Сайт посвященный церковной истории

Святая София и

 Великий Новгород

История и

современность

История и современность
Яндекс.Метрика

Кликни на квадрат справа, чтобы открыть вкладки  сайта

Перепечатка в интернете разрешена при условии наличия активной ссылки на сайт " Святая София и Великий Новгород: История и современность".

НОВГОРОДСКАЯ ПЕРВАЯ ЛЕТОПИСЬ МЛАДШЕГО ИЗВОДА
(Комиссионный, Академический, Толстовский списки)

В лѣто 6712 [1204]. Царствующу Олексѣ въ Цесариградѣ, въ царствѣ Исаковѣ, брата своего, и абие слѣпивши его, а самъ цесаремъ ста, а сына Олексу затвори въ стѣнах высокых и стража пристави, и сице заповѣдавши, яко никтоже не внидет зде. И временемь мивувшимъ, дръзну Исакъ молитися о сыну своемь, дабы его испустилъ ис тверди пред ся; и умоли брата Исакъ, и прияста извѣщение съ сыномъ, яко не помыслити на царство, и спущенъ бысть ис тверди и хожашеть по своеи воли. Цесарь же Олекса не печаляше о немь, вѣря брату своему Исакови и сынови его, зане прияста извѣшение. И потомъ помысливъ Исакъ и въсхотѣ царства и учашеть сына, посылая потаи: «язъ добро створих брату моему Олексѣ, от поганых выкупих его, а онъ противу зло ми въздасть, слѣпивъ мя, царство мое взя». И восхотѣ сынъ его, якоже учашеть его, и мысляшеть, како ему изити из града в далняя страны и оттолѣ искати царства. И введенъ бысть в корабль и всаженъ бысть в бочку, имущи 3 дна при единемъ /л.126об./ конци, за ним же Исаковиць сѣдяше, а въ другомъ конци вода, идеже гвоздъ: нѣлзѣ бо бяшеть инако изити изъ града; и тако изиде изъ Грѣчькои земли. И увѣдавъ цесарь, и посла искатъ его въ мнозѣхъ мѣстехъ, и внидоша в тои корабль, идеже бяше, и вся мѣста обыскаша а из бочокъ гвозды выняша и видиша воду текущу и идоша прочь, не обрѣтше его.И тако изиде Исаковиць и прииде къ нѣмечкому цесарю Филипови, къ зятю и къ сестрѣ своеи. Цесарь нѣмечькыи посла, к папѣ в Римъ, и тако увѣчаста, яко не воевати на Цесарьград, нь яко же рече Исакович: «всь град Костянтинъ хотять моего царства». Такоже посадивъ его на престолѣ, поидѣте же къ Иерусалиму в помоць; не восхотят ли его, а ведете опять ко мнѣ, а пакости не дѣите Грѣчьскои землѣ. Фрязи же и вси воеводы их възлюбиша злато и сребро, иже мняшь имъ Исакович, а цесарева велѣниа забыша и папина: первое пришедше въ Суд, замкы желѣзныя разбиша, и приступивше къ граду, огнь въвергоша въ 4 мѣста въ храмы. Тогда цесарь Олекса, узрѣвъ пламень, не створи брани противу имъ. Призвавъ брата Исака, егоже слѣпи, посади его на престолѣ, /л.127./ и рече: «даже еси, брат, тако створилъ, прости мене, а се твое царство», а самъ бѣжа изъ града. И пожьженъ бысть град и церкви несказанны лѣпотою, им же не можемъ числа исповѣдати; и святѣи Софѣи притворъ погорѣ, идеже патриарси всѣ написанѣ, и подрумие и до моря; а сѣмо по Цесаревъ затворъ и до Суда погорѣ. И тогда погна Исаковиць по цесарѣ Олексѣ съ Фрягы, и не постыже его и възвратися въ град, и съгна отца съ престола, а самъ цесаремь ста и сице ему рекши: «ты еси слѣпъ, како можеши царство держати, и  азъ есмь цесарь». И тогда Исакъ цесарь, много съжаливъси о градѣ и о царствѣ своем и о граблении манастырьскомъ, еже даяста Фрягомъ злато и сребро, посуленое имъ, абие разболѣся, и бысть мних, и отънде свѣта сего. По Исаковѣ же смерти людие на сына его въсташа про зажение градное и за пограбление манастырьское; и събрашася чернь, и вълъчаху добрые мужи, думающе с ними, кого цесаремъ поставят. И пакы вси хотяху Радиноса; он же не хотяше царства, и скрыся от них, измѣнивъся въ черныя ризы; а жену его, емше, приведоша въ святую Софѣю и много нудиша ю: «повѣжь намъ: гдѣ есть мужь твои»; /л.127об./ и не сказа имъ о мужи своем ничтоже. Потом же яша человѣка, именемъ Николу, воина нарочита, и на того възложиша вѣнець безъ патриарха; и ту бысть снемъ въ святѣи Софѣи 6 днии 6 нощии. А цесарь же Исаковичь бѣаше  в  то время Влахирнѣ и мышляаше  в себѣ, како бы ввести Фрягы отаи; и боярѣ въ градѣ томъ, увѣдавши помышление цесарево, и пакы утолиша его, не даша ему напустити Фрягъ, рекъ се: «мы с тобою есме». Тогда же бояре, убоявшеся введениа Фрягъ, сдумавше с Муръчюфломъ, яша цесаря Исаковица и на Муръчюфла вѣнець возложиша; а Муръчюфла бяше Исаковиць высадилъ ис темници, и приялъ извѣщение, яко не искати под Исаковицем царства, нь пакы блюсти под нимъ. Муръчюфлъ же посла к Николѣ и къ людемъ въ святую Софѣю: «язъ ялъ ворога вашего Исаковица, язъ вашь цесарь; а Николѣ даю пръвыи въ боярех, сложи съ себе вѣнець». И вси людие не даша ему сложити вѣнца, нь болши закляшася: аще кто отступит от Николы, да будет нроклят. Того же дне дождавше нощи, разбѣгошася вси, а Николу яша, и жену его яше Муръчюфлъ и всади а в темницю, и Олексу Исаковица у/л.128./тверди въ стѣнах, а самъ цесаремъ ста Мюрчюфлъ февраля въ 5 день, надѣяся избити Фрягы. Фрязи же увѣдавше, яко изимаша Исаковица, воеваху волость около града, просяше у Муръчюфла: «даи намъ Исаковица, даждь поидемь къ нѣмечкому цесарю, отнелѣже есмь присланѣ; а тобѣ царство его». Муръчюфлъ же и бояре не даша его жива, и уморивше Исаковица, и ркоша Фрягомъ: «умерлъ есть, приидете и видѣте его». Тогда же Фрязи печалнѣ быша за преслушание свое; не тако бо бяше казалъ имъ цесарь нѣмечькыи и папа римьскыи, якоже сии зло учиниша Цесарюграду, и рѣша сами к собѣ вси: аще намъ нѣту Исаковица, с нимъ же есме пришли, да луче ны есть умрети у Цесаряграда, нежели съ срамомъ отъити»; оттолѣ начаша строити брань къ граду. И замыслиша, якоже и преже, на кораблехъ раинами на шеоглах, на иных же кораблех исчиниша порокы и лѣствица, а на иных замыслиша свѣшивати бочкѣ чресъ град, накладены смолы, и лучины зажегши,Вперёд хоромы, якоже и прежде пожгоша град. И приступиша къ граду априля въ 9 день в пяток 5 недѣли поста, и не успѣша ничтоже граду; нь Фрягъ избиша близъ 100 мужь. /л.128об./ И стояша ту Фрязи 3 дни. В понедѣльник вербьнои недѣли приступиша къ граду, солнцю въсъходящю, противу святому Спасу, зовемыи Вергетисъ, противу Испигасу, сташа же и до Лахерны. Приступиша же на 40 кораблехъ великых; бяху же изременани и межи ими, в нихже людие на конех, въ оружьи, еще же и конѣ их оболчени въ брони; инии же в кораблех и в галѣлеях стояху назади, боящеся от зажьжениа, якоже и преже бяхут Грѣци пустилѣ на нѣ 10 корабль съ огнемъ; и въ пряхъ изьвеременивше погодье вѣтра, на Васильевъ день, полунощи, не успѣша ничтоже фряжьскымъ кораблемъ: вѣсть бо имъ бяше далъ Исаковиць, а Грѣком повелѣвъ пуститѣ на кораблѣ на них; тѣм же и не погорѣша Фрязи. И тако бысть взятье Цесаряграда великаго: и привлече корабль къ стѣнѣ граднѣи вѣтръ, и быша скалы их великыя чресъ град, а нѣжняя скалы равно съ забралы; и бияхут с высокых скалъ на град грѣчьскыи Варягы камениемь и стрѣлами и сулицами, а с нижних на град слѣзоша; и тако взяша град. Цесарь же Мюрчюфлъ крѣпляше бояры и вси люди, хотя ту брань створити съ Фрягы, и не послушаша его: и отбѣгоша /л.129./ от него вси. И цесарь же побѣже от них, и угониша е на Коньнѣмъ торгу, и много жалова на бояры своя и на всѣ люди. Тогда же цесарь избѣже из града, и патриархъ и вси боярѣ; и внидоша въ град Фрязи вси, априля въ 12 день, на память святого священномученика Василиа исповѣдника, в понедѣльник,Вперёдмѣстѣ, идеже стояше 6 цесарь грѣчьскыи, у святого Спаса, и ту Вперёд нощь. Заутра же, солнцу въсходящу, внидоша въ святую Софѣю, и одраша двери и расѣкоша, а онбонъ окованъ бяше сребромъ, и столпы сребреныя 12, а 4 кивотныя, и тябло исѣкоша и 12 креста, иже над олтаремъ бяху, межи ими шишкы, яко древа вышьша мужа, и прѣграды олтарныя межи столъпиа, то все сребрено; и трапезу чюдную одраша драгыи камень и великыи жемьчюгъ, а саму невидимо камо ю дѣша; и 40 кубъковъ великых, иже бяху пред олтаремъ, и поникадила и свѣтилна сребреная, яко не можемъ числа исповѣдати, съ праздничными съсуды безъцѣнными поимаша; служебныя еуангелиа же и кресты честныя, иконы безъцѣнныя все одраша; и под тряпезою кровъ наидоша 40 кадии чистаго злата; а на полатех въ /л.129об./ стѣнах и въ судохранилници невѣдѣ колико злата и сребра, яко нѣту числа, и безъцѣнных съсуд. То же все въ единои Софѣи сказах; а святую Богородицю, иже в Лахерънѣ, идеже святыи духъ съхожаше на вся пятницѣ, и ту одраша; инѣх же церквии не может человѣкъ сказати, яко бещисла. Одигитрию же чюдную, иже по граду хожаше, святую богородицю, съблюде ю богъ добрыми людьми, и нынѣ есть, на нюже надѣемся; а иныя церкви въ градѣ и внѣ града и в манастырех пограбиша все, им же не можемъ числа, и красоты их сказати. Чернець и черница и попы облупиша и нѣколико их избиша; Грѣкы же и Варягы изгнаша из града, иже бяхут ся остали. Се же имена воеводамъ их: 1 Маркосъ от Рима, въ градѣ Берне, идеже бѣ жилъ, поганыи злыи Дедрикъ; а 2 Икандофъ от Фландръ; а 3  Дужь слѣпъ от Маркова острова, того же острова Венедикъ. сего Дужа слѣпилъ Мануилъ цесарь; мнози бо философи моляхутся цесареви: «аще сего Дужа отпустиши здрава, много зла створит твоему царству»; цесарь же не хотя его убити, повелѣ ему очи слѣпити стькломъ, и быста неврежденѣ очи, нь не видяше ничегоже. Сь же Дужь много брани на град замы/л.130./шляше, и вси его послушаху, и кораблѣ его велицѣ бяху, с них же град взяша. Стояниа же Фряжьскаго у Цесаряграда от декабря до априля, доколѣ град взяша. А мѣсяца маия въ 9, на память, святого пророка Исаия и в тои же день святого отца нашего Николы принесение честных мощеи его, поставиша цесаря своего, родомъ Латинина, именем Кондофларента, своими бискупы. и власть собѣ раздѣлиша: цесареви град, а Маркосу, а Дужеви десятина. И тако погыбе царство богохранимаго града Костянтина и земля Грѣчьская въ свадѣ царствъ. еюже обладают Фрязи.

 

В то же лѣто побѣдиша Олговици Литву и избиша их 7 сот да 1000. Того же лѣта преставися Мирошка, посадникъ новгородчкыи, приимъши мнишькыи чинъ, и положенъ бысть в монастырѣ святого Георгиа; и по томъ даша посадничьство Михалку Степаничю. Того же лѣта, по грѣхомъ нашимъ, изомроша конѣ в Новѣгородѣ и по селомъ, яко нѣлзѣ бяше поити смрады никуда же. Тогда же, на вербьницю приидоша Латина под Цесарьград, въ бучах и взяша Цесарьград на щитъ, исѣкоша Грѣцѣ; и кто ся их гдѣ хоронилъ, и тѣх, выводяще, исѣкоша; а святую Софѣю всю пограбиша и что в неи; а что манастырь силных и церквии, /л.130об./ а тыи излупиша вся; а патриархъ и игумены и игумениа выводяще и  въ ужищах, и взимаше злато у нихъ.

1184 - 1203                                                    Содержание                                                            1205 - 1219

1184 - 1203                                                    Содержание                                                            1205 - 1219