Кликни на квадрат справа, чтобы открыть вкладки сайта
Перепечатка в интернете разрешена при условии наличия активной ссылки на сайт " Святая София и Великий Новгород: История и современность".
НОВГОРОДСКАЯ ПЕРВАЯ ЛЕТОПИСЬ МЛАДШЕГО ИЗВОДА
(Комиссионный, Академический, Толстовский списки)
В лѣто 6525 [1017]. Ярославъ иде къ Берестию; и заложена бысть /л.82об./ святыя Софѣя в Киевѣ.
В лѣто 6526 [1018].
В лѣто 6527 [1019].
В лѣто 6528 [1020]. Родися у Ярослава сынъ и нареченъ бысть Володимиръ.
В лѣто 6529 [1021]. Побѣди Ярославъ Брячислава.
В лѣто 6530 [1022].
В лѣто 6531 [1023].
В лѣто 6532 [1024].
В лѣто 6533 [1025].
В лѣто 6534 [1026].
В лѣто 6535 [1027].
В лѣто 6536 [1028]. Знамение 19 явися на небеси змиевъ видъ.
В лѣто 6537 [1029].
В лѣто 6538 [1030].
В лѣто 6539 [1031].
В лѣто 6540 [1032].
В лѣто 6541 [1033].
В лѣто 6542 [1034].
В лѣто 6543 [1035].
В лѣто 6544 [1036].
В лѣто 6545 [1037]. Заложи Ярославъ город Кыевъ, и церковь святыя Софѣя сверши.
В лѣто 6546 [1038].
В лѣто 6547 [1039].
В лѣто 6548 [1040].
В лѣто 6549 [1041].
В лѣто 6550 [1042].
В лѣто 6551 [1043].
В лѣто 6552 [1044]. Ходи Ярославъ на Литву; а на весну же Володимиръ заложи Новъгород и сдѣла его.
В лѣто 6553 [1045]. Заложи Володимиръ святую Софѣю в Новѣгородѣ.
В лѣто 6554 [1046].
В лѣто 6555 [1047] Ярославъ иде на Мазавшаны и побѣди я, и князя ихъ уби Моислава, и покори я Казимиру; тогда дасть Казимиръ 800 людии Руси полоненыхъ Ярославу шюрину.
В лѣто 6556 [1048].
В лѣто 6557 [1049]. Мѣсяца марта въ день суботныи, сгорѣ святая Софѣя; бѣаше же честно устроена и украшена, 13 верхы имущи. а ту стояла святая Софѣя конець Пискуплѣ улицѣ, идеже 18 /л.83./ нынѣ поставилъ Сотъке церковь камену святого Бориса и Глѣба над Волховомъ.
В лѣто 6558 [1050]. Свершена бысть святая Софѣа в Новѣгородѣ, повелѣниемь князя Ярослава и сына его Володимира и архиепископа Лукы. И преставися жена Ярославля княгыни.
В лѣто 6559 [1051]. Постави Ярославъ Лариона митрополитомъ Русина въ святѣи Софѣи, събравши епископы.
В лѣто 6560 [1052]. Мѣсяца октября въ 4 день, в недѣлю, преставися Володимиръ, сынъ Ярославль, старѣишии в Новѣгородѣ; положиша и в Новѣгородѣ въ святѣи Софѣи, юже бѣ создалъ самъ.
В лѣто 6561 [1053]. у Всеволода родися сынъ Володимирь от цесарицѣ Грекинѣ.
В лѣто 6562 [1054]. Преставися великыи князь рускыи Ярославъ. Еще бо живу сущу ему, наряди сыны своя, рекъ имъ. «се, азъ отхожю свѣта сего, сыновѣ мои; имѣите в себѣ любовь, понеже вы есте братьа единого отца и матери. Да еще будете в любъви межи собою, богъ будет в васъ, покорить вы противныя и будете мирно живуще. Аще ли будете ненавистьно живуще, въ распрях живуще и которающеся, то погыбнете сами, и землю отець своих и дѣдъ своих испустошите. иже бо онѣ налѣзоша трудомъ великымъ; то пребываите /л.83об./ мирно, послушающе брат брата. Се же поручаю въ свое мѣсто столъ свои старѣишему сыну моему, брату вашему, Изяславу Кыевъ; сего же послушаите, якоже вы послушасте мене, да тъ вы будет въ мене мѣсто; а Святославу даю Черниговъ, а Всеволоду Переяславль, а Игореви Володимирь, а Вячеславу Смолнескъ». И тако рекши, раздѣли имъ грады; и заповѣда имъ не преступати брату въ предѣлъ братинь, ни сгонити, рекъ Изяслава. «аще кто хощеть обидѣти брата своего, то ты помагаи, егоже обидять». И тако уряди сыны своя пребывати в любви. Самому же болну сущу и пришедшю Вышегороду, разболѣся велми, Изяславу тогда сущу, а Святославъ въ Володимери, Всеволоду же у во отца тогда: бѣ бо любимъ отцемъ паче всея братья, егоже имяше присно у себе. Ярославу же приспѣ конець житиа, и предасть душю свою мѣсяца февраля, в суботу 1 недѣли поста, на святого Федора. Всеволодъ же, спрятавъ тѣло отца своего, возложи на сани, повезоша Кыеву попове, поюще обычныя пѣсни; и плакашася по немъ людие плачемь велиимъ зѣло; и абие принесъше, положиша его в рацѣ мраморянѣ въ церкви святыя Софѣя; и плакася по немъ Всеволод и людие вси. Живе же /л.84./ всѣх лѣт 76.
Начало княжениа Изяславля в Киевѣ.
В лѣто 6563 [1055]. Пришедши Изяславъ, сѣде в Киевѣ, а Святославъ в Черниговѣ, Всеволод в Переяславлѣ, а Игорь в Володимерѣ, Вячеславъ въ Смоленьскѣ. В се же лѣто приходи Болушь с Половци, и створи Всеволодъ миръ с ними; възратишася Половци въспять, откуду быша пришли. В семъ же лѣтѣ клевета бысть на епископа Луку от своего холопа Дудикы, и изиде изъ Новагорода и иде Кыеву, и осуди митрополит Ефримъ, и пребысть тамо 3 лѣта.
В лѣто 6564 [1056].
В лѣто 6565 [1057]. Преставися Вячеславъ, сынъ Ярославль, въ Смоленьскѣ; и посади Игоря въ Смоленьскѣ, а изъ Володимиря выведше.
В лѣто 6566 [1058]. Побѣди Изяславъ Голядъ. Сем же лѣтѣ архиепископъ Лука прия свои столъ в Новѣгородѣ и свою область. Дудицѣ же холопу оскомины: урѣзаша ему носа и обѣ руцѣ, и бѣжа в Нѣмци.
В лѣто 6567 [1059]. Изяславъ, Святославъ, Всеволод высадиша строя своего Судислава князя ис поруба, сѣдивша лѣт 20 и 4, и приведоша его къ ротѣ и къ кресту, и бысть чернцомъ.
В лѣто 6568 [1060]. Преставися Игорь, сынъ Ярославль. Того же лѣта Изяславъ, Святославъ, Всеволод, Всеславъ совокупиша вои /л.84об./ бещисла и поидоша на конех, в лодиях, бещисленое множество, на Торкы. Слышавши же се Торци, убояшася, пробѣгоша и до сего дни; помроша бѣгающе, гнѣвомъ божиимъ гоними: ови от зимы изомроша, другыи же гладомъ. Тако богъ избави крестиянъ от поганых. Потом же ходи Изяславъ на Сосолы и дань заповѣда даяти по 2000 гривенъ; они же поручьшеся и изгнаша даньникы; на весну же, пришедше, повоеваша села о Юрьевѣ, и город и хоромы пожгоша, и много зло створиша, и Плескова доидоша воююще. И изидоша противу имъ плесковицѣ и новгородци на сѣчю, и паде Руси 1000, а Сосолъ бещисла.
В лѣто 6569 [1061]. Приидоша Половци пръвое на Рускую землю воеватъ; Всеволод же изиде противу имъ мѣсяца февраля вторыи день; и бившись имъ, побѣдиша Всеволода, воеваше и отъидоша. Се бысть пръвое зло от поганых. безбожных врагъ. Бысть же Сокалъ князь ихъ.
В лѣто 6570 [1062].
В лѣто 6571 [1063] Судиславъ преставися, Ярославль брат; погребоша и въ церкви святого Георгиа. В се же лѣто в Новѣгородѣ иде Волховъ
въспять; се же знамение не на добро бысть: на четвертое лѣто пожьже Всеславъ град.
В лѣто 6572 [1064]. Бѣжа Ростиславъ Тмутороканю, сынъ Володимирь, внукъ Ярославль; и с нимъ бѣжа Порѣи, /л.85./ Вышата, сынъ Остромирь, воеводы новгородчкого. И пришед выгна Глѣба ис Тьмутороканя, а самъ сѣде въ него мѣсто.
В лѣто 6573 [1065]. Иде Святославъ на Ростислава Тмутороканю. Ростиславъ же выступи кромѣ из града, не убоявъся его, нь не хотя противу строю своему оружиа взяти. Святославъ же пришед Тмютороканю, и посади пакы сына своего Глѣба, възратися опять. Ростиславъ же пакы пришед, выгна Глѣба; и прииде Глѣбъ ко отцу своему. Ростиславъ сѣде Тмуторокани. В се же лѣто поча рать копити Всеславъ. В се же время бысть знамение на западѣ: звѣзда привелика, луцѣ имуши акы кровавы, въсходящи с вечера по заходѣ солнецьномъ; пребысть же днии 7. Се же проявляше не на добро: по семъ бо быша усобица многы и нашествие поганых иа Рускую землю; сиа бо звѣзда бысть акы кровава, проливающи кровопролитие. В се же время бысть дѣтнще ввержено в Сѣтомль; сего же дѣтища вывлекоша рыболовы в неводѣ, егоже позоровахомъ до вечера, и пакы ввергоша и в воду, понеже бо бысть у дѣтища того срамнии удове на лици его, и иного нелзѣ бяше сказати срама ради. Пред сим же временемъ /л.85об./ и солнце премѣнися, и не бысть свѣтло, нь якоже мѣсяць бысть, егоже невѣгласи глаголют снѣдаемому сущу. Се же бывают сица знамениа е на добро; мы бо по всему разумѣемъ, якоже древле при Антиосѣ въ Иерусалимѣ ключися внезапу по всему граду за 40 днии являтися имъ на въздусѣ на конех рыщющимъ въ оружьи, одежи златы имущимъ, полкы обавляемыи оружиемъ дъвижющимся: се бо проявляше нахождение Антиохово, нашествие рати на Иерусалимъ. Посем же при Неронѣ въ Иерусалимѣ восиа звѣзда образъ копииныи надъ градомъ: се же проявляше нахожение рати от Римлянъ. И пакы сице же бысть Вперёдѣ цесари, звѣзда восиа на западѣ, испущающе луча, еюже прозываху блистаньницю, и бысть еи сѣяющи за 20 днии; посемь же бысть звѣздамъ течение с вечера до утриа, яко мнѣти всѣмъ, яко падуть звѣзды; и пакы солнце безъ лучеи сѣяше: се же проявляше крамолы, недузи человѣкомъ, и умертвие бяше. Пакы же при Маврикии цесари бысть сице: жена роди дѣтище безъ очью и безъ руку, в череслахъ бѣ ему рыбеи хвостъ прирослъ; а песъ родися о 6 ногъ; въ Африкии же два дѣтища родистася: /л.86./ единъ о 4 -хъ ногъ, а другыи о двою главу. Посемь же бысть при Костянтинѣ иконоборци, сына Леонова: течение звѣздъное на небеси бысть, отторгахуть бо ся на землю, яко видящимъ имъ концину мнѣти; тогда же и въздухъ вознѣяся по велику; и в Сурии же бысть трусъ великъ, земли разсѣдъшися трии поприщь, и абие изиде изъ земли дивно мьска, человѣческымъ гласомъ глаголюши, проповѣдающи наитие языкомъ, еже и бысть: наидоша бо Срачина на Палестиньскую землю. Таковая же знамениа, еже бывают въ небеси, или въ звѣздах, или въ солнци, или птицами, или етеромъ коимъ, не благо бываеть; сице же есть се на зло бываеть, или проявление рати, или гладу, или смерть проявляет.
В лѣто 6574 [1066]. Ростиславу сущю Тмутороканю и емлющю дань у Касогъ и у иных странъ, сего же убоявшеся Грѣци, послаша с лестию катопана. Оному же пришедшю къ Ростиславу съ дружиною своею и ввѣрившюся ему, и чтяше его Ростиславъ. Единою же пиющю Ростиславу съ дружиною своею, рече котопанъ: «княже, хощю на тя пити». Оному же рекшю: «пии». Он же испивъ половину, а половину дасть князю пити, дотькнувъся палчемъ /л.86об./ в чашю, бѣ бо имѣя под ногьтемъ растворение смертное, и дасть князю, урекъ смерть до дне осмаго. Оному же испивъшю, котопанъ же пришед къ Корсуню, повѣдаше имъ, яко в сии день умрет Ростиславъ; якоже и бысть. Сего же котопана побиша камениемь корсуньстѣи людие. Бѣ же Ростиславъ мужь добръ на ратѣ, и възрастомъ же лѣпъ, и красень лицемъ, и милостивъ убогымъ. Умре же мѣсяца февраля въ 3 день, и тамо положенъ бысть въ церкви святыя Богородица.
В лѣто 6575 [1067]. Заратися Всеславъ, сынъ Брячиславль, Полотьскыи, зая Новгород. Ярославици же трие, Изяславъ, Святославъ, Всеволодъ совокупиша воя, идоша на Всеслава, зимѣ сущи велицѣ, и прииде Мѣньску, и мѣнянѣ затворишася въ градѣ. Сиа же братьа взяша Мѣнескъ, исѣкоша мужи, а жены и дѣти взяша на щитъ; и поидоша к Немѣзе, мѣсяца марта въ 3 день, и бяше снѣгъ великъ, и поидоша противъ себѣ, и бысть сѣча зла, и мнози падоша; и одолѣша Изяславъ, Святославъ, Всеволодъ, а Всеславъ бѣжа. Посемъ же, мѣсяца июля въ 10 день, Изяславъ, Святославъ, Всеволод цѣловаша крестъ честныи ко Всеславу, рекше ему: «прииди к намъ, яко не створим ти зла». Онъ же, надѣяся о цѣловании /л.87./ креста, приихавши в лодьи чресъ Днепръ. Изяславу же в шатеръ преди идущу, Всеславу по немь идущу, тако Всеслава яша на Рши у Смоленьска, преступивше крестъ. Изяславъ же приведе Всеслава Кыеву и всади его в порубъ съ двѣима сынъма.
В лѣто 6576 [1068]. Приидоша иноплеменници на Рускую землю, Половци мнози; Изяславъ же и Святославъ и Всеволодъ изидоша противу имъ на Альто. И бывши нощи, поидоша противу себѣ; грѣхъ же ради наших попусти богъ поганыя на ны, и побѣгоша рустѣи князи, и побѣдиша их Половци. Наводит бо богъ поганыя, по гнѣву своему, иноплеменьникы на землю, и тако скрушенымъ имъ, въспомянутся къ богу. Усобная же рать бываеть от сважениа диаволя. Богъ не хощеть зла въ человѣцѣхъ, но блага; а диаволъ радуется злому убииству, кровопролитью, въздвизая свары, зависти, братоненавидѣния, клеветы. Земли согрѣшивши коеи любо, казнить богъ смертью, или гладомъ, или наведениемъ поганых, или ведромъ, или гусиницею, или инѣми казньми. Аще ли покаявшеся будемь, в нем же ны богъ велит жити, глаголеть бо намъ пророкомъ: «обратитеся ко мнѣ всѣмъ сердцемь вашимъ, /л.87об./ постом и молитвою и плачемъ»; да аще сице створимъ, всѣх грѣхъ прощени будемъ. Нь мы на злое возвращаемся, акы свинья в калѣ грѣховнемъ валяющися, и тако пребываемъ. Тѣм же и пророкомъ к намъ глаголеть: разумѣхъ, рече, яко жестокъ еси, и шия желѣзныя выя твоя, того ради удержах от вас дождь, предѣлъ единъ одождихъ, а другаго не одождихъ, исъше; поразих вы зноемъ и различными казньми, то и тако не обратистеся ко мнѣ. Сего ради винограда вашего и смокви ваша, и нивы, и дубровы ваша истрохъ, глаголет господь, а злобъ ваших не могох истерти. Послахъ на вы различныя напасти и болезни, смерти тяжькы, на скоты казнь свою послах, то и тако не обратистеся ко мнѣ, нь рекосте: мужа есмя В мы. Доколѣ не насытистеся злобъ вашихъ. Вы уклонистеся от пути моего, глаголеть господь, соблазнисте многы; сего ради буду свѣдѣтель скоръ на противныя и на прелюбодѣица, и на кленущая во лжу именемъ моимъ, и на лишающая мьзды наимникы, насильствующая на сироты и вдовиць, и накланяющая судъ кривѣ. Почто не сдерзаетеся о грѣсех ваших; нь уклонисте законы /л.88./ моя и не съхранисте их. Обратитеся ко мнѣ, обрящуся к вамъ, глаголеть господь; и азъ отверзу вамъ хляби небесныя, и возращу гнѣвъ мои от вас, дондеже все обилуеть вамъ; и не имуть изнемощи виногради ваши, ни нивы. Нь вы стяжасте на мя словеса тяжка, глаголюще: суетно работая богу; тѣм же усты чтуть мя, а сердце ваше далече отстоить от мене, глаголеть господь. Того ради ихже просим, не улучимъ: будет бо, рече, егда призовете мя, азъ же не послушаю вас. Възищете мене зли, и не обрящете; не въсхотѣша бо ходити по путемъ моимъ; да того ради затворяется небо, ово ли злѣ отверзается, въ дождя мѣсто пущаеть, ово ли сланою плоды ознобляя и землю зноемь томя, наших ради злобъ. Аще ли ся покаемъ о злобах своихъ, то акы чадом своимъ подаст богъ намъ вся прошениа, и одождить намъ дождь рань и позденъ, и наполнятся гумна наша пшеница, и пролиються точила винная и масличная; и воздамъ вамъ за лѣта, яже пояша прузи и хрустове и гусиница, сила моя великая, юже послах вамъ, глаголеть господь вседержитель. Си слышавше, въстягнемся на добро; взищете суда, избавите обидимаго; на покаяние приидемъ, не въздающе зла /л.88об./ за зло, ни клеветы за клевету; нь любовию прилѣпимся господѣ бозѣ нашемъ, постомъ и рыданиемъ и слезами омывающи вся прегрѣшениа, не словомъ нарѣчающеся крестиянѣ, а поганьскы живуще. Се бо, не поганьскы ли живемъ, аще въ усряцю вѣруют; аще бо кто усрящеть черноризьца, то възращается, ни единиць, ли свинью: то не поганьскы ли есть то. Се бо по диаволю научению кобь сию творять. Друзии же зачиханию вѣруют, еже бываеть на здравие главѣ. Нь сими диаволъ льстить, и другыми нравы, всякыми лестьми, пребавляя ны от бога, трубами, гусльми, русальями. Видѣмъ бо игрища утолочена и людии множество на них, яко упихати начнуть другъ друга, позоры дѣюща от бѣса замысленаго дѣла, а церкви стоять; егда же бываеть год молитвы, мало их обращаеться къ церкви. Да сего ради казни приемлемъ, казни грѣх ради нашнхъ от бога всякыя и нахожение ратных по божию повелѣнию приемлемъ. Мы же на предлежащее возратимся. Пакы же Изяславу со Всеволодом Кыеву прибѣгшю, а Святославу Черьнигову, и людие киевьстѣи прибѣгоша Кыеву, и створиша вѣче на торговищи, и рѣша, пославше къ князю: «се Половци розошлѣся по земли; да вдаи, /л.89./ княже, оружие и конѣ, и еще биемся с ними». Изяславъ же сего не послуша. И начаша людие говорити на воеводу Коснячя; идоша с вѣча на гору, и приидоша на дворъ Коснячевъ, и не обрѣтше его, и сташа у двора Брячиславля, и рѣша: «поидемъ, высадимъ дружину свою ис погреба». И раздѣлишася на двое: половину ихь иде къ погребу, а половина поидоша по мосту; сии же приидоша на княжь дворъ. Изяславу сѣдящу на сѣнех с дружиною своею, и начаша прѣтися съ княземъ, стояще долѣ. Князю изо оконца зрящу и дружинѣ стоящи у князя, и рече Тукы, брат Чюдинь, Изяславу: «видѣши, княже, людие возлилися суть; пошли солъ, да блюдут Всеслава». И се ему глаголющю, другая половина людеи прииде от погреба, отворивше погребъ. И рѣша дружина князю: «се зло есть, посли к Всеславу, даждь призвавше къ оконцю, пронзуть его мечемъ»; и не послуша сего князь. И людье же кликнуша, и идоша къ порубу Всеславлю; Изяславъ же, се видѣвъ, со Всеволодомъ побѣгоста съ двора князя; и дворъ княжь разграбиша, бещесленое множество злата поимаша и сребра и кунами и скорою. Изяславъ бѣжа в Ляхы. Посем же Половчемъ воюющимъ /л.89об./ по землѣ Рустѣи, Святославу сущу в Черниговѣ, и Половцемъ воюющим около Чернигова, Святославъ же собравъ дружины нѣколико, изиде на нѣх ко Сновьску. И узрѣша Половци идущии вои, пристроиша вои противу. И видѣ Святославъ множество их, рче дружинѣ своеи: «потягнемь, уже намъ нѣлзѣ камо ся дѣти»; и удариша в нѣ; и одолѣ Святославъ въ 3 -хъ тысящах, а Половець бѣ 11 тысяцѣ; н тако биеми, а друзии истопоша въ Снови; а князь их яша Шаракана въ 1 день ноября. И възвратишася с полономъ въ град свои Святославъ; Всеславъ же сѣде в Киевѣ. Се же богъ яви силу крестианьскую: понеже Изяславъ человавъ честныи крестъ, и изыма и; тѣм же наведе богъ поганыя, сего же явѣ избави крестъ честныи. Въ день бо Въздвижениа Всеславъ, въздохнувъ, рече: «о кресте пресвятыи, понеже в тебе вѣровах, избави мя от рова сего». Богъ показа силу крестияньскую на показанье земли Рустѣи, да не преступають креста честнаго, цѣловавше; аще ли преступят, то и здѣ приимут казнь, и на приидущимъ вѣцѣ казнь вѣчную; понеже бо есть сила велика крестъная: крестомъ бо побѣжени бывають силы бѣсовьскыя, крестъ бо княземъ въ бранех, крестомъ бо огражаеми вѣрнии побѣжают супостаты про/л.90./тивныя, крестъ бо въскорѣ избавляеть от напасти призывающимъ его с вѣрою; ничего же ся бѣси боять, токмо креста: аще бо бывают от бѣсовъ мечтаниа, знаменавше лице крестомъ, прогоними бывають. А Всеславъ сѣдѣ в Киевѣ мѣсяць 7.
В лѣто 6577 [1069]. Поиде Изяславъ с Болеславомъ на Всеслава; Всеславъ же поиде противу; прииде к Бѣлугороду Всеславъ, бывши нощи, и утаивъся киянъ, бѣжа из Бѣлагорода Полотьску. Заутра же видѣша людие бѣжавша князя, възратишася къ Кыеву, и створше вѣче, послаша къ Святославу и ко Всеволоду, глаголюще: «мы уже зло створилѣ есмы, князя своего прогнавше; а се ведеть на нас Лятьскую землю; а вы поидита въ град отца своего; аще ли не хощета, то намъ неволя: зажегше град свои, ступимъ в землю Грѣчьскую». И рече имъ Святославъ: «вѣ пошлевѣ брату своему; да аще поидет на вы с Ляхы губити васъ, то вы противу ему ратью, не дадивѣ убо погубити града отца своего; аще ли хощеть с миром, то в малѣ приидет дружинѣ». И утѣшиста кыянѣ. Святославъ же и Всеволод посласта къ Изяславу, глаголюща: «Всеславъ ти бѣжалъ; а ты не води Ляховъ къ Кыеву, противна ти нѣту; аще ли хощеши гнѣвъ имѣти погубити град, то вѣси, яко намъ жаль ти есть отня /л.90об./ стола». То слышавъ Изяславъ, остави Ляхы, поиде с Болеславомъ, мало Ляховъ поимъ; посла же пред собою сына своего Мьстислава къ Кыеву. И пришед Мьстиславъ, исѣче, иже бѣша высѣклѣ Всеслава, числомъ 70 чади; а другиа слѣпиша, иныя же безъ вины погуби, не испытавъ. Изяславу же, идущу къ граду, изидоша людье противу с поклономъ, и прияша князь свои кыянѣ; и сѣде Изяславъ на столѣ своемъ мѣсяца маия въ 2 день, распуща Ляхы на покормъ, и избиваху Ляхы отаи. И возратишася Болеславъ в землю свою. Изяслав же взя торогъ на гору; и прогна Всеслава ис Полотьска, и посади Мьстислава, сына своего, в Полотьскѣ, иже въскорѣ умре ту; и посади в него мѣсто брата его Святополка, а Всеславу бѣжавшю.
В лѣто 6578 [1070]. Родися у Всеволода сынъ, и наркоша именемь Ростиславъ. В се же лѣто заложена бысть церкви святого Михаила въ манастыри Всеволожи.
В лѣто 6579 [1071]. Воеваша Половци у Растовьца и у Неятина. Всеславъ же в сее лѣто выгна Святополка ис Полотьска. В се же лѣто побѣди Ярополкъ Всеслава у Голотичьска. В сиа же времена прииде волхвъ, прѣлъщенъ бѣсомъ; пришед бо Кыеву, глаголаше, яко явилося ми богъ, глаголюще сице: повѣдаи людемъ, яко на лѣто потещи Днѣ/л.91./пру въспять, а землямъ преступати на иная мѣста, яко стати Грѣчьскои земли а Рускои земли, а Рускои земъли на Грѣчьскои землѣ, и прочимъ землям измѣнятися; егоже невѣгласи послушаху, вѣрнии же насмѣяхуся, глаголюще ему: «бѣсъ тобою играеть на пагубу тобѣ». Еже и бысть ему: во едину бо нощь бысть безъ вѣсти. Бѣси бо, подътокше, на зло въводят, посемь же насмихаются, вринувше въ пропасть смертьную, научивше глаголати, яко се скажемъ бѣсовьское научение и дѣиство. И бывши единою скудости в Ростовьстѣи области, въстаста два волъхва от Ярославля, глаголюща, яко «мы свѣмы, кто держить обилье в себѣ». И пакы поидоста по Волзѣ; гдѣ приидоста в погостъ, и ту нарицающа лучьшая жены и глаголюща, яко сия жена жито держить, и сия медъ, а си рыбы, и сия же скору. И привожаху к нима сестры своя и матери и жены своя; онѣма же мечтаниемь своимъ прорѣзавше за плечима, и вынимаста любо жито, или рыбу, или веверицю; и убивашета многы жены, и имѣниа их взимашета собѣ. И приидоста на Бѣлоозеро, и бѣ у нею людии 300. В се же время нриключися приити отСвятослава Яневи, сыну Вышатину, /л.91об./ сбирати данѣ. Повѣдаша же ему бѣлозерци, яко «суть у нас два кудесника и избиша многыя жены по Волзи, по Шекъшнѣ и нонѣ приидоста сѣмо в нашю землю». Янь же, испытавъ, чья еста смерда, и увѣдавши ясно, яко суть князя Святослава, и сице пославши к ним, и рече иже суть около двою кудесникъ: «выдаите ми волхва та сѣмо, яко тѣи суть смердѣ моего князя». Они же сего не послушаша. Янь же поиде самъ безъ оружья, и рѣша ему отроцѣ его: «не ходи безъ оружья, исъсоромять тя». Он же повелѣ отрокомъ своимъ взяти оружие, и бѣ с нимъ 12 отрок, и се пакы поиде к нимъ к лѣсу. Они же сташа, исполцившеся, противу; а Яневѣ же идущу с топорцемъ, и выступиша от нихъ трие мужи, и приидоша къ Яневѣ, и сице глаголюще ему: «видя идеши на смерть, не ходи». Оному же повелѣвшю бити я, къ прочимъ поиде. Они же сунушася на Яня, и единъ от них грѣшися Яня топоромъ; а Янь же, оборотя топоръ, удари тыльемъ, и абие повелѣ отрокомъ сѣщи их; они же бѣжаша в лѣсъ, и убиша ту попина Янева. Янь же, вшед въ град къ бѣлозерчемъ, и рече имъ: «аще не имете волхву сею, не иду от васъ /л.92./ за лѣто». Бѣлозерци же, шедши, яша их и приведоша к нему. И рече има: «что ради толко погубиста человѣкъ». Онѣма же рекшима, яко «ти держать обилье; да аще истребивѣ и избѣваемъ сих, и будеть гобиино; аще ли хощеши, то пред тобою выимевѣ жито, или рыбу, или иное что». Янь же рече имъ: «поистиннѣ лжета: створилъ бо есть богъ человѣка от земля, съставленъ костьми и жилами и от крове, и нѣсть в немъ ничтоже, и не вѣсть ничтоже, токмо богъ единъ вѣсть». Она же рекоста: «вѣдаемъ, како есть человѣкъ створенъ». Он же рече: «како». Она же ркоста: «богъ мывъся в мовницѣ, и въспотѣвъ отреся вехтемь, и сверже и съ небеси на землю; и разъпрѣся сатана с богом, кому в немъ створити человѣка, и створи диаволъ человѣка, а богъ душю в него вложи; тѣм же аще умрет человѣкъ, и в землю идет тѣло, а душа къ богу». И рече има Янь: «по Вперёдѣ прельстилъ вы есть бѣсъ; коему богу вѣруета». Она же рекоста: «Антихьсту». Он же има рекъ: «то гдѣ есть». Она же ркоста: «сѣдить въ безъднѣ». «То кыи то богъ, сѣдяи въ бездне; то есть бѣсъ; а богъ есть, сѣдяи на престолѣ на небеси, славимъ от аггелъ, иже предстоять ему съ страхомъ, не могу/л.92об./ще на нь зрѣти; и сих бо аггелъ сверженъ бысть, егоже вы глаголета антихьста, за величание его сверженъ бысть съ небесѣ, и есть въ безднѣ, якоже вы глаголета, жьда, егда приидеть богъ съ небесѣ, сего имъ антихъста свяжеть узами и посадить во огнѣ вѣчномъ съ слугами его, иже к нему вѣрують; вамъ же и здѣ мука прияти от мене, и по смерти тамо». Онѣма же рекшима: «нама бозѣ повѣдають: не можеши нама створити ничтоже». Он же рече имъ: «лжют вамъ бозѣ». Они же ркоста: «намъ пред Святославомъ стати, а ты намъ не можеши створити ничтоже». Янь же повелѣ бити ихъ и поторгатѣ брадѣ ею. Симь же пакы биенымъ суще и брадѣ поторгаеми проскипомъ, и рече има Янь: «что вамъ бозѣ молвят». Онѣм же тако рекшимъ: «стати намъ пред Святославомъ». И абие повелѣ Янь вложити рубля въ уста има и привязати ихъ къ упругомъ, и пусти пред собою в лодьи, а самъ по них поиде; и ста на усть Шекъсны. И рче има Янь: «что вамъ бозѣ молвят». Она же повѣдаста: «сице намъ молвят: не быти иамъ живымъ от тебе». И рече има Янь: «то ти право повѣдають». Она же рекоста: «аще наю пустиши, много ти добра будеть; аще ли /л.93./ нас не пустиши, многу печаль приимеши и зло». Он же рече: «аще вас пущу, то зло ми будет от бога; аще ли вас погублю, то мьзда ми от бога будет». И рече Янь къ повозникомъ: «чи кому васъ кто родинъ убиенъ от сею». Они же глаголаша: «мнѣ мати, другому сестра». Он же рече: «мьстите своих». Они же поимше, убиша я и повѣсиша их на дубѣ; отместие приимше от бога по правдѣ. А Яневѣ идущи къ домовѣ своему, и въ другую нощь медвидь възлѣзъ, угрызъ, снѣсть их; и тако погыбнуста бѣсовьскымъ наущениемъ, инѣмъ видяща и гадающа, а своея пагубы не вѣдуще. Аще быста вѣдала, то не быста пришла на мѣсто се, идеже изимана быста; аще ли ята, то почто глаголата: «не умрети нама», оному мыслящу убити я. Нь се есть бѣсовьское наущение; бѣси бо не вѣдят мысли человѣческыя, но влагають помыслъ въ человѣка, а таины не свѣдуще. Богъ же единъ свѣсть помышлениа человѣческа, бѣси бо не свѣдают ничтоже; суть бо немощнѣ и худѣ взоромъ. Яко и се скажемъ о взорехъ и омрачениих. В си бо времена и в лѣта приключися нѣкоему новгородцю приити в Чюдь, и прииде къ кудеснику, хотя волъхвованиа у него; онъ же /л.93об./ по обычаю своему нача призывати бѣсы въ храмину свою. Новгородцю же сѣдяще на празѣ тоя храмины, кудесъникъ же лежа оцѣпѣвъ, и шибе имъ бѣсъ. Кудесникъ же, въставъ, рече к новъгородцю: «бози не смѣють приити: нѣчто имаши на собѣ, его же боятся». Он же помяну на собѣ крестъ; и, отшед, постави кромѣ храмины тоя. Он же нача изнова призывати бѣсы; бѣсы же, мечтавше имъ, повѣдаша, что ради пришелъ есть. Посемъ же поча прошати его: «что ради боятся сего, егоже носимъ на собѣ креста». Он же рече: «то есть знамение небеснаго бога, его же наши бозѣ боятся». Он же рече: «то каковѣ суть бози ваши и гдѣ живут». Он же рече: «бози наши живут въ безднахъ; суть же образомъ черни и крилатѣ, хвосты имуще; въсходят же и под небо, слушающе ваших богъ: ваши бо бозѣ на небесѣ суть; и аще кто умрет от ваших людии, то возносимъ есть на небо; аще ли от наших людии умираеть, то носимъ есть нашим богомъ въ бездну». Якоже и есть: грѣшницѣ въ адѣ суть, ждуще мукы вѣчнои; а праведницѣ въ небесномъ жилищн въдворяются съ аггелы. Сица ти есть бѣсовьская сила и лѣпота и немощь; тѣм же прельщають человѣкы, веляще имъ глаголати видѣниа, являющеся имъ; не сверше/л.94./ным вѣрою, являющеся во снѣх, инѣмь мечьстѣ; и тако волхвуют научениемъ бѣсовьскымъ. Паче же женами бѣсовьская волшвениа: искони бо бѣсъ прельсти жену, сия же мужа своего; тако сии роди много волхують жены чародѣиствомъ и отравою и инѣми бѣсовьскыми козньми. Нь и мужи прелщени бывають от бѣсовъ невѣрьнии; яко се в первыя роды: при апостолехъ бо бысть Симонъ волхвъ, иже творяше волшество: псомъ и глаголати человѣческымъ гласомъ; еще же и самъ премѣняшется, ово старъ, ово млад, оволи иного премѣняше во иного образъ, въ мечтании сице творяше; Аини и Абри волъшвениемъ чюдеса А противу Моисѣеви. Нь и Конопъ творяше мечтаниемъ бѣсовьскымъ, яко и по водамъ ходити, и ина мечтаниа творяше, бѣсомъ льстимъ, на пагубу собѣ и инѣмъ. Сице бѣ волхвъ въсталъ при Глѣбѣ в Новѣгородѣ; глаголашеть бо людемъ, творяся акы богъ, и много прельсти, мало не всего града: глаголашеть бо, яко провѣде вся, и хуляшеть вѣру крестияньску, и тако глаголаше, яко «преиду по Волхову пред всѣми людьми». И бысть мятежь въ градѣ великъ, и вси яша ему вѣру, и хотяху побити епископа Федора. И епископъ /л.94об./ же Федоръ, вземши честныи крестъ и оболчеся в ризы, и ста пред народомъ, и глагола им: «аще хощете вѣру няти волхву, тои за него да идет; аще ли вѣрует къ кресту, да идеть к нему». И раздѣлишася на двое: а князь Глѣбъ и дружина его сташа у епископа, а людие вси идоша за волъхва; и бысть мятежь междю ими. Глѣбъ же, въземъ топоръ под скуд, и прииде къ волхву, и рече ему: «то вѣси ли, что утро хощеть быти, что ли вечеръ». Он же рече: «провидѣ вся». И рече Глѣбъ: «то вѣси лѣ, что ти днесь хощеть быти». Он же рече: «чюдеса велика створю». Глѣбъ же, выимя топоръ, ростя и, и паде мертвъ; и людье разидошася. Он же погыбе душею и тѣломъ, предавъся диаволу.