Сайт посвященный церковной истории
Святая София и
Великий Новгород
История и
современность
История и современность
Кликни на квадрат справа, чтобы открыть вкладки сайта
Перепечатка в интернете разрешена при условии наличия активной ссылки на сайт " Святая София и Великий Новгород: История и современность".
НОВГОРОДСКАЯ ПЕРВАЯ ЛЕТОПИСЬ МЛАДШЕГО ИЗВОДА
(Комиссионный, Академический, Толстовский списки)
/л.117об./ В лѣто 6692 [1184]. Архиепископь новгородчкыи Илья с братомъ Гавриломъ заложиша церковь камену святого Иоанна на Торговищи. В томь же лѣтѣ приславъ Всеволод, выведе свояка своего из Новагорода Ярослава Володимирица: негодовахуть бо ему новгородци, зане много творяше пакости волости новгородчкои. И послаша къ Смоленьску къ Давыдови по сынъ; и вда имъ Мьстислава, и ведоша и къ Новугороду и посадиша и на столѣ.
В лѣто 6693 [1185]. Мѣсяца маа въ 1 день, в год пѣниа вечернии, солнце померче, яко на час и боле, и звѣзды быша, и просвѣтися, и пакы ради быхомъ. Того же мѣсяца въ 6 день заложиша Лукинци церковь камену святых апостолъ Петра и Павла на Синилищи. Того же лѣта заложи церковь камену святого Вознесениа Милонѣгъ при архиепископѣ Ильи. А на зиму иде Давыдъ к Полотску и с новгородци и смольняны, и, смирившеся, воротишася на ѣмъницѣ.
В лѣто 6694 [1186]. Иде Завидъ къ Давыду къ Смоленьску, и вдаша посадничьство Михалкови Степаницю. Того же лѣта приходи цесарь грѣчьскыи Олекса Мануиловиць в Новъгород. Тогда же ходиша новгородци на ѣмь о Вышатѣ о Василевици и приидоша вси здрави, добывше полона. Того же лѣта преставися /л.118./ архиепископъ новгородчкыи владыка Ильа, мѣсяца септября въ 7, и положен бысть честно въ притворѣ святыя Софѣя. Новгородци же съ княземь Мьстиславомъ, съ игумены и с попы и съ крилосом святыя Софѣя, сдумавши собѣ, изволиша поставити брата его Гаврила; и послаша с молбою к митрополиту в Киевъ к Никифору; и присла по него митрополит и вси князи рускыи, и пояша и с любовию. Тои же зимѣ убиша новгородци Гаврилу Неревиница и Вача Свиневица, свергоша с мосту. В то же время въстань бысть въ Смоленьскѣ промежи княземъ Давыдомъ и смолняны, и много паде головъ лучьших мужь.
В лѣто 6695 [1187]. Поставленъ бысть архиепископомъ новгородчкымъ Гаврила въ 29 марта, а прииде к Новугороду мая въ 31; и ради быша новгородци своему владыцѣ. В том же пакы лѣтѣ преставися игуменъ Моисии святѣи Богородици въ Онтоновѣ манастырѣ, и поставиша по немъ Волоса. В то же лѣто громъ бысть страшенъ зѣло и молниа; пришедшимъ съ кресты от святыя Софѣя къ святому Михаилу и поющимъ 9 пѣснь, и шибе громъ и молниа, и падоша вси людие, и загорѣся церковь; нь богъ своею милостью [съблюде] и молитвами святого Михаила, и не бысть бѣдѣ церкви; а два /л.118об./ человѣка до конца мертва быста. В то же лѣто изьбиени быша Печеръскыи и Югорьскыи даньници, а друзии за Волокомъ, и паде головъ о стѣ кметѣи. Том же лѣтѣ бысть знамение въ солнци в полудне, яко мѣсяць смерчеся, и по малѣ времени наполнися и пакы просвѣтися, септября въ 9. В то же лѣто выгнаша новгородци князя Мьстислава Давыдовица, и послашако Всеволоду в Володимирь по Ярослава по Володимирица; и вниде в Новъгород, и сѣдѣ на столѣ ноября въ 20.
В лѣто 6696 [1188]. Заложи Семьюнъ Дыбучевиць церковь камену святыя богородица Успение во Оркажи манастырѣ. В ту же пакы зиму бысть дороговъ, яко купляху хлѣбъ по двѣ ногатѣ, а кадь ржи по 6 гривенъ; нь милосердиемь божиимъ не бысть пакости в людех. В то же лѣто рубиша [новгородьце] Варязи на Гътѣх, Нѣмци в Хорюжку и в Новоторжьце; а на весну не пустиша из Новагорода своих ни одиного мужа за море, ни сла выдаша Варягомъ, но пустиша я без мира.
В лѣто 6697 [1189]. Святи церковь Гаврила, архиепископъ новгородчкыи. святыя богородица Успение въ Аркажи манастырѣ июня въ 4. В то же лѣто постави церковь нову на Жатунѣ Гаврила архиепископъ въ имя святых 3 отрокъ. В то же лѣто ко/л.119./нчаша подписъ церковь святое Благовѣщение. Того же лѣта отъяша посадничьство у Михалка и даша Мирожкѣ Незнаницю.
В лѣто 6698 [1190]. Избиша плесковици Чюдь поморьскую: пришли бо бяху въ 7 шнекъ и оболочилися около порога въ озеро; и удариша на нѣх плесковици и неВперёд мужа, а шнекѣ привезоша въ Плесковъ.
В лѣто 6699 [1191]. Ходиша новгородци в лоивахъ на ѣмъ с Корѣлою, и воеваша землю ѣмьскую и пожгоша и скот исѣкоша. В то же лѣто срубиша церковь на Городищи святого Николы князь Ярославъ. а владыка сруби Устрѣтение господне; того же лѣта и святого Образа Внѣзде Нездылиниць, и святую Пятницю Костянтине с братомъ. В том же лѣтѣ святи церковь архиепископъ боголюбивыи Гаврила святого Възнесениа, создана Милонѣгомъ тысячкымъ. В то же лѣто ходи князь Ярославъ на Лукы, позванъ полочькою князьею и полочаны, и поя съ собою новгородци переднюю дружину; и сняшася на рубежи и положиша межи собою любовъ, яко на зиму всимъ снятися любо на Литву, любо на Чюдь; и прииде в Новъгород князь Ярославъ. И бысть на зиму, иде князь Ярославъ с новгородци и со плесковици и со всею областью своею /л.119об./ на Чюдь и взя город Гюргевъ, и пожгоша землю их и полона бещисла приведоша; а сами приидоша въ Новъгород вси здрави.
В лѣто 6700 [1192]. Иде князь Ярославъ къ Плескову на Петровь день, и новгородци вмалѣ; и самъ сѣде въ Плесковѣ, а дворъ свои посла съ плесковици воеватъ, и шедши, взяша город Медвѣжию голову и пожгоша, и възвратишася вси здрави. В то же лѣто постави церковь на Хутинѣ черниць Варламъ, а мирьскымъ именемь Олекса Михаилович, во имя святого спаса Преображение; и свяща ю архиепископъ новгородчкыи владыка Гаврила на праздникъ, и нарече монастырь. В то же лѣто пакы концаша церковь Петра и Паула на Синилищи, и святи ю архиепископъ Гаврила на Петровь день. В то же лѣто в Русѣ сруби церковъ на островѣ игуменъ Мантурии въ имя святого спаса Преображениа, и створи манастырь честень, и бысть прибѣжище крестианомъ. Того же лѣта сорѣ церковъ святых апостолъ Петра и Паула от грома на Холмѣ. В то же лѣто поставиша у святѣи Богородици въ Звѣринци игумению Ефросинию Петровую Купцевица.
В лѣто 6701 [1193]. Преставися архиепископъ новгородчкыи Гаврила мая въ 24, на память святого отца нашего Симеона, иже иа Дивнѣи горѣ, и положенъ бысть честно /л.120./ въ притворѣ святыя Софѣя, посторонѣ брата, и нареченаго въ черничьствѣ Григореи. И пакы по временѣ семъ новгородци же съ княземь Ярославомъ, съ игумены и съ софияны и с попы и думаша собѣ: инии хотяху Митрофана поставити, а друзии Мантуриа, а и сии хотяху пакы Гричина; в нихъ пакы распря бысть немала, и ркоша къ себѣ: «да сице положим три жребиа на святѣи тряпезѣ въ святѣи Софѣи». И абие положиша и повелѣша пѣти святую литургию, и по совершении службы и послаша с вѣца слѣпца, да котораго дасть богъ, и выняся божию благодатью жребии Мантуриевъ; и послаша по него, и привезоша и из Русѣ, и посадиша его въ епископьлѣ дворѣ; и послаша о немь къ митрополиту, и митрополит пакы прислаше по него съ великою честью. Сице же оному пошедши съ предними мужи, и въсприяша его с любовию князь Святославъ и митрополит, и поставиша и декабря въ 10, на память святых мученикъ Мины и Ермогена и Еуграфа; и прииде в Новъгород генваря въ 16, на поклонение честных веригъ святого апостола Петра. В то же лѣто идоша из Новагорода въ Югру ратью с воеводою Ядрѣикомъ; и приидоша въ Югру и взяша город, и при/л.120об./идоша къ другому городу, и затворишася въ градѣ, и стояша под городомъ 5 недѣль; и посылаху из города к нимъ съ льстивою рѣчью, ркуще тако: яко «сбираемъ сребро, и соболѣ, и иная узорочиа, авы не губите нас, своих смердовъ и своеи дани», а в то время копяще воиско. И яко уже скопишася вои и выслашася изь города к воеводѣ, рекши тако: «поиди въ город, поемши со собою 12 мужа»; и иде в город, понявши съ собою попа и Иванка Легена и иных вячьших; и иссѣкоша я на канунъ святыя Варварѣ; и выслаша пакы, и пояша 30 муж вятьших, и тѣх иссѣкоша; и потомъ 50.
Потомъ рече Савка князю югорьскому: «аще, княже, не убиешь еще Яковца Прокшиница, а живого пустиши в Новъгород, то тому ти, княже, опять привести вои сѣмо, и землю твою пусту сътворит». И призвавши князь Яковца Прокшиница, и повелѣ его убити. И рече Яковець Савици: «брате, судит ти богъ и святая Софѣя, аще еси подумалъ на кровь братьи своеи; и станеши с нами пред богомъ и отвѣщаеши за кровь нашю». И то ему рекъшю, убиенъ бысть. Тъ бо Савица перевѣт держаше отаи съ княземь югорьскымъ. И потом, яко изнемогоша /л.121./ людие гладом, стоялѣ бо бяху 6 недѣль, слушающе лестьбѣ их, и на праздникъ святого Николы вылѣзъше изъ града, исъсѣкоша вся; и бѣ туга и бѣда останку живых, бѣ бо осталося их 80 муж. И не бяше вѣсти чресъ всю зиму в Новъгород на них, ни на живых, ни на мертвых; и печаловахутся в Новѣгородѣ князь и владыка и всь Новъгород.
В лѣто 6702 [1194]. Зажьжеся пожаръ в Новѣгородѣ в недѣлю на Всѣх святых, в говѣние, въ заутреиии год: загорѣся Савкине дворе на Ярышевѣ улици, и бяше пожаръ золъ, сгорѣша 3 церкви: святыи Василии, святаа Троица, и святое Въздвижение, и много домовъ добрых, и уяша у Лукинѣ улицѣ. И не ту ся зло устави за грѣхи наша, нь на другои день загорѣся в Чегловѣ улкѣ, и погорѣ дворовъ 10. И потомъ пакы болшее зло въздвижеся: тои же недѣли в пяток, в торговое время, загорѣся на Хревковѣ улици дажь и до ручья в Неревьскыи конець, и сгорѣ церквии 7 и домове велицѣи. И оттоль въста зло: по вся дни загарашеться невидимо по мѣстомъ, и пакы к тому не смѣяху людие тировати в домех, нь по полю живуще, и потомъ погорѣ Городище. Того же лѣта и Ладога погорѣ преже Новагорода, а потомъ и Руса погорѣ; а посль и Людинь конець /л.121об./ погорѣ дворовъ 10; и тако бысть казнь сиа от Всѣх святых и до Госпожина дни. И тогда приидоша изъ Югрѣ избытокъ живых. И убиша Събышку Волосовица и Негочевица Завиду и Моислава Поповица самѣ путникы, а друзии кунами ся окупиша; творяхут бо я съвѣт державъше съ Югрою на свою братью, а то богови судити. Того же лѣта поставиша церковь святого апостола Филипа на Нутнои улицѣ, нову, и святи ю владыка Мантурии генваря 29, Радославъ Даниловиць. В то же лѣто преставися Дионисии анхимандрит новъгородчкыи, игуменъ святого Георгиа; и поставиша на мѣстѣ его Саватия.
В лѣто 6703 [1195]. Архиепископъ новгородчкыи владыка Мантурии боголюбивъ сы заложи церковь камену на городнѣх воротех во имя святыя богородица Положение честнаго пояса, иже в Халкопратии, и начаша дѣлати мѣсяца маия въ 4, а концаша августа въ 2 день, и святи ю владыка на праздникъ святыя богородица пояса; и бысть крестияномъ прибѣжище, и радость и веселие вѣрнымъ. Тои же осени заложи церковъ камену святого Въскресения в манастырѣ архиепископъ новгородчкыи Мантуръи. Того же лѣта, на зиму, позва Всеволод новгородцовъ на Черниговъ, на Ярослава и на все Олгово племя; /л.122./ и новгородци не отпрѣшася ему, идоша съ княземъ Ярославомъ огнищанѣ и гридба и купцѣ. И быша на Новѣмъ торгу, и приславъ Всеволод, и възврати е съ честию домовъ. И послаша новгородци к нему
Мирошьку посадника и Бориса Жирослалица и Микифора сочкаго, просяще сына, а Ярослава негодующе; и възвратишася в город. Тои же зимѣ бишася смолнянѣ с черниговци, и поможе богъ черниговчемъ, и яша князя Бориса Романовица; и ие бяше мира межю ими. И прия Всеволод посадника Мирожку и Бориса и Иванка и Фому, и не пусти их в Новъгород, а самъ послаше в Половци. И почаста вои копити Всеволод и Давыдъ к собѣ, а Ярославъ Черниговьскыи и Игорь съ своею братиею; не бяше мира междю ими. нь рать болшюю въздвигоша.
В лѣто 6704 [1196]. Заложиста церковь камену святого Кирила в манастырѣ въ Нелѣзенѣ Костянтинъ и Дмитръ, братеника, [а мастеръ бяше] Коровъ Якович с Лубяиѣи улицѣ; начаша ю /л.122об./ дѣлати априля, а концаша июня въ 8, на святого Прокопиа; и святи ю владыка Мантурии генваря въ 12, и бысть радость крестианомъ, а Костянтину и Дмитру вѣчная память. Того же лѣта исписа церковь на воротех архиепископъ Мартурии святыя Богородица. В то же лѣто концаша церковь святого Въскресениа; и святи ю архиепископъ Мантурии септября въ 13; а владыка тружаяся и горя зноемъ въ день, а в нощь печалуяся, како бы концати и видѣти церковь свершена и украшена; егоже желавъ, прия царство небесное и радость не концаему в вѣкы. Тому же пакы лѣту исъходящю, и съсылахуся новгородци къ Всеволоду посадника дѣля Мирожки и Иванка и Фомѣ, пустилъ бо бяше Бориса и инѣи мужи с нимъ. А Всеволод иде на Черниговъ, и совокупивъ силу свою, и половѣчьскую силу приведе, и вожаше со собою посадника новгородчкаго Мирошьку и Иванка и Фому, а новгородцомъ повелѣ ити на Лукы. И идоша съ Ярославомъ, и сѣдѣвше на Лукахъ, и възвратишася опять домовь, а Всеволод вшедъ в землю их; и не вда богъ кровопролитья болшаго, н взяша миръ междю собою, а Новъгород выложиша вси князи въ, свободу: кдѣ имъ любо, /л.123./ ту собѣ князя поимают. И възвратився Всеволод, пусти Фому в Новъгород, а Мирошкѣ ни Иванка не пусти, и розгнѣвивши новгородцовъ; сдумавъши же новгородци, выгнаша князя Ярослава из Новагорода на осенныи Юрьевъ день. И посемь пакы иде Ярославъ на Новыи торгъ, и прияша и новоторжци с поклономъ; и жаляху по немъ в Новѣгородѣ добрѣ, а злѣи радовахуся. А новгородци послашася къ князю Ярославу в Черниговъ, просяще у него сына, а сами сѣдиша всю зиму безъ князя. А Ярославъ княжаше на Торъжку въ своеи волости, и дани поимаше во всеи волости: по Верху, Мьстѣ и за Волочкомъ возме дань; а новгородцовъ изъизыма Всеволодъ за Волочкомъ и по всеи земли своеи, держаше у себе, не пустя ихъ в Новъгород; но хожаху по граду Володимиру по своеи воли. Тои же зимѣ святи церковь архиепископъ Мартурии в Нелѣзене.
В лѣто 6705 [1197]. Прииде от Чернигова къ Новугороду князъ Ярополкъ Ярославиць на вербьницю, мѣсяца марта; и сѣдѣвши ему одину 6 мѣсяць, и выгнаша его из Новагорода, и послаша опять по Ярослава с Новаго торгу в Володимирь, позвани Всеволодомъ. Идоша из Новагорода /л.123об./ прежнии мужи и сочкыи и пояша Ярослава со всею правдою и честью; и прииде на зиму по крещении за недѣлю; и сѣде на столѣ своемъ, и обуяся 1 с людьми, и добро все бысть; и Мирошку посадника приведе, сѣдѣвша 2 лѣта за Новъгород; и вси приидоша здрави, невреженѣ ничимже; и ради быша вси от мала и до велика. Того же лѣта постави 9 архиепископ-. новгородчкыи Мантурии владыка церковь на островѣ, святого Никифора. В то же лѣто постави манастырь святыя Еуфимиа в Плотникех Полюжая Жирошкѣ Городъшиница дщи.
В лѣто 6706 [1198]. Заложи боголюбивыи архиепископъ Мантурѣи въ Русѣ въ своемь манастырѣ церковъ камену святого Преображениа; и начаша ю дѣлати мѣсяца маия 21 въ, а кончаша мѣсяца июля въ 31; и святи церковъ на Успение святѣи богородици, и сотвори и праздникъ честенъ и службу створи, и помолися, сице глаголя: «господи боже, призри съ небесѣ и вижь, и посѣти винограда своего, и сверши еже насади десница твоя; и призри на церковъ сию, юже создах рабъ твои, архиепископъ Мантурии, въ имя святого твоего Преображениа: да еще кто помолится въ церкви сеи с вѣрою, то услыши молитву его, и отпусти /л.124./ грѣхы его молитвами святыя богородица и всѣх святых твоих, аминь». И веселяшеться блаженыи сердцемъ и душею, устроивъ собѣ память вѣчную и всѣм крестианом честныи монастырь. В то же лѣто, веснѣ, преставистася 2 сына у Ярослава: Изяславъ бяше посаженъ на Луках княжити и [бѣ] от Литвы оплечье Новугороду, и тамо преставися; а Ростиславъ в Новѣгородѣ; и оба положена быста у святого Георгиа в манастырѣ. В то же лѣто заложи церковь камену князь великыи Ярославъ, сынъ Володимирь, внукь Мьстиславль, во имя святого спаса Преображениа в Новѣгородѣ в Нередицахъ; и начаша дѣлати июня въ 8 день, на святого Федора, а концаша септября 7. На тую же осень приидоша полочанѣ с Литвою на Луки и пожгоша хоромы, а лучанѣ устерегошася, избыша в городѣ. Того же лѣта заложиша церковь камену святого пророка Ильи на Холмѣ. На ту же зиму ходи князь Ярославъ с новгородци и со плесковици и с новоторжьци и с ладожаны и со всею областью новгородчкою к Полотску, и устрѣтоша полочанѣ с поклономъ на озерѣ Касоплѣ; и вземше миръ, възъвратишася в Новъгород: богъ бо не вдалъ кровопролитья крестияномъ.
/л.124об./ В лѣто 6707 [1199]. Приславши Всеволод выведе Ярослава из Новагорода и веде и к собѣ; а из Новагорода позва владыку и посадника Мирошьку и вячьшии мужи по сынъ. Яко быша на озерѣ Серегирѣ, преставися рабъ божии архиепископъ новгородчкыи владыка Мантирии августа въ 24; и, привезъше, положиша и въ притворѣ святыя Софѣя. Идоша мужи с посадникомъ и с Михалкомъ ко Всеволоду; и прия их с великою честью и вда имъ сына Святослава; а в Новъгород присла, сдумавъ с посадникомъ и с новгородци, и введе въ епискупью Митрофана, богомъ избрана; и весь Новъгород, шедши, съ честью посадиша и, дондеже будет от митрополита позвание: и тогда поидеши на поставление.
В то же лѣто заложиша церковь камену святыхь мученикь 40, с Прокшею с Малышевицемъ. Того же лѣта постави церковь княгыни Ярославляя и манастырь устрои святыя богородица Рожество, и игумению постави Завижюю. В то же лѣто исписаша церковь святого Спаса на Городищи; а в Русѣ такоже святого Спаса подписаша в монастырѣ владычнѣ. И по сих прииде князь Святославъ в Новъгород, сынъ Всеволожь, внукъ Юрьевъ, генваря въ 30, и посадиша и на столѣ въ святѣи Софѣи, и обрадовася всь /л.125./ Новъгород. В то же лѣто в Русѣ город обложиша.
В лѣто 6708 [1200]. Литва взяша Ловоть и до Налюча, с Бѣлѣи и до Свинорта и до Ворча середу; и нагнашася новгородци по них и до Чернянъ, и бишася с ними и убиша у нихъ мужь 80 въ Клинѣ, а новгородець 15: Рагуилу Прокшиница с братомъ Олексою, Юрья Сбыщиница, Ратмира Нѣжатиница, Страшка серебряника вѣсца, Внѣзда Ягиница, Луку Мирошкинъ отрокъ, Микиту Лазоревица, Жирошку Огасовица, Осипа подвоискаго, Романа Потка, инѣх 4 муж; а полонъ всь отяша, а избытокъ убѣжа. В то же лѣто иде Нездыла Пьхичиниць на Лукы воеводою; иде с Лукъ малою дружиною в Лотыголу на сторонѣъ, и засташая въ одринах, и убиша их 40 муж, а жены их и дѣти поимаша, а сами приидоша на Лукы вси здрави; а кто бѣ не пошелъ по них Столбовичи с николикымъ дружины, а у тѣх, бывши, куны поимаша.
В лѣто 6709 [1201]. Новгородци богомъ избраньнаго Митрофана въведоша въ архиепископьлии дворъ по Мантурии; и иде в Русь ставится к митрополиту с новгородчкыми мужи и со всеволожими, и поставленъ бысть мѣсяца июля въ 3 день, на святого Укинфа; и прииде /л.125об./ в Новъгород септября въ 14, на Въздвижение честнаго креста; и ради быша новгородци своему владыцѣ. В то же лѣто мѣсяца априля въ 15 сгорѣ от грома церкви святого Николы на Городищи; и ста все лѣто дождево. А Варягы пустиша без мира за море. Того же лъта срубиша в Русѣ город. на осень приидоша Варязи горою на миръ. и да имъ миръ на всеи воли своеи.
В лѣто 6710 [1202]. Свершиша церковь камену святого пророка Ильи на Холмѣ, конець Славна, и святи ю владыка Митрофанъ на праздникь.
В лѣто 6711 [1203]. Рюрикъ съ Олговици и с погаными Половци, Кончакъ и Данила Кобяковиць, взяша град Кыевъ на шитъ, въ 1 день генваря, на святого Василья; а кого доидет рука, чернца ли черничю, или попа или попадью, а тых ведоша в поганыя; а что гостии, иноземца всякого языка, а тѣ затворишася въ церквахъ, и вдаша имъ живот, а товаръ с ними роздѣлиша на полы; а что по манастыремъ и по всѣмъ церквамъ, всякыя узорочья и иконы одраша и везоша в поганѣи в землю свою; а град пожгоша. Тогда же ходиша рустѣи князи на Половци: Рюрикъ, Романъ, Мьстиславъ и инии князи мнози; /л.126об./ тогда 24 же зима бысть 24 люта; и взяша мног 25 полонъ и стада их отгониша. Того же лѣта посла Романъ Вячеслава, веля ему Рюрика пострици в чернци.