Сайт посвященный церковной истории
Святая София и
Великий Новгород
История и
современность
История и современность
Кликни на квадрат справа, чтобы открыть вкладки сайта
Перепечатка в интернете разрешена при условии наличия активной ссылки на сайт " Святая София и Великий Новгород: История и современность".
НОВГОРОДСКАЯ ПЕРВАЯ ЛЕТОПИСЬ МЛАДШЕГО ИЗВОДА
(Комиссионный, Академический, Толстовский списки)
В лѣто 6781 [1273]. Прииха князь Дмитрии Александрович в Новъгород и сѣде на столѣ мѣсяца октября въ 9. Того же лѣта приходи князь Василии к Торжьку, и пожьже хоромы и посади тивунъ свои, и иде назадъ /л.185об./ на Кострому. И Святославъ съ тфѣрици и начаша воевать волость новгородскую: Волокъ, Бѣжици. Вологду; а в Новѣгородѣ бысть хлѣбъ дорогъ, и у гостебниковъ по Низовьскои земли товаръ отъимаша. Тои же зимѣ князь Дмитрии с новгородци н со всею областью идоша къТфѣри, а к Василью послаша Смена Михаиловича, Лазаря Моисиевича, Стефана Душиловича: «что еси поималъ волости новгородчкои, то въспяти; а с нами миръ возми». Василии же отпусти послы съ честью и мира не да. И яко быша новгородци на Торжку, и възмятошася люди, и восхотѣша Василья; и съступися Дмитрии стола волею и поиде прочь с любовью. Тогда же отъяша посадничьство у Павши, и бѣжа с Романомъ к Дмитрѣю, и оттоль идоша к Василью и поклонишася; и даша посадничьство Михаилѣ Мишиничю, и послаша по Василья, и цѣловаша на Торжку образъ господень, яко всѣм одинакымъ быти с посадникомъ Михаилом. Сѣде князь Василии Ярославич в Новѣгородѣ на столѣ. Того же лѣта отъяша посадничьство у Михаила и даша опять Павши, с Костромы привед.
В лѣто 6782 [1274]. Преставися архиепископъ Далматъ новгородчкыи, мѣсяца октября въ 21, в суботу, въ 1 час нощи; а заутра в недѣлю по/л.186./гребенъ бысть честно. Даи, господи, молитву его святую кланяющимся гробу его. Тои же зимы преставися Павша, посадникъ новгородскыи, и прииха князь Василии в Новъгород, и даша опять посадничьство Михаилу Мишиничю. Преже преставлениа Далматова посадникъ Павъша с мужи старѣишими биша чоломъ Далмату: «кого, отче, благословишь на свое мѣсто пастуха и учителя». Далмат же нарече два игумена: святого Георгиа Иоана и отца своего духовнаго Климента: «коего собѣ излюбите, того вамъ благословлю». Иде посадникъ на Иоанна дворъ, и созва новгородци, и сказа имъ слово Далматово; и възлюбиша вси богомъ назнаменана Климента, и благослови его Далмат своею рукою, и по преставлении Далматовѣ послаша в Кыево ставится.
В лѣто 6783 [1275]. В нощь загорѣся на княжи дворѣ, подлѣ нѣмечкои дворъ, и погорѣ Торгъ сѣмо и до Славна, а сѣмо и до Рогатицѣ; и сгорѣ церквии 7 древяных, а каменых 4 огорѣша, а 5-я нѣмѣчкая.
В лѣто 6784 [1276]. Отпаде стѣна у святѣи Софѣи до основы, от Неревьскаго конца, мѣсяца маа въ 9, в полъдни. Того же лѣта, на зиму, поставленъ бысть архиепископъ новгородчкыи Климентъ, прииха ис Кыева въ свою /л.186об./ епископью, и введоша его честно въ святую Софѣю весь Новъград съ кресты и пѣснми в недѣлю, мѣсяца августа въ 2 день. Того же лѣта, на зиму, преставися великыи князь Василии Ярослалиць и положенъ бысть у святого Федора на Костромѣ. Новгородци же послаша по Дмитрия Александровича.
В лѣто 6785 [1277]. Прииха князь Дмитрии в Новъгород, и посадиша на столѣ, в недѣлю на всѣх святых.
В лѣто 6786 [1278]. Князь Дмитрии с новгородци и со всею Низовьскою землею казни Корѣлу и взя землю их на щитъ.
В лѣто 6787 [1279]. Испроси князь Дмитрии у Новагорода поставити собѣ город Копорью, и ихавъ самъ сруби.
В лѣто 6788 [1280]. Князь великыи Дмитрии с посадникомъ Михаилом и с болшими мужи, шедши, обложиша город каменъ Копорью. Того же лѣта отъяша посадничьство князь Дмитрии с новгородци у Михаила у Мишиница и даша Смену Михаилову, вывед изъ Ладогы. И по трех мѣсяцѣхъ преставися Михаилъ Мишиниць, мѣсяца ноября въ 9, на память святого Павла Исповѣдника.
В лѣто 6789 [1281]. Заратися князь Дмитрии с новгородци; новгородци жё послаша владыку с молбою, и не слуша и. Того же лѣта, на зиму, приходи князь Дмитрии к Новугороду ратью и много пакости створи /л.187./ волости новгородскои; и ставъ на Шелонѣ, створи миръ, и отъиде. Тои же зимѣ преставися митрополит всея Руси Кирилъ въ Переяславли мѣсяца декабря въ 6; везены бысть мощи его в Киевъ къ святѣи Софѣи.
В лѣто 6790 [1282]. Андрѣи князь лександрович со Сменомъ Толигнѣвицемъ цесареви би чоломъ на брата своего на Дмитрия, и въздыну рать татарьскую, и взяша Переяславль на щитъ; а князь Дмитрии выступи с мужи своими и со дворомъ своимъ, и поиха мимо Новъгорода хотя в Копорью. Новгородци же изидоша вси полкомъ противу, на озеро Ильмерь; князь же Копорьи отступися, а новгородци князю путь показаша, а не яша его, а двѣ дщери его и бояры его с женами и с дѣтми приведоша в Новъгород в таль: «дажь мужи твои выступятся ис Копорьи, тоже пустимъ их»; и поихаша разно мѣсяца генварявъ 1. Того же дни изгони Домонтъ Ладогу ис Копорья, и поимаша всь княжь товаръ Дмитриевъ, и задроша и ладозкого, и везоша и в Копорью на Васильевъ день. А новгородци послаша по Андрѣя князя, а сами идоша къ Копорьи; мужи Дмитриевѣ выступиша из города, показаша имъ путь новгородци, а город розгребоша. Тои же зимѣ приѣха князь Андрѣи /л.187об./ Александрович в Новъгород, и посадиша на столѣ честно, в недѣлю сыропустную. Тогдаже Андрѣи князь поиде из Новагорода, поимя съ собою новгородцовъ, Смена Михаиловича и иных муж старѣиших, иде в Володимиръ; из Володимира отпусти новгородци назадъ, а самъ иде в Городець. И прииха Сменъ Михаилович в Торжокъ и сѣде засадою в Торжку, не дадуще внити в Торжокъ намѣстьникомъ Дмитриевым, а обилье все попровади в Новъгород в лодьяхъ; а в Новѣгородѣ бяше хлѣбъ дорогъ.
В лѣто 6791 [1283]. Идоша новгородци на Дмитриа к Переяславлю, и Святославъ со тфѣрици, и Данило Олександрович с москвици; Дмитрии же изиде противу плъкомъ со всею силою своею и ста въ Дмитровѣ. Новгородци сташа, не дошед Дмитрова 5 -ю веръстъ, и стояша 5 днии близь себе съсылающеся послы; и створиша миръ на всеи волѣ новгородчкои, и отъидоша.
Того же лѣта възъѣздиша Нѣмци ратью Невою въ озеро Ладоское, избиша новгородцовъ, обонискых купець; идоша ладожанѣ в Неву и бишася с ними.
В лѣто 6792 [1284]. Прииха Андрѣи князь в Торжокъ и позва к собѣ Смена посадьника съ всѣми старѣишими, и доконцаша и крестъ цѣлова князь, а новгородци к нему: како Андрѣю не съступитися Новагорода, а новгородцомъ не искати иного /л.188./ князя; живот ли, смерть ли, новгородцом съ Андрѣемъ. И отпусти князь новгородцовъ назадъ, а самъ поиде на Низъ и, шедши тамо, съступися брату своему стола Дмитрию Новагорода. Того же лѣта воевода нѣмечьскои Трунда с Нѣмци в лоивахъ и въ шнеках внидоша Невою в Ладоское озеро ратью, хотяще на Корѣлѣ дань взяти; новгородци же с посадникомъ Сменомъ и с ладожаны и ѣхавше, Вперёдсть Невы, и дождавше избиша их, а прокъ их убѣжаша, мѣсяца септября въ 9, на память святых праведникъ Акима и Анны.
Того же лѣта, на зиму, прииде Дмитрии князь с братомъ своимъ Андрѣемъ ратью к Новугороду и с Татары и со всею Низовьскою землею, и много зла учиниша, волости пожгоша; и, пришедше, Вперёд Коричкѣ, и створиша миръ; и сѣде Дмитрии в Новѣгородѣ на столѣ своемъ.
В лѣто 6793 [1285]. Приходи Максимъ митрополит в Новъгород. Тои же зимѣ Литва воеваша волость.
В лѣто 6794 [1286]. На зиму отъяша посадничьство у Смена и даша Андрѣю Климовичю, а тысячкое отъяша у Ивана и даша Андрѣяну Олферьевичю.
В лѣто 6795 [1287]. Бысть мятежь великъ в Новѣгородѣ на Смена Михаиловича: въста на него всь Новъгород безъ исправы, поидоша на него /л.188об./ изо всѣх концевъ, яко силная рать, всякыи въ оружии, силою великою; жалостьно видѣние. И тако поидоша на дворъ его, взяша всь домъ егосъ шюмомъ. Семеонъ прибѣжа къ владыцѣ, и владыка провади въ святую Софѣю; и тако ублюде богъ, и заутра снидошася в любовь. Семеонъ же по малѣ дни разболѣся болѣзнью; лежавъ нѣколико днии, преставися мѣсяца июля въ 16, на память святого Тихона, в понедѣльник.
В лѣто 6796 [1288].
В лѣто 6797 [1289]. Ходи князь Дмитрии ратью ко Тфѣри и позва новгородцовъ; идоша новгородци с посадникомъ Андрѣемъ, и пожгоша волость, и взяша миръ.
В лѣто 6798 [1290]. Отъяша новгородци посадничьство у Андрѣа Климовича и даша Юрью Мишиничю, великое говѣние, исходящу лѣту 8-му. В то же лѣто даша посадничьство ладоское Матфѣю Сменовичю. Того же говѣниа, на похвалнои недѣли вторник, убиша Самоила Ратшинича на владычнѣ дворѣ, у въсхода у Рожества христова, по заутрении. Новгородци же съзвониша вѣче у святѣи Софѣи и у святого Николы, снидошася в доспѣсѣ, взяша улицю Прускую и домы их разграбиша, пожгоша улицю всю; и церковь святыя Богородица сгорѣ.
В лѣто 6799 [1291]. Вода бысть в Волховѣ велика веснѣ. Того же лѣта посла господь казнь свою за грѣхы наша: помроша /л.189./ конѣ в Новѣгородѣ, мало ся и оста. Того же лѣта поби морозъ обилье но всеи волости новгородчкои. Тоже богъ кажет насъ, хотя от нас покаяниа. да быхом ся осталѣ от злобъ своих. Мы же не худѣ попечемся о грѣсех своих; а господь долготерпит, ожидая нашего покаяниа. Того же лѣта грабиша коромолницѣ торгъ, и заутра створишя вѣче новгородци, свергоша два коромолника с мосту. Того же лѣта бысть мятежь в Татарех: Ногуи цесарь уби Телебегу цесаря и Алгуя цесаря.
В лѣто 6800. [1292] Преставися у великаго князя у Дмитриа сынъ Александръ в Татарехъ. Того же лѣта заложи архиепископъ новгородчкыи Климентъ перковь камену святого Николу на Липнѣ. Того же лѣта святого Федора церковь почаша здати, которая порушилась. Того же лѣта ходиша молодци новгородстѣи с воеводами съ княжими воеват на Емъскую землю; воевавше, приидоша вси здрави. В то же лѣто приходиша Свѣя воеват, 800 их: 400 иде на Корѣлу, а 400 на Ижеру; избиша их Ижера, а Корѣла изби своих, а иных рукама изимаша.
В лѣто 6801 [1293]. Пришедши Свѣя, поставиша город на Корѣльскои землѣ. Того же лѣта би чоломъ Андрѣи князь цесареви съ иными князи на Дмитриа князя с жалобами, и отпусти цесарь брата своего Дуденя съ множеством рати /л.189об./ на Дмитриа 41. О, много бяше пакости крестияномъ, безвинныя городы поимаша: Володимерь, Москву, Дмитровъ, Волокъ и иныи грады, положиша всю землю пусту; а Дмитрии во Пьсковъ вбѣжа. Новгородци же Сменомъ Климовичемъ дары послаша цесарю Дюденю на Волокъ: «воспяти рать с Волока»; а по Андрѣя послаша с поклономъ. Андрѣи князь рать въспяти, а самъ поиха в Новъгород и сѣде на столѣ, в недѣлю сыропустную. Того же говѣнья посла великыи князь Андрѣи князя Романа Глѣбовича и Юрья Мишинича, Андрѣяна тысячкого, в малѣ новгородцовъ к городу Свѣискому; пришибошася вторник на похвалнои недѣли крѣпко, и застрѣлиша с города мужа добра Ивана Клекачевича, и мнози ранени быша; тои же нощи, по грѣхомъ нашимъ, бысть оттеплѣе, росполися вода под городом, а конемъ не бысть корма; и отъидоша, и приидоша вси здрави, нь ранени; а Иванъ Клекачевич привезенъ преставися с тои ранѣ. Того же говѣнья князь Андрѣи с посадникомъ Андрѣем и с вятшими мужи иде в Торжокъ Дмитриа преимать; а Дмитрии бѣжа ис Плескова во Тфѣрь, и присла в Торжокъ владыку тфѣрьскаго и Святослава с поклоном къ брату Андрѣю и к новгородцомъ, съсылающеся послы взяша миръ, /л.190./ а Волокъ опять Новугороду.
В лѣто 6802 [1294]. Князь Андрѣи посла А посадника ис Торъжку в Новъгород, а самъ иде на Низовьскую землю. Того же лѣта преставися князь Дмитрии в Волоцѣ, постригъся, и везоша и въ Переяславль. Того же лѣта постави Титмановиць отии городокъ на сеи сторонѣ Наровѣ; новгородци же, ѣхавше, пожгоша и, и село его великое взяша и пожгоша. Того же лѣта свершиша церковь святого Федора, и свяща ю владыка Климентъ, мѣсяца октября въ 18 день.
В лѣто 6803 [1295]. Поставиша Свѣя с воеводою своимъ Сигомъ город в Корѣлѣ; новгородци же, шедши, город розгребоша, а Сига убиша, не Вперёд мужа.
В лѣто 6804 [1296]. Постави архиепископъ новгородчкыи Климентъ церковь камену святого Въскресениа на воротех.
В лѣто 6805 [1297]. Поставиша новгородци городъ Копорью. Того же лѣта игуменъ Кирилъ святого Георгиа постави церковь камену святого Преображениа на воротех от Людина конца.
В лѣто 6806 [1298]. В зимѣ изгониша Нѣмци Плесковъ и много зла створиша: посадъ пожьженъ бысть, а по манастыремъ всѣ чернци исѣкоша; и плесковици же съ княземъ Домонтомъ, укрѣпившеся богомъ и святою богородицею, прогнаша их, давши имъ рану не малу.
В лѣто 6807 [1299]. Мѣсяца априля въ 18 день, в суботу великую, въ 1 час /л.190об./ нощи загорѣся на Варескои улици; по грѣхомъ нашимъ створися горе велико: въздвижеся буря с вихромъ; и тако бысть силень огнь вборзѣ, кто же, мало что похвативъ, выбѣжа изъ своего двора, а иное все огнь взя. И вержеся огнь изъ нѣмечкого двора в Неревьскыи конець, загорѣся на Холопьи улици, и тамо того сѣлнѣе огнь, а неревлянѣ на онои сторонѣ, а мостъ Великыи огнь заялъ. И тако створися пагуба велика; и тако бо на свѣтѣ богъ и добрии люди уяша; а злѣи человѣци падоша на грабежи: что въ церквахъ, а то все розграбиша, бога бо не боящеся; и, видящи казнь божию, въ покаяниа мѣсто горшее зло створиша: въ святомъ Иванѣ надъ товаромъ сторожа убиша; а въ святомъ Яковѣ сторож сгорѣ; на Торговомъ же полу церквии сгорѣ 12, и иконъ не всѣхъ успѣша выносити, ни книгъ; а въ Христовѣ въ церкви нѣколико головъ сгорѣ, и два попа сгорѣста; в Неревьскомъ конци сгорѣ церквии 10 и многа узорочая, въ церквах, и муж добръ сгорѣ Ольфереи Лазаревиць; и бысть заутра в радости мѣсто печаль и сѣтование. За грѣхы наша сбыстся пророчество Исая пророка, еже рече: преложю праздникы ваша въ плачь, игрища ваша в сѣтование. Тоже, братье, богъ казнить за грѣхы наша, /л.191./ кажа нас на покаяние, да быхом ся осталѣ злобъ своих; аше согрѣшихомъ. нь не отчаемся твоея милости: твоя бо власть есть казнити и пакы миловати. Казнивъ, господи, помилуи. Того же лѣта мѣсяца мая въ 22 день, на память святого мученика Василиска, в пяток 4 недѣли по пасцѣ, въ 7 час дни, преставися архиепископъ новгородчкыи Климентъ, бывши въ епископьи лѣт 23, добрѣ правивъ церковь божию; душа его взиде на небеса, а тѣло его честное положено бысть въ притворѣ святыя Софѣя от владычня двора анхимандритом Кириломъ и всѣми игумены и всѣмъ иерѣискымъ чиномъ и посадникомъ Андрѣемъ и всими новгородци. Того же лѣта преставися Домонтъ, князь Плесковьскыи, и много пострадавъ за святую Софѣю и за святую Троицю. По преставлении же Климентовѣ новгородци много гадавше с посадникомъ Андрѣемъ, възлюбиша всь градъ от мала и до велика богомъ назнамена мужа блага и смирена, игумена святого Благовѣщениа, именемь Феоктиста; и созвонивше вѣче у святѣи Софѣи, князь Борисъ Андрѣевич съ всѣми новгородци введоша его с поклономъ, и посадиша въ владычнѣ дворѣ, дондеже увѣдаеть, гдѣ митрополитъ.
В лѣто 6808 [1300]. Прииха митро/л.191об./политъ Максимъ в Новъгород, и епископъ ростовьскыи Семеонъ, епископъ тфѣрьскои Андрѣи, поставиша архиепископа Новуграду Феоктиста; знаменаша его въ церкви святою Бориса и Глѣба митрополит съ епископы и съ преподобными игумены, мѣсяца июля въ 29; того же мѣсяца поставиша его, на память святую апостолу Петра и Павла, въ святои Софѣи, и свершиша праздникъ свѣтелъ; и бысть радость Новуграду о своемь владыцѣ. Того же лѣта, веснѣ, по грѣхомъ нашим погорѣ Новыи торгъ. Тои же осени заложиша церковъ камену святого Михаила на Михаиловѣ улици. Того же лѣта приидоша изъ заморья Свѣя в силѣ велицѣ в Неву, приведоша мастеры изъ своеи земли, изъ великаго Рима от папы мастеръ приведоша нарочитъ, и поставиша город надъ Невою на усть Охты рѣкы, и утвердиша твердостию несказанною, поставиша в немъ порокы, похвалившеся оканнѣи, и нарекоша его Вѣнець земли, бѣ бо с ними намѣстьникь королевъ, именемъ Маскалко; и посадивше в немъ мужи нарочитыя с воеводою Стѣнемъ, и отъидоша; князю великому Андрѣю не бывшю тогда в Новѣградѣ.
В лѣто 6809 [1301]. Прииде /л.192./ князь великыи Андрѣи с полкы нѣзовьскыми, иде с новгородци къ городу тому, и приступиша к нему мѣсяца мая въ 18, на память святого Патрикия, в пятокъ пред Шествиемъ святого духа, и потягнуша крѣпко; силою святыя Софѣя и помощью святую Бориса и Глѣба твердость та бысть ни во чтоже, за высокоумье их; зане всуе трудишася безъ божиа повелѣниа: град взятъ бысть, овых избиша, а иных исѣкоша, а иных, извязавше, поведоша с города, а град запаливше и розгребоша . упокои, господи, душа въ царствии небесномъ тѣх, иже у города главы своя положиша за святую Софѣю; а князю великому Андрѣю умножи, господи, много лѣт съ своими мужи съ суздалци и съ своими мужи с новгородци и с ладожаны.
В лѣто 6810 [1302]. Заложиша город каменъ Новуграду. Того же лѣта заложиша церковъ камену святого Бориса и Глѣба, коя бѣ порушилася. Того же лѣта послаша послове за море в Доньскую землю, привезоша миръ доконцавше. Того же лѣта поиде князь великыи Андрѣи в Татары. Того же лѣта свершиша церковь святого Михаила на Михаиловѣ улици. Святыи Михаиле, помощникъ имъ буди и потягнувшимъ въ церковь сию. /л.192об./
В лѣто 6811 [1303]. На зиму, бысть зима вся тепла, не бысть снѣга чресъ всю зиму, и не добыша люди хлѣба, и бысть дороговь велика, и туга велика и печаль людемъ. Не отчаемся милости твоея; кажа, господи, накажи, а смерти не предаи; аще бо съгрѣшихомъ, нь от тебе не отступихомъ; казнивъ, помилуи, господи, не по нашимъ дѣломъ злымъ, нь по своеи велицѣи милости възри милостью на люди ты бо еси богъ, развѣе тебе иного бога не знаемъ.
В лѣто 6812 [1304]. Преставися князь великыи Андрѣи Олександрович, внукъ великаго Ярослава, мѣсяца июля 27, на память святого мученика Пантелѣимона, постригъся въ скиму, положенъ бысть на Городци; а боярѣ его поихаша въ Тфѣрь. И сопростася два князя о великое княжение: Михаилъ Ярославич Тфѣрьскыи, Юрьи Даниловиць Московъскыи, поидоша въ Орду въ спорѣ, и много бысть замятни Суздальскои земли въ всѣхъ градех. А в Новъгород въслаша тфѣрици намѣстникы Михаиловы силою, и не прияша новгородци, нь идоша в Торъжокъ новгородци блюсти Торжьку, и совокупиша всю землю противу, съсылающися послы, и розъѣхашася разно, доконцавше миръ 25 /л.193./ до приизда князеи.
В лѣто 6813 [1305]. Постави Семеонъ Климович церковь камену на градных воротехъ от Прускои улици. Того же лѣта дѣлаша мостъ новъ чресъ Волхово. Того же лѣта священа бысть церкви святую мученику Бориса и Глѣба в Новѣгородѣ великымъ священиемъ боголюбивым архиепископомъ Феоктистомъ, мѣсяца декабря въ 9 день, на Зачатие святыя Анны, в державу христолюбиваго князя Михаила.
В лѣто 6814 [1306].
В лѣто 6815. [1307] Сѣде князь великыи Михаилъ Ярославиць, внукъ великаго Ярослава Всеволодица, в Новѣгородѣ на столѣ, в недѣлю святых отець 600 и 30, иже в Халкидонѣ ссбора. Того же лѣта, на зиму, архиепископъ новгородчкыи Феоктистъ выиде изо владычня двора, по своеи волѣ своего ради нездравия, благословивъ Новъгород; иде в манастырь святыя богородица Благовѣщению, изволивъ молчалное житье, в немощи будя. Новгородци же всь Новъгород от велика и до мала съ игумены и со всѣмъ иерѣискымъ чиномъ възлюбиша богомь избрана и святою Софѣею отца его духовнаго именемъ Давыда, с поклономъ и съ честью посадиша его въ владычнѣ дворѣ, а Феоктистъ благослови его въ /л.193об./ свое мѣсто, и послаша его
к митрополиту ставится. Того же лѣта постави Якимовая Столбовица церковь камену на княжи дворѣ въ имя святых отець 318, иже в Никии сбора.
В лѣто 6817 [1309]. Поставленъ бысть въ Володимири архиепископъ Новуграду Давыдъ митрополнтомъ Петромъ, мѣсяца июня въ 5 день, на память святого мученика Никандра, и прииде в Новъгород мѣсяца июля въ 20, на Ильин день, и устрѣтоша и у святого Ильи попове и весь Новъград съ кресты и пѣсньми и хвалами, и сотвориша праздникъ свѣтелъ, и посадиша на столѣ; и ради быша новгородци своему владыцѣ.
В лѣто 6818 [1310]. Ходиша новгородци в лодиях и в лоивахъ въ озеро, идоша в рѣку Узъерву и срубиша город новъ на порозѣ, ветхыи сметавше. Того же лѣта постави церковь камену на Коломцах анхимандритъ Кирилъ въ имя святыя богородица Успение; и другую поставиша церковь камену на Дубенкѣ во имя святыя богородица Покровъ, стяжениемъ раба божиа Олониа мнѣха, нарицаемаго Сшкила; и бысть монастырь крестияномъ прибѣжище. Того же лѣта, на зиму, преставися блаженыи архиепископъ новгородчкыи Феоктистъ, мѣсяца де/л.194./кабря въ, на память святых мученикъ 10, иже въ Критѣ, много пострада богови въ болезни, святая душа его возиде на небеса, а лице его просвѣтися яко свѣтъ, яко всѣмъ видящим дивитися и славити бога; и положено бысть тѣло его честное всѣмъ иерѣискымъ чиномъ в манастырѣ святыя богородица Благовѣщениа. Даи же, господи боже, ему небесное царствие, а Новуграду молитву его и благословение. Тои же зимѣ грабиша села около Новаграда.
В лѣто 6819 [1311]. Ходиша новгородци воиною на Нѣмечькую землю за море, на Имъ съ княземъ Дмитриемь Романовицемъ, и переихавше море, взяша первое Купечьскую рѣку, села пожгоша, и головы поимаша, и скотъ исъсѣкоша; и ту убиенъ бысть Костянтинъ, Ильинъ сынъ Станимирович, в загонѣ. Потомъ взяша Черную рѣку такоже всю, по Чернои приидоша къ городу Ванаю, городъ взяша и пожьгоша; а Немци вбѣгоша в Дѣтиниць: бяше бо мѣсто то велми твердо, понеже бо на высоцѣ каменѣ, не имѣя Вперёд откудуже; и съслаша с поклономъ, просяще мира; новгородци же мира не даша. И стояща 3 дни и 3 нощи, волость труще, села великая пожгоша, обилье все /л.194об./ потратиша, а скота не оставиша ни рога; и потомъ идуще, взяша Кавгалу рѣку, Перну рѣку, и выидоша на море, и приидоша здрави в Новъгород, и радъ бысть владыка и Новъград весь. Тои же веснѣ, мѣсяца мая въ 19, в нощь, загорѣся на Яневѣ улици, съгорѣ дворовъ 3, а головъ 7. И потомъ июня въ 28. в нощь загорѣся на Розважи улици Глѣбовъ дворъ, и погорѣ конець Неревьскыи, сѣмо до греблѣ, а сѣмо и за Боркову улицю; и сгорѣ церковъ святыи Козма и Дамианъ, и другая святого Савы, и четырьдесят церковъ огорѣ, и домове добрыи. О горе, бяше лют пожаръ, с вѣтромъ и с вихромъ, а злѣи человѣци недобрии, бога не боящеся, видяще людемъ погибель, падоша на грабежи, пограбиша чюжая имѣниа. И потомъ июля въ 16, в нощь загорѣся на ономъ полу, на Ильинѣ улици, и ту такоже бысть лютъ пожаръ, вихромъ на борзѣ, трѣскомъ; и погорѣ торгъ всь, и домове по Рогатицю, а сѣмо въ Славно, а церквии сгорѣ древяных 7: святого Дмитриа, святого Георгиа, и святыи Борисъ Глѣбъ, и святого Иоанна Ишкова, и святыя Катерины, и святого Прокопия, и святая Христова; и каменых 6 огорѣша, седмая Варяская. /л.195./ А оканнии человѣци, такоже бога не помняще, ни суда божиа, ни жалобы имѣюще, пограбиша чюжая имѣниа. Того же лѣта боголюбивыи архиепископъ новгородчкыи Давыдъ постави церковь камену на воротех от Неревьскаго конца во имя святого благовѣрнаго князя Владимира, крестивъшаго Рускую землю, а въ крещении Василии.