Сайт посвященный церковной истории
Святая София и
Великий Новгород
История и
современность
История и современность
Кликни на квадрат справа, чтобы открыть вкладки сайта
Перепечатка в интернете разрешена при условии наличия активной ссылки на сайт " Святая София и Великий Новгород: История и современность".
НОВГОРОДСКАЯ ПЕРВАЯ ЛЕТОПИСЬ МЛАДШЕГО ИЗВОДА
(Комиссионный, Академический, Толстовский списки)
В лѣто 6820 [1312]. Заратися князь Михаилъ к Новугороду и намѣстьникы своя выведе, не пустя обилья в Новъгород, а Торжокъ зая и Бѣжицѣ и всю волость. И иде владыка Давыдъ во Тфѣрь веснѣ, в роспутье, и доконца миръ; и князь ворота отвори и намѣстникы своя присла в Новъгород. Того же лѣта владыка Давыдъ заложи церковь камену в Неревьскомъ конци, на своемъ дворищи, во имя святого Николы.
В лѣто 6821 [1313]. Выиха посадникъ ладожьскыи с ладожаны въ воину; и по грѣхомъ нашимъ врази наши оканьнии Нѣмци изъихаша Ладогу и пожгоша. Того же лѣта священа бысть церкви каменая святого Николы в Неревьскомъ конци, създаниемъ архиепископа новгородчкого Давыда, и створи в неи вседеньную службу, и бысть прибѣжище всѣмъ крестианомъ, и чернци в немъ совокупишася.
В лѣто 6822 [1314]. Избиша Корила городцанъ 32, /л.195об./ кто былъ Русѣ в Корѣльскомъ городкѣ, и введоша к собѣ Нѣмцовъ; новгородци же съ намѣстникомъ Федоромъ идоша на нѣх, и передашася Корѣла, и избиша новгородци Нѣмець и Корѣлу перевѣтниковъ. Того же лѣта прииха Федоръ Ржевьскыи в Новъгород от князя Юрья с Москвѣ, и изыма намѣстникы Михаиловы, и держаша их во владычнѣ дворѣ, а новгородци съ княземъ Федоромъ поидоша на Волгу; и выиде изо Тфѣри князь Дмитрии Михаилович и ста об ону Вперёд Волъгы, и тако стояша и до замороза, а Михаилу князю тогда сущу в Ордѣ. Посемъ доконцаша миръ съ Дмитриемъ, и оттолѣ послаша по князя Юрья на Москву, на всеи волѣ новгородчкои; а сами возвратишася в Новъгород. Тои же зимѣ, пред великымъ заговѣниемъ, приѣха князь великыи Юрьи в Новъгород на столъ с братомъ Афанасиемъ; и ради быша новгородци своему хотѣнию. Тои же зимы хлѣбъ бяше дорог въ Новѣгородѣ; а въ Плесковѣ почалѣ бяху грабити недобрии людие села и дворы в городѣ и клѣти на городѣ; избиша их плесковици съ 50 человѣкъ; и потомъ бысть тихо.
В лѣто 6823 [1315]. Поиде князь великыи Юрьи из Новаграда, позванъ въ Орду от цесаря, марта въ /л.196./ 15, в суботу Лазареву, оставивъ в Новѣгородѣ брата своего Афанасия. Того же лѣта поиде князь Михаило из Орды в Русь, ведыи съ собою Татары, оканнаго Таитемеря. Услышавши же новгородци съ княземь Афанасиемъ, изидоша къ Торжьку и пребыша ту 6 недѣль, вѣсти переимающе. Тогда же поиде князь Михаилъ со всею землею Низовьскою и с Татары к Торжьку; новгородци же съ княземъ Афанасиемъ и с новоторжьци изидоша противу на поле. Бысть же тогда попущениемъ божиимъ, не мало зло створися: съступившемася обѣима полкома, бысть сѣча зла, яко не мощи исповѣдати, и ту убиша много добрых мужь и бояръ новъгородчкых: убиша Ондрѣя Климовича, Юрья Мѣшинича, Селивана, Тимофѣя Андрѣянова сына тысячкого, Онанью Мелуева, Офоноса Романовича и купцевъ добрых много, а иных новгородцовъ и новоторжьцовъ богъ вѣсть; а инии, останокъ, вбѣгоша в город и затворишася в городѣ съ княземъ Афанасиемъ. И присла князь Михаило к новгородцомъ в Торжокъ: «выдаите ми князя Афанасия и Федора Ржевьскаго, а язъ с вами мир доконцаю». И ркоша новгородци: «не выдадимъ князя /л.196об./ Офанасиа, нь изомремъ честно за святую Софѣю». И присла князь опять: «выдаите ми Федора Ржевьскаго»; и не хотѣвше выдати его, и по неволѣ выдаша его, а на собѣ доконцаша 5 темь гривенъ серебра, и доконцаша миръ и крестъ цѣловаша. И по миру призва князь к собѣ князя Афанасия и бояры новгорочкыя, изыма ихъ и посла на Тьфѣрь в таль, а останокъ людии, что есть в городѣ, нача продаяти, колко кого станеть, и снасть отъима у всѣх. А бои сии былъ мѣсяца февраля въ 10, на память святого мученика Харлампиа. И посла князь намѣстьникъ свои в Новъгород; и даша посадничьство Смену Климовицю.
В лѣто 6824 [1316]. Выидоша намѣстьницѣ Михаиловы из Новаграда, и поиде князь Михаило к Новугороду со всею землею Низовьскою; а новгородци учиииша острогъ около города по обѣ сторонѣ, и соиде вся волость новгородская: и плесковици, и ладожанѣ, рушанѣ, Корила, Ижера, Вожанѣ. Князь же Михаило, не дошед города, ста въ Устьянехъ; и тако мира не возмя, поиде прочь, не успѣвъ ничтоже, нь болшюю- 3 рану въсприимъ; възвратися назадъ, и заблудиша во озерехъ, в болотех; и начаша изми/л.197./рати гладом, и ядяху конину, а инии, съ щитовъ кожю сдирающе, ядяху, а снасть свою всю пожгоша; приидоша пѣши в домы своя, приимше рану, якоже древле иерусалимлянѣ, внегда предасть я богъ в руцѣ цесарю Титу Римъску. Того же лѣта, еще не дошедшю князю Михаилу до города, изимаша Игната Бѣска, и биша и на вѣцѣ, и свергоша его с мосту въ Волхово, творяща его перевѣт держаща к Михаилу; а богъ вѣсть. Тогда же и Данилко Писцовъ убиенъ бысть на рли от своего холопа: обадилъ бо его бяше к горожаномъ, тако рекши: «посылалъ мя съ грамотами к Михаилу князю».
В лѣто 6825 [1317]. Послаша новгородци владыку Давыда къ князю Михаилу с молбою, просяще на окупъ братьи своеи, кто у князя в талѣ; и не послуша его князь. Того же лѣта приходиша Нѣмци во озеро Ладоское и побиша много обонискых купець.
В лѣто 6826 [1318]. Ходища новгородци воиною за море, в Полную рѣку, и много воеваша, и взяша Людеревь город сумьскаго князя и Пискупль; и приидоша въ Новъгород вси здрави. Того же лѣта выиде князь великыи Юрьи из Орды с Татары и со всею Низовьскою землею
и поиде къ Тфѣри на князя Михаила. /л.197об./ И, приславъ Телебегу, и позва новгородцовъ; и они, приихавше в Торжекъ, и доконцаша съ княземъ Михаиломъ, како не въступатися ни по одином: понеже не вѣдуще князя, гдѣ есть, и приидоша пакы в Новъгород. Князю же Юрью пришедшю с полкы близь Тфѣри за 40 веръстъ, и ту выиде на нь Михаило князь со Тфѣри, и съступишася, и бысть сѣча зла, и много паде головъ о князи Юрьи; а брата его Бориса и княгиню его яша и приведоша во Тфѣрь, тамо умориша; а самъ прибѣжа въ Новъгород, и позва всѣх новгородчовъ съ собою, и идоша с нимъ всь Новъгород и Плесковъ, поимше съ собою владыку Давыда; и пришедше на Волгу, и доконцаша съ княземъ Михаиломъ миръ, како ити въ Орду обѣима, а брата Юрьева и княгину пустити. И приидоша новгородци вси в Новъгород, веснѣ сущи; а князь Юрьи иде на Москву, оттолѣ въ-Рду.
В лѣто 6827 [1319]. Уби цесарь в Ордѣ князя Тфѣрьскаго Михаила, и сына его Костянтина и бояры его, а великое княжение дасть Юрью; и присла князь Юрьи в Новъгород брата Афанасиа.
В лѣто 6828 [1320]. Ходи князь Юрьи ратью с братомъ Иваномъ на /л.198./ Рязань на князя Ивана Ростиславьского, и доконцаша миръ.
В лѣто 6829 [1321]. Ходи князь Юрьи ратью на Дмитриа Михаиловича Тфѣрьскаго и прииде в Переяславль с полкы. И ту присла князь Дмитрии владыку тфѣрьскаго, и доконцаша миръ на дву тысящу сребра, а княжениа великаго Дмитрию не подъимати. Того же лѣта, мѣсяца июня 26, бысть знамение въ солнци пред обѣднею: чисту сущю небу, вънезаапу померче солнце яко на час, и бысть яко мѣсяць 5 ночии, и тма бысть яко в зимнюю нощь, и пакы наполнися помалу; и ради быхомъ.
В лѣто 6830 [1322]. Прииде князь Юрьи в Новъгород, позванъ новгородци, и повелѣ порокы чинити. Тогда же приходиша Нѣмци ратью къ Корѣльскому городку и не взяша его. Того же лѣта поиде князь великыи Юрьи с новгородци к Выбору, городу Нѣмечкому; и биша и 6-ю пороковъ, твердъ бо бѣ, и избиша много Нѣмець в городѣ, а и иных извѣшаша, а инии на Низъ поведоша; и стоявше мѣсяць, приступивъ, и не взяша его, нь за грѣхы наша нѣколико муж добрых паде. Того же лѣта преставися князь Афанасии, брат Юрьевъ, постригъся в чернци, и положиша и у святого Спаса на Городищи. /л.198об./ Того же лѣта ходи князь Дмитрии в Орду Михаилович, и подъя великое княжение. Того же лѣта приходи посолъ силенъ из Орды, именемъ Ахмылъ, и много створи пакости по Низовьскои земли, много посѣче христианъ и поведе в Орду. Князь же Юрьи пришед от Выбора, и поиде на Низъ, и много моли новгородцовъ, дабы проводилѣ. Бывшю ему на Урдомѣ, и ту князь Александръ Михаилович со Тфѣри нападе на нь, и князь Юрьи самъ убѣжа въ Плесковъ, а товаръ его разграбишя, а въ Плесковѣ бяше тогды литовьскыи князь Давыдько; и оттолѣ призваша и новгородци к собѣ по хрестьному цѣлованию, и поставиша в Загородьи, въ Офоносовѣ дворѣ, въ диаконовѣ.
В лѣто 6831 [1323]. Ходиша новгородци съ княземъ Юрьемъ и поставиша городнаусть Невы, на Орѣховомъ островѣ; туто же приихавше послы великы от Свѣискаго короля, и доконцаша миръ вѣчныи съ княземъ и с Новымъгородом по старои пошлинѣ. Того же лѣта воеваша Литва волость, и угониша ихъ новгородци и биша, а инии убѣжаша. Того же лѣта заратишася устьюжане с новгородци, изьимаша новгородцовъ хто ходилъ на Югру, и ограбиша их.
В лѣто 6832 [1324]. Идоша новгородци съ /л.199./ княземъ Юрьемъ на Заволочье, и взяша Устьюгъ на щитъ, и приидоша на Двину; и ту прислаша послы 2 князи устьюскыи къ киязю и к новгородцамъ и доконцаша мирь по старои пошлинѣ; и приидоша новгородци вси здрави; а князь Юрьи поиде в Орду изъ Заволочья по Камѣ по рѣцѣ. Того же лѣта свершиша Христову церковь камену, и свяща ю владыка Давыдъ. Тои же зимы преставися архнепископъ новгородчкыи Давыдъ, мѣсяца февраля въ 5, на память святыя мученици Агафьи; и положиша и въ
притворѣ въ святѣи Софѣи, подлѣ Климента. Тогда же сдумавши новгородци, игумены и попове и чернци и весь Новъградъ, възлюбиша вси богомь назнаменана Моисѣя, преже бывша анхимандритомъ у святого Георгиа, потомъ бяше вышелъ по своеи воли къ святѣи Богородици на Коломци въ свои манастырь, и возведоша на сѣни, и посадиша и во владычни дворѣ, дондеже позоветь его митрополитъ.
В лѣто 6833 [1325]. Прииде из Орды князь Александръ Михаилович, и Татарове с нимъ должници, и много бысть тяготы на Низовьскои земли. Того же лѣта поиха Моиси владыка к митрополиту ставится на Москву; и привезоша при немъ князя Юрья великаго из Орды, Данилова сына, /л.199об./ внукъ Александровъ, и погребе его митрополит Петръ и архиепископъ Моиси и тфѣрьскыи епископъ Варсонофѣи и ростовьскыи Прохоръ и рязаньскыи Григории, в суботу 1 поста; и плакася по немъ брат его князь Иванъ и весь народ от мала и до велика плачемь великым зѣло: убилъ бо бяше в Ордѣ князь Дмитрии Михаилович князя великаго Юрья безъ цесарева слова; не добро же бысть и самому: еже бо сѣеть, то и пожнеть. Добро убо послушати бяше рекшаго: да любите другъ друга, якоже азъ възлюбих вы. Иоан же Богословъ глаголеть: братие, богъ любы есть, пребывааи в любви съ братомъ, въ бозѣ пребываеть и богъ в немъ, и пакы индѣ в писании глаголеть: иже бо имѣеть ко всѣм любовь, таковыи бес труда спасется.
В лѣто 6834 [1326]. Прииха в Новъград поставленъ архиепископомъ Моиси, вторник на вербьнои недѣли. Того же лѣта, мѣсяца августа въ, загорѣся на Боянѣ улкѣ, и погорѣ и до половинѣ Рогатицѣ, а Славкова улица от святого Дмитриа и до поля, и церковь святого Климента сгорѣ. Того же лѣта уби цесарь в Ордѣ князя Дмитриа Михаиловича. Тои же зимы преставися митрополит Петръ всея Руси на Москвѣ, и положиша и въ церкви святыя 68 /л.200./ Богородица, юже самъ началъ здати камену; молитвами его створи богъ чюдеса у гроба его: три человѣци прощени быша. Того же лѣта приихаша послове от Литовьскыя земли: брат литовьскаго князя Гедимина, Воини Полотскыи князь, Василии Мѣньскыи князь, Федоръ Святославич; и доконцаша миръ с новгородци и с Нѣмци.
В лѣто 6835 [1327]. Бысть мятежь в Новѣгородѣ, и пограбиша дворъ Остафьевъ Дворянинцовъ и пожгоша. Того же лѣта, на Успенье святыя богородица, изби князь Александръ Михаиловиць Татаръ много во Тфѣри и по инымъ городом, и торговцовъ гость хопыльскыи иссѣче: пришелъ бо бяше посолъ силенъ из Орды, именемъ Щолканъ, съ множествомъ Татаръ. И присла князь Александръ послы к новгородцомъ, хотя бѣжати в Новъгород, и не прияша его. Того же лѣта присла князь Иванъ Даниловичь намѣстьникы свои в Новъгород, а самъ иде в Орду. На ту же зиму прииде рать татарьская множество много, и взяша Тфѣрь и Кашинъ и Новоторьскую волость и просто ркуще всю землю Рускую и положиша ю пусту, токмо Новъград ублюде богъ и святая Софѣя. А князь Александръ вбѣжа въ Плесковъ; а Ко/л.200об./стянтинъ, брат его, и Василии в Ладогу; въ Новъгород же прислаша послы Татарове, и даша имъ новгородци 2000 серебра, и свои послы послаша с ними къ воеводамъ со миожествомъ даровъ. Убиша же тогда Татарове Ивана, князя Рязаньскаго.
В лѣто 6836 [1328]. Ходи князь великыи Иванъ Данилович и Костянтинъ Михаилович, и новгородци от себе послаша Федора Колесницю. во Орду къ цесареви; и отпусти я цесарь, и повелѣвъ искати князя Александра. И посла князь Иванъ свои послы, а новгородци от себе владыку Моисия и Авраама тысячкого къ князю Александру въ Плесковъ, веляще ему, дабы пощелъ въ Орду, и не послуша. Того же лѣта погорѣ Юрьевъ нѣмечкои всь и божници ихъ, и полаты каменыя съкрушившеся падоша; и сгорѣ Нѣмець в полатах 2000 и 500 и 30, а Руси 4 человѣкы.
В лѣто 6837. [1329] Прииде в Новъгород на столъ князь великыи Иванъ Данилович, внукъ Александровъ, мѣсяца марта въ 26, на зборъ архангла Гаврила; бяху же с ними тфѣрьскыи князи Костянтинъ и Василии, и Александръ Суздалскыи, и иных много рускых князеи. Того же лѣта прииха в Новъград митрополит, родомъ Гричинъ, именемъ Феогнастъ, и прокля /л.201./ плескович. Того же лѣта убиша въ Юрьевѣ новгорочкого посла мужа честна Ивана Сыпа. Того же лѣта поиде князь Иванъ со всѣми князьми и с новгородци на Плесковъ ратью; и увѣдавше плесковици, выпровадиша от себе князя Александра, а ко князю Ивану и къ новгородцамъ прислаша послы с поклоном въ Опоку, и доконцаша миръ. Тои же зимы избиша новгородцовъ, которыи были пошли на Югру. Того же лѣта безъ князя и безъ новгородцовъ загорѣся Ондрѣшковъ дворъ въ Плотниках, и погорѣ и до Федора святого, и потомъ на тои же недѣли погорѣ Ильина улица мало не вся и Лубяница, и церкви святого Спаса и святого Лукы.
В лѣто 6838 [1330]. Пострижеся въ скиму архиепископъ Моисии по своеи воли, и много молиша и новгородци всѣмъ Новымгородомъ с поклономъ, дабы сѣлъ пакы на своемъ престолѣ, и не послуша их, нь благослови, сице рекши: «изберите себѣ мужа такого достоино того сану, и язъ его благословлю». И много гадавше новгородци, и быша безъ владыкы 8 мѣсяць; и възлюбиша весь Новъград от мала и до велика, игумени и попове богомь назнаменана Григориа Калику, мужа добра, кротка и смирена, /л.201об./ попа бывша святого Козмы и Дамиана на Холопьи улици; и пострижеся въ святыи аггельскыи образъ, мѣсяца генваря, и нареченъ бысть именем Василии, и посадиша и въ владычнѣ дворѣ, дондеже пошлют к митрополиту.
В лѣто 6839 [1331]. Приихаша послове от митрополита из Волыньскои земли Федорко и Сменко, на страстьнои недѣли, зовуще на поставление. Того же лѣта заложи владыка Василии город каменъ от святого Володимера до святои Богородици, а от Богородици до Бориса и Глѣба. Того же лѣта, на память святого рожества Иоана, мѣсяца июня поиха Василии на владычество ставится в Волыньскую землю, а съ нимъ бояри: Кузма Твердиславль, Валъфромѣи Остафьевъ сынъ тысячкого; и приихаша в Володимиръ волыньскыи, промысломъ божиимъ и поспѣшениемъ святого духа, и створиша праздникъ свѣтелъ святыя богородица; и поставиша его на память святого апостола Тита; тогда явися на небеси знамение, звѣзда свѣтла над церковью. А постави его Феогнастъ митрополит, родомъ Гричинъ, а владыкы; Григории полочкыи, Афанасии володимирьскыи, Федоръ галичкои, Марко перемышлевъскыи, Иоанн холмъскыи. В то же время приихаша послове изъ Плескова от князя /л.202./ Александра, и от Гидимена послове, и от всѣх князии литовьскых к митрополиту и приведоша со собою Арсѣниа, хотяще его поставити на владычество въ Плесковъ, не потворивше Новаграда ни во чтоже, възнесошася высокоумъемъ своимъ. Нь богъ и святая Софѣя низлагаеть всегда же высокыя мысли, зане плесковици измѣнилѣ крестъное цѣлование к Новуграду, посадилѣ собѣ князя Александра из литовъскыя рукы. Арсѣнии же со плесковици поиха посрамленъ от митрополита из Волыньскои земли на Киевъ, на память святого отца Семеона столпъника. Поиха Василии владыка от митрополита; яко прииха под Черниговъ, и ту научениемъ дияволимъ пригнася киязь Федоръ Киевьскыи со баскакомъ в пятидесят человѣкъ розбоемъ, и новгородци остерегошася и сташа доспѣвъ противу себе, мало ся зло не учинило промежю ими; а князь въсприимъ срамъ и отъиха, нь от бога казни не убѣжа: помроша конѣ у его. И оттолѣ поиха владыка на Брянескъ и прииха в Торжокъ, на память святого священномученика Акепсимы, и ради быша новоторжьци своему владыцѣ; а в Новѣгородѣ печалнѣ быша, занеже не бяше вѣсти, нь сица вѣсть /л.202об./ промчеся, яко владыку Литва ялѣ, а дѣтеи его избиша. Того же лѣта поиде князь великыи Иванъ в Орду со княземъ Костянтиномъ. Того же лѣта прииха архиепископъ новгородчкыи владыка Василии в Новъгород мѣсяца декабря, на память святого отца Потапиа, въ день недѣлныи, из Волыньскои земли, и ради быша новгородци своему владыцѣ, а при князи Иванѣ, при посадницѣ Валфромѣи, при тысячкомъ Остафьи.
В лѣто 6840 [1332]. Въсташа крамолницѣ в Новѣгородѣ, и отъяша посадничьство у Федора у Ахмыла и даша Захарьи Михаиловичю, и пограбиша дворъ Смена Судокова, а брата его Сенифонта села пограбиша. Того же лѣта великыи князь Иванъ прииде из Орды и възверже гнѣвъ на Новъград, прося у н их серебра закамьское, и въ томъ взя Торжокъ и Бѣжичькыи верхъ чересъ крестное цѣлование.
В том же лѣтѣ отъяша посадничьство у Захарьи и даша Матфѣю Коскѣ.
В лѣто 6841 [1333]. Прииде князь Иванъ в Торжокъ со всѣми князи низовьскыми, и присла в Новъгород, и сведе намѣстьникы, а самъ сѣде в Торжьку от Крещениа и до збора, теряя волость новгородчкую. И послаша новгородци послы, зовуще в Новъгород: анхи /л.203./ мандрѣта Лаврентиа, и Федора Твердиславля, Луку Валфромѣева и оиъ молбы не приялъ, а ихъ не послушалъ, а миру не далъ, и прочь поихалъ. Того же лѣта владыка Василии святую Софѣю сторону свинцомъ поби, и крестъ обнови на святои Софѣи великыи, и сволокы сня сторону; и город каменыи постави, поспѣшениемь божьимь, въ два лѣта. А даи ему, господи боже, святая Софѣя, в сии вѣкъи в будущии отпущение грѣховъ с дѣтми его, с новгородци. Того же лѣта послаша новгородци владыку Василья къ великому князю Ивану с молбою; и приихалъ к нему въ Переяславль с Терентиемъ Даниловицемъ и с Даниломъ Машковицемъ, и давали ему 5 сот рублевъ, а свобод бы ся отступилъ по хрестьному целованию; и много моли его владыка, чтобы миръ взялъ, и не послуша. Того же лѣта приихавъ владыка Василии от великаго князя Ивана, и поиха въ Плесковъ, и прияша его плесковици с великою честью: понеже не бывалъ бяше владыка въ Плесковѣ 7 лѣт; и у князя Олександра крестилъ сына Михаила. Сем же лѣтѣ въложи богъ въ сердце князю Литовьскому Наримонту, нареченому въ крещении Глѣбу, сыну великого князя Литовьскаго Гедимина, /л.203об./ и присла в Новъград, хотя поклонитися святѣи Софѣи; и послаша новгородци по него Григорью и Олександра, и позваша его к собѣ; и прииха в Новъгород, хотя поклонитися, мѣсяца октября; и прияша его съ честью, и цѣлова крестъ к великому Новуграду за одинъ человѣкъ; и даша ему Ладогу, и Орѣховыи, и Корѣльскыи и Корѣльскую землю, и половину Копорьи въ отцину и в дѣдѣну, и его дѣтемъ. Того же лѣта прииха митрополит Феогнастъ в Русь, бывъ въ Цесариградѣ и в Ордѣ.
В лѣто 6842 [1334]. Индикта въ 2, владыка Василии ѣздилъ к митрополиту в Володимирь. Того же лѣта и город каменыи покрылъ владыка. Того же лѣта прииде из Орды князь великыи Иванъ Даниловиць; и послаша к нему новгородци Валъфромѣя Юрьевича, и прия их с любовию. Тои же зимѣ прииха в Новъгород князь великыи Иванъ Данилович, в четверток на мясопустнои недѣли, мѣсяца февраля въ 16, на святрго мученика Памфила.
В лѣто 6843 [1335]. Заложи архиепископъ Василии церковь святыя Богородица въ Звѣринцѣ, а Моисии владыка заложи церковь камену святого Въскресения на Деревяници, манастырь. Того же лѣта заложи владыка Василии съ своими дѣтми, с посадникомъ Федоромъ Даниловицемъ /л.204./ и с тысячкым Остафьемъ и со всѣмъ Новымъгородом, острогъ каменъ по онои сторонѣ, от Ильи святого къ Павлу святому, при великомъ князи Иванѣ Даниловици. Того же лѣта, по грѣхомъ нашимъ, бысть пожаръ в Руси: погорѣ город Москва, Вологда, Витебьско; и Юрьевь нѣмечкыи всь погорѣ. Того же лѣта князь великыи Иванъ хотѣ ити на Плесковъ с новгородци и со всею Низовьскою землею, и бысть ему по любви рѣчь с новгородци, и отложиша ѣздъ; а плесковицемъ миру не даша. Того же лѣта сверши владыка Василии церковъ святую Богородицю въ Звѣринци, а Моисии другую святого Въскресения каменую. Того же лѣта, великому князю Иваиу приихавшю в Торжокъ из Новагорода, воеваша Литва Новоторжьскую волость на миру; и пославъ князь великыи, пожже городкѣ Литовьскыи Осѣченъ и Рясну и иных городковъ много. Того же лѣта князь великыи позва владыку к собѣ на Москву на честь, и посадника и тысячкого и вятших бояръ; и владыка Василии ѣздивъ, и чести великои много видилъ. Тои же осени внесе лед и снѣгъ [в] Вълъхво, и вышибе 15. городень великаго мосту; то же, богъ вѣсть, или казия нас или милуя. [Не далъ богъ кровопролитиа] А промежи братьею: наважениемъ /л.204об./ диявольскым сташа си сторона и она сторопа, доспѣвше въ оружьи противу себе оба полъ Волхова; нь богъ ублюде и снидошася в любовь.
В лѣто 6844 [1336]. Заложи владыка Василии церковь камену Входъ Иерусалима господа нашего Исуса христа, гдѣ теремець былъ, мѣсяца июня въ 25, на память святыя Февроньи. Того же лѣта свершиша мостъ новъ чресъ Волхово. Того же лѣта поиде князь великыи Иванъ в Орду. В то же лѣто боголюбивыи архиепископъ Василии святую Софѣю тыном новымъ отыни, а у святѣи Софѣи двери мѣдяны золочены устроилъ. Того же лѣта погорѣ Плесковъ весь, что ни есть дворовъ за стѣною и церквии.
В лѣто 6845 [1337]. Наважениемь диаволимъ сташа простая чадь на анхимандрита Есифа, и створиша вѣче, запроша Есифа въ церкви святого Николы; и сѣдоша около церкви нощь и день коромолници, стрегуще его. Аще кто под другомъ копаеть яму, самъ впадеться в ню. Тои же зимы розратися князь великыи Иванъ с новгородци, и посла рать на Двину за Волокъ, не помянувъ крестнаго цѣлованиа, и тамо крестъною силою посрамлени быша и ранени.
Того же лѣта поиха владыка Василии въ Плесковъ на подъѣздъ, и плесковици суда /л.205./ не даша, и владыка поиха от них, проклявъ их. Того же лѣта Москва вся погорѣ; и тогда же наиде дождь силенъ, и потопе все, иное в погребех, иное на площадех, что гдѣ выношено. Того же лѣта и Торопець погорѣ и потопе. Того же лѣта поѣха князь Олександръ изъ Плескова въ Орду, бывъши въ Плесковѣ 10 лѣт. Того же лѣта свершена бысть церковь Входъ въ Иерусалимъ господа нашего Исуса христа, и священа бысть пресвященнымъ архиепископомъ Васильем мѣсяца септября 21, святого мученика Кондрата, и бысть крестияномъ прибѣжище; а поставлена бысть въ 9 недѣль. Тои же зимы Корѣла, подведше Нѣмець, побиша Русь новгородцовъ много и ладожанъ гостии и кто жилъ крестиянъ в Корѣлѣ, а самѣ побѣжалѣ в Нѣмечкыи городокъ и потом много посѣкоша крестиянъ изь Нѣмечкого городка.
В лѣто 6846 [1338]. Бысть вода велика в Волховѣ, яко же не бысть 3 бывала николи же, по велицѣ дни на 3 недѣли въ среду, и снесе великого мосту 10 городенъ; тогда и Жилотужьскыи мостъ снесе и створися зла много. Того же лѣта повелѣ владыка Василии писати церковь Вход Иерусалимь господа нашего Исуса христа Исаю Грѣчину с другы, мѣсяца мая въ 4, на память святого священномученика Селивана; въ тои же день нача писати. /л.205об./ Тои же веснѣ ѣздиша новгородци с посадникомъ Федоромъ в Неву, и стояша под Орѣховымъ, съсылающеся послы с воеводою нѣмечкымъ съ Стѣнемъ, и не бысть миру; нь тако възвратишася новгородци в Новъгород. Воеваша Нѣмцѣ с Корѣлою много по Обонижью, послѣже и Ладогу пожгоша, пригонивше, посадъ, нь города не взяша. Потомъ же ходиша молодци новгородстѣи с воеводами и воеваша городецьскую Корѣлу нѣмечкую, и много попустошиша земли их и обилье пожгоша и скот иссѣкоша, и приидоша вси здрави с полономъ. Того же лѣта приходиша Нѣмци из городка воеватъ на Толдогу, и оттолѣ хотяху на Водскую землю, и не взяша ничто же: остерегли бо ся бяху, нь выщедши копорьянѣ с Федоромъ Васильевичемь, и биша я; и убиша ту Михѣя Копорьянѣна, мужа добра, а под Федоромъ конь раниша, нь самому не бысть пакости, выихалѣ бо бяху в малѣ. Князь же Наримантъ бяше в Литвѣ, и много посылаша по него, и не поѣха, нь и сына своего выведе изъ Орѣхового, именемь Александра, токмо намѣстьникъ свои остави. Того же лѣта дѣлаша мостъ новъ, что было вышибло, /л.206./ повелѣниемъ владыкы Василья; самъ бо владыка присталъ тому, и почалъ и кончалъ своими людьми; и много добра створи християномъ. Князю же Александру бысть пожалование от цесаря, и прииде из Орды въ свою отчину во Тфѣрь; и пославъши въ Плесковъ, выведе княгиню свою к собѣ и дѣти. Того же преставися анхимандритъ Лаврентѣи святого Георгиа, и посадиша Есифа. Тои же зимы прислаша послы из нѣмечкого городка из Выбора о миру в Новъгород от Петрика воеводѣ, ркуще, яко князь свѣискыи того не вѣдаеть, что учинилося розмѣрье с Новымъгородомъ, нь то подѣялъ Стѣнь воевода о своемь умѣ. Новгородци же послаша Кузму Твердиславица и Олександра Борисовица посольством, и привезоша миръ, доконцавше по тому миру, что доконцали с великымъ княземъ Юрьемь в Невѣ, а про Кобыличкую Корилу послати къ свѣискому князю.
В лѣто 6847 [1339]. Ходи князь великыи Иванъ в Орду; его же думою приславше Татарове, позваша Александра и Василья Давыдовица Ярославьскаго и всѣх князии в Орду. Князь же Александръ бѣ послалъ преже себе в Орду сына своего /л.206об./ Федора, чая оттолѣ вѣсти; и присла по него цесарь, и поиде в Орду, и Василии Ярославьскыи, на нь же посла Иванъ князь, тесть его, въ 5 сот переимать, нь отбися их; уже бо бяше князь Иванъ из Орды вышелъ, и послаша к нему новгородци послы. Того же лѣта бысть знамение, мѣсяца августа въ 12, у святого Лазаря от иконы святыя богородица на вечернии изъ обѣю очью яко слезы течаху, и подъставиша 2 вощаници; наутрѣя же увѣдавше город всь, игумены и попове съ причетникы в ризахъ съ кресты ходиша видѣти. Того же лѣта послаша новгородци Кузму Твердиславля и Олександра Борисовича с другы, а от владыкы сестрицича его Матфѣя за море къ свѣискому князю посольствомъ; и наихаша его в Мурманьскои земли, в городѣ Людовли, и доконцаша миръ по старым грамотамъ; а про Корилу тако ркоша: «аще к вамъ наши бежат, сѣките их или вѣшаите; или ваши к намъ, мы же тако имъ створимъ, дажь не польстят промежю нами; а сих не выдадимъ: крещени суть в нашю вѣру; а и бес того мало бѣ их осталося, а то вси помроша гнѣвом божиимъ». Ко князю же Ивану послаша Селивестра Волошевича и Фе/л.207./дора Оврамова с выходом. Князь же присла послы свои, прося другого выхода: «а еще даите ми запросъ цесаревъ; чого у мене цесарь запрошалъ»; и они ркоша: «того [у насъ] не бывало от начала миру, а ты цѣловалъ крестъ к Новугороду по старои пошлинѣ новгородчкои и по Ярославлимъ грамотамъ». Того же лѣта концаша церковъ владычню пишюче. Тои же осени, мѣсяца октября въ 5, погорѣ околотокъ от святого Володимира. Того же мѣсяца въ 29 убиша князя Олександра и сына его Федора в Ордѣ погании Татарове: призвалъ бо его бяше цесарь Озбякъ с лестью, хотя и убити, тако рекъ: «хощеть тя цесарь жаловати»; оному же послушавъшю поганаго льстивых словесъ и пришедшю и убиена быста, приимша горкую и нужную смерть. Тои же зимѣ выведе князь великыи Иванъ Данилович намѣстникы свои из Новагорода, и не бѣ ему миру с Новымгородом.