Кликни на квадрат справа, чтобы открыть вкладки сайта
Перепечатка в интернете разрешена при условии наличия активной ссылки на сайт " Святая София и Великий Новгород: История и современность".
В лѣто 6862 [1354]. Отступися посадничьства Онцифоръ Лукинъ по своеи волѣ, и даша посадничьство Обакуну Твердиславличу, а тысячкое Олександру, Дворянинцову брату. Того же лѣта приидоша послове архиепископа новгородчкого Моисиа изъ Цесаряграда, и привезоша ему ризы крестъцаты, и грамоты с великымъ пожалованием от цесаря и от патриарха, и златую печать. Бѣ же тогда цесарь гричкыи Иванъ Кантакузинъ, а патриархъ Филофѣи, преже бывыи ираклиискымъ митрополитомъ.
В лѣто 6863 [1355]. Прииде на Русь Алексии митрополитъ, поставленъ въ Цесариградѣ.
В лѣто 6862. [1354] Поставлена бысть церкви каменая въ имя святыя Богородица Знамение, на Ильини улици.
В лѣто 6863. [1355] Постави владыка Моиси церковь камену святого Михаила на Сковороткѣ.
В лѣто 6864 [1356]. Поставиша лубянци церковь камену святого Георгиа на том же мѣстѣ, гдѣ пръвѣе древяная стояла. Того же лѣта поставиша четыридесячкую церковъ камену; а преже камена же была, нь сама палася от старости. Того же лѣта поставлены быша три церкви древяны: святыи Николу на Яковли улици, святого Саву на Кузмодѣмѣанѣ улици, святого Николу на Ляткѣ. Тои же осени вода бысть велиха.
В лѣто 6865 [1357]. Постави владыка Моисии церковь камену Духъ святыи, монастырь. Того же лѣта постави владыка Моисейй Богородицю святую в Радоковицах. Того же лѣта громъ бысть силенъ: въ Николѣ святомъ на Лятки игумена зашибло и иных людии, а на Рогатицѣ шибло одиного до смерти, а иныи живы милостию божиею.
В лѣто 6866 [1358]. Поставиша святых апостолъ 12 церковь древяну.
В лѣто 6867 [1359]. Постави владыка Моиси святого Прокопья церковь камену на княжи дворѣ. Того же лѣта постави Лазута святыи Иоанн церковь камену у Нѣмечьского двора. Того же лѣта владыка Моисии съиде съ владычьства по своеи воли, немощи дѣля своея, на память святого отца Моисиа; и молиша его много всь Новъград с поклономъ, и не послуша ихъ, но благослови, рекъ: «изберите:обѣ мужа, его же вы бог дасть». Много же гадавше посадникъ и тысячкои и весь Новъград, игумени и попове, и не изволиша [себѣ от человѣкъ избрания сътворити, нъ изволиша] собѣ от бога прияти извѣщение и уповати на милость его, кого богъ въсхощеть и святая Софѣя, того знаменаеть; и избраша три мужи: Олексѣя чернца, ключника дому святыя Софѣя, и Саву, игумена Онтонова манастыря, и Ивана, попа святыя Варвары; и положиша три жребиа на престолѣ въ святѣи Софѣи, утверьдивше себѣ слово: егоже въсхощеть богъ и святая Софѣя, премудрость божиа, своему престолу служебника имѣти, того жребии да оставитна престолѣ своемь. И избра богъ, святая Софѣя святителя имѣти мужа добра, разумна и о всемь расмотрелива Олексиа чернца, и остави жребии его на престолѣ своемъ 44, и възведоша его на сѣни честьно всь Новъградъ, мѣсяца семтября въ 15 день, на память святого христова мученика Никиты; и посадиша его, дондеже позовет митрополит на поставление: бѣаше бо тогда митрополит в Киевѣ; и послаша к нему послове. Тои же зимы поставленъ бысть Алексѣи черниць въ Тфѣри въ дияконы и попомъ от Федора, епископа тфѣрьскаго.
Тои же весны, богу попустившю грѣх ради наших, а диаволу дѣиствующу, и по совѣту лихых людии и бысть мятежь силенъ в Новѣгородѣ; отъяша посадничьство у Вондрѣяна Захарьиница не весь город, токмо Славеньскыи конець, и даша посадничьство Селивестру Лентиеву, и створися проторжь не мала на Ярославлѣ дворѣ, и сѣча бысть: занеже славлянѣ в доспѣсѣ подсѣлѣ бяху, и розгониша заричанъ, а они безъ доспѣха были, и бояръ многых побилѣ и полупили, а Ивана Борисова Лихинина до смерти убили. И доспѣша тогда обѣ сторонѣ противу себе: Софѣиская сторона хоти мьстити бещестие братьи своеи, а Славеньская от живота и от головъ;и стояша три дни межю себе, уже бо славляне и мостъ переметаша. И съиха владыка Моисѣи из манастыря и Олексѣи, поимя съ собою анхимандрита и игумены, благослови я, рекъ: «дѣти, не доспѣите поганымъ похвалы, а святымъ церквамъ и мѣсту сему пустоты; не съступитеся бится». И прияша слово его, и разидошася; и взяша села Селивестрова на щитъ, а иных селъ славеньскыхъ много взяша; много же и невиноватых людии погибло тогда; и даша посадничьство Микитѣ Матфѣевичю, и тако смиришася: не попусти богъ до конца диаволу порадоватися, нь възвеличано бысть крестияньство в род и род.
В лѣто 6868 [1360]. Поиха Олексѣи на поставление владычества в Володимирь, позванъ послы от митрополита; а с нимъ боярѣ новгородчкыи: Олександръ посадникъ, Юрьи Евановъ. А безъ владыки в Новѣгородѣ погорѣ Подолъ да Горончарьскыи конець, и 7 церквии древяных сгорѣ. Того же лѣта бысть мятежь силенъ въ Ордѣ: мнози цесари побиени быша и цесарици и цесаревицѣ, и рядци сѣкошася межи собою. Того же лѣта прииде из Орды в Володимирь князь Дмитрии Костянтинович Суздальскыи на великое княжение; и поставленъ бысть Олексѣи архиепископом Новуграду, въ преименитѣи церкви въ святѣи Богородици володимерьскои пресвященнымъ митрополитомъ Олексиемъ всея Руси, при великомъ князѣ Дмитрии Костянтиновичѣ, мѣсяца июля въ 12 день, на память святыя мученици Голендухи и Прокла; прииха в Новъград, и стрѣтоша и игумены и попове съ кресты у Ильи святого, посадникъ и тысячкои и всь Новъград, възрадовашася радостию великою зѣло въ тъ день. Того же лѣта присла князь великыи Дмитрии свои послове намѣстьникы; и посадиша намѣстьникы княжии у себе новгородци, и суд имъ даша, домолвяся съ княземъ. Того же лѣта заложи церковь камену Федоръ святыи на Федорови улицѣ Семеонъ Ондрѣевич съ боголюбивою матерью своею. Того же лѣта бысть моръ силенъ въ Плесковѣ, и прислаша послове плесковици къ владыцѣ с молбою и челобитьемъ, чтобы, ѣхавши, благословилъ бы еси нас, своих дѣтеи, и владыка, ѣхавъ, благослови их и городъ Пьсковъ съ кресты обходи, и литургии три совръши, прииха в Новъград, а плесковицамъ оттолѣ нача лучши бывати милость божиа, и преста моръ. Того же лѣта, въ Филипово говѣние, бысть знамение въ мѣсяци: аки темно кровию покровенъ створися на чистѣ небѣ. Тои же осени погорѣ Корѣльскыи город напрасно, и много пакости створися доспѣху и животу, а городчане толко душами осташася. Тоя веснѣ, в великое говѣние, аки огнени зари явишася от въстока, въсходяща чресъ небо.
В лѣто 6869 [1361]. Свершиша церковъ камену святыи Федоръ на Федоровѣ улици.
В лѣто 6870 [1362]. Постави Моисии владыка церковь камену святое Благовѣщение на Михаиловѣ улицѣ. Того же лѣта постави архиепископъ новгородчкыи Алексѣи церковь камену святое Рожество на сѣнех, и свяща ю самъ, съ игумены и с попы и с крилосомъ святыя Софѣя, мѣсяца септября въ 1, на память святого отца Семеона столпъника. Того же лѣта приимаша плесковици гость нѣмечьскыи и поморьскыи и заморьскыи, а ркуще тако: «отъималѣ юрьевци с велневици у нас землю и воду». Того же лѣта, на зиму, преставися архиепископъ новгородчкыи Моиси; архиепископъ же новгородчкыи Алексѣи, собравъ игумены и попове и всь церковныи чинъ и множество правовѣрных крестиянъ, муж и женъ, и абие проводи и положи своими руками у святого Михаила в монастыри на Сковородкѣ, мѣсяца генваря въ 25, на память святого отца Григория Богословца.
В лѣто 6871 [1363]. Приихаша послове нѣмечкыи, юрьевьскыи и велневидьскыи в Новъгородна смолву со плесковици, и приихаша плесковици в Новъгород, и повѣстовавше много, поихаша прочь, а миру не доконцавъ; и приимаша гость новгородчкыи въ Юрьеви. Того же лѣта подъписана бысть церкви святыя Богородица на Волотовѣ, в Моисѣевѣ манастыри, повелѣниемъ боголюбиваго архиепископа новгородчкого Алексѣя. Того же лѣта ѣздивши новгородчкыя послове, ис концевъ по боярину, въ Юрьевъ в Нѣмечкои, смолвиша Нѣмець съ плесковици влюбовъ и быстьмежю ими мирно, и попускаша плесковици от себе нѣмечкыи гость, а Нѣмци новгородчкыи гость попускаша.
В лѣто 6872 [1364]. Поставиша в Торжьку церковь камену въ имя святого и боголѣпнаго Преображениа господа бога спаса нашего Исуса
христа, замыщлением богобоязнивых купець новгородчкых, а потягнутиемъ всѣхъ правовѣрных крестиянъ, а на зиму свяща ю архиепископъ новгородчкыи Алексии, с попы и диаконы и с крилосомъ святыя Софѣя.
В лѣто 6873 [1365]. Постави владыка Алексѣи церковь камену святого Устрѣтениа на воротех въ Онтовѣ манастырѣ, а на Ляткѣ постави Лазута церковь камену же святого Николы. Того же лѣта, по владычню благословению по Алексѣеву, почаша дѣлати церковь камену въ Плесковѣ святую Троицю, по старои основѣ.
В лѣто 6874 [1366]. ѣздиша из Новаграда люди молодыи на Волгу без новгородьчкого слова, а воеводою Есифъ Валъфромѣевич, Василии Федорович, Олександръ Обакунович; того же лѣта приихаша вси здрави в Новъгород. И за то князь великыи Дмитрии Иванович розгнѣвася и розверже миръ с новгородци, а ркя тако: «за что есте ходилѣ на Волгу и гости моего пограбисте много». Того же лѣта. на зиму, от князя изимаша Василья Даниловича съ сыномъ на Вологдѣ. а онъ ѣхалъ съ Двины, а того не вѣдалъ, ни стереглъся.
В лѣто 6875 [1367]. Посылаша послы новгородци къ князю великому Дмитрию Ивановичю и доконцаша миръ с княземъ великымъ; а князь великыи отпусти Василья и сына его Ивана, и намѣстьника своего присла в Новъгород. Того же лѣта, по грѣхом нашимъ, не бѣше пословици пьсковицамъ с Новымъгородом; и пришедши рать нѣмечкая, велневичкая, воеваша около Изборьска волость всю пьсковьскую и до Великои рѣки, и перебродивъ за Великую рѣку и пришед къ городу ко Пьскову, и посадъ пожгоша около города, и много пакости подѣявше, и отъидоша прочь; а пакости имъ не бѣ ничего, зане не бяше тогда ни князя Александра, ни посадника Лентиа, ни иных людии добрых, много бѣше въ розъѣздѣ. И потом прислаша в Новъгород пьсковици послы с поклономъ и с жалобою: «господо братье, како печалуетесь нами, своею братьею». А тогды бѣше гость новгородчкыи приималѣ въ Юрьевѣ и по инымъ городом нѣмечкымь, а в Новѣгородѣ приималѣ гость нѣмечкыи, но толко бяше не розвержено крестное цѣлование Новугороду с Нѣмци, и за то не всѣдоша на борзѣ по пьсковицах на Нѣмечьскую землю новгородци. Того же лѣта, на зиму, прислаша пьсковици Онанью посадника и Павла в Новъгород и биша чолом архиепископу новгородчкому Алексѣю о священии святѣи Троицѣ; и посла к нимъ владыка отца своего духовнаго Иоанна и протопопу своего и протодиякона, и священа бысть церкви святыя Троиця благословениемъ архиепископа новгородчкого Алексѣя, мѣсяца генваря въ 30, на память святого мученика Пополита. Тогда бяше послалѣ Саву Купрова посломъ в Нѣмечькую землю.
В лѣто 6876 [1368]. Мѣсяца мая въ 12, на память святого мученика Епифаниа, бысть пожаръ золъ в Новѣгородѣ: погорѣ город Дѣтиниць всь и владычень дворъ, и святая Софѣя огорѣ, и Неревьскыи конець по половинѣ улиць до Даньслалѣ улицѣ, и Плотничьскыи конець весь, от святого Никиты до Радоковиць, и церкви погорѣша, и людии нѣколико погорѣ. Того же лѣта приходиша Нѣмци ратью великою, самъ бискупъ и местерь и кумендерѣ под Изборескъ; и новгородци поидоша на них и доидоша до Пьскова, и Нѣмцѣ от Изборьска побѣгоша, а порокы посѣкши. На тую же зиму прииха князя великаго брат Володимиръ в Новъгород.
В лѣто 6877 [1369]. Погорѣ Славеньскыи конець от Нутнои улици всь и до Ильи святого. Того же лѣта заложиша церковь камену на Ярышевѣ улицѣ, другую церковь камену святого Еупатья на Рогатиццѣ.
В лѣто 6878 [1370]. Ходиша новгородци съ плесковицѣ к Новому городку к нѣмечьскому и отъидоша, не вземше, занеже бяшеть твердъ; и нѣколко людии пострѣляша с города. Того лѣта свершиша церковь святого Василья и другую церковь святого Еупатья и свяща я архиепископъ новгородчкыи Алексѣи с попы. Того же лѣта былъ Олгердъ с Литвою под Москвою и посадъ пожьже
.
В лѣто 6879 [1371]. Поставиша церковь камену святого Николу в Русѣ. Того же лѣта бысть пожаръ съ Ильинѣ улици въ Плотничькыи конець, и Подолъ всь погорѣ, и конець до Килавои улици. Сии же многы пожары бывають грѣх ради наших, да ся быхомъ покаяли от злобъ своихъ; но мы на болшая возвращаемся. Что есть сего злѣе, иже ходити лжею пред богомъ въ обѣтѣ и крестъ цѣловати и пакы преступати, а то зло многажды стваряется в насъ; за то богъ наводит на насъ злѣишия казни по дѣлом нащимъ. Того же лѣта ѣздиша на съѣздъ Юрьи Иванович посадникъ новгородчькыи, Селивестръ Лентѣевич, Олисѣи тысячкыи, Олександръ Колывановъ, и доконцаша миръ с Нѣмци под Новымъ городкомъ. Того же лѣта, по грѣхомъ нашимъ, погорѣ город Торжекъ всь, и не ту злу конець.
В лѣто 6880 [1372]. Поихаша новгородци в Торжекъ города ставити и сослаша намѣстьникы Михаиловы с Торжьку; и прииде князь Михаило ратью к Торжку, пожьже город всь, и бысть пагуба велика крестияномъ: овы огнемъ погорѣша въ дворѣх над животы, а друзин бѣжаша въ святыи Спасъ, и ту издъхошася, и огнемъ изгорѣша много множество, инѣи же от огня бѣжаци, в рѣцѣ во Тфѣрци истопоша а добрыя же жены и дѣвица, видящи надъ собою лупление от тфѣриць, а они одираху до послѣднеи наготы, егоже н погании не творят тако, тѣ от срамоты и бѣды истопошася в водѣ, чернци и черници все до наготы изълуплено; первѣе же всего Олександръ Обакунович стрѣти и на полѣ и ту костию паде за святыи Спасъ и за обиду за новгородскую, и с нимъ убиша Ивана Шаховича и другаго Ивана Тимофѣевича и Григорью Щебелкова, и иных нѣколко ту мужь паде, а инѣи побѣгоша, а иных изимавъ, на Тфѣрь поведе полонъ, мужеи и женъ, бещисла множество; а и товара много поимаша, что ся осталось от огня; и иконнои круты серебра много поимаша. И кто, братье, о сем не поплачется, кто ся осталъ живых видѣвъ, како онѣ нужную и горкую смерть подъяша, и святыя церкви пожьжены, и город всь отинуд пустъ: понеже бо ни от поганых не бывало такового зла. И наметаша избиеных людии и съжьженых и истоплых 5 скуделниць, а инѣи погорѣлѣ без останка, а инии истоплѣ безъ вѣсти, поплылѣ внизъ по Тфѣрци. Того же лѣта копаша ровъ около Людина конца и Загородья и Неревьскаго конца.
В лѣто 6881 [1373]. Прииха в Новъгород князь Володимеръ, по зборѣ за недѣлю, и сѣдѣ в Новѣгородѣ до Петрова дни, и поиха прочь. Того же лѣта иде Волхово навъспять по семь днии.
В лѣто 6882 [1374]. Поставиша церковь камену святого Спаса на Ильинѣ улици; и свяща ю архпепископь новгородчкыи Алексѣи съ игумены и с попы и с крилосомъ святыя Софѣя.
В лѣто 6883 [1375]. Мѣсяца июля въ 29 день, на память святого мученика Калиньника, въ день недѣлныи бысть знамение в солнци. Того же лѣта ходи князь великыи Дмитрии Ивановиць съ всѣми князьми и со всею силою рускою на князя Михаила Тфѣрьскаго, и стоя под Тфѣрью 4 недѣли, и волость всю взяша и посад пожгоша, и полона много множество розведоша; а град Тфѣрь острогомъ обострожишя, и мосты два издоспѣша чресъ Волгу. А под новгородци князь великыи посла, и новгородци, изводя честь своего князя, въскорѣ въ три дни поихаша под Тфѣрь. И видѣ князь Михаило грядущу силу новгородчкую на ся, и посла къ князю великому владыку Еуфимиа, а дая ся въ всю волю великому князю. А новгородци стояша под Тфѣрью 4 дни, и доконцаша миръ на всеи воли князя великаго и на новгородчкои. На ту же зиму съиде владыка Алексѣи со владычества, по своеи воли, на Деревяницу; и бысть Новгород в то время въ скорби велицѣ; гадавъ много, послаша к митрополиту Саву анхимандрита, Максима Онцифоровица с бояры, чтобы благословилъ сына своего владыку Алексѣя в домъ святѣи Софѣи, на свои ему святительскыи степень. И митрополитъ благослови сына своего владыку Алексѣя, а Саву анхимандрита и бояръ А отпусти с великою честью; и привезоша благословение митрополице владыцѣ Алексѣю и всему Новуграду. И новгородци сташа вѣцемъ на Ярославли дворѣ и послаша с челобитьемъ ко владыцѣ на Деревяницю с вѣца намѣстьника князя великаго Ивана Прокшинича, посадника Юрья и тысячкого Олисѣя и иных многых бояръ и добрых муж; и владыка прия челобитье, възведоша владыку Алексѣя в дом святыя Софѣя, на свои архиепископьскыи степень, мѣсяца марта въ 9, на память святых мученикь 40; и ради быша новгородци своему владыцѣ.
В лѣто 6884 [1376]. Иде Волхово на звод, по три лѣта, по 7 днии. Тои же веснѣ прииде въ Новъград митрополит Маркъ от святѣи
Богородици со Синаискои горѣ, миилостиня ради. Посемь за мало прииде изъ Ерусалима анхимандрит Внифантии от святого Михаила, такоже милостиня ради. Того же лѣта поиха владыка Алексѣи к митрополиту, и с нимъ Сава анхимандрит, Юрьи Онцифорович, Василии Кузминич, Василии Иванович и иных много бояръ, мѣсяца августа въ 13 день, на память святого Максима исповѣдника. И прия митрополит сына своего владыку Алексѣя в любовь, такоже и князь великыи пребысть на Москвѣ 2 недѣли; и отпусти митрополит съ благословениемъ, а князь великыи и брат его князь Володимиръ с великою честью; и приихаша владыка в домъ святыя Софѣя мѣсяца октября въ 17 день, на память святого пророка Осѣя, в пятницю. Тои же зимы присла митрополит Киприянъ из Литвы свои послове, и патриарши грамоты привезоша ко владыцѣ в Новъградъ; а повѣствуеть тако: «благословилъ мя патриархъ Филофѣи митрополитомъ на всю Рускую землю». И Новгород слышавъ грамоту, и дасть имъ отвѣтъ: «шли князю великому: аще приимет тя князь великыи митрополитом всеи Рускои земли, и намъ еси митрополит». И слышавъ отвѣтъ новгородчкыи митрополит Киприянъ и не сла на Москву къ князю великому.
В лѣто 6885 [1377]. Ходиша из Новагорода люди молодыи к Новому городку, на Овль на рѣцѣ, к нѣмечкому. И стояша под городомъ много днии, и посадъ всь взяша, и волость всю потравиша, и полона много приведоша в Новъгород, а сами приидоша всѣ здрави в Новъгород, с воеводою Иваномъ Федоровицемъ, Василии Борисович, Максимъ Онаньиниць. Тои же веснѣ бысть пожаръ в Новѣгородѣ: загорися на Людьгощи улици, и погорѣ до Яковлѣ улици, и сгори 7 церквии древяных, а каменых огорѣ 3 церкви. Того же лѣта сгорѣ церкви от грома святая Богородица на Михалицѣ.
Того же лѣта умре в Литвѣ князь Литовьскыи Олгердъ. Том же лѣтѣ преставися анхимандрит новгородчкыи Сава мѣсяца мая 6 въ, на память святого мученика Калиньника; и проводи архиепископъ, новгородчкыи владыка Алексѣи, съ игумены и с попы, с кандѣлы и со свѣщами, и положиша у святѣи Богородици Онтова манастыря. Того же лѣта свершиша церковь камену святую мученику Бориса и Глѣба въ Плотникехь; и свяща ю владыка Алексѣи с попы и с крилосомъ святыя Софѣя. Того же лѣта взяша Татарове Нижнии Новъград . Тои же зимы преставися митрополит рускыи Алексѣи на Москвѣ.
В лѣто 6886 [1378]. Свершиша церковь камену святого Образа на Добрыни улицѣ; и святи владыка Алексѣи с попы и с крилом святыя Софѣя, на праздникъ его. Того же лѣта поидоша Татарове на Суздальскую землю на князя на Дмитрия. Князь же посла противу их сына своего князя Ивана съ силою; и бишася на Пиянѣ на рицѣ. И утопе ту князь Иванъ, а инѣи побиени быша. На ту же зиму прибѣжа во Пьсковъ князь Литовьскыи Ондрѣи Олгердович, и цѣлова крестъ ко пьсковицамъ; и поиха на Москву из Новаграда къ князю к великому къ Дмитрию, князь же прия его.
В лѣто 6887 [1379]. Загорѣся на Лукинѣ улицѣ, и сгорѣ церквии 12, а улиць 8, до Чюдинцевѣ улицѣ. Того же лѣта поидоша Татарове на Рускую землю, на князя великаго на Дмитриа; князь же поиде противу ихъ; и бысть на рѣцѣ на Овожи, и ту ся обои полкы съступишася; и пособи богъ князю великому, а Татарове, вдавъ плещи, побѣгоша. Того же лѣта заложиша церковь камену святую Богородицю на Михалицѣ, и другую церковь камену святую Фрола и Лавра на Люгощи улицѣ. Тои же зимы прииха в Новъгород князь Литовьскыи Юрьи Наримантович.