Кликни на квадрат справа, чтобы открыть вкладки сайта
Перепечатка в интернете разрешена при условии наличия активной ссылки на сайт " Святая София и Великий Новгород: История и современность".
НОВГОРОДСКАЯ ПЕРВАЯ ЛЕТОПИСЬ МЛАДШЕГО ИЗВОДА
(Комиссионный, Академический, Толстовский списки)
В лѣто 6665 [1157]. Бысть котора зла в людех, и въсташа на князя Мьстислава на Юрьевича, и начаша изъгонити из Новагорода, торговы же послаша въ оружьи по немъ; и свадишася братиа, и мостъ переимаша на Волховѣ, и сташа сторожи у городних во/л.110./ротъ, а друзии на ономъ полу, мало же крови не пролиаша межи собою. И тогда внидоста Ростиславица, Святославъ и Давыдъ; а на тую нощь бѣжа Мьстиславъ изъ Новагорода. И по 3 -хъ днехъ вниде Ростиславъ самъ, и снидошася братья, и не бысть зла ничтоже. Тои же веснѣ преставися князь Юрьи в Киевѣ, и посадиша Изяслава Давыдовица в Киевѣ на столѣ. Того же лѣта преставися Андрѣи, игуменъ святѣи Богородици, и поставиша игуменомъ Олексу на его мѣсто. На ту же осень зѣло страшенъ бысть громъ и молниа, град же яко яблока болши, мѣсяца ноября въ 7 день, а въ 5 час нощи.
В лѣто 6666 [1158]. Иде Ростиславъ къ Смоленьску и съ княгинею своею, а сына своего Святослава посади в Новѣгородѣ на столѣ, а Давыда в Новѣмъ торгу. В то же лѣто, по грѣхомъ нашимъ, моръ бысть А в людех много, и конѣи множество помре, яко нѣлзѣ бяше пропти до торгу сквозѣ город, ни по гребли, ни на поле, понеже бовеликъ бяше смрад. Еше же и скот рогатыи помре. Того же лѣта поиде Аркадии къ Кыеву ставится епископомъ, и поставленъ бысть от митрополита Костянтина, и прииде в Новъгород, мѣсяца семтября 4 въ 13 день, на канунъ святого Въздвижениа. Того же лѣта побѣди Мьстиславъ Изяславиць Давыдовица Изяслава, и прогна /л.110об./ ис Кыева и позва Ростислава, строя своего, на столъ в Киевъ. Тои же осени поставиша Деонисиа игуменомъ у святого Георгиа в манастырѣ.
В лѣто 6667 [1159]. Иде Ростиславъ в Киевъ и сѣде на столѣ въ Киевѣ. В то же лѣто преставися Костянтинъ, митрополит рускыи, в Черниговѣ.
В лѣто 6668 [1160]. Прияша новгородци Святослава Ростиславица, и послаша его в Ладогу, и княгыню впустиша в монастырь святыа Варвары, а дружину его в погребъ всажаша; и введоша Мьстислава Ростиславица, внука Юрьева, мѣсяца июня въ 21. И тои же зимѣ вдаша посадничьство Нѣжатѣ, и ведоша Святослава в Ладогу, и оттолѣ бѣжа въ Смолнескъ. Тои же зимѣ побѣди Ростиславъ Изяслава Давыдовица у Бѣлагорода, и самого убиша, и множество Половець паде.
В лѣто 6669 [1161]. Урядися Ростиславъ съ Андрѣемъ о Новъгородѣ, и выведоста Мьстислава Юрьева внука, сѣдѣвшю ему год безъ недѣлѣ, а Святослава ведоша опять на всеи воль его, мѣсяца септября въ 28. Тогда же отъяша посадничьство у Нѣжатѣ, а Озарьи даша. В том же лѣтѣ стоя все лѣто ведромъ, и пригорѣ всякое жито, а на осень морозъ поби всю ярь. Еще же за грѣхы наша не то зло оставися, но пакы на зиму ста вся /л.111./ зима теплом, и дождемъ, и громомъ; и купляхомъ малую кадьку по седми кунъ. О, велика скорбь бяше в людех и нужда.
В лѣто 6670 [1162]. Преставися Олекса игуменъ святыя Богородица; поставиша по немъ Мануилу игуменомъ. Того же лѣта у святого Духа поставиша игуменомъ Саву попина святого Савы.
В лѣто 6671 [1163]. Преставися архиеписко.гь новгородчкыи владыка Аркадии септября въ 19; положиша его съ великою честью въ притворѣ святыя Софѣя.
В лѣто 6672 [1164]. Приидоша Свѣя под Ладогу, и пожгоша ладожанѣ хоромы своя, а сами затворишася в городѣ с посадникомъ своимъ Нѣжатою, а по князя послаша и по новгородци. Они же приступиша под город въ день суботныи и не успѣша нѣчтоже граду, но болшюю рану въсприяша; и отступиша в рѣку Воронаи. Въ 5 же день потомъ приспѣ князь с новгородци и с посадникомъ Захарьею, и иаворотишася на ня мѣсяца маия въ 28, на память святого Еладиа, в четвертокъ, въ 5 час дни; и побѣдиша божиею помощью, овы иссѣкоша, а другыя изимаша: и пришли бяху въ 55 шнекь, и изьимаша 43 шнекѣ; а мало их убѣжаша, и тѣ язвени.
В лѣто 6673 [1165]. Поставленъ бысть Илья архиепископъ новгородчкыи /л.111об./ от митрополита Иоана, при великом князѣ рустѣмь Ростиславѣ, марта въ 28, на вербьницю, и прииде к Новугороду мая въ 11 день, при князѣ Святославѣ, а при посадницѣ Захарьи. Того же лѣта поставиша церковь святыя Троица шетиници, а другую на Городищи святого Николы князь Святославъ. В то же лѣто ходи игуменъ Деонисии с любовью в Русь, и повелѣно бысть владыцѣ архиепископьство митрополитомъ. Тои же зимѣ преставися. Тои же зимы бяше силныи морозы.
В лѣто 6674 [1166]. Преставися митрополит Иоанн въ Кыевѣ. Том же лѣтѣ заложена бысть церкви каменая святыи Спасъ на воротех в манастырѣ святого Георгиа. В то же лѣто, на зиму, прииде Ростиславъ ис Кыева на Лукы, и позва новгородци на порядъ: огнищаны, и гридьбу, и купцѣ вятьшии; и ту ся разболѣ самъ, и воротися опять, и преставися на пути, везоша и къ Кыеву, и положиша и у святого Федора.
В лѣто 6675 [1167]. Сѣде Мьстиславъ Изяславиць в Киевѣ на столѣ. На ту же весну заложи Сотко Сытиниць церковь камену святого Бориса и Глѣба, при князи Святославѣ Ростислалицѣ, при архиепископи Ильи. В то же лѣто прииде Костянтинъ митрополит в Русь. В то же лѣто выиде князь Свято/л.112./славъ из Новагорода на Лукы, и присла в Новъгород, тако глаголя имъ: «не хощю у вас княжити, не любо ми есть». Новгородци же цѣловаша святую Богородицю, ркоша к собѣ, яко «не хощемъ его»; и идоша прогнати его с Лукъ. Онъ, учювъ, оже идут на нь, и иде Торопцю, а новгородци послаша в Русь ко Мьстиславу по сынъ. Святослав же иде на Волгу, и вда ему Андрѣи помоць, и пожже Новыи торгъ, а новоторжьци отступиша к Новугороду; и много пакости творяше домомъ ихъ и села их потрати. А брат его Романъ и Мьстиславъ пожгоста Лукы; а лучанѣ уступиша они в город, а иныи Плескову. И сложиша на Новъгород Андрѣи съ смолняны и с полочаны, и пути заяша, и послы изымаша новгородчкыя всьдѣ, а вѣсти не дадуще къ Кыеву и къ Мьстиславу князю; а Святослава силою вмѣщающа в Новъгород, а то слово ркуще: «нѣту вамъ князя иного, развѣ Святослава». Новгородци же того небрежаху и убиша посадника Захарью и Неревина и Несду бирица, яко творяща их перевѣтъ держаще къ Святославу. И налѣзоша собѣ путь и на Вячка и на Володаря; и иде Даньславъ Лазутиниць со дружиною /л.112об./ къ Кыеву къ Мьстиславу по сынъ; а Святославъ прииде съ суздалци и с братома и со смолняны и с полочаны к Руси; и идоша новгородци съ Якуномъ противу ихъ; инии же, не дошедше, воротишася: не успѣша бо ничтоже. Тогда же даша посадничьство Якуну; и сѣдѣша новгородци безъ князя от Семеня дни до велика дни о Якунѣ, ждуще от Мьстислава сына. На ту же зиму ходи Мьстиславъ на Половци, и побѣдиша я и приведе полонъ в Рускую землю [толь] силно, яко и числа нѣту.
В лѣто 6676 [1168]. Прииде князь Романъ Мьстиславиць, вънукъ Изяславль, Новугороду на столъ, априля въ 14 день; и ради быша новгородци своему хотѣнию. В то же лѣто ходиша новгородци съ плесковици къ Полтеску и пожгоша волость и воротишася от города за 30 веръстъ. Тому же лѣту исходяшу, на весну ходи Романъ с новгородци к Торопцю, и пожгоша домы их, и головъ множество полониша. В то же лѣто ходиша Ростиславци съ Андрѣевичемъ и съ смолняны и с полочаны и с муромци и с рязанци на Мьстислава къ Кыеву; онъ же не бияся с ними, нь отступи волею ис Кыева.
В лѣто 6677 [1169]. Иде Даньславъ Лазутиниць за Волокъ даньникомъ съ дружиною своею, и присла Андрѣи полкъ свои /л.113./ на нѣх, и бишася с ними, и бяше новгородѣць 400, а суздалець 7000; и пособи богъ новгородцемъ, и паде ихь 300 и 1000, а новгородцовъ 15 мужь, и отступиша новгородци, и опять ся воротивше, взяша всю дань, а на суздальскых смердехъ другую, и приидоша вси здрави. В то же лѣто, на зиму, приидоша под Новъгород суздалци съ Андрѣевицемъ, Романъ и Мьстиславъ съ смолнянѣ и с торопцаны, и с муромци и с рязанци съ двѣма князьма, и полочкыи князь с полочаны, и вся земля просто Руская, а новгородци же сташа твердо о князи Романѣ Мьстиславлици, о Изяславли внуцѣ, и о посадници Якунѣ, и устроиша город около города. И приидоша къ городу в недѣлю на зборъ, и сходистася промежи себе о уряди по три дни; въ 4 же день, въ среду, приступиша силою и бишася всь день; и к вечеру побѣди я князь Романъ, нь еще бо тогда 41 дѣтескъ бяше сыи 42, с новгородци 43, силою крестною и святою богородицею и молитвами благовѣрнаго владыкы 44 Ильи 44, мѣсяца февраля въ 25, на память святого отца Тарасия, патриарха Цесаряграда, овы исъсѣкоша, а другыя изимаша, а прокъ их злѣотбѣгоша, и продаваху суздалца по двѣ ногатѣ.
В лѣто 6678 [1170]. Бысть дороговъ в Новѣгородѣ: ку/л.113об./пляхут кадь ржи по 4 гривнѣ, а хлѣбъ по двѣ ногатѣ. а мед пуд по 10 кунъ. И сдумавъше новгородци, показаша путь князю Роману, а сами послашеся къ Андрѣеви на миръ: «на всеи воли нашеи и даи же намъ князь».
В то же лѣто прииде в Новъгородъ князь Рюрикъ Ростиславич октября въ 4 день. В то же лѣто боголюбивыи архиепископъ новгородчкыи владыка Илья с братом Гавриломъ создаста манастырь и церковь устроиста святыя Богородица Благовещение. В том же лѣтѣ преставися князь Мьстиславъ Изяславиць в Володимирѣ. В то же лѣто преставися князь Глѣбъ Юрьевич в Киевѣ; и введоша Володимира Мьстиславича.
В лѣто 6679 [1171]. Преставися князь Володимиръ в Киевѣ, сѣдѣвъ на столѣ 3 мѣсяци. Того же лѣта отъяше князь Рюрикъ посадничьство у Жирослава и выгнаша его изъ Новагорода, и онъ поидяше къ Суздалю къ князю Андрѣю, и даша тогда посадничьство Иванкови Захарьиницю. Того же лѣта сѣде на столѣ в Киевѣ Романъ Ростиславиць. В то же лѣто, на зиму, иде Рюрикъ из Новагорода, и послаша новгородци къ Андрѣеви по сынъ; и присла Жирослава посадничати с мужи своими.
В лѣто 6680 [1171]. Прииде князь Юрьи Андрѣвич, внукъ Юрьевъ, в Новъгород. В то же лѣто заложиша церковъ каме/л.114./ну святого Якова в Неревьскомъ конци. Того же лѣта, на зиму, выиде ис Кыева князь Романъ Ростиславиць волею своею, и по немь сѣде Михалко Юрьевич в Кыевѣ. Того же лѣта, на зиму, ходи архиепископъ новгородчкыи Илья ко Андрѣеви, въ Володимиръ, ходилъ бяше на всю правду. Тогда же даша опять посадничьство Иванкови Захарьиничю.
В лѣто 6681 [1173]. Иде князь Юрьи Андрѣевиць с новгородци и с ростовци Кыеву на Ростиславица и прогнаше ис Кыева, и стояше под Вышегородомъ 7 недѣль, и приидоша в Новъгород вси здрави; а Ярославъ Изяславиць сѣде в Киевѣ. Того же лѣта свящаше церковь святу мученику Бориса и Глѣба архиепископъ новгородчкыи владыка Илья, октября въ 14, а другую церковь святого Спаса на воротех у святого Георгиа.
В лѣто 6682 [1174]. Убиша в Володимири князя Андрѣя свои милостьници: на канунъ святых апостолъ Петра и Павла, в нощи, спящю ему въ Боголюбемъ, и бяше с нимъ кощеи единъ малъ; избивше сторожеви дворныя и приидоша к сѣнемъ, князю же очютившю, попадъ меч, ста у двереи, боряся с ними, оних же бяше много, а князь одинъ; и налегоша силою и выломиша двери и вълѣзоша на нь, и ту насунуша копьи 31, /л.114об./ и абие сконца живот свои. И великъ мятеж бысть в земли тои, и велика бѣда, и много паде головъ, яко и числа нѣту; и посадиша на столѣ Мьстислава Ростиславица съ братомъ Ярополкомъ. Выиде Рюрикъ из Новагорода. Том же лѣтѣ сѣде в Киевѣ Романъ Ростислалич, внукъ Мьстиславль.
В лѣто 6683 [1175]. Выведоша из Новагорода князя Юрья Андрѣевича; а Мьстиславъ сынъ свои посади Святослава в Новѣгородѣ. Того же лѣта вниде самъ в Новъгород, бивъся съ строем своимъ Михалкомъ, и сѣде в Новѣгородѣ; а Михалко сѣде в Володимирѣ, а брата своего Всеволода посади в Переяславли. Того же лѣта загорѣся от Денгуниць, и сгорѣша церквии 3: святого Михаила и святого Якова и святое Възнесение. В то же лѣто преставися посадникъ новгородчкыи Иванко Захарьиниць, и даша Жирославу опять; и концающюся лѣту
тому, исъгнаша ис посадничьства Жирослава и даша Завиду Невероницю.
В лѣто 6684 [1176]. Иде Волхово опять на зводь по 5 днии. Тои же веснѣ оженися князь Мьстиславъ в Новѣгородѣ, и поняша у Якуна у Мирославича дщерь. И потомъ позваша и Ростиславци к собѣ, и иде къ Ростову съ дружиною своею, а сынъ оставивъ в Новѣ/л.115./городѣ; и прииде к Ростову. И в то время умерлъ бяше Михалко; и поиде с ростовци и с суздалци къ Володимеру, и срѣте и Всеволодъ с володимирци и с переяславци, и постави противу его полкъ, и бишася, и паде обоих много множество, и одолѣ Всеволод. И възвратися Мьстиславъ в Новъгород, и не прияша его новгородци, но путь ему показаша и сыномъ Святославомъ; и пояша новгородци себѣ у Всеволода князя Ярослава Мьстиславица. На тую же зиму иде Мьстиславъ съ зятемъ своим Глѣбомъ и с братомъ Ярополкомъ на Суздаль, и бишася за Калакшею, и ту побѣдиша рязанци, изымаша Глѣба сыномь и Мьстислава с братомъ Ярополкомъ, и порубиша я. Того же лѣта, зимѣ, приходиша вся Чюдьская земля къ Плескову, и бишася с ними, и убиша Вячеслава и Микиту Захарьиница, и Станимира и Иванца и инѣхъ, а Чюди множество избиша. Том же лѣтѣ постави Михалко Степановиць церковь нову святого Михаила, а другую Моиси Доманѣжиць святого Иоанна Усѣкновение главы на Чюдѣнцевѣ улицѣ.
В лѣто 6685 [1177]. Преставися князь Глѣбъ Рязаньскыи в порубѣ. В то же время слѣпленъ бысть Мьстиславъ князь с братомъ своимъ Ярополкомъ /л.115об./ от стрыя своего Всеволода, и пусти я в Русь; ведома же има и гнѣющема очима, и яко доидоша Смоленьску, приидоша же на Смядино въ церковь святых мученикь Бориса и Глѣба, и ту абие спостиже божиа благодать и святыя владычиця наша богородица и святую мученику Бориса, еже Романа и Давыда, и ту прозрѣста. Того же лѣта погорѣ на осень Неревьскыи конець от Иванковѣи, и сгорѣ церквии 5. И на зиму прииде князъ Мьстиславъ съ братомъ Ярополком в Новъгород, и посадиша новгородци Мьстислава на столѣ, а Ярополка на Новѣмъ торгу, а Ярослава на Ламъскомъ волоцѣ, и тако управишася по волѣ.
В лѣто 6686 [1178]. Преставися князь Мьстиславъ, сынъ Ростиславль, а внукъ Юрьевъ, и положиша у святѣи Софѣи въ притворѣ; а брата его Ярополка посадиша в Новѣгородѣ на столѣ. И зая Всеволод гость новгородчкыи, и показаша путь Ярополку новгородци, и тогда Всеволод изгони Новыи торгъ и взя. И послашася новгородци по князя Романа къ Смоленьску, и вниде на сборъ по чистои недѣли.
В лѣто 6687 [1179]. Заложи архиепископъ новгородчкыи владыка Илья церковь камену святыа богородица Благовѣщение, а начаша ю дѣлати мая 21, а концаша августа въ 25, а всего дѣла церковнаго днии 70; и бысть /л.116./ крестияномъ прибѣжище. По том же лѣтѣ иде Романъ из Смоленьска. Того же лѣта послаша новгородци по брата егопо Мьстислава в Русь, и прииде Мьстиславъ в Новъгород ноября въ 1 а на зиму иде Мьстиславъ с новгородци на Чюдь, на Очелу, и пожьже всю землю их, а сами отбѣгоша къ морю, нь и ту много их падоша.
В лѣто 6688 [1180]. Преставися князь Мьстиславъ в Новѣгородѣ Ростиславиць, вънукъ Мьстиславль, иуня въ 14, и положиша и въ святѣи Софѣи въ предѣлѣ святыя Богородица. И послашася новгородци къ Святославу в Русь по сынъ, и приведоша Володимира в Новъгород, и посадиша на столѣ августа 17. Тогда же отъяша посадничьство у Завида и вдаша Михалку Степановичю. Того же лѣта боголюбивыи архиепископъ новгородчкыи владыка Илья заложи церковь камену с братом своимъ с Гавриломъ в манастырѣ святого Благовѣшепиа на воротех святое Богоявление. Того же лѣта. на зиму, иде князь Святославъ Всеволодиць, Олговъ внукъ, изь Руси на Суздаль ратью на Всеволода, а сынъ его Володимиръ с новгородци из Новагорода; и съяшася на Волзѣ усть Тфѣри, и пакы идущи имъоттолѣ, и положиша всю Волгу пусту и городы и все пожгоша, не дошедше /л.116об./ Переяславля за 40 веръстъ, и у Вленѣ рѣцѣ, ту воротишася: ту бо бяху вышлѣ суздалци полкомъ, и учиниша около себе твердь, и не смѣша дати полку; а князь с новгородци посылаху к нимъ, просяще голку, нь богъ своею милостью болши крови не пролья крестияньстѣи: слипали бо ся бяху на малѣ часу, и убиша их новгородци близь трех сотъ, а сами вси здрави и воспятишася; и пояша князя самого Святослава в Новъгород, а Ярополка посадиша на Новѣмъ торгу; и вниде Святославъ великыи Всеволодиць в Новъгорд.
В лѣто 6689 [1181]. Мѣсяца июля въ 3, зажьжена бысть церкви от грома Варяжьская на Торговищи, по вечерънии, а другая святого Иоана Ищекова. Того же лѣта загорѣся въ Славнѣ от Коснятина двора, сгорѣста 2 церкви: святого Михаила и святых Отець, и дворове мнози
по гребли и до Ручья.
В то же лѣто срубиша церковь святого Якова на Добрынѣ улици, и святого Кузмы и Дамиана, и святого Саву, и святого Георгиа, и святого Иоана Ищекову. Того же лѣта идоша новгородци съ Святославомъ Дрьючку, съ Олговымъ внукомъ. И в то время прииде Всеволод со всѣмъ полкомъ своимъ и смуромци и с рязанци на Новыи торгъ; и затворишася новоторжьци в го/л.117./родѣ съ княземъ Ярополком. И осѣдѣша город, и сѣдѣша 5 недѣль, и изнемогоша в городѣ: зане не бяше имъ корма, друзи бо их конину ядяху; и устрѣлиша князя Ярополка в городѣ, и бѣ имъ велика бѣда; и предашася новоторжьци, а Ярополка сзымавъ окова и веде со собою, такоже и новоторжьцовъ и с женами и с дѣтми веде, а городъ пожьже. А новгородци възвратишася от Дрьючка, пожегше город. Тогда же на зиму показаша путь Володимиру Святославичю, и иде къ отцю в Русь, а новгородци послашася по князь ко Всеволоду, и вдасть имъ свояка своего.
В лѣто 6690 [1182]. Прииде в Новъгородъ князь Ярославъ, сынь Володимирь, внукъ великаго Мьстислава. Того же лѣта концаша церковь архиепископь новгородчкыи владыка Илья съ своимъ братом Гаврилою на воротех святое Богоявление. Тогда же и святых Отець церковь поставиша.
В лѣто 6691 [1183]. Поставиша церковь Рядко с братом святого Еупатиа чюдотворца и епископа Ганьграньскаго на Рогатѣи улици. Того же лѣта ходи Всеволодъ на Болгарѣ со всею областью своею, и убиша в Болгарех князя Изяслава Глѣбовица. На ту же зиму бишася плесковици с Литвою, и много ся пакости издѣя плесковицемъ.