Сайт посвященный церковной истории
Святая София и
Великий Новгород
История и
современность
История и современность
Кликни на квадрат справа, чтобы открыть вкладки сайта
Перепечатка в интернете разрешена при условии наличия активной ссылки на сайт " Святая София и Великий Новгород: История и современность".
НОВГОРОДСКАЯ ПЕРВАЯ ЛЕТОПИСЬ МЛАДШЕГО ИЗВОДА
(Комиссионный, Академический, Толстовский списки)
В лѣто 6464 [956].
В лѣто 6465 [957].
В лѣто 6466 [958].
В лѣто 6467 [959].
В лѣто 6468 [960].
В лѣто 6469 [961].
В лѣто 6470 [961].
В лѣто 6471 [963].
В лѣто 6472 [964]. Князю Святославу възрастъшю и возмужавшю, нача вои совокупляти многы храбры; и бѣ бо самъ храборъ, и легко ходя, акы пардусъ; воины многы творяше ходя, а возовъ по собѣ не вожаше, ни котла, ни мясъ варяше, нь потонку мяса изрѣзавше, конину или звѣрину, грядину, на углех испекъ, ядяше; /л.37./ ни шатра имяше, нь подклад постилаше, а сѣдло в головах; такоже у него и прочии вси вои бѣху. И накы посылаше къ Вперёдмъ, глаголя имь сице: «хощу на вы ити». И абие поиде на Оку рѣку и на Волгу. И налѣзе Вятици, и рече Вятицемъ: «кому дань даете». Они же рѣша: «Козаромъ дань даемь по щьлягу от рала».
В лѣто 6473 [965]. Иде Святославъ на Козары. Слышавши же Козары, изидоша противу съ княземъ своим каганомъ, и съступишася на бои, и бысть брань, одолѣ Святославъ Козаромъ, и град ихъ Бѣлу вежю взя. И Ясы побѣди и Касогы, и приведе Кыеву.
В лѣто 6474 [966]. Побѣди Святославъ Вяткцевъ и дань на них возложи.
В лѣто 6475 [967]. Иде Святославъ на Дунаи на Болгары. И бившемся обоимъ, одолѣ Святославъ Болгаромъ, и взя городовъ 80 по Дунаю, и сѣде княжа ту въ Переяславци, и емля дань на Грецехъ.
В лѣто 6476 [968]. Приидоша Печенѣзѣ на Рускую землю прѣвѣе; а Святославъ въ Переяславци затворися; а А Олга въ градѣ со внукы своими: съ Ярополкомъ и Олгомъ и съ Володимиромъ въ градѣ Кыевѣ. И оступиша Печенѣзи град въ силѣ тяжьцѣ, бещисленое множество около града; и не бѣ лзѣ из града вылѣсти, ни вѣсти послати; изнемогаху людие гладомъ и жажею. И собра/л.37об./вшеся людие оноя страны Днѣпра в лодьяхъ, стояху об ону Вперёд, не бѣ лзѣ внити в Киевъ ни единому их, изъ града к ним. Въстужиша людие въ градѣ [и рѣша]: «не буде ли кого, иже бы моглъ на ону Вперёд доити: аще не приступите утро подъ град, предатися имут Печенѣгомъ». И рече имъ единъ отрокъ: «азъ преиду». [Они же глаголаша] «иди». Он же изиде изъ града со уздою, рысташе сквозѣ Печенѣгы, глаголя имъ: «не видѣсте ли коня никто же»; бѣ бо умѣя велми печенѣжьскымъ языкомъ; онѣ же мнѣвше его своимъ. И яко приближися к рѣцѣ, свергъ порты съ себе, сунуся во Днѣпръ и побреде. Видѣвши же се Печенѣзѣ, абие устремѣшася на нь, стрѣляюще его; не могоша ему ничтоже зла створити. Онѣ же видѣша съ оноя страны, преихавше в лодьи, превезоша и къ дружинѣ. И рече имъ: «аще не поступите заутра къ граду, и людие предатися имут Печенѣгомъ». Рече же воевода их, именем Притиць: «подступимъ заутра в лодьяхъ, и попадьше княгыню и княжичѣ, умчимъ на сию Вперёд людии; аще ли того не створимъ, погубить нас Святославъ. И яко бысть заутра, всѣдше в лодьи противу свѣту, въструбиша вельми трубами, и людие въ градѣ кликнуша. /л.38./ Печенѣзи же мнѣша князя пришедша, побѣгоша разно от града. Изиде Олга съ внукы своими и с людьми к лодьямъ. Видѣв же се князь печенѣжьскыи, възратися единъ къ воеводѣ Притичю, рче: «кто се прииде». И рече ему: «людие оноя страны». И рече князь печенѣжьскыи: «а ты князь ли еси». Онъ же рече: «азъ есмь мужь его, пришелъ есмь въ сторожехъ, а по мнѣ идут вои съ князем безъщислено множество». Се же рече, грозя имъ. Рече князь печенѣжьскыи къ Притичю: «буди ми ты другъ». Он же рече: «тако буди». И пода руку межю собою; и вда печенѣжьскыи князь Притичю конь, саблю, стрѣлы; онъ же дасть ему брони, щитъ, мечь. И отступиша Печенѣзи от града, не бяше лзѣ коня напоити на Лыбедѣ Печенѣгы. И послаша кыянѣ къ Святославу послы, глаголюще: «ты, княже, чюжеи землѣ ищеши и блудиши, своея ся охабивъ; мало бо насъ не взяша Печенѣзи, матерь твою и дѣтеи твоих. Аще не приидеши, ни оборонѣши насъ, да пакы ны возмут. Аще тѣ не жаль отчины своея и матери, стары суща, и дѣтии своих». То слышавъ Святославъ, вборзѣ сѣдши на коня съ дружиною своею, прииде Кыеву, и цѣлова матерь свою и дѣти своя; съжалися/л.38об./ о бывшимъ от Печенѣгъ, и собра воя, и прогна Печенѣгы в поле; и бысть мирно.
В лѣто 6477. [969] И рече Святославъ къ матери своеи и къ бояромъ своимъ: «не любо ми есть жити въ Киевѣ, нь хощю жити въ Переяславци и в Дунаи, яко то есть среда земли моеи, яко ту вся благая сходятся: от Грекъ паволокы, злато и вино, овощевѣ различнии; а и-Щехъ и из Угровъ сребро и конѣ, а изъ Русѣ же скора и воскъ и мед и челядь. И рече А ему Олга: «видѣши ли мя болну сущу; камо хощеши от мене ити»; бѣ бо уже разболѣлася; и рече ему: «погреби мя, и иди, ямо же хощеши». И по трех днех умре Олга; и плакася по неи сынъ ея и внуцѣ ея и людие вси плачемъ великымъ зѣло; и несъше, погребоша ю на мѣстѣ. И бѣ заповѣдала Олга не творити трызны надъ собою: бѣ бо имущи прозвутера втаинѣ; и тъи похорони ю, блаженую Олгу. Си бысть предтекущиа крестияньстѣи землѣ, акы деньница пред солнцемъ, акы заря пред свѣтомъ; ибо сияше, акы луна в нощи; тако и сиа бысть в невѣрныхъ человѣцѣхъ свѣтяшеся, аки бисеръ в калѣ; калнѣ бо бѣша грѣхомъ, не омовенѣ крещениемъ святымъ. Си бо омыя купѣлью святою, и съвлечеся грѣховныя /л.39./ одежда ветхаго человѣка Адама, и в новыи Адамъ облечеся, еже есть христос. Мы же речемъ к неи: «радуися, руское познание къ богу, начатокъ примирению быхомъ». Си пръвое вниде въ небесное царство от Руси; сию бо хвалять рустѣи князѣ и сынове, акы началницю, ибо по смерти моляшеся богу за Русь. Праведных бо душа не умирають, якоже рече Соломонъ: «похвала праведному, возвеселятся людие; бесмертие бо есть и память его, яко от бога познавается и от человѣкъ». Се бо вси человѣци блажать, видяще бо ю лежащу за многа лѣта в тѣлѣ своемъ . Рече пророкъ: «прославлю прославляющих мя». О сяковых бо Давыдъ глаголаше: «[в] В память вечную будет праведникъ, от слуха злаго не убоится; готово сердце его уповати на господа, и утвердится сердце его, и не подвижится». Соломонъ рече: «праведници в вѣкы живут, от господа мъзда имъ есть и устроение от вышняго; сего ради приимуть царствие красотѣ и вѣнець добротѣ от рукы господня: яко десницею покрыеть я и мышцею защитить я». Защитилъ бо есть господь сию блаженую Олгу от противника супостата диавола.
В лѣто 6478 [970]. Святославъ посади Ярополка в Киевѣ, а Олга въ Древлянѣхъ. В се же время приидоша людие новгородстѣи, /л.39об./ просяще князя себѣ: «аще не поидет к нам, то мы налѣземъ собѣ князя». Рече к нимъ Святославъ: «да аще бы кто шелъ к вамъ». И отопрѣся Ярополкъ и Олегъ. И рече Добрыня к новгородцемъ: «просите Володимира»; бѣ бо Владимерь от Малуши, ключницѣ Олзинѣ, а Малуша бѣаше сестра Добрынѣ, отець же бѣ има Малко Любцанинъ; и бѣ Добрыня уи Володимеру. И рѣша новгородци Святославу: «даи ны Володимера». Он же рече: «тъи вы есть». И пояша новгородци Володимира к собѣ; и поиде Володимеръ с Добрынею, уемъ своим, к Новуграду, а Святославъ къ Переяславцю.
В лѣто 6479 [971]. Прииде Святославъ къ Переяславцю, и затворишася Болгаре въ градѣ. Излѣзоша Болгаре на сѣчю противу Святославу, и бысть сѣча велика, и одолѣша Болгаре. И рече Святославъ воемъ своимъ: «уже намъ здѣ пасти; потягнемъ мужескы, о братье и дружино». И к вечеру одолѣ Святославъ, и взя град копиемъ, и рче: «се град мои». И посла ко Грекомъ, глаголя имъ сице: «хощю на вас ити и взяти град вашь, якоже и сему створихомъ». И рѣша ему Грѣци: «мы недужи противу вамъ стояти, нь возми дань на нас и на дружину свою; и повѣжьте /л.40./ ны, колико есть васъ, да въдамь по числу на главы». И се рѣша Грѣци, льстящеся под Русью, суть бо Грѣци льстиви и до сего дне. И рече Святославъ: «есть нас 20 тысяць»; толико же приложи еще к тому 10 тысящь. И пристроиша Грецѣ 100 тысящь на Святослава, и не даша дани. И поиде Святославъ на Грѣкы, и изидоша противу Руси. Видѣвъши же Русь, убояшася зѣло множества вои; и рече имъ Святославъ: «уже намъ нѣкамо ся дѣти, волею и неволею стати противу; да не посрамимъ землѣ Рускыя, но ляжемъ костью ту: мертвии бо срама не имут; аще ли побѣгнемъ, то срамъ имамъ, и не имамъ убѣжати, нь станемъ крѣпко, азъ же предъ вами поиду; аще моя глава ляжеть, то промыслите о собѣ». И рѣша воини: «гдѣ, княже, глава твоя, ту и главы наша сложимъ». Исполчишася Русь, тако же и Грѣци противу исполчишася; и сразистася обои полъци, и оступиша Русь, и бысть сѣча велика зѣло; и одолѣ Святославъ, и бѣжаша Грецѣ. А Святославъ пакы поиде къ граду, воюя и грады разбивая, иже стоять пусты и до днешняго дне. Цесарь же созваше боляры своя в полату и рече имъ: «что сътворимъ, яко не можемъ проти/л.40об./ву ему стати». И рѣша ему бояре: «пошли к нему дары, искусимъ его: любезнивъ ли есть злату и паволокамъ». Послаша к нему злато и паволокы и мужа мудра, и рѣша ему: «глядаи взора его и лица его и смысла его». Он же, вземъ дары, иде къ Святославу. И повѣдаша Святославу, яко приидоша Грѣци с поклономъ. И рче Святославъ: «введите их сѣмо»; и абие приведоша и. Онѣмъ же слом пришедшимъ и пакы поклонившимся ему, и положиша пред нимъ злато и паволокы. И рече Святославъ, кромѣ зря, отрокомъ своимъ: «возмѣте, кому что будет». Они же поимаша; а послы цесаревѣ, видѣвши тое, приидоша ко цесарю. И съзва царь бояры своя и велможа; рѣша же послании, яко «приидохомъ к нему, и не позри на ны, нь толико отрокомъ повелѣ поимати». Рече же единъ от ту предстоящих: «царю, искуси единою еще; пошли к нему оружье браньное». Онъ же послуша его, и послаше ему мечь и иное оружье Слуги же цесареву принесъшю къ Святославу, он же приимъ, нача любити и хвалити и цѣловати, [яко самого] цесаря. И приидоша опять къ цесарю, и повѣдаша вся бывшая. И рѣша бояре: «лютъ сьи мужь хощеть быти, яко имѣниа небрежеть, а оружие /л.41./ емлет и любит; имѣся по дань». И посла цесарь, глаголя сице: «не ходи ко граду и возми на нас дань, еже хощеши»; мало же бѣ не дошелъ Цесаряграда. И даша ему дань; он же и на убиеныя имаше, глаголя, яко «род его возметь». И взя же дары многы, и възвратися къ Переяславцю съ похвалою великою. Видѣв же мало дружинѣ своея, и рече к собѣ: «да како прельстивше, избиють дружину мою и мене»; бѣша бо мнозѣ избиенѣ на полку. И рече: «поиду в Русь и приведу болши дружинѣ»; и поиде в лодьяхъ. Рече же ему воевода отень Свѣнделдъ: «поиде, княже, около на конѣх; стоять бо Печенѣзѣ в порозѣхъ». И не послуша его, нь поидоша в лодьяхъ. Послаша переяславци къ Печенѣгомъ, глаголюще сице: «идеть вы Святославъ в Русь, вземъ имѣние много у Грѣкъ и полонъ бещисленыи, с маломъ дружины». Слышавши же Печенѣзѣ, и заступиша Печенѣзи порокы. И прииде Святославъ к порогомъ, и не бѣ лзѣ проити; и ста зимовати в Бѣлобережьи; и бѣ гладъ великъ, по полугривнѣ 2 голова конячья. Веснѣ же приспѣвши.
А се княжение Ярополче.
В лѣто 6480 [972]. Поиде Святославъ в порогы, и нападе Куря, князь Печенѣжьскыи /л.41об./ и убиша Святослава, и взяша главу его, и во лбѣ его сдѣлаша чашю и пиаху изъ неи. Свѣнделъ же прииде Кыеву къ Ярополку; а Ярополкъ же княжа в Киевѣ, и воевода бѣ у него Блудъ.
В лѣто 6481 [973].
В лѣто 6482 [974].
В лѣто 6483 [975]. Ловы дѣюще Свѣньлдицю, именемъ Лутъ, ишедъ бо ис Кыева, гна по звѣри в лѣсѣ; и узрѣ Олегъ, и рече: «кто се есть». И рѣша: «Свѣндельдиць». И заихавъ, уби. бѣ бо ловы дѣя Олегъ. И оттолѣ бысть межи ими ненависть, Ярополъку на Олга; и молвяше всегда Ярополку Свѣнделдъ: «поиди на братъ свои, и приимеши власть его», хотя А отомьстити сыну своему.
В лѣто 6484 [976].
В лѣто 6485 [977]. Поиде Ярополкъ на Олга, брата своего, на Деревьскую землю; изиде противу ему Олегъ, и вполцистася; и сразивъшимася полкома, и побѣди Ярополкъ Олга. И побѣгшю Олгу с вои своими во градъ, рекомыи Вруцѣи, и бѣаше мостъ чресъ греблю ко вратомъ граднымъ; и тѣснящеся, другъ друга спихаху с моста въ греблю; и сопьхнуша Олга с мосту в дебрь, и падаху людие на нь мнози, удавиша и конѣ и человѣци. И вшед Ярополкъ въ градъ Олговъ, и прия власть его; /л.42./ и посла искати брата своего; искавше его, не обрѣтоша. И рче единъ Древлянинъ: «азъ видѣх вчера, яко сопьхнуша его с моста». И посла Ярополкъ искати, и влачиша трупье из греблѣ от утра до полудни; и налѣзоша Олга высподѣ под трупиемъ, изнесъше, положиша и на коврѣ. И прииде Ярополкъ надъ него, и плакася зѣло, и рече Свѣньделду: «яжь се А ты сего хотяше». И пакы погребоша его на мѣстѣ у града, зовомаго Вручьяго; есть могыла его и до сего дне у Вручьяго града. И прия власть его Ярополкъ. Бѣ бо у Ярополка жена Грикинѣ, бяше была прежде черницею, юже бѣ привелъ отець его Святославъ, и вдасть ю за Ярополка красы ради лица ея. Слыша же се Володимиръ в Новѣгородѣ, яко уби Ярополкъ Олга, и убоявъся бѣжа за море. А Ярополкъ посади посадникы в Новѣгородѣ; и бѣ владѣя единъ в Руси.
В лѣто 6486 [978].
В лѣто 6487 [979].
В лѣто 6488 [980]. Начало княжениа Володимиря. И прииде Володимиръ с Варягы к Новугороду и рече посадникомъ Ярополчимъ: «идѣте къ брату моему и тако рците ему: идет Володимиръ на тя, пристраиваися противу на бои». И сѣде в Новѣ/л.42об./градѣ; и посла къ Ровъголду Полочку, глаголя сице: «хощю поняти дщерь твою женою себѣ». Он же рече дщери своеи: «хощеши ли за Володимира». Она же рече: «не хощу розувати робичица, на Ярополка хощю». Бѣ бо Рогъволодъ пришед изъ заморья, имяше власть свою в Полотьскѣ, а Турыи Турове, от него же и Турица прозвашася. И приидоша отроци Володимири, и повѣдаша всю рѣчь Рогънѣдинѣ, дщери Рогъволожи, князя Полочьскаго. Володимиръ же собра воя многы, Варягы, Словенѣ, Чюдь, Кривици, и поиде на Рогъволода; в се же время хотяху Рогънѣдь вести за Ярополка. Иде Володимирь на Полтескъ, и уби Рогъволода и два сына, а дщерь его Рогнѣдь поня себѣ женѣ; и поиде на Ярополка. И прииде Володимиръ къ Кыеву съ многыми вои. Не могыи стояти Ярополкъ противу Володимиру, и затворися Ярополкъ в Киевѣ с людьми своими и съ воеводою Блудомъ. Стояше на Дорогожицѣ Володимеръ, обрывъся межи Дорогожицемъ и Капичемъ; и есть ровъ и до сего дни. Володимеръ же посла къ воеводѣ Блуду Ярополчю, с лестью, глаголя: «поприяи ми; аще убию брата своего, любити тя начну въ отца мѣсто /л.43./ своего, и многу честь приимеши от мене; не азъ бо почах братию бити, нь онъ; азъ же того убояхся и приидох на нь». И рече Блуд къ посланнымъ Володимиромъ: «азъ буду тобѣ въ сердце и въ приязньство». О злая лесть человѣческа; якоже Давыдъ глаголеть: «ядыи хлѣбъ мои възвеличилъ есть на мя лесть». Сеи убо льстяше на князя своего льстию. И пакы: «своими А льстяху, суди имъ, боже, да отпадут от мыслии своихъ; по множеству нечестиа их изрини а, яко прогнѣваше тя, господи». И пакы тои же Давыдъ глаголеть: «мужь крови и льсти не приполовят днии своих». Се же есть съвѣт золъ, съвѣщавают на кровопролитье; то суть неистовѣ, иже приемше от князя или от господина своего честь или дары, тѣ мыслять о главѣ князя своего на погубление, горьши суть бѣсовъ таковии: и яко и Блуд предасть киязя своего, приимъ от него чьсти многы; сеи бо есть повиненъ крови тои. Сьи бо Блуд затворивъся съ Ярополкомъ, слаше къ Володимиру часто, веля ему приступити ко граду бранию, самъ мысля убити Ярополка; нь нѣлза бѣ граждань 1 убити его. Блуд же не возмогъ, како бы погубити, замысли лестию, веля ему не излазити на брань из града. И рече Блуд Ярополку: /л.43об./ «киянѣ шлются 53 к Володимеру, глаголюще: приступаи ко граду, яко предамы и ти Ярополка; побѣгни из града». И послуша его Ярополкъ; и пакы избѣгъши, пришед затворися въ градѣ Роднѣ на усть Росѣ; а Володимиръ вниде в Киевъ. И осѣдаху Ярополка в Роднѣ; и бѣ гладъ великъ в немъ, и есть притча си и до сего дни: бѣда акы в Роднѣ. И рече Блуд Ярополку: «видѣши ли, колико есть вои у брата твоего; намъ их не пребороти; твори миръ съ братомъ своимъ», льстя под нимъ се. Рече Ярополкъ: «тако буди». И посла Блуд к Володимиру, сице глаголя, яко: «сбыстся мысль твоя, яко приведу к тобѣ Ярополка, пристрои убити и». Володимиръ то слышавъ, и вшед пакы в теремныи дворъ отень, о нем же преже сказахомъ, сѣде ту с вои своими и с дружиною. И рече Блуд Ярополку: «поиди брату своему и рци ему: что ми ни вдаи, то азъ прииму». И поиде Ярополкъ; и рече ему Варяжько: «не ходи, княже, убиють тя; побѣгни в Печенигы и приведеши воя»; и не слуша его. И прииде Ярополкъ к Володимиру; и яко полѣзе во дверѣ, подъяста два Варя/л.44./га мечема под пазусѣ, Блуд же затвори двери и не дасть по немъ ити своимъ, и тако убиенъ бысть Ярополкъ. Варяжько же, видѣвъ, яко убиенъ бысть Ярополкъ, бѣжа съ двора в Печенигѣ, и много воева с Печенигы на Володимира, и едва приваби, заходивъ ему ротѣ. Володимиръ же залѣже братьню жену Грикиню, и бѣ непразна, от нея же родися Святополкъ. От грѣховнаго бо коренѣ золъ плодъ бываеть, понеже была бѣ мати его черницею, а второе, Володимиръ залеже ю не по браку, прилюбодѣичь убо бысть; тѣм же и отець его не любляше: бѣ бо от двою отцю, от Ярополка и от Володимира. Посемъ рѣша Варязи Володимиру: «се градъ нашь, и мы прияхомъ и, да хощемъ имати окупъ на них, по двѣ гривнѣ от человѣка».
И рече имъ Володимиръ: «пождите, оже вы куны сберуть, за мѣсяць». И ждаша за мѣсяць, не дасть имъ; и рѣша Варязи: «съльстилъ еси нами, да покажи ны путь во Грекы». Он же рече имъ: «идѣте». И избра от них мужи добры и храбры и мудры, и раздая имъ грады; а прочии же идоша въ Грекы къ Цесарьскому граду. И посла пред ними послы, глаголя сице къ цесарю: «се идут к тобѣ Варязи, не мози ихъ держати въ градѣ, дажь пакы не створять ти зла въ градѣ, якоже здѣ /л.44об./ створиша, нь растоцѣ их разно, а сѣмо не пущаи ни единаго». И пакы нача княжити Володимеръ в Киевѣ, и постави на холмѣ внѣ двора теремнаго: Перуна древяна, а главу сребрену, а усъ златъ, и Хоръса и Дажьба и Стриба, Сеимарекла, Мокошь. И жряху имъ, наричюще их богы, и привожаху сынови свои и дщери, и жряху бѣсомъ, и оскверьняху землю требами своими; и осквернися земля Руская кровьми и холмъ тъи. Нь преблагыи богъ, не хотя смерти грѣшникомъ: на томъ холмѣ церкви святого Василиа есть, якоже послѣди скажемъ. Мы же на преднее възратимся. Володимиръ же посади Добрыню в Новѣгородѣ, уя своего. И пришед Добрыня къ Новугороду, постави Перуна кумиръ над рѣкою Волховомъ, и жряху ему людие новгородстѣи акы богу. Бѣ же Володимеръ побѣженъ похотью женьскою, и быша ему водимыя: Рогънѣдь, юже посади на Лыбедѣ, идеже есть нынѣ селище Передъславино, от нея же родишася 4 сыны: Изяслава, Мьстислава, Ярослава, Всеволода, и двѣ дщери; от Грѣкинѣ Святополка, а от Чехинѣ Вышеслава, а от другыя Святослава, Мьстислава, а от Болгарынѣ Бориса и Глѣба; и наложниць бѣ у него 300 47 /л.45./въ Вышегородѣ, 300 в Бѣлѣгородѣ, 200 на Берестовомъ селищи, еже зовут нынѣ Берестовое. И бѣ несытъ блуда, и приводи к собѣ мужьскы жены, и дѣвицѣ растляя; бѣ бо женолюбець, яко у Соломона бѣ бо, рече, женъ семъсот, а наложниць 300. Мудръ же бѣ, а на конѣць погыбе; сеи же бѣ невѣглас, а на конець обрѣте спасение. Велии господь нашь, и велия крѣпость его, и разуму его нѣсть числа. Зло бо есть женьская прелесть, яко же рече Соломонъ, покаявъся, о женах: «не внимаи злѣи женѣ, медъ бо каплеть от устъ ея, жены любодѣица, во время наслажаеть твои гортань, послѣди же горче желци обрящеши; прилѣпляющимся еи смертью во адъ; на пути бо животныя не находят; блудная же течениа ея, неблагоразумна». Се же рече Соломонъ о прелюбодѣицах. И о добрых женах рече: «дражьши есть камени многоцѣнна; радуется о неи мужь ея: дѣеть бо мужеви своему благо все житие; и обрѣтши волну и ленъ, створит благопотребная рукама своима; бысть яко корабль, куплю дѣюща, издалеча сбираеть себѣ богатьство; и въстаеть от нощи, и даеть брашно дому и дѣла рабынямъ; видѣ/л.45об./вши же тяжение, куповаше: от дѣлъ руку своею насадить тяжение; препоясавши крѣпко чресла своя, и утверди мышци свои на дѣло; и вкуси, яко добро есть дѣлати, и не угасаеть свѣтилникъ ея всю ношь; руцѣ свои простираеть на полезная, локти же свои утвержаеть на вретено; руцѣ свои отверзе убогому, плодъ же простре нищему; не печется о дому своемъ мужь ея, егда гдѣ будеть, вси свои одѣни будут; сугуба одѣниа створи мужю своему, очеръвлена и багряна себѣ одѣниа; взоренъ бываеть во вратех мужь ея, егда же аще сядет на сонмищи съ старци и съ жители земля тоя; и опоны створи, и отдасть в куплю; и уста же своя отверзе смыслено и законно, и в чинъ молвить языкомъ своимъ; въ крѣпость и в лѣпоту ся облече; милостини же ея въздвигоша чада ея, и обогатѣша; и мужь ея похвали ю, жена бо разумна благословена есть, боязнь же господню та да похвалит; дадите еи от плода устну ея, да похвалит во вратех мужь ея».