Сайт посвященный церковной истории
Святая София и
Великий Новгород
История и
современность
История и современность
Кликни на квадрат справа, чтобы открыть вкладки сайта
Перепечатка в интернете разрешена при условии наличия активной ссылки на сайт " Святая София и Великий Новгород: История и современность".
НОВГОРОДСКАЯ ПЕРВАЯ ЛЕТОПИСЬ МЛАДШЕГО ИЗВОДА
(Комиссионный, Академический, Толстовский списки)
В лѣто 6921 [1413]. Постави владыка Иоан с воеводами новгородскыми и съ их вои, что былѣ у Выбора, и пометомъ християньскым, церковь камену сборъ архаггела Гаврила на Хревьковѣ улици, и свяща ю самъ въ праздникъ его. А Иванъ Морозовъ постави церковь камену на Десятинѣ Зачатье святого Иоанна Предтечя. Погорѣ Тфѣрь. Того же лѣта от Можаиска града за 10 веръстъ, въ отчины князя Аидрѣя Дмитриевича, от иконы пресвятыя Богородица явилося жалованиа и прощениа людем много: слѣпымъ, хромымъ, раслабленымъ, глухымъ и нѣмымъ, и нѣсть мощно сказати или исчести их, ум человѣчь не можеть изрещи, колико человѣколюбие божие и какова милость на людех. А владыка Иоанн ѣзди во Пьсковъ.
В лѣто 6922 [1414]. Поиха Фотѣи митрополит в Литву, и Витовтъ его ограби. Погорѣша в манастыри на Деревяницѣ владычнѣ хоромы, и церковь камена святая Богородица огорѣ да человѣкъ сгорѣ. Тои веснѣ ѣздиша от Новагорода в Литву послы: посадникъ Юрьи Онцифорович, Офоносъ Федорович сынъ посаднич, Федоръ Трябло; и взяша /л.246об./ со княземь Витовтомъ миръ поВперёдѣ. Бѣ болезнь крестианом тяжка. Мѣсяца августа въ 3, погорѣ Неревьскыи конець от святого Володимера и до Гзени; а дерквии каменых огорѣ 8, а древяных 5. Тои осени свершиша церковь камену святую Еуфимию въ Плотничком концѣ. Пострижеся владыка Иоанн въ скиму; а посадникъ Кирила Дмитриевич преставися. Тои же зимы, мѣсяца генваря въ 20, соиде владыка Иоан со владычества, бывши въ владычьствѣ 30 лѣт безъ трии.
В лѣто 6923 [1415]. Иде вода во звод. И повоеваша Татарове Елетьскую землю. И Москва выгорѣ и Смолнескъ. И бысть знамение въ солнци мѣсяца июня въ 7. Преставися посадникъ Федосии Обакунович въ мнишьскомъ чину. Поставиша церковь камену святую Троицю на Видогощи в манастыри. Того же лѣта новгородци, сдумавъ на Ярославлѣ дворѣ и ставъ вѣцемъ у святѣи Софѣи, и положиша три жеребьи на престолѣ, во имена написавъ: Самсона чернца от святого Спаса с Хутина, Михаила игумена от святого Михаила с Сковороткѣ, Лва игумена святѣи Богородици с Колмова; и по отпѣтьи святыя службы Василии протопопъ старыи пръвое вынесе на вѣце Лвовъ жеребеи, по сем Михаиловъ, а на престолѣ остася Самсоновъ. И посадникъ ОньЦдрѣи Иванович и тысячкыи Олександръ Игнатьевич с новгородци възведоша Самсона честно в дом святѣи Софѣи на сѣни, мѣсяца августа день, в недѣлю, на память святого мученика Еупла диакона. Того же дни священа бысть церкви древяная святое Въскресение господне на Краснои горкѣ у Плотничского конца, и манастырь устроиша. Тои осени свершиша двѣ церкви камены в Людинѣ конци: святое Въздвижение господне да святого Луку.
На ту же осень богу попущьшю, а князю Витовту Литовьскому тако изволшю, по своему хотѣнью собравъ епископы крестианьскыя, иже въ области его живущих: Феодосиа Полочкого, Исакиа Черниговьскаго, Дионисиа Лучкого, Герасима Володимирьскаго, Харитона Холмъскаго, Еуфимиа Туровьскаго, и тѣми епископы постави Киеву митрополита Григориа Болгарина, мѣсяца ноября въ 15. Тои зимы февраля въ 23, в недѣлю мясопустную, прииха Самсонъ к митрополиту ставится владыкою, а с ним послы новгородчкыи: Василии Обакунович, тысячкыи Василии Есифович, тысячкыи Олександръ Игнатьевич, и приихаша на Москву.
В лѣто 6924 [1416]. Марта въ 9, на 40 мученикъ, по зборѣ в понедѣльник, а в четверток тои недѣли, 12 день, простилъ богъ въ церкви святѣи Богородици у гроба /л.247об./ Петра митрополита: у человѣка нога прикоръчена исцѣлѣ, а в недѣлю 2-ю поста, въ 15, у черницѣ руцѣ исцѣлѣша. А в тои день Фотѣи митрополит постави Самсона диакономъ, а в суботу 3-ю поста, 21, попомъ сверши; а в недѣлю средокрестъную, въ 22, на память святого отца Василья, поставленъ бысть архиепископом великому Новуграду въ церкви архистратига Михаила, и нареченъ бысть от митрополита Семеономъ; а на поставлении были с митрополитом владыкъ 5: Григореи Ростовьскыи, Суздальскыи Митрофанъ, Антонии Тфѣрьскыи, Сарьскии Тимофѣи, Исакии Перемьскыи, при великомъ князѣ Васильи Дмитриевичѣ и при братьи его Юрьи и Костянтинѣ и прииха в Новъгород априля въ 16, в великии четвергь. И посадникъ Иванъ Богданович, тысячкыи Борисъ Васильевич, съ игумены, и с попы, и с крилосом святыя Софѣя стрѣтоша и съ кресты конець Славна, и ради быша новгородци своему владыцѣ;а владыка Семеонъ того дни сверши святую литургию въ святѣи Софѣи, у своего престола, богомъ подарованнаго ему. Поставиша церковь святого Илью конець Прускои улицѣ. Тои осени свершена быста двѣ церкви камены: святыи Петръ митрополит рускыи, да святыи Афанасии, стяжениемъ владыцѣ /л.248./ Семеона.
В лѣто 6925 [1417]. Преставися посадникъ Юрьи Онцифорович, бывши нѣмъ год и 3 мѣсяци. Мѣсяца июня въ 10 громъ бысть, въ церкви святого Еупатиа на Рогатицѣ и иконы ополѣша. Того же мѣсяца 24, на рожество святого Иоанна Предтечя, преставися владыка Иоанн въ монастыри на Деревяницѣ и положенъ бысть въ церкви святого Въскресения въ притвори. А на Москвѣ преставися князь Иванъ, сынъ князя великаго Василья. Того же лѣта свершены быша 6 церквии каменых: святая Троица на Колмовѣ, святыи Никола, святыи Мина на Даньслалѣ улицѣ, святыи Андрѣи на Щитнои улици, святыи Антонии у Спаса на Хутинѣ, святого Николу на Холопьи городци. Того же лѣта с Вятки, изъ князя великого отчинѣ, княжь бояринъ Юрьевъ Глѣбъ Семеонович с новогородчкыми бѣглицѣ, съ Семеономъ Жадовьскым и с Михаилою съ Росхохинымъ, и съ устьюжаны и с вятцаны изъихаша в насадех безъ вѣсти в Заволочькую землю и повоеваша волость Борокъ Ивановых дѣтеи Васильевича, и Емцю и Колмогоры вземъ и пожгли, и бояръ новгородчкых изимаша: Юрья Ивановича и брата его Самсона. Иванъ Федорович и брат его Офоносъ, Гаврила Кирилович, Исакъ Ондрѣевич, сугнавъ ихъ под Моржомъ на островѣ, братыо свою Самсона /л.248об./ и Юрья отъяша и полонъ весь и съ животы, а их отпустиша. А Василии Юрьевич, сынъ посадниць, Самсонъ Иванович, Гаврила Кирилович, брат его Григореи, съ заволочаны идоша за разбоиникы в погоню и пограбиша Устьюгъ. А в то время взяша новгородци миръ с Нѣмци. В то же лѣто и зиму бѣ моръ страшенъ в Новѣгородѣ на людех, и в Ладозѣ, и в Русѣ, и в Порховѣ, и во Пьсковѣ, и въ Торжьку, и въ Дмитровѣ, и во Тфѣри, и по властемъ и по погостомъ. И како могу сказати ту бѣду Вперёдю и грозную, бывшюю в вееь моръ; кака туга живым по мертвыхъ, понеже умножишася умерших въ градѣх и селех, тѣм же едва успѣваху живии мертвых опрятывати, на всякъдень умираху толко, яко не успѣваху погрѣбати их, а дворовъ много затвориша безъ людии. Преже яко рогатынею ударить и явится железа, или начнет кровию хракати и потомь дрожь имет и огнь ражьжет по всѣмъ суставам человѣческымъ естественым, и недуг походит; и в то болѣзни мнози, лежавъ, изомроша. Мнозѣх же крестиянъ богъ помилова своею милостию: отъидоша житья сего въ аггельском чину, от архиереи маслом мазавшимся; и два посадника преставистася в том же чину: Иванъ Олександрович, Борисъ Ва/л.249./сильевич. А владыка Семеонъ съ всею седмию сборовъ и съ крестианы, со кресты обходи около всего великаго Новагорода, молися богу и пречистѣи его матери о престатьи гнѣва божиа. А крестианы овѣ на конех, а друзии 83 пѣши, из лѣса беръвна привозивъ, поставиша церковь святую Ностасью в память ея, и свяща ю архиепископъ Семеонъ того же дни и святую литургию совръши; а въ остаточных беръвнах поставиша церковь святого Илью конець Прускои улицѣ; а новоторжанѣ такоже единѣмъ утром святого Афанасиа, и литургию свершиша.
В лѣто 6926 [1418]. Знамение бысть въ церкви святѣи мученици Ностасьи: идяше от иконы святыя богородица Покрова акы кровь по обѣ сторонѣ ризъ ея, мѣсяца априля 19. Того же мѣсяца сдѣяся тако в Новѣгородѣ научением дияволим: человѣкъ нѣкыи Степанко изымаша боярина Данила Ивановича, Божина внука, держащи вопияше людем: «а господо, пособите ми тако на злодѣя сего». Людие же, видяще его вопль, влечахут акы злодѣя к народу и казниша его ранами близъ смерти, и сведше с вѣца, сринуша и с мосту. Нѣкто же людинъ, Личковъ сынъ, хотяше ему добра, въсхити его в челнъ, и народ, възъярившись на того рыбника, домъ его розграбиша. И рекомыи бояринъ, хотя беще/л.249об./стие свое мьстити, въехитивъ супостата и нача мучити, хотя вред ицѣлити, паче болши язву въздвиже; не помяну рекшаго: азъ отмьщение. Слышавъ же народ, яко изиманъ бысть Степанко, начаша звонити на Ярославли дворѣ вѣче, и сбирахуся людии множество, кричаху, вопиюще по многы дни: «поидем на оного боярина и дом его расхытим». И пришед в доспѣсех съ стягом на Кузмадемиану улицу, пограбиша дом его и иных дворовъ мъного, и на Яневѣ улицѣ берегъ пограбиша. И по грабежи том возбоявъшися кузмодимиянци, да не горѣе будет на них, отдаша Степанка, пришедши къ архиепископу, молиша его, да пошлет къ собранию людску. Святитель же послуша молениа их, посла его с попом да съ своим боярином; они же прияша его и пакы възъярившися, аки пианѣ, на иного боярина, на Ивана на Иевлича, на Чюдѣнцевѣ улици и с ним много разграбиша домовъ бояръскых; нь и монастырь святого Николы на полѣ разграбиша, ркуще: «здѣ житницѣ боярьскыи». И еще того утра на Людгощи улицѣ изграбиша дворовъ много, ркуще, яко «намъ супостаты суть»; и на Прускую уличу приидоша, и они же отбишася их. И от того часа нача злоба множитися: прибѣгше /л.250./ они на свою Торговую сторону й рѣша, яко Софѣиская Вперёд хощеть на нас въоружатися и домы наша грабити; и начаша звонити по всему граду, и начаша людие сърыскывати съ обою Вперёд, акы на рать, в доспѣсѣх на мостъ великыи; бяше и губление: овы от стрѣлы, овы же от оружиа, бѣша же мертвии аки на рати; и от грозы тоя страшныя и от возмущениа того великаго въстрясеся всь град и нападе страх на обѣ страны. Слышав же владыка Семеонъ особную рать промежи своими дѣтьми, и испусти слезы изъ очию и повелѣ предстоящим собрати зборъ свои; и вшед архиепископъ въ церковь святыя Софѣя, нача молитися съ слезами, и облечеся въ священныя ризы со своимъ збором, и повелѣ крестъ господень и пресвятыя богородица образъ взяти, иде на мостъ; и по нем въслѣдующе священници и причетъ церковныи, и христоименитое людьство по немь идоша, и мнози народи, испущающе слезы, глаголюще: «да укроти, господи, молитвами господина нашего». И людие богобоязнивии припадающе къ святителевома ногама съ слезами: «иди, господине, да уставит господь твоимъ благословениемъ усобную рать»; ови же А глаголаху: «да будет злоба ги на зачинающих рать». И пришед святитель ста посредѣ мосту и, вземъ животворящий крест, /л.250об./ нача благословляти обѣ Вперёдѣ; ови, взирающе на честныи крестъ, плакахуся. Услышавши она Вперёдсвятителево пришествие, н прииде посадникъ Федоръ Тимофѣевич съ иными посадникы и с тысячкыми, поклонишася владыцѣ. Владыка послуша молениа их, посла анхимандрита Варлама и отца своего духовнаго и протодиакона на Ярослаль дворъ, да подадут благословение степенному посаднику Василью Есифовичю и тысячкому Кузмѣ Терентѣевичю, да идут в домы своя. И разидошася, молитвами святыя богородица и благословениемъ архиепископа Семеона, и бысть тишина въ градѣ. Того же лѣта поставлены быша 4 церкви камены: Всѣ святыи на Черници улици, святого Саву на Кузмодемьянѣ улици, святого Илью у Спаса на Хутинѣ, Въскресение христово общии манастырь; и святого Николу на Пидбѣ. И тои осени ѣздилъ владыка Семеонъ въ Пьсковъ и мѣсяць судилъ.
В лѣто 6927 [1419]. Мѣсяца маия въ 1 погорѣ Славеньскыи конець и Плотничьскыи и до Федорова ручья, церкви 24, а святых Отець церковь вся выгорѣ, а животовъ християньскых множество изгорѣ, а людии истопло въ Волховѣ и от огня изгибло много. Того же лѣта и преставися Иванъ посадникь Богданович. Того же лѣта, мѣсяца априля въ 27 /л.251./ 9, в недѣлю по вечернии бысть буря велиа вѣтреняя, и тучя, и дождь умноженъ; источницѣ потекоша воды, акы рѣка силна, и молнии блистаниа, и громъ страшенъ бысть; и въ церкви святѣи Богородици у городнихъ врат уби сторожа Андрѣа, а чепь поникадилную, что во лбѣ, всю порвало, и двери раискыи ополѣлѣ, и святыи Иоанн Предтеча, и на святомъ Николѣ [и] на Василии изнадбу сътвори, а церкви божиею благодатью схранена бысть, а подъ церковию в воротех два человѣка убило до смерти, а инии падоша, акы мертви быша, и овы онѣмѣша, а инии безъ ногь быша, и глусѣи быша; оле, милосердиемь божиимъ, овых водою отольяша, а друзѣх по домом разносиша, нь и тѣ божиею благодатью, полежавъ на одрѣ колко, которыи въсташа; и во святомъ Костянтинѣ том же часѣ иконы ополѣша. Того же лѣта, пришед 85 Мурманѣ воиною въ 500 человѣкъ, в бусах и въ шнеках, и повоеваша въ Арзуги погостъ Корильскыи и в земли Заволочкои погосты: в Неноксѣ, в Корѣльскомъ манастырь святого Николы, Конечныи погостъ, Яковлю кюрью, Ондрѣяновъ берегъ, Кигъ островъ, Кяръ островъ, Михаиловъ манастырь, Чиглонимъ, Хѣчинима; 3 церкви сожгли, а христианъ /л.251об./ черноризиць посѣклѣ, и заволочанѣ двѣ шнеки Мурманъ избиша, а инии избѣгоша на море. А Варламъ анхимандрит постави церковь камену въ Юрьевѣ манастыри Рожество богородицю. А Михаила Юрьевич церковь древяну святого Михайла на Колъмовѣ. А Федосии игуменъ еватую Троицу церковь камену на Клопьскѣ въ 60 днии. Тои зимѣ умре Григори митрополит киевьскыи, литовьскыи, поставленыи по повелѣнию Витовтову епископы, а не патриархомъ, не по заповѣдѣ святых отець и апостолъ. Того же лѣта в Новъгород приихалъ с Москвѣ князь Костянтинъ Дмитриевич; милостью божиею и архиепископа Сёмеона благословением прияша новгородци въ честь, мѣсяца февраля въ 25, на сборъ великыи: и подаваша ему пригороды, кои былѣ за Лугвенем, и боръ по всеи волости новгородчкои, коробеищину; а про то был в Новѣгородѣ, занеже брат его князь великыи Василии хотѣлъ его в челование привести под своего сына Василья; и онъ не хотя быти под своимъ братаничем, и князь Василии возверже нелюбье на него, и отъима у него всю отчину, и бояръ его поима и села и животы их отъима.
В лѣто 6928 [1420]. Начаша новгородци торговати денги серебряными, а артуги попрода/л.252./ша Нѣмцом, а торговалѣ 5’ имы 9 лѣт. И моръ бысть въ Пьсковѣ великъ. Тои же осени прииха в Новъгород из Нѣмець от местеря Селивестра посолъ велиядьскыи кумендеръ Гостило, сестричиць местеровъ Тимофѣи, и воевода ругодивьскои, и доконцаща со княземъ Костянтиномъ и со всѣмъ великымъ Новымградом, что быти на съѣзди местерю, а князю Костянтину и новгородцомъ послати своих бояръ; и послаша намѣстьника князя великаго князя Федора Патракиевича, посадника новгородчкого Василья Есифовица, посадника Офоноса Федоровича, Якова Дмитриевича, Михаилу Юрьевича, Наума Ивановича. Они же наѣхавше местеря на Наровѣ и взяша вѣчныи миръ по Вперёдѣ, како былъ при великом князѣ Александрѣ Ярославличѣ.
В лѣто 6929 [1421]. Выихалъ князь Костянтинъ из великого Новагорода; а Владыка Семеонъ и посадникы и тысячкыи и боярѣ новгородчкыи, одаривъ и, проводиша его съ честью. Того же лѣта бысть вода велика въ Волховѣ и снесе Великыи мостъ и Нередичкои и Жилотужьскыи, а с Коломець и церковь снесе святую Троицю; а въ Щиловѣ и на Соколницѣ и в Радоковицах и [въ] А Въ/л.252об./скресениа в Людинѣ концѣ, в тѣх церквах толко на полатех пѣлѣ; а по концем’ хоромы и съ животы снесе, а толь силно розлилася в городняя ворота до Рыбниковъ. Того же лѣта, мѣсяца мая 19, в Петрово заговѣние, в нощь бысть трусъ на небесѣ’ великъ: въшедши туцѣ с полудни, в полунощи громъ и молнии огненѣ съ небесѣ съ шюмомъ страшнымъ и дождь прапруденъ и с камениемъ и съ градом; и владыка Семеонъ, вшед въ церковь святыя Софѣя, съ иерѣи, съ крилошаны, уже свитающю дни в понедѣльник, и повелѣ молбенъ пѣти святѣи богородици за весь род крестианьскыи о преставлении гнѣва божиа. Того же лѣта преставистася въ мнишьском чину два посадника: Федоръ Тимофѣевич, Олександръ Фоминич. Того же лѣта, мѣсяца июня въ 15, святого пророка Амоса, преставися архиепископъ новгородчкыи Семеон; бысть владыкою 5 лѣт и 3 мѣсяци безъ пяти дьнии, а всего 6 лѣт. Того же лѣта сдумавше новгородци на вѣцѣ на Ярославлѣ дворѣ, и ставъ вѣцемъ у святѣи Софѣи, положиша 3 жеребьи на престолѣ во святѣи Софѣи, написавъ: игумена Феодосиа святѣи Троицѣ съ Клопьска, игумена Захарью от Благовѣщениа святѣи богородици, Арсиния ключника владычня съ /л.253./ Лисиции горкѣ, и по отпѣтии святыя службы Труфанъ попъ 1 вынесе Арсѣниевъ жеребии, потом Захарьинъ, а на престолѣ остася Феодосьевъ жеребии; посадникъ Тимофѣи Васильевич и тысячкыи Кузма Терентѣевич с новгородци възведоша игумена Феодосиа честно в домъ святѣи Софѣи на сѣни, мѣсяца септября въ 1, в понедѣльник, на память святого отца Семеона столпъника. Того же лѣта свершены быша 4 церкви камены: Богоявление на полѣ, Въскресение у Благовещениа въ В манастыри, Иванъ милостивыи въ Людинѣ конци; а новгородци человаша крестъ за одинъ брат. Въ си два лѣта бысть глад и моръ великъ, и наметаша мертвых три скуделницѣ: одину въ святѣи Софѣи за олтарем, а двѣ у Рожества на полѣ.
В лѣто 6930 [1422].
В лѣто 6931 [1423]. Бысть знамение въ солнци. И того лѣта свершиша двѣ церкви камены: святую Богородицю на Колмовѣ и святого Якова на Лужищи.
В лѣто 6932 [1424]. Сослаша новгородци Феодосиа въ свои монастырь, бѣ два лѣта на сѣнех в дому святѣи Софѣи. И пакы того же лѣта възведоша Омельяна по жеребью къ престолу святѣи Софѣи. Того же лѣта и въ Пьсковѣ дѣнги сковаша, и почаша по всеи Рускои земли торговати дѣнгами. И моръ бысть в Корѣльскои землѣ. /л.253об./ Того же лѣта моръ бысть в Новѣгородѣ железою и хракъ кровию. И поставленъ бысть владыка Еуфимии на Москвѣ митронолитомъ Фотиемъ. Того лѣта свершенѣ быша двѣ церкви камены: святыи Лука на Лубяницѣ и святыи Борисъ и Глѣбъ на Гъзенѣ. Того же лѣта постави владыка Еуфимеи церковь святого Спаса милостиваго за олтаремъ у святѣи Софѣи. Того же лѣта преставися князь великыи Василии Дмитриевич.
В лѣто 6933 [1425]. Погорѣ Торговая сторона и Людинь конець весь. Того же лѣта воеваша устижанѣ Заволочьскую землю; и новгородци ходиша на нѣх ратью къ Устюгу, и взяша на них окупъ 50000 бѣлкѣ и 6 сороковъ соболеи. Того же лѣта успе князь Иванъ Михаилович Тфѣрьскыи. Того же лѣта преставися Феодосии игуменъ святѣи Троицѣ, въ своемь манастырѣ, мѣсяца септября въ 29.
В лѣто 6934 [1426]. Стоя Витовтъ под Вороначомъ 3 недѣли ратью и отъиде не взя.
В лѣто 6935 [1427]. Свершена бысть церковь камена святыи Спасъ милостивыи владыкою Еуфимиемъ, и устроена бысть дивно иконами и книгами.
В лѣто 6936 [1428]. Приходилъ князь Витовтъ к Порхову ратью, и порховици кончаша за себе 5000 серебра. И тогда прииха владыка Еуфимеи к Порхову с послы новгород/л.254./скыми, и доконца Витовту другую 5000 серебра, а шестую тысяцю на полону.
В лѣто 6937 [1429]. Преставися владыка Еуфимии, мѣсяца ноября въ 1, на память святого Кузму и Димиана; а былъ владыко 5 лѣт и 5 недѣль, а чернцом былъ на сѣнех год и двѣ недѣли. Того же мѣсяца въ 13 възведенъ бысть по жеребью священноинокъ Еуфимии с Лисицьи горкѣ на сѣни в домъ святѣи Софѣи. Того же лѣта падеся церковь святых Отець на княжи дворѣ.
В лѣто 6938 [1430]. Поставиша церковь камену святых Отець на княжи дворѣ в тоя мѣсто. Того же лѣта новгородци приставили В к Порхову другую стѣну камену. Того же лѣта пригонъ былъ крестианомъ к Новугороду город ставити, а покручалъ 4-и 5-го. Тои же осени умре князь Витовтъ Литовьскыи, и насѣде на него мѣсто на княжение князь Свѣтригаило. Тои же осени вода бысть мала велми, и земля и лѣсы горяху, и дыммногь велми, иногда друга не видѣти; и с того дыма мряху рыбы и птици, а рыба дымомъ воняше и по два года.
В лѣто 6939 [1431]. Преставися на Москвѣ митрополит Фотѣи. Того же лѣта ходиша князи рустѣи въ-орду: Юрьи Дмитриевич, Василии Васильевич. /л.254об./
В лѣто 6940 [1432]. Выидоша князи рустии из Орды без великаго княжениа. Того лѣта владыка Еуфимии священноинокъ постави церковь древяну святых Апостолъ на Чюдинчевѣ’ улици. Тои осени прииха в Новъгород князь Юрьи Семенович из Литвы. Тои же осени погорѣ околотокъ всь и владычнь дворъ. Того же лѣта заложиша церковь камену святого Юрья на Борковѣ улицѣ.
(по иному списку)
(В лѣто 6940 [1432]. Выидоша князи рустии из Орды": князь Василии Васильевич, Юрьи Дмитриевич; цесарь Махметь даше княжение великое князю Василию Васильевичю на всеи Рускои земли. Того лѣта владыка Еуфимии постави церковь древяну святых Апостолъ на Чюдинцевѣ улици. Тои осени прииха в Новъгород князь Юрьи Семенович съ своею княгинею из Литовьскои земли.)
В лѣто 6941 [1433]. Загорѣся веснѣ на Яневѣ улици и погорѣ Загородчкыи конець и Людинь конець до Лукинѣ улицѣ. Того же лѣта
свершиша борковци церковь камену святого Георгиа. Того лѣта постави преподобныи нареченыи владыка Еуфимеи полату въ дворѣ у себе, а дверии у неи: а мастеры дѣлалѣ нѣмечкыи изъ Заморья с новгородскыми масторы.