Сайт посвященный церковной истории
Святая София и
Великий Новгород
История и
современность
История и современность
Кликни на квадрат справа, чтобы открыть вкладки сайта
Перепечатка в интернете разрешена при условии наличия активной ссылки на сайт " Святая София и Великий Новгород: История и современность".
НОВГОРОДСКАЯ ПЕРВАЯ ЛЕТОПИСЬ МЛАДШЕГО ИЗВОДА
(Комиссионный, Академический, Толстовский списки)
В лѣто 6888 [1380]. Биша чоломъ всь Новъградъ господину своему владыцѣ Алексѣю, чтобы еси, господине, ялъся ѣхати [ко] князю великому [Дмитрею Ивановичю]. И владыка прия челобитье своих дѣтеи, всего Новагорода, поиха на Низъ, за недѣлю до цвѣтнои недѣлѣ; а с нимъ поиха Юрьи Иванович, Михаило Данилович, Юрьи Онцифорович, Иевъ Обакунович, Иванъ Федорович и иных бояръ много и житьих мужь. Князь же прия [их] в любовь, а к Новугороду крестъ цѣловалъ на всеи Вперёдѣ новгородчкои и на старых грамотах.
В то же лѣто, мѣсяца августа, приидоша вѣсти от Орды к великому князю Дмитрию и брату его князю Володимеру, якоже въздвизается на крестияны измаилетескыи род поганыи. Нѣкоему убо у них худу /л.226./ цесарюющу, а все дѣющю у них князю Мамаю, и лютѣ гнѣвающюся ему на великого князя и на всю Рускую землю. Се же слышавъ князь великыи Дмитрии Иванович, яко грядеть на нь сила велика татарьская, и собравъ многы вои, и поиде противу безбожных Татаръ, а уповая на милосердие божие и на пречистую его матерь божию богородицю, на приснодѣвицю Марью, призывая на помощь честныи крестъ; и въниде бо в землю их за Донъ, и бѣ ту поле чисто на усть рѣкы Непрядвы, и ту исъполцишася 3- погании Измаилятяне противу крестиянъ. Москвици же мнози небывалци, видѣвши множество рати татарьскои, устрашишася и живота отцаявшеся, а инѣи на бѣги обратишася, не помянувше реченаго пророкомъ, како единъ пожнеть 1000, а два двигнета тму, аще не богъ предасть ихь. Князь же великыи Дмитрии, с братомъ своимъ с Володимеромъ, изрядивъ полкы противу поганых Половець и възрѣвъ на небо умилныма очима, въздохнувъ из глубины сердца, рекоста слово псаломъское: «братие, богъ намъ прибѣжище и сила». И абие съступишася полкы обои; и бысть брань на долгъ час зѣло, и устрашить богъ невидѣмою силою сыны Агаряны, и обратиша плещи на язвы, и погнани /л.226об./ быша от крестиянъ и ови же от оружиа падоша, а инии в рѣцѣ истопошася, бещисленое их множество. А на съступи убиенъ бысть тогда князь Федоръ Бѣлозерьскыи и сынъ его князь Иванъ; а иныи князи и воеводы погнашяся по иноплеменницѣх; от страха божиа и от оружиа кристияньскаго падаху безбожнии Татарове, и възнесеть богъ десницю князя великаго Дмитриа Ивановича и брата его князя Володимера Андрѣевича на побѣду иноплеменникъ. Се же бысть грѣх ради наших: въоружаются на них иноплеменьници, да быхом ся отступилѣ своих неправдъ, от братоненавидѣниа и от сребролюбиа и в неправды судящих и от насилья; нь милосердъ бо есть богъ человѣколюбець, не до конца прогнѣвается на ны,ни в вѣкы враждуеть. Сиа же сдѣяся побѣда князю великому мѣсяца септября въ 8, на Рожество святѣи богородици, в суботу. Князь же великыи Дмитрии съ братомъ своимъ съ княземъ Володимеромъ, ставъ на костех татарьскых, н многыя князи рускыя и воеводы прехвалными похвалами прославиша пречистую матерь божию богородицю, крѣпько брашася съ иноплеменници за святыя божиа церкви, за правовѣрную вѣру, за всю Рускую землю; а самъ /л.227./ приихалъ богомь храним въ столныи и великыи град Москву, въ отчину свою, съ своимъ братомъ Володимеромъ.
В лѣто 6889 [1381]. Заложиша церковь камену святыи Дмитрии на Славковѣ улицѣ. Тои же осени стоялъ князь Литовьскыи Скригаило под Полотскомъ с нѣмечьскою ратью, и много бысть имъ тягости; и прислаша к Новугороду, просяще помоци по крестияньству: «помогли бы есте по насъ». И не бысть имъ помощи от Новаграда, толко посолъ послаша Юрья Онцифоровица къ князю Литовьскому Ягаилу. И заступи богъ и святая Софѣя свои домъ, и отъидоша, города не вземше. В то же лѣто бысть мятежь в Литвѣ, богу попущьшю на них А гнѣвъ свои: въсташа сами на ся, и убиша князя велика Кестутья Гедиминовича, и бояръ избиша; а сынъ его Витовтъ побѣже в Нѣмцѣ и много зла створи Литовьскои земли, подъялъ бо бяше Кестутии княжение под Ягаиломъ.
В лѣто 6890 [1382]. Прииде цесарь татарьскыи Тектомышь в сили велицѣ на землю Рускую, много попустоши земли Рускои: взя град Москву и пожьже, и Переяславль, Коломну, Серпоховъ, Дмитровъ, Володимирь, Юрьевъ. Князь же великыи, видя многое множество безбожных Татаръ, и не ста противу имъ, /л.227об./ и поиха на Кострому и съ княгинею и с дѣтмѣ, а князь Володимеръ на Волокъ, а мати его и княгинѣ в Торжокъ, а митрополит во Тфѣрь, а владыка коломеньскыи Герасимъ в Новъгород. И кто нас, братие, о сем не устрашится, видя таковое смущение Рускои земли, якоже господь глагола пророком: аще хощете послушаете, благая земьная снѣсте, и положю страх вашь на вразѣх ваших; аще ли не послушаете мене, то побѣгнете, никим же гоними; пошлю на вы страх и ужасъ, побѣгнеть вас от 5 —100, а отъ 100 — 10000. Того же лѣта свершиша церковъ камену святого Дмитриа на Славковѣ улицѣ; и свяща ю владыка Алексѣи, съ игумены и с попы и с крилосомъ святыя Софѣа; и за мало днии рассыпася. В то же лѣто приихалъ в Новъгород владыка суздальскыи Дионисии изо Цесаряграда от патриарха Нила съ благословениемъ и съ грамотами, и иде во Пьсковь по повелѣнию владыцѣ Алексѣя, и поучая закону божию, а утвержая правовѣрнии вѣрѣ истиннии крестияньстѣи, нѣгли бы богъ в послѣдняя лѣта утвердилъ несмущено от злых человѣкъ, дияволомъ наущенымъ, правовѣрная вѣра.
В лѣто 6891 [1383]. Копаша ровъ около Софѣискои сторонѣ, къ старому валу. Того же лѣта заложиша двѣ церкви камены: святого Филипа на Нутнои у/л.228./лицѣ и святого Иоанна в Радоковицах, а святого Дмитриа свершишя на Славковѣ улицѣ. В то же лѣто поиде князя великаго сынъ князь Василии в Орду, позванъ цесаремь. Тои же осени поиде князь Михаило Тфѣрьскыи в Орду, ища великаго княжениа. А в Новъгород приихаша князь Патрикии Наримантович, и прияша его навгородци, и даша ему кормление: Орѣховъ город, Корѣльскыи город, и пол-Копорьи города и Луское село.
В лѣто 6892 [1384]. Приихаша городцане орѣховци и корѣльскыи с жалобою к Новугороду на Патрикиа на князя; и князь Патрикии подъя Славно и смути Новъгород: и стаху славлянѣ по князи, и поставиша вѣце на Ярославлѣ дворѣ, а другое вѣце у святѣи Софѣи, обои въ оружьи, аки на рать, и мостъ великыи переметаша; нь ублюде богъ и святая. Софѣя от усобныя рати, но отъяша у князя тѣ городы, а даша ему Русу и Ладогу. Того же лѣта поставиша новгородци город каменъ на Лугѣ, на Ямѣ, милостию святѣи Софѣи, а поспѣшением великаго Михаила архистратига, а благословениемъ отца своего владыцѣ Алексѣя, толко въ 30 дни и въ 3 дни. В то же лѣто загорѣся в Неревьском концѣ у святого Лазоря, и сгорѣ церкви святыи Лазарь и другая церкви святыи Петръ.
В то же лѣто /л.228об./ бысть помрачение на многы дни и нощи, и потки падаху на землю и по водѣ, и не видяху, камо летѣти; а людие не смѣяху ѣздити по озерамъ и по рѣкамъ, и бысть въ крестианех скорбь и туга. Тоже, братие, богъ казнить ны по нашему съгрѣшению, кажа нас на покаяние, да быхом ся покаялѣ от злобъ своих; казнивъ, помилуи, господи; и бысть свѣт, и ради быхомъ. Тои же осени свершиша церковь камену святого Филиппа на Нутнои улицѣ, и свяща ю архиепископъ владыка Алексѣи; и другую церковь сверьшиша святыи Иоанн в Радоковицахъ.
В лѣто 6893 [1385]. Погорѣ город всь Пьсковъ, толко ублюде богъ святая Троица. Того же лѣта мѣсяца июня въ 14, в Петрово говѣние, на память святого пророка Елисѣя и погорѣ в Новѣгородѣ Торговая сторона вся и церкви вси, толко ублюде богъ святую Богородицю на Михалицѣ молитвами святыя богородица; а людии сгорѣ 70 человѣкъ: лют бо бяше велми пожаръ. Того же лѣта, на зиму, бысть знамеиие въ солнци, мѣсяца генваря въ 1 день, на память святого отца Василья.
В лѣто 6894 [1386]. Погорѣ город Орѣховыи, а в Новѣгородѣ погорѣ конець Микитинѣ улици. Того же лѣта свершиша церковь камену святого Климеита на Иворовѣ улицѣ. Того же лѣта убиша Литва князя Святослава /л.229./ Смоленьскаго. Тои же зимы приходи князь великыи Дмитрии ратью к Новугороду с братом своимъ съ княземъ Володимеромъ, держа гнѣвъ про волжанъ на Новъгород, и стоя въ Ямнех. И ѣзди владыка Алексѣи и докоица миръ на всеи Вперёдѣ; а за винныи люди, за волжанъ, взя князь великыи у Новаграда 8000 рублев. Тои же зимы ѣздиша за Волокъ Федоръ посадникъ Тимофѣевич, Тимофѣи Юрьевич, а с ними боярьскии дѣти, брати 5000 рублевъ, что возложилъ Новъгород на Заволочкую землю, занеже заволочанѣ былѣ же на Волгѣ.
В лѣто 6895 [1387]. Копаша валъ около Торговои сторонѣ. Того же лѣта благослови владыка Алексѣи всь Новъгород ставити город Порховъ каменъ; и послаша новгородци Ивана Федоровича, Фатьяна Есифовича, и поставиша город Порховъ каменъ. Того же лѣта, на зиму, выведе из Орды князя великаго сынъ князь Василии Дмитриевич.
В лѣто 6896 [1388]. Съиде владыка Алексѣи съ владычества по своеи воли, благословивъ своих дѣтеи, посадниковъ и тысячкых и всь Новъград, в манастырь святого Въскресениа на Деревяницю, на преполовление праздника владычня, сѣдѣвъ в дому святѣи Софѣи лѣт 30 безъ лѣта и безъ 5 мѣсяць; и много молиша и всь Новъград, чтобы /л.229об./ побылъ в дому святѣи Софѣи, донелѣже извѣдают, кто будет митрополит Рускои земли, и не послуша их, нь благослови я, рекъ: «изберите собѣ три мужа, его же вы богъ дасть». И створиша новгородци тако; мъного же гадавъ посадникъ и тысячкои и всь Новъград, игумены и попове, и не изволиша собѣ от человѣкъ избраниа, нь изволиша от бога прияти извѣщение и уповати на милость его. И избраша три мужи: Иоанна игумена святого Спаса с Хутина, Парфѣниа игумена святого Благовѣщениа, Афанасиа игумена святого Рожества, и положиша три жребии на престолѣ въ святѣи Софѣи, утвердивше тако: егоже въсхощеть богъ и святая Софѣя своему престолу служебника, того жребии остави на престолѣ своемъ. И начаша иерѣи сборомъ обѣднюю пѣти, а новгородци сташа вѣцемъ у святѣи Софѣи; и сконцанѣ святѣи службѣ вынесе протопопъ Измаило жеребеи Афанасьевъ, потомъ Порфѣниевъ; и избра богъ и святая Софѣя и престолъ божии мужа добра, тиха, смирена Иоана, игумена святого 6 Спаса, и стави жеребеи его на престолѣ своемь; и възведоша и на сѣни честно всь Новъград, мѣсяца маия въ 7,на Вознесение господне. на память святого отца Пахомия; не бысть тогда митрополит /л.230./ в Рускои земли. Тои же осени, мѣсяца октября въ 26, в полунощи, въздвижеся угъ вѣтръ, и внесе лед Вълхово изъ озера, и вышибе из Великаго мосту 9 городень. То же богъ не хотѣ видѣти кровопролитья промежи братии наважениемь- 2 диаволим: понеже въсташа 3 концѣ Софѣискои сторонѣ на посадника Есифа Захарьинича, и звонивше вѣце у святѣи Софѣи, и поидоша на дворъ его, акы рать силная, всякыи во оружьи, и взяша домъ его, и хоромы розвезоша; а Есифъ посадникъ бѣжа за рѣку въ Плотничьскыи конець. И въста за него Торговая сторона вся, и начаша людии лупити, а перевозниковъ бити от берега, а суды сѣчи, и тако быша безъ мира по 2 недѣли, и потомъ сиидошася в любовъ; и даша посадничьство Василью Евановичю. Тои же осени, мѣсяца декабря въ 8, поиха владыка Иванъ на поставление владычества на Москву, позванъ послы от митрополита, а с нимъ бояръ новгородчкых: посадникъ Василии Федорович и тысячкои Есифъ Фалелѣевич,Иевъ Обакунович,Тимофѣи Еванович и иных много бояръ; и прииха на Москву генваря въ 10. И поставленъ бысть Иванъ архиепископом Новуграду въ преименитии церкви /л.230об./ святого и великаго архистратига Михаила, генваря въ 17, в недѣлю, на память святого отца Антониа, пресвященнымъ митрополитом Пумииомъ всея Руси; а на поставлении былъ владыка смоленьскыи Данило и рязаньскыи владыка; и створиша в тои день праздникъ свѣтелъ съ хвалами и пѣсньми, при князѣ великом Дмитрии Ивановичѣ. И прииха в Новъград февраля въ 8, в недѣлю фарисѣискую, на память святого отца Парфѣниа, и стрѣтоша съ кресты игумены и попове, конець Славна, посадникъ и тысячкои и всь Новъград, възрадовашася радостию великою зѣло въ тъ день о своемъ владыцѣ.
В лѣто 6897 [1389]. Преставися 1князь великыи Дмитрии Иванович на Москвѣ, мѣсяца мая въ 9, на память святого пророка Исаия. И тои веснѣ бысть моръ великъ во Пьсковѣ, а знамение железою. И тъи веснѣ ѣздилъ владыка Иванъ въ Пьсковь, и молитвою его преста моръ въ Пьсковѣ; и прииха владыка Иванъ в Новъгород, а вси около его здравѣ. Того же лѣта Григории посадникъ Якунович постави церковь камену Покровъ святыя богородица на воротех. Того же лѣта прииха в Новъгород князь Семеонъ Олгордовиць на Успенье святыя богородица, и прияша его новгородци въ честь. Тои же зимѣ преставися архиепископъ новгородчкыи владыка /л.231./ Алексѣи, мѣсяца февраля въ 3, на память святого Симеона Богоприимца.
В лѣто 6898 [1390]. Сѣде на великом княженьи князь Василии Дмитриевич, и новгородци взяша с нимъ миръ по Вперёдѣ. Того же лѣта ѣздиша новгородци с Нѣмци на съѣздъ и не взяша мира. И попдоша новгородци ратью къ Пьскову, и пьсковици добиша чолом Новугороду, и взяша миръ, и воротишася от Солци. Того же лѣта поставиша церковь камену святого цесаря Костянтина и матери его Олены, и свяща ю владыка Иванъ. И поставиша монастырь новъ святого Николу конець Люгощи улицѣ и Чюдинцевѣ на скуделници. Тои В же осени бысть моръ силенъ велми в Новѣгородѣ; все случися приити на ны по грѣхомъ нашим, велие множество крестиянъ умре по всим улицамъ; сице же знамение на людех: при смерти явится железа; пребывъ три дни, умре. Тогда же поставиша церковь святого Афанасиа въ единъ день, и свяща ю архиепископъ новгородчкыи владыка Иоанъ съ игумены и с попы и с крилосом святыя Софѣя; божьею же милостью и святыя Софѣя, стояниемъ и владычнимъ благословениемъ и преста моръ.
Тои же зимы сгорѣ церковь святого Дмитриа на Даньслалѣ улицѣ, и иконы и книгы и весь запасъ церковныи, и товара много /л.231об./ множество изгорѣ: на борзѣ огнь занялъ.
В лѣто 6899 [1391]. Бысть пожаръ, и погорѣ от Борковѣ улицѣ и до Гзеня, а на другои сторонѣ от Микитинѣ улицѣ и до Радокович; и сгорѣ церквии древяных 8, а каменых 3 церкви огорѣша; а людии, женъ и дѣтеи изгорѣ 14 душь, мѣсяца июня въ 15, на память святого мученика Дорофѣя.
Того же мѣсяца въ, на память святого мученика Ульяна, загорѣся на Прускои улицѣ у Веденья святѣи богородици, и погорѣ весь конець Людинъ до святого Алексѣа, и згорѣ церквии древяных 7, а каменых 4 церкви огорѣша. Тои же осени послаша новгородци послы на създъ с Нѣмци в Ызборьско: посадника Василья Федоровича, посадникъ Богданъ Обакунович, посадника Федора Тимофѣевича, тысячкого Есифа Фалелѣевича, Василья Борисовича и купцевъ; а нѣмечкыи послове приихалѣ изъ заморья, из Любька из городка, из Гочкого берега, из Ригѣ, изъ Юрьева, ис Колываня и из ыныхъ городовъ изо многых; тогда взяша миръ с Нѣмци. Тои же зимѣ тѣи же послове нѣмѣчкыи приихавъше в Новъгород, и товары свои поимахут, и крестъ цѣловалѣ, и начаша дворъ свои ставити изнова: занеже не бяшет по 7 год миру крѣпкаго. Тои же зимѣ при/л.232./ихаше митрополит Киприянъ в Новъгород, и владыка Иоанн стрѣтѣ его съ кресты съ игумены и с попы и со многыми крестияны у святого Спаса на Ильинѣ улицѣ. И бысть в Новѣгородѣ 2 недѣлѣ; много говоряшеть Новугороду, чтобы грамота подрати, что новгородци поконцалѣ к митрополиту не зватися. И Новъгород слова его не прияше, а грамотѣ не подраша; и митрополит поиха из Новагорода, а на Новъгород велико нелюбие держа.
В лѣто 6900. [1392] Юрьи Онцифорович постави церковъ святую богородицю Успленне и манастырь устрои. Того же лѣта вышед из Орды князь великыи Василии Дмитриевиць и взя Нижнии Новъгороди поима князѣи и княгинь в таль; а князь Семеонъ бѣжа в Орду. Того же лѣта пришедши из моря разбоиницѣ Нѣмцѣ в Неву, взяша села по обѣ сторонѣ рѣкѣ, за 5 веръстъ до городка до Орѣшка. И князь Семеонъ с городцаны сугнавши, иных избиша, а иных разгониша, п языкъ в Новъгород приведоша; и тогды же поѣхаше в Литву къ своеи братьи, а городокъ покинувши. Тогоже лѣта копаша валъ около Торговои сторонѣ. Того же лѣта пошелъ князь великыи Василии Дмитриевич в Орду, позванъ цесаремъ. Того же лѣта посадникъ Богданъ Обакуно/л.232об./вич съ своею братьею и с улицаны поставиша церковь святого Симеона камену на Чюдѣнцевѣ улицѣ, и священа бысть на праздникъ его. Того же лѣта преставися посадьникъ Василии Федорович, приимши мънишьскыи чинъ, мѣсяца июня 2, и положиша у святого Николы. Тои же осени преставися посадникъ Михаило Данилович, приимши мнишьскыи чинъ.
В лѣто 6901. [1393] Взяша розмирье князь великыи Василии Дмитриевич с великымъ Новымградом про грамоту, что записалъ великыи Новъград грамоту к митрополиту не зватися на Москву, а повѣстуя тако: «чтобы есте к митрополиту грамоту отослалѣ; а что есте цѣловалѣ, а тъ грѣх с васъ митрополит сънимаеть». И великыи Новъгород того не похотѣлъ; и князь великыи взя у Новагорода пригород Торжокъ с волостьми, и Волокъ Ламьскыи, и Вологду, и волостии много повоева; а новгородци взяша у князя великаго Устьюгъ город, Устижно, и много волостии поимаша; и в то время с обѣ сторонѣ кровопролитья много учинилося. И новгородци, не хотя видити болшаго кровопролитья въ крестиянѣхъ, послаша послы к великому князю с челобитьемь оВперёдѣ, а к ми/л.233./трополиту послаша грамоту человальную; и митрополит словом повѣстоваше: «язъ у васъ грамоту цѣловальную емлю, а грѣх с васъ снимаю, а вас благословляю»; а князь великыи новогородчкое челобитье приялъ и взя миръ поВперёдѣ. Поставиша церковь святую Богородицю на Лисицьи горкѣ камену. Сѣде на княженьи в Литвѣ князь Витовтъ Кестутьевич, и новгородци взяша с нимъ миръ но Вперёдѣ. Прииха князь Костянтинъ Бѣлозерьскыи в Новъгород, и прияша его.
В лѣто 6902. [1394] Поставиша даньслалцѣ церковь камену святого Дмитриа, и свяща ю архиепископъ владыка Иванъ на праздникъ его. Того же лѣта ходиша новгородци ко Пьскову ратью и стояша под городом недѣлю; и в то время учинися бои в заиздѣ новгородцамъ съ пьсковици, и убиша ту князя Ивана Копорѣискаго и Василья Федоровича, а иных паде съ обѣ сторонѣ богъ вѣсть; и отъидоша новгородци от города, а со пьсковицѣ в розмѣрьи. И в то время отъяша новгородци посадничьство у Есифа Захарьиница, и даша посадничьство Богдану Обакуновичю. Тои же осенѣ погорѣ владыченъ дворъ и околоткы, и за городом много улиць погорѣ, а у святѣи Софѣи маковица огорѣ, а церквии каменых 8 огорѣ, а древяных двѣ /л.233об./ церкви сгорѣша. Поставиша церковь древяну святыи Спасъ конець Кузмодѣмьянѣ улицѣ, и манастырь устроиша. Прииха князь Андрѣи со пьсковьскыми послы, и поиха из Новаграда, а миру не возмя. Прииха изъ Цесаряграда от патриарха от Антониа Вифлеомьскыи владыка Михаила, а привезлъ Новуграду двѣ грамотѣ о поучении крестияномъ.
В лѣто 6903 [1395]. Прииха в Новъгород митрополитъ Киприянъ с патриаршимъ послом в великое говѣние и запроси суда, и новгородци суда ему не даша; и онъ пребылъ весну всю в Новѣгородѣ и до Петрова говѣниа, и владыка Иванъ далъ честь велику митрополиту и патриаршю послу; и митрополит Киприянъ, едуцѣ прочь, благословилъ сына своего владыку Иоанна и весь великыи Новъгород. Того же лѣта постави Исакъ Онкифовъ церковь камену Зборъ святого Михаила в Аркажи манастыри. Приходиша Нѣмци Свѣя к новому городку къ Ямѣ, и поихаша прочь, и князь Костянтинъ с городцаны иных изби, а инии убѣжаша. Тои же осени князь Витовтъ Литовьскыи взя город Смолнескъ и намѣстьникъ свои посади, а князь Юрьи Святъслялич бѣжа на Рязань.
В лѣто 6904 [1396]. ѣзди владыка Иванъ к митрополиту Киприяну на /л.234./ Москву, позванъ от митрополита, и пребысть на Москвѣ 2 дни, и отпусти [и] митрополит съ благословениемъ и съ честью, и прииха въ Новъгород, вторник на святои недѣлѣ. Того же лѣта пришедше Нѣмци в Корѣльскую землю и повоеваша 2 погоста: Кюрьескыи и Кюлоласкыи, и церковь сожгоша; и князь Костянтинъ с Корѣлою гнася по них, и языкъ изима и присла в Новъгород. Погорѣ Онтоновъ манастырь всь, и святаа Богородица огорѣ, бяше бо свинцомъ побита; и Устрѣтение огорѣ. Створися знамение от образа владычня въ святомъ Еупатии на Щерковѣ улицѣ: аки вино идяше изъ иконы. Повеленьемь владыцѣ Ивана побиша у святѣи Софѣи маковицу свинцомъ, которая в пожаръ огорѣла. Сгорѣ церкви святыи Иоанъ в Ростькинѣ" манастырѣ, и иконы и книгы сгорѣша. Того же лѣта ходи князь Витовтъ Литовьскыи на Рязань и волости повоева.
В лѣто 6905 [1397]. Постави Исакъ Онкифовъ церковь камену святыя богородица Рожество на Десятинѣ. Того же лѣта приихаша послы пьсковьскии великыи Новъгород: князь Григореи Остафьевич, посадникъ Сысои, посадник Романъ, Филипъ Козачькович, съ своими другы, и биша чоломъ господину архиепископу великаго Новаграда владыцѣ Иоану: «чтобы еси, господине, благословилъ дѣтеи /л.234об./ своих, великыи Новъгород, чтобы господинъ нашь великыи Новъгород нелюбиа бы отдалъ, а принялъ бы нас въВперёд. И владыка Иоанн благослови великыи Новъгород, дѣтеи своих: «чтобы есте, дѣти, мое благословение принялѣ, а пьсковицамъ нелюбья бы есте отдалѣ, а принялѣ бы есте свою братью молодшюю поВперёдѣ, занеже, дѣти, видѣте послѣднее время, былѣ бы есте за одинъ брат въ крестияньствѣ». И посадникъТимофѣи Юрьевич и тысячкыи Микита Федорович и вси посадникы и тысячкыи и боярѣ и весь великыи Новъград благословение своего господина отца владыцѣ Ивана принялѣ, а от пьсковиць нелюбье отложилѣ, и взяша миръ поВперёдѣ, мѣсяца июня въ 18 день, на память святого мученика Лентѣя, занеже не бяше миру по 4 годы, и бысто крестияномъ радость и веселье, а диаволъ, вндя крестияномъ добро, плакашеся, видя себе побѣжаема, а злодѣи крестияньскыи помрачишася. По семъ прииха князь Василии Иванович Смоленьскыи в Новъгород, и прияша его. По семъ загорѣся на Щерьковѣ улицѣ противь святых 40, и погорѣ Щерковѣ улицѣ берегъ всь, и Яневѣ берегъ безъ трии дворовъ, и Розважи берегъ весь, и Кузмодемьянѣ берегъ весь, и до Холопьи улицѣ, на память святого мученика /л.235./ Андрѣя Стратилата. Тои же осени пришедши Нѣмци, взяша 7 селъ у Ямьского городка и пожгоша. Сгорѣ церковь святое Въздвиженье, и иконы и книгы погорѣша. Потом же преставися носадникъ Есифъ Фалелѣевич, приимши мнишьскыи чинъ. Прииха князь Патрикии Наримантович в Новъгород, и прияша и.
Того же лѣта насла князь великыи Василии Дмитриевич за Волокъ на Двину бояръ своих, Андрѣя Албердова съ другы, ко всеи Двиньскои слободѣ, а повѣстуя имъ тако: «чтобы есте задалѣся за князь великыи, а от Новагорода бы есте отнялѣся, а В князь великыи от Новагорода хоцет васъ боронити, а за вас хощеть стояти». И двинянѣ, Иванъ Микитинъ и боярѣ двиньскыи и вси двинянѣ за великыи князь задалѣся, а ко князю великому цѣловаша крестъ; и князь великыи на крестъномъ цѣлованьи у Новагорода отнял Волокъ Ламьскыи и с волостьми, Торжокъ с волостьми, и Вологду и Бѣжичькыи верхъ; и потом к Новугороду съ себе целование сложилъ и хрестьную грамоту въскинулъ, а новгородци съ себе целование сложилѣ и грамоту крестъную князю великому въскинулѣ. И посем присла Киприянъ митрополит в Великыи Новъградъ /л.235об./ столника своего Климентѣя къ сыну своему къ владыцѣ Ивану, а повѣстуя тако: «поѣди на Москву, зовет тя отець твои митрополит о святительскых дѣлех». И владыка митрополица боярина отпусти на Москву, а самъ восхотѣ поихати къ отцю своему к митрополиту; и посадникъ и тысячкыи и боярѣ и весь великыи Новъград биша чоломъ своему господину отцю владыцѣ Иоанну: «чтобы еси, господине, князю великому слово добро и благословение бы еси подалъ за свои дѣти. за великыи Новъград». А новгородци съ своимъ отцемъ съ владыкою послаша послове: посадника Богдана Обакуновича, Кюрилу Дмитриевича и житьих людии князю великому. И владыка Иоанн князю великому благословение и слово добро подалъ, а послы от Новаграда чолобитье; рекъ тако: «чтобы еси, господине и сыну, князь великыи, мое благословение и слово добро принялъ, а новгородчкое челобитье, а от Новагорода от своих мужии от волных нелюбье бы отложилъ, а принялъ бы еси въВперёд; а при твоем бы, сыну, княженьи промежи крестиянъ другое бы кровопролитье не учинилося бы; а что еси, сыну, князь великыи, на крестъномъ цѣловании у Новагорода отъялъ еси Заволочье, Торжокъ, Волокъ, Вологду, Бѣжичкыи верхъ, а того бы еси, господине /л.236./ князь великыи, ступилъся, а пошло бы то к Новугороду въВперёд; а про обьцѣи суд на порубежьи, а то, сыну, отложилъ бы еси: занеже, господине князь великыи, то неВперёд. И князь великыи владычня благословенна и слова добра не прииялъ, а от пословъ новгородчкых чолобитья, а от Новагорода нелюбья не отложилъ, а миру не далъ; а митрополит Киприянъ своего сына владыку Иоанна и пословъ новгородчкых отпустилъ в Новъгород съ честью и съ благословениемъ.