьская и почитаниа книжная; паче же въ устѣх имѣти псалтирь Давыдовъ подобаеть же черноризъцемъ, симъ прогонити бѣсовьское уныние; паче /л.96об./ же всего имѣите любовъ в себѣ; меншим къ старѣишимъ покорение и послушание, и старѣишимъ к меншимъ любовь и наказание, и образъ показати собою въздержаниемъ и бдѣниемъ и хожениемъ и смирениемъ; и тако наказывати меншая, и наказати, и утѣшати я, и тако проводити пост». Глаголаше бо сице, яко «богъ далъ есть намъ 40 днии сию на очищение души и тѣлу: се бо есть десятина даема от лѣта богу; днии бо есть от года до года 365, и от сих днии десятыи день въздаяти богу десятину, еже есть постъ съ четыредесятныи, в няже дни очистивъшися душа празднуеть свѣтло на въскресение господне, веселящися о господѣ. Постъное бо время очищаеть умъ человѣку: пощение бо исперва проображено бысть Адаму пръвѣе, не вкушати от дрѣва единаго; постивъ бо ся Моисии дии 40, и сподобися прияти законъ на горѣ Синаистѣи, и видѣвъ славу божию; постомъ Самоила мати роди; постивше бо ся Ниневгитяне, гнѣва божиа избыша; постивъся Данило. видѣниа сподобися великаго; постився Илья, яко на небо взятъ бысть, въ пищу породную; постившеся трие отроци, угасиша силу огненую; постися /л.97./ господь днии 40, намъ показая постное время; постомъ апостоли искорениша бѣсовьское учение; постомъ явишася отци наши акы свѣтила в мирѣ, иже сияють по смерти, показавше труды великыя и воздержаниа, яко се великыи Антонии, Еуфимии и Сава и прочии отцы, имъ же и мы поревнуимъ, братие». И сице поучивъ братью и цѣлова вся по имени, глаголя имъ; и тако исхожаше изъ манастыря, взимая мало хлѣба, единь укрух; и пакы вшедши в пещеру, затворяше двери печерѣ и засыпаше перьстью, не глаголаше никомуже; аще ли кому бываше нужное орудье, то оконцемъ малымъ бесѣдоваше к нимъ в суботу или в недѣлю; а по иныи дни пребываше в постѣ и въ молитвах, въздержася крѣпко. Приходяше в монастырь в пятокъ, на канунъ Лазаревь; в сии бо день концѣвается постъ 40, начинаемъ от пръваго понедѣлника, наставшю Федоровѣ недѣли, концается в пяток Лазаревъ; а страстьная недѣля уставлено есть поститися страсти ради господни. Феодосиевѣ же пришедшю по обычаю, цѣловавъ братью, и празднова с ними в недѣлю цвѣтную. И дошедъ великаго дне въскресения. по обычаю празднова свѣтло, и впаде в болѣзнь. Разболѣвъшю/л.97об./ бо ся ему днии пять, посемъ, бывшю вечеру, повелѣ изнести ся на дворъ; братья же, вземши носило и изнесъши, поставиша прямо церкви. Онъ же повелѣ съзвати братью всю; брат же, на то устроенъ бѣ, удари в било, и абие събрашася братиа вси. Он же глагола имъ: «братьа мои и отци мои и чада моя. се, азъ уже отхожю от вас, якоже яви ми господь в постъное время, сущу ми в пещерѣ, изити от свѣта сего; вы же кого хощете игуменомъ имѣти себѣ, да и азъ, убогыи, благословение подалъ бых ему». Они же глаголаша ему: «ты еси отець намъ всѣм, да аще коего самъ изволиши, то намъ будет отець и игуменъ; послушаемъ его, якоже и тебе». Отець же нашь Федосии глаголаше: «шедши кромѣ мене, рците кого хощете от старѣиших до менших». Они же послушаша его, отступиша мало къ церкви, сдумавше послаша два брата, глаголюще сице: «егоже изволи богъ и твоя честная молитва; кого тобѣ любо, того намъ рци». Федосии же рече имъ: «аще хощете от мене прияти игумена, то и азъ створю им не по моему изволению, нь по божию строению»; нарече имь Якова прозвитера.
Братьи же нелюбо бысть се, нь сице глаголюще, яко «не здѣ у нас постриженъ есть»: бѣ бо Яковъ пришелъ издалеча съ /л.98./ братом своимъ с Павлом; и начаша братьа просити Стефана, демественика суща тогда, ученика Федосьева, мужа по всему обычаемъ блага и кротка, тиха и смирена, иже глаголюща, яко «сеи възраслъ есть под рукою твоею и у тебе служилъ есть; сего нынѣ вдаи». И рече имъ Федосии: «се, азъ по божию повелѣнию нареклъ бѣх Якова, се же вы свою волю створити хощете»; и послуша ихъ, предаст имъ Стефана, да будет имъ игуменъ. И благослови Стефана, и рече ему: «чадо, се, предаю ти манастырь, блюди съ спасениемъ его, и яже устроихъ въ службах, то держи; преданиа манастырьская, устава не измѣняи, нь твори вся по закону, по чину манастырьску». И посемъ вземше братья, и несоша его в келию, и положиша на одрѣ. И шестому дни наставшю, болну сущу вѣдому, прииде к нему Святославъ съ сыномъ своимъ Глѣбомъ. Сѣдящим же имъ у него, рече ему Федосии: «се, отхожю свѣта сего; се, предаю ти манастырь на соблюдение, еда будеть что смятение в немъ; и се, поручаю игуменьство Стефану, и не даи его въ обиду». И абие князь Святославъ и съ сыномъ своимъ Глѣбомъ цѣловавъ святого старца и обѣшавъся манастыремъ пещися /л.98об./ .
В лѣто 6583 [1075].
В лѣто 6584 [1076].
В лѣто 6585 [1077]. Преставися архиепископъ новгородчкыи Федоръ.
В лѣто 6586 [1078]. Бѣжа Олегъ Тмутороканю, и приведе Половци, и побѣди Всеволода на Съжицахъ. В то же лѣто бысть сѣча у Чернигова, и убиена быста два князя: Изяславъ и Борисъ.
В лѣто 6587 [1079]. Убиша за Волокомъ князя Глѣба, мѣсяца маия въ 30 день. В то же лѣто убиша Половци Романа.
В лѣто 6588 [1080].
В лѣто 6589 [1081].
В лѣто 6590 [1082].
В лѣто 6591 [1083].
В лѣто 6592 [1084].
В лѣто 6593 [1085].
В лѣто 6594 [1086].
В лѣто 6595 [1087].
В лѣто 6596 [1088]. Священа бысть церкви святого Михаила.
В лѣто 6597 [1089]. Священа бысть церкви Печерьская Иоаномъ митрополитомъ. Того же лѣта преставися Всеволожа дщи.
В лѣто 6598 [1090]. Приведе Анка митрополита скопца, Иоанн егоже зваху. В то же лѣто священа бысть церкви святого Михаила въ Переяславлѣ.
В лѣто 6599 [1091]. Пренесоша игумена Федосиа ис Печеры в манастырь. В то же лѣто прѣставися Иоанъ скопечь митрополит.
В лѣто 6600 [1092]. Наидѣ рана на Полочаны, яко нѣкако бяше ходити по улицамъ, яко мнѣти вои множество, а конемъ копыта видѣти; да аще кто изъ избѣ вылазяше, напрасно убиенъ бываше невидѣмо.
В лѣто 6601 [1093]. Всеволод преставися; и сѣде Святополкъ в Киевѣ. В то же лѣто /л.99./ побѣдиша Половци Святополка.
В лѣто 6602 [1094].
В лѣто 6603 [1095]. Иде Святополкъ и Володимирь на Давыда къ Смоленьску, и даша Давыду Новъгород. В то же лѣто приидоша прузи в Русь августа въ 28.
В лѣто 6604 [1096].
В лѣто 6605 [1097]. Слѣпленъ бысть Василко Ростиславиць. В то же лѣто, зимѣ, побѣди Мьстиславъ с новгородци 29 Олга на Кулатьскѣ, въ великое говѣние. И того же лѣта, на весну, погорѣ онъ полъ, а въ 3 день погорѣ Дѣтѣниць город; Илькину чадь избиша.
В лѣто 6606 [1098].
В лѣто 6607 [1099].
В лѣто 6608 [1100].
В лѣто 6609 [1101]. Преставися Всеславъ князь Полочьскыи.
В лѣто 6610 [1102].
В лѣто 6611 [1103]. Идоша вся братья князи Рускыя земля на Половцы, на Сутень, и побѣдиша я, князя ихъ и имѣние заяша. Того же лѣта побѣдиша Ярослава Моръдва Мюромѣ. В то же лѣто заложи князь Мьстиславъ на Городищѣ церковь святое Благовѣщение.
В лѣто 6612 [1104]. Прииде Никифоръ, митрополит рускыи.
В лѣто 6613 [1105]. Поставлени быша епископи: Лазарь, Мина, Анфилохии. Того же лѣта идоша в Ладогу иа воину. И погорѣша хоромы от ручья, мимо Славно, до святого Ильи.
В лѣто 6614 [1106]. Избиша Половци на Дунаи. В то же лѣто пострижеся Святоша князь, сынъ, Давыдовъ, в Черниговѣ, тѣсть Всеволожь.
В лѣто 6615 [1107]. Трясеся земля въ 5 февраля.
В лѣто 6616 [1108]. Преставися архиепископъ новгород/л.99об./чкыи Никита, мѣсяца генваря въ 31. На весну почаша писати святую Софѣю. стяжениемъ святого владыкы.
В лѣто 6617 [1109]. Бысть вода велика въ Днѣпрѣ, и въ Деснѣ, и въ Прѣпятѣ. И концаша трепезницю Печерьскаго манастыря. В то же лѣто заложена бысть церкви княземъ Святополкомъ в Киевѣ.
В лѣто 6618 [1110]. Прииде в Новъгород архиепископъ Иоанн, мѣсяца декабря въ 29.
В лѣто 6619 [1111]. Иде Святополкъ, Володимирь и Давыдъ и вся земля просто Руская на Половцѣ, и побѣдиша я, и взяша дѣти их, и город по Дънови Сугровъ и Шаруканъ. Тогда же погорѣ Подолье Кыевѣ, и Черниговъ, и Смолнескъ, и Новъгород. Того же лѣта преставися Иоанн, епископъ черниговьскыи. Того же лѣта ходи Мьстиславъ на Очелу.
В лѣто 6620 [1112].
В лѣто 6621 [1113]. Ходи Ярославъ на Ятвягы, сынъ Святополчь; и пришед с воины, и поя дщерь у Мьстислава. Того же лѣта преставися
Святополкъ, а Володимирь сѣде на столѣ в Кыевѣ. В том же лѣтѣ преставися Давыдъ Игоревиць. Сего же лѣта побѣди Мьстиславъ на Бору Чюдь. В то же лѣто заложена бысть церкви святыи Никола в Новѣгородѣ. В то же лѣто погорѣ онъ полъ, на сеи же сторонѣ город Кромныи, от Лукинъ пожаръ.
В лѣто 6622 [1114]. Преставися Святославъ в Переяславлѣ. /л.100./ В то же лѣто поставиша Феоктиста епископа Чернигову.
В лѣто 6623 [1115]. Совокупишася вся братьа в Вышегородѣ: Володимиръ, Олегь, Давыдъ и вся Руская земля, и освяти церковь камену мая въ 1, а 2 день принесоша Бориса и Глѣба, индикта въ 8. И в се же лѣто бысть знамение въ солнци, якоже погыбе. А на осень преставися Олегъ, сынъ Святославль, августа въ 1. А въ Новѣгородѣ изомроша конѣ у Мьстислава вси и у дружины его. Том же лѣтѣ заложи Воигость церковь святого Федора Тирона, априля въ 28.
В лѣто 6624 [1116]. Иде Мьстиславъ на Чюдь с новгородци, и възя Медвижю голову на 40 святых. В то же лѣто Мьстиславъ заложи Новъгородъ болѣи перваго. Того же лѣта Павелъ, посадникъ ладоскыи, заложи Ладогу город каменъ.
В лѣто 6625 [1117]. Иде Мьстиславъ въ Киевъ на столъ из Новагорода марта въ 17; а сына посади в Новѣгородѣ Всеволода на столѣ. В то же лѣто бысть знамение в Новѣгородѣ въ святѣи Софѣи от грома, а клиросъ всь падоша и с людьми ниць, нь вси живы быша, единъ от диакъ зараженъ бысть, мѣсяца маня въ 14, в час 10, вечернюю поющимъ. А на вечеръ бысть знамение в лунѣ. В то же лѣто игуменъ Антонѣи заложи церковь камену святыя Богородица манастырь. Того же лѣта преста/л.100об./вися Добрыня, посадникъ новгородчкыи, декабря въ 6.
В лѣто 6626 [1118]. Преставися Дмитръ Завидович, посадникъ новгородчкыи, иуня въ 9, посадницавъ 7 мѣсяць одину. Того же лѣта приведе Володимирь съ Мьстисла вомъ вся боярѣ новгородчкыя къ Кыеву, и заводи я къ честному кресту, и пусти их домовъ, а иныя у себе остави; и разгнѣвася на ты, оже ты грабилѣ Даньслава и Ноздрьчю, и на сочькаго на Ставра, и заточи я вся.
В лѣто 6627 [1119]. Заложи церковь Кирьякъ игуменъ и князь Всеволод, манастырь святого Георгиа в Новѣгородѣ. В том же лѣтѣ преставися Костянтинъ Моисѣевич, посадникъ. Того же лѣта свершена бысть церковь Антонова святая Богородица в Новѣгородѣ манастырь.
В лѣто 6628 [1120]. Прииде Борисъ посадницатъ в Новъгородъ.
В лѣто 6629 [1121].
В лѣто 6630 [1122]. Преставися Мьстиславляя Вперёд. В 24 том же лѣтѣ оженися Мьстиславъ в Киевѣ, поя Дмитриевну в Новѣгородѣ Завидовица.
В лѣто 6631 [1123]. Оженися Всеволодъ, сынъ Мьстиславль, в Новѣгородѣ. В то же лѣто падеся церкви святого Михаила Переяславлѣ. А на весну ходи Всеволод с новгородци на ѣмь, и побѣди я; нь лютъ бяше путь, яко купляху по ногатѣ /л.101./ хлѣбъ.
В лѣто 6632 [1124]. Мѣсяца августа въ 11 день, перед вечернею, поча убывати солнца, и погыбе все; о, великъ страхъ тогда, и тма бысть, и звѣзды быша и мѣсяць; и пакы нача пребывати вборзѣ, и пакы наполнися; и ради быша вси по граду.
В лѣто 6633 [1125]. Преставися Володимиръ Великыи в Киевѣ, сынъ Всеволожь; а сына его Мьстислава посадиша на столѣ отнѣ. В то же лѣто бяше буря велика с градом, и хоромы раздра, стада и скотины, и с божьниць волны содра, и скотины нолна у Волхово, а другыя одва переимаша живы. В том же лѣтѣ исписаша церковь Антонову в манастырѣ. В то же лѣто посадиша на столѣ Всеволода новгородци.
В лѣто 6634 [1126]. Ходи Всеволод къ отцю Кыеву, и прииде опять в Новъгород на столъ мѣсяца февраля въ 28. И в то же лѣто вдаша посадничьство Мирославу Гюрятиницю.