Сайт посвященный церковной истории
Святая София и
Великий Новгород
История и
современность
История и современность
Кликни на квадрат справа, чтобы открыть вкладки сайта
Перепечатка в интернете разрешена при условии наличия активной ссылки на сайт " Святая София и Великий Новгород: История и современность".
НОВГОРОДСКАЯ ПЕРВАЯ ЛЕТОПИСЬ МЛАДШЕГО ИЗВОДА
(Комиссионный, Академический, Толстовский списки)
В лѣто 6713 [1205]. Мѣсяць освѣти въ 8 ночеи. Того же лѣта присла великыи князь Всеволод в Новъгород, а рка тако: «в земли вашеи рать ходить, а князь вашь сынъ мои Святославъ малъ; и даю вамъ, сына своего старѣишаго Костянтина». Тогда же отъяша посадничьство у Михалка и даша Дмитру Мирошкиницю. В то же лѣто прииде князь Костянтинъ Всеволодиць, внукъ Юргевъ, в Новъгород, мѣсяца марта въ 20, на память преподобных отець наших, иже в манастырѣ святого Савы избиеных от Срачинъ; и радъ бысть весь великыи Новъград своему хотѣнию. В то же лѣто преставися княгиня Всеволожая.
В лѣто 6714 [1206]. Преставися посадник новгородчкыи Михалко, маа въ 18, приимши мнишьскыи чинъ, и наркоша имя Митрофанъ, и положенъ бысть у святѣи Богородици въ Оркажи манастыри. В то же лѣто постави Твердиславъ церковь на воротех въ Оркажи манастыри Михалковиць, святого Симеона столпъника, иже на Дивнѣи горѣ.
В лѣто 6715 [1207]. Поставиша церковь святого Лукы на Лубянои улицѣ, перенесъше съ Колѣна, Володаревица и Носовици. Того же лѣта све/л.131./ршиша церковь святыя Пятница заморьскыи купцѣ, августа 30. В то же лѣто свершиша церковь святого Пянтелѣимона Федоръ Пинещиниць, в манастырѣ. В то же лѣто прѣставися рабъ божии Перфурии, а мирьское Прокша Малышевиць, постригъся у святаго Спаса на Хутинѣ, при игуменѣ Варламѣ; а покои господи душю его въ царствии небеснѣмъ.
В лѣто 6716 [1208]. Прииде Лазарь, Всеволожь мужь, из Володимиря, и Борисъ Мирошкиниць повелѣ убити Олексу Сбыслалича на Ярославли дворѣ, и убиша без вины, в субботу, марта въ 17, на память преподобнаго Алексиа человѣка божиа; а заутра плака святая богородица у святого Якова в Неревьскомъ конци.
В лѣто 6717 [1209]. Идоша новгородци на Черниговъ съ княземъ Костянтиномъ, позвани Всеволодом; и приидоша на рѣку на Оку, и ту скопишася вси вои, а князи рязаньстѣи сташа об ону Вперёд Окѣ. в помощь Всеволоду. И позва е Всеволод на обѣд, и сѣдоша 6 князь в шатрѣ, а Глѣбъ и Олегъ у Всеволода в шатрѣ, а В новгородци. И ту обадиста Володимирица братью свою: «не ими, княже, вѣры братьи наю, свѣцялися суть с черниговьскыми князи», и тѣмь е облици рязаньстии князи. И Всеволод изимавъ мужи их, и исковавъ, посла е в Во/л.131об./лодимирь, а самъ поиде с новгородци и с клеветникы, поиде на Рязаньскую волость; и прииде къ Проньску и рече: «предаите ми ся». Они же сташа съ княземь Изяславомъ съ третьимъ Володимирицемъ; киръ Михаилъ побѣже передѣ ис Проньска. И отъя у них воду, и они передашася; и я княгиню киръ- Михаиловую и товара поима бещисла, а съ Изяславомъ миръ взя, и отъидоша вси здрави. А новгородцовъ пусти с Коломна к Новугороду, одаривъши бешисла, и вда имъ волю всю и уставы старых князеи, егоже хотѣху новгородци, и рече имъ: «кто вы добръ, того любите, злых казните», а съ собою поя сына своего Костянтина и посадника Дмитра, стрѣлена под Проньскомъ, а вятших 7 муж. Новгородци же, пришедшек Новугороду, створиша вѣче на посадника Дмитра и на братью его, яко тѣ повелѣша на новгородцѣх серебро иматѣ, а по волости куры брати, по купцемъ вѣру дикую, и повозы возити, и иное все зло; и поидоша на дворы их грабежомъ, а Мирошинъ дворъ Дмитровъ зажгоша, а житье их поимаша, а села ихь распродаша и челядь, а скровища ихъ изискаша и поимаша бещисла, а избытокъ роздѣлишапо зубу, по 3 гривнѣ по всему граду, и на щитъ; /л.132./ а что кто похватилъ, а того единь богъ вѣсть, и от того мнозѣ разбогатѣша; а что на досках, а то князю оставиша. Того же лѣта привезоша Дмитра мертваго Мирошкиница из Володимиря и погребоша и у святого Георгиа в манастырѣ, подлѣ отца; а новгородци хотяху с моста свереци, нъ възбрани имъ архиепископъ Митрофанъ. Присла Всеволодъ сына своего Святослава в Новъгород, в недѣлю мясопустную. Тогда даша посадничьство Твердиславу Михалковичю, и даша доскы Дмитровы князю Святославу, а бѣ на них писано бещисла; и цѣловаша новгородци честныи крестъ, яко «не хощемъ у себе держати дѣтии Дмитровых, ни Володислава, ни Бориса, [ни Твердислава] Станиловица, ни Овъстрата Домажировица»; и потоцѣ я князь къ отцу, а на иных серебро поимаша бещисла.
В лѣто 6718 [1210]. Новгородци угонивше Литву в Ходыницѣх, избиша съ княземъ Володимиром и с посадникомъ Твердиславомъ. Того же лѣта ходи Всеволод на Рязань и рече имъ: «поидите ко мнѣ съ сыномъ моимъ Ярославомъ за Оку на рядъ»; и переидоша к нему, и ту я изъима, и посла полкы и изыма жены и дѣти, а град их зажьже; и тако расточи их по градомъ. На ту же зиму прииде /л.132об./ князь Мьстиславъ Мьстиславиць на Торжокъ и поимаше дворянѣ Святославли, и посадника окова, а товаръ их кого рука доидет; а в Новъгород присла: «кланяюся святѣи Софѣи и гробу отца моего и всѣмъ новгородцемъ; пришелъ есмь к вамъ, слышавъ насилие от князь, и жаль ми своея отцины». То слышавше, новгородци послаша по него с великою честью: «поиди, княже, на столъ»; а Святослава посадиша въ владычни дворѣ и с мужи его, дондеже будет управленье съ отцомъ. И прииде Мьстиславъ в Новъгород, и посадиша и на столѣ отнѣ, и ради быша новгородци. И поиде Мьстиславъ съ всѣмъ полкомъ на Всеволода; и быша на Плътескѣ; и присла къ нему Всеволод: «ты ми еси сынъ, а язъ тобѣ отець; пусти Святослава с мужи, и все то, еже задѣлъ, исправи; а язъ гость пущу и товаръ». И пусти Мьстиславъ Святослава и мужи его, а Всеволод пусти гость с товары; крестъ цѣловаста и миръ взяста; и прииде Мьстиславъ в Новъгород.
В лѣто 6719 [1211]. Прииде Дмитръ Якуниць из Русѣ, и съступися Твердиславъ с посадничьства по своеи воли старѣишю себе: тогда же даша посадничьство Дмитру Якуницю. И посла князь Мьстиславь /л.133./ Дмитра посадника на Лукы с новгородци город ставити, а самъ иде на Торжокъ блюсти волости, и ис Торжьку иде в Торопець и с Торопця прииде на Лукы, и снятся с новгородци; а лучаномъ дасть князя Володимира Плесковьскаго. Того же лѣта, волею божьею, свершиша церковь камену Вячеславъ Прокшиниць, внукъ Малышевъ, святых 40 мученикь; а даи ему богъ въ здравие и въ спасение, въ отпущение грѣховъ и молитвами святых 40 мученикъ. Того же лѣта безь князя и безъ новгородцовъ в Новѣгородѣ бысть пожаръ великъ; загорѣся на Рядятинѣ улици и сгорѣ дворовъ 4000 и 300, а церквии 13. Того же лѣта, на зиму, мѣсяца генваря въ 22, на память святого отца Климента и святого Тимофѣя и преподобномученика Анастасиа Персянина, и злодѣи исперва не хотя добра, зависть вложи людемъ на архиепископа Митрофана съ княземь Мьстиславомъ, и не даша ему правитися и ведоша и в Торопець; онъ же то прия с радостию, яко Иоан Златоустыи и Григории Акраганьскыи, тую же въсприятъ скорбь и печаль, славя и благодаря бога. Тогда же бяше пришелъ, прежде изгнаниа Митрофаня архиепископа, Добрыня Ядрѣиковиць изъ Цесаряграда и привезе съ собою гробъ господень, а самъ пострижеся на Хутинѣ у святого Спаса; /л.133об./ и волею божиею възлюби и князь Мьстиславъ и вси новгородци, и послаша и в Русь ставится; и прииде поставленъ архиепископъ Антонии и створи полату Митрофаню церковь въ имя святого Антониа.
В лѣто 6720 [1212]. Ходи Мьстиславъ на Чюдь, рекомую Торму, с новгородци, и много полониша, а скота бещисла приведе. Потом же, на зиму, иде князь Мьстиславъ с новгородци на чюдьскыи город, рекомыи Медвѣжию голову, села их потрати; и приидоша под город, и поклонишася Чюдь князю, и дань на них взя; и приидоша вси здрави.
В лѣто 6721 [1213]. В Петрово говѣние изъихаша Литва безбожная Пьсковъ и пожгоша;плесковици же бяху в то время изгналѣ князя Володимера от себе, а плесковици бяху на озерѣ; и много створиша зла и отъидоша.
В лѣто 6722 [1214]. Мѣсяца февраля въ 1 день, в недѣлю сыропустную, громъ бысть по заутрении, и вси слышаша; и потом тогда же змии видѣша летящь. Того же дни иде князь Мьстиславъ с новгородци на Чюдь на Ереву, сквозѣ землю Чудьскую к морю, села их потрати и осѣкы ихъ возмя; и ста с новгородци под городомъ Воробииномъ, и Чюдь поклонишася ему; и Мьстиславъ же /л.134./ князь взя на них дань, и да новгородцемъ двѣ чясти дани, а третьюю часть дворяномъ; бяше же ту и Плесковьскыи князь Всеволод Борисовиць со плесковици, и Торопечьскыи князь Давыдъ, Володимирь брат; и приидоша вси здрави со множествомъ полона. В то же лѣто изъгони Всеволод Чермныи, сынъ Святослаль, правнукъ Олговъ, внукы Ростиславлѣ из Руси, тако рекъ: «братью мою есте два князя повѣсилѣ вы в Галицѣ, яко злодѣя, и положилѣ есте укоръ на всѣх; и нѣту вамъ части в Рускои земли». Того же лѣта прислаша внуци Ростиславици в Новъгород къ Мьстиславу Мьстислаличю: «се не творит намъ Всеволод Святославич части в Рускои земли; и сице, поищемь своеи отцыны». Мьстиславъ же созвони вѣче на Ярославлѣ дворѣ и поча звати новгородци къ Кыеву на Всеволода на Чермьнаго. Ркоша ему новгородци: «камо, княже, очима зриши, тамо и мы главами своими вержемъ». И поиде князь Мьстиславъ с новгородци къ Кыеву, мѣсяца июня въ 8, на память святого и великомученика Федора Стратилата; и доидоша Смолнеска, и бысть распря новгородцомъ [съ] смолняны, а по князи не поидоша. Князь же, цѣловавъ всѣх, поиде, поклонивъся; новго/л.134об./родци же, створивше вѣче о себѣ, и почаша гадати. И рече Твердиславъ посадникъ: «братье новгородци, якоже преже сего страдалѣ дѣдѣ наши и отци а Рускую землю, тако, братье, и мы поидемь по своемъ князи». Новгородцомъ же люба бысть рѣчь си, абие поидоша и Смоленьска, и постигше князя, идоша воевати по Днепру городы черниговьскыя и взяша Рѣчици на щит и инѣи городы мнози черъниговьскыя. И приидоша под Вышегород и начаша битися, и одолѣ Мьстиславъ с новгородци, и яша два князя: Ростислава Ярославица и Ярополка, брата его, внука Олгова, а вышегородци поклонишася и врата отвориша; а Всеволод выбѣжа ис Кыева за Днѣпрь; и воиде Мьстиславъ с братьею и с новгородци в Киевъ, и поклонишася кияне, и посадиша в Киевѣ Мьстислава Романовича, внукъ Ростиславль. Идоша ис Кыева къ Чернигову, и стоявше 12 днии, и взяша миръ, и въземше дары, приидоша в Новъгород въси здрави.
В лѣто 6723 [1215]. Поиде князь Мьстиславъ по своеи воли Кыеву, и створи вѣце на Ярославли дворѣ и рече новгородцемъ: «суть ми орудиа в Русѣ, а вы волнѣ во князех». Того же лѣта новгородци, много гадавше, по/л.135./слаша по Ярослава по Всеволодица, по Юрьевъ внукъ, Юрья Иванковица посадника и Якона тысячкого и купець старѣиших 10 муж; и въиде князь Ярославъ в Новъгород, и усрѣте и архиепископъ Антонъ съ новгородци. Того же лѣта князь Ярославъ [ят] Якуна Зуболомича, а по Фому посла по Доброщинича, по новоторьскыи посадникъ, и оба поточи на Тфѣрь; и по грѣхомъ нашим обади Федоръ Лазутиничь, Иворъ новоторжець Якуна тысячкого 58 Намнѣжица. Князь же Ярославъ створи вѣче на Ярославлѣ дворѣ и идоша на дворъ Якунъ, и розграбиша я, и жену его яша; а Якунъ заутра иде с посадникомъ ко князю, и князь повелѣ яти сына его Христофора, мая въ 21, на память святого цесаря Костянтина и матери его Елены. Тогда же убиша прусѣ Острата на зборъ и сына его Луготу, и ввергоша и въ греблю мертва; князь же о томъ пожалѣ на новгородци. Того же лѣта поиде князь Ярославъ на Торжокъ понявши съ собою Твердислава Михаиловича, Микифора, Полюда, Сбыслава, Семеона, Олексу, и много боляръ, и одаривъ, присла въ Новъгород; а самъ сѣде на Торжьку. Тои же осени много ся зла сътвори: поби мразъ обилье все по волости, а на Торжку все цѣло бысть. И зая князь вершь /л.135об./ на Торжьку, не пусти в город ни воза; и послаша по князя Смена Борисовича, Вячеслава Климовича, Якуна Зубца, и тѣх прия, и кого послаше и князь прия. А в Новѣгородѣ зло бысть велми: купляхуть кадь ржи по 10 гривенъ, а овса по три гривнѣ. а рѣпѣ возъ по 2 гривнѣ; ядяху люди соснову кору и листъ липовъ и инии мох. О, горе тогда, братье, бяше, дѣти свои даяху одерень; и поставиша скуделничю и наметаша полну. О, горе бяше, по торгу трупье, по улицам трупье, и не можаху псы изъядати человѣкъ, нь и по полю лежаху; а Вожанѣ помроша, а останкъ разидеся; и тако, по грѣхомъ нашимъ, разидеся власть наша и град нашь. Новгородци же, останокъ живых, послаша Юрья 48 Иванковича, посадника новгородчкого, Степана Твердиславича, и иных муж по князя, тако же и тых прият; а в Новъгород приславъ Ивора Чапоноса, выведе княгыню свою къ себѣ, дщерь Мьстиславлю; и потомъ послаша Мануилу Ягълочевица с послѣднею рѣчью: «поиди въ свою отцину къ святѣи Софѣи; или не идешь, а насъ повержешь». Ярославъ же и тѣх не пусти, а гость новгородчкыи всь прия; и бысть в Новѣгородѣ печаль и вопль. Тогда же учювъ Мьстиславъ Мьстиславич великое то зло /л.136./ прииде в Новъгород мѣсяца февраля въ 11 день, на память святого отца нашего Мелентѣя архиепископа Мелетиискаго, и изыма Хота Григорьевича, намѣстьника Ярославля, и вси дворянѣ искова; н пакы пришедши на Ярославль дворъ, и цѣлова честныи крестъ, а новгородци к нему, яко с нимъ в живот и въ смерть: «или възыщут мужи новгородстѣи волости, пакы ли главу свою положю за Новъгород». Ярославу же князю вѣсть прииде на Торжокъ, изгониша твердь, а пути от Новагорода засѣкоша и рѣку Тфѣрцю; а в Новъгород посла 100 мужь новгородцовъ Мьстислава провадити из Новагорода; и не яшася по то, нь вси быша единодушьно, и 100 то муж. И посла князь Мьстиславъ с новгородци къ Ярославу в Торжокъ попа Юрья святого Иоаиа на Торговищи, и свои мужь пусти: «сыну, кланяю ти ся; мужи мои и гость пусти, а самъ с Торжьку поиди, а со мною любовь возми». Князь же Ярославъ того не учини и не улюби, пусти попъ без мира; а новогородци съзва на поле за Рожество, в мясопустную суботу, вси мужи и гостебницѣ, и изыма вся, и искова и посла их по своимъ городомъ, а товаръ их раздая и конѣ; а всѣх новгородцовъ бѣаше болши 2000. И прииде вѣсть в Новъгород; бяше бо новгородцовъ /л.136об./ мало: а меншии они разидошася, а иное помре гладом. Князь же Мьстисла.въ створи вѣце на Ярославлѣ дворѣ и рече: «поидемь, поищемъ мужии своих. а вашеи братьи, и волости своеи; да не будет Новыи Торгъ над Новымгородомъ, ни Новъгород под Торжькомъ; нь гдѣ святая Софѣя, и ту и Новъгород; а въ мнозѣ богъ, и в малѣ богъ и правда».
В лѣто 6724 [1216]. Мѣсяца марта въ 1 день, на память святыя Марьи Египтянынѣ, вторник по чистои недѣли, поиде князь Мьстиславъ на зять свои, на Ярослава с новгородци, а в четверток побѣгоша къ Ярославу преступници кресту: цѣловали бяху крестъ честныи ко Мьстиславу со всими новгородци, всѣмъ одинако быти, Володиславъ Завидовиць, Гаврила Игоревиць, Юрьи Олексѣниць, Гаврилиць Милятиниць, и с женами и с дѣтми. Мьстиславъ же поиде Серегиромъ, и вниде въ свою волость, и рече новгородцомъ: «идете в зажитья, толко головъ не емлите». И идоша, исполнишася кормомъ, сами и конѣ, и быша верху Волзѣ; осѣлъ Святославъ Ржеву, городець Мьстислаль, с полкы въ 10 тысящь. Мьстиславъ же с Володимиром со Плесковьскымъ поиде в борзѣхъ въ 5 сот: толко бо всѣх вои бяшеть; и пригони до них, ани побѣгли бяхут прочь. /л.137./ А Ярунъ бяше затворилъся вгородѣ въ стѣ муж и отбися их. И поиде Мьстиславъ, взя Зубчовъ, и быша на Возузѣ; и прииде Володимиръ Рюриковиць съ смолняны, и идоша по Волзѣ, воююще; и ркоша ему: «княже, поиди къ Торжьку». Рече же Мьстиславъ и Володимиръ Плесковьскыи: «пондемъ къ Переяславлю; есть у нас третии другъ». И не бѣ вѣсти, гдѣ Ярославъ, в Торжьку ли, или во Тфѣри. И наихаша на Яруна сторожи за Тфѣрью Ярославли; и пособѣ богъ Яруну, и многы побѣгоша, а иных изымаша, а инии убѣжаша во Тфѣрь. И бѣ вѣсть на тѣх у Ярослава; и поидоша по Волзѣ, воююще; и пожгоша Шешю, и Дубну, и Костянтинъ и все Поволожье. И усрѣте и Еремѣи от князя Костянтина с любовью и с поклономъ; и поидоша къ Переяславлю, воююще. И быша на Городищи на рѣцѣ Саррѣ, у святѣи Маринѣ, в великую суботу, мѣсяца априля въ 9; и прииде князь Костянтинъ с ростовци, и крестъ цѣловаша. Ярослав же поиде с Торжьку, поимавши старѣишии мужи со собою новгородстѣи, и молодых изьборомъ, а новоторжьци вси; и прииде Переяславлю и скопи волость свою всю, а Юрьи свою, в Володимирѣ такоже, /л.137об./ а Святославъ такоже. И выиде ис Переяславля с полкы, с новгородци и с новоторжьци. Оле страшно чюдо и дивно, братье; поидоша сынове на отци, а отци на сыны, брат на брата, рабъ на господина, господинъ на рабъ. И ста Ярославъ и Юрьи с братьею на рѣцѣ Хзѣ; Мьстиславъ же и Костянтинъ и два Володимира с новгородци Вперёдѣцѣ Липицѣ; и узрѣша полкы стояща, и послаша Лариона съчкаго къ Юрью: «кланяемь ти ся; нѣту намъ с тобою обиды, съ Ярославомъ намъ обида; пусти мужи мои новгородци и новоторжьци; и, что еси зашелъ волости новгородчкои Волокъ, въспяти; а миръ возми с нами, а крестъ к намъ цѣлуи; а крови не проливаимя». Отвѣцаше: «мира не хощемъ, а мужи у мене; а далече есте шли, и вышли есте акы рыба на сухо». И сказа Лариянъ ту рець Мьстиславу и новгородцемъ; и ркоша новгородци: «княже, не хощемъ изъмрети на конех, нь, якоже отци наши билися на Колачькеи, пѣши». Мьстиславъ же князь радъ бысть тому; новгородци же съсѣдавше с конѣи, и порты сметаша съ себе, еще же и сапозѣ с ногъ сметавъ, и поскочиша босѣ, пѣшь, якоже еленѣ; а Мьстиславъ князь поиде за ними на конех; и съступися полкъ новгородчкыи съ Ярославлимъ /л.138./ полком. И тако, божьею помощью и святыя Софѣя одолѣ Мьстиславъ, и полкъ его; Юрьи же стоя Костянтину, и узрѣ Ярославль полкъ побѣгше Юрьи, Ярославъ вдавъ плече,
и тои вда плече, мѣсяца априля въ 21, на память святого Тимофѣя и Федора и Александры цесариця. О, многы побѣды, братье, бещисленое число, яко не может умъ человѣчь домыслити избиеных и повязаных; а князю же Ярославу вбѣгшю в Переяславль, и повелѣ пакы новгородцовъ в погребъ метати, что ни есть, а иных въ гридничю, и ту ся издъхоша въ множествѣ. Мьстиславъ же и Костянтинъ и два Володимера с полкы поидоша по Юрьи к Володимирю; и пришедше, сташа под городомъ, и тои нощи загорѣся город, княжь дворъ; и хотѣша новгородци полѣсти къ городу, и не да имъ Мьстиславъ. И бысть заутра, высла князь Юрьи с поклономъ ко княземь: «не дѣите мене днесь, а заутра поиду из города». И иде Юрьи изъ Володимиря въ Радиловъ городець; и посадиша новгородци Костянтина въ Володимери на столѣ отнѣ. Костянтин же князь одарѣ честью великою князеи и новгородець бещисла. Мьстислав же поиде съ новгородци къ Переяславлю; и не идя /л.138об./ къ городу, поима дары; пославъ, поня дщерь свою, жену Ярославлю, и что живых новгородець, и что было съ Ярославом в полку; и приидоша в Новъгород вси здрави. О, великъ, братье, промыслъ божии, на томъ побоищи Юрьевых и Ярославлих вои паде бещисла, а новгородцовъ убиша на съступѣ: Дмитра Плесковитина, Онтона котелника, Иоанка Прѣбышиница опоньника; а в загонѣ: Иванка поповица, тѣрьскаго даньника. Прииде Мьстиславъ в Новъгород, и радъ бысть владыка и вси новгородци. Тогда отъяша посадничьство у Юрья Иванковича и даша Твердиславу Михалковичю.
В лѣто 6725 [1217]. Поиде Мьстиславъ кь Киеву, оставивъ княгиню в Новѣгородѣ и сына своего Василья; и поя съ собою Юрья Иванковица, Сбыслава Степаница, Олексу Путиловица. Тогда же прииде Володимиръ в Новъгород своими орудьи. И воеваша Литва в Шелонѣ; новгородци же поидоша по них и не състигоша их. И поидоша к Медвижьи головѣ съ княземъ Володимеромъ и с посадникомъ Твердиславом, и сташа под городомъ. Чюдь же начаша слати с поклономъ лестию, а по Нѣмцѣ пославша; и начаша новгородци гадати съ плесковици на чюдьскои /л.139./ рѣцѣ, отшедше далече на товаръ, а сторожи нощьнѣи пришли бяху, а деньныи не пошли; и наидоша на товары безъ вѣсти, новгородци же побѣгоша с вѣча в товары, и поимавше оружие и выбиша е ис товаръ; и побѣгоша Нѣмцѣ къ городу, и убиша новгородци два воеводѣ, а третии руками изимаша, а коиевъ отъяша 700, и приидоша вси здрави. Князь жь Мьстиславъ прииде в Новъгород безъ них; и изыма Станимира Дерновича съ сыномъ Нездылою и, оковавъ, поточи, и товара поима бещисла, и опять пусти и. Тои же веснѣ загорѣся мѣсяца маия въ 31, на память святого апостола Еремѣя, от Иоанна Ярышевица в серед утра, печне погорѣ до удениа всь полъ, не остася ни хорома; а хто бяше вбѣглъ в каменыя церкви с товары, и ту изгорѣша сами и товаръ; а в Варяжьскои божницѣ изгорѣ товаръ всь варяжьскои бещисла; а церквии сгорѣ 15, а у каменых церквии огорѣша верхы и у притворъ.
В лѣто 6726 [1218]. Поиде князь Мьстиславъ на Торжокъ и [поима] боярѣ Борислава Некуришиница, и поимавъ товара много, и пусти и. Тогда же разболѣся княжиць Василии Мьстиславиць на Торжьку, и привезоша и мертвого в Новъгород; /л.139об./ и положиша его въ святѣи Софѣи, въ предѣлѣ святыя богородица, въ головах у дѣда его, мѣсяца априля въ 1 день; а самъ выихавъ въ 5 день. Того же лѣта заложи архиепископъ Антонии церковъ камену святыя Варвары в манастырѣ. Съзвони Мьстиславъ князь вѣче на Ярославлѣ дворѣ, сице рече к нимъ. «кланяюся святѣи Софѣи и гробу отца моего и вамъ; хощю поискатѣ Галица, а вас не забуду; даи богъ лецѣ у святѣи Софѣи и у гроба отца своего кость своя положити». Новгородци же много молящеся ему: «не ходи, княже, нас не мецѣ»; и не можаху его уняти; и поклонивъся, поиде. Того же лѣта прииде из Володимеря архиепископъ Митрофанъ новгородчкыи в Новъгород, и провадиша и новгородци къ святѣи богородици къ Благовѣщению. Поиде Мьстиславъ в Русъ; новгородци же послашася Смоленьску по Святослава. И бысть на зиму, побѣжа Матеи Душиловиць, связавъ Моисѣица бирица ябетниць; новгородци же, угонивше, яша и, и ведоша его на Городище; вниде лжа по городу, ркуще сице: «выдалъ Твердиславъ Матѣя къ князю»; и съзвониша вѣче у святого Николы они половицѣ и чресъ нощь, а Неревьскыи конець у святых 40-тъ, такоже копяще люди на Тве/л.140./рдислава. И бысть заутра, пусти князь Матѣя, а слышавши голку и мятежь в городѣ. И поидоша они половицѣ и до дѣтинѣ въ бронях, въ шоломех, акы на рать, и неревлянѣ такоже; а загородци не въсташа ни по сих, ни по онихъ, нь зряху перезора. Твердислав же, позря на святую Софѣю, и рече: «даже буду виноватъ, да буду ту мертвъ; буду ли правъ, а ты мя оправи, господи»; и поиде съ прусы и с Людинымъ концемъ. И бысть сѣча у городнѣх врат, и побѣгоша на онъ полъ, а друзии в ту нощь мостъ переметаша, и преидоша они половици в лодиахъ, и поидоша силою великою. О, братие, сие чюдо свади оканныи диаволъ; когда бяше брани быти на поганыя, и тогда пакы начаша битися междю собою; и убиша прусъ муж единъ, а концанъ другыи, а онѣхъ половиць Иоанна Душильцева, брата Матѣева, а в Неревъскомъ конци Костянтина Прокшиница, а иных 6 муж, а раненых много обоих. Бысть же се мѣсяца генваря въ 27, на память святого Иоанна Златоустаго, и тако быша вѣця по всю недилю. Нь диаволъ попранъ бысть богомъ и святою Софѣею, а крестъ господень возвеличанъ бысть; и сънидошася братья обои вкупѣ одинодушьно, и крестъ цѣловаша. /л.140об./ Князь же присла свои тысячкыи на вѣце, рекши тако: «не могу быти с Твердиславомъ, отъимаю посадничьство у него». Новгородци же ркоша: «есть ли вина его». Он же рече: «без вины». Рече же Твердиславъ: «тому есмь радъ, яко вины моея нѣту; а вы, братье, в посадничьствѣ и во князех вольнѣ есте». Новгородцѣ же отвѣтъ даша князю: «аще вины его нѣту, и ты к намъ крестъ цѣловалъ без вины мужа не лишити; тобѣ ся кланяемъ, а се есть нашь посадникъ, и в то ся не вдадимъ»; и отселѣ бысть мирно.
В лѣто 6727 [1219]. Присла великыи князь Мьстиславъ Романович ис Кыева сынъ свои Всеволод, сице глаголя: «приимѣте себѣ князя Всеволода, а Святослава старѣишаго пустите ко мнѣ». Новгородци же пакы створиша волю его. И поиде тои зимѣ Семьюнъ ѣминь въ 4 стѣх на Тоимокары, и не пусти их Юрьи, ни Ярославъ сквозѣ свою землю; и приидоша к Новугороду в лодияхъ, и ста по полю шатры на зло; и замыслиша Твердиславъ. Якунъ тысячкыи, заслаша къ Юрью, не пустити их туда, и возвадиша город. Тогда же отъяша посадничьство у Твердислава и даша Смену Борисовицю, а тысячкое у Якуна /л.141./ отъяша и даша Семьюну ѣмьину. Тогда А же А концаша церковь святыя Варвары каменую. Того же лѣта заложиста Твердиславъ с Федоромъ церковь камену святого Михаила, а другую святых 3 отрокъ посторонь церковьцю малу, сверши ю въ 4 дни. Поиде князь Мьстиславъ и Володимиръ ис Кыева къ Галицю на королевиць, и выидоша галицане- противу, и Чехове и Ляхове и Морава и Угре, и съступишася 6 полкове; и пособи богъ Мьстиславу, и в город Галиць воиде, а королевица руками изима и жену его, и взя миръ с королемь, а сына его пусти, а самъ сѣде въ Галицѣ, а Володимирь Рюриковиць в Киевѣ. Того же лѣта иде князь Всеволод с новгородци к Пертуеву, и усрѣтоша сторожевъ Нѣмци, Литва, Либь, и бишася; и пособи богъ новгородцомъ, и идоша под город и стояша 2 недѣли, не взяша города; и приидоша здрави вси. Того же лѣта иде Антонии архиепископъ новгородчкыи на Торжокъ; новгородци же введоша архи епископа Митрофана въ дворъ опять на столъ, а ко Онтонию послаша «поиди, гдѣ ти любо». Антонии же поиде в Новъгород къ святому Спасу в Нередицех. Князь и новгородци ркоша Митрофану и Онтону: «идита к митрополиту, /л.141об./ да коего намъ послеть, то намъ владыка»; и пустиша с ними Васьяна священноинока, а другаго священника Бориса. И пакы по сих приидоша от Пертуя, вдаша посадничьство Твердиславу, Якуну тысячкое.