Кликни на квадрат справа, чтобы открыть вкладки сайта
Перепечатка в интернете разрешена при условии наличия активной ссылки на сайт " Святая София и Великий Новгород: История и современность".
НОВГОРОДСКАЯ ВТОРАЯ ЛЕТОПИСЬ
(по сборнику Архивского)
В лето 6849 (1341). Архиепископ Новгородцкий владыко Василей покры святую Софию свинцом, что было погорело, и иконы исписаны, и киот доспе. Той же зимы приехал митрополит Фегнаст Гречен в Новгород, со многими людми, тяжко бысть владьце и манастырем, кормом и дары. Той же зимы умре Озбяк цесарь поганый. Той же зимы умре князь великй Гидемен Литовъский, поганый. Той же зимы постави владыко терем великий. Той же зимы приехал Михаил княжич Александрович, со Твери, в Новъгород, ко владыце сын крестный, грамоте учится. Семь же лете хлеб бысть дешев, а скот рогатый помре (об. л. 26 —л.27).
В лето 6850 (1342). Того же лета заложи владыко Василей церковь святое Благовещение, на Городищи, порушеную, повелеием раба Божиа великого князя Семиона Ивановича, в Петрово говенья, в понедельник, месяца маиа в 27, на святаго Климонта, творца, кануном. Того же лета владыко Василей повеле слити колокол велик к святой Софии, и приведе мастера с Москвы, человека добра, именем Бориса (об. л. 123 —л. 124).
В лето 6853 (1345). Заложил владыко Василей святою Пятницу, что порушилось в великий пожар, повеление[м] раба Божия Анд[р]еа, сына тысяцкого, и Павла Петриловичя. Того же дни заложи владыко Василей церковь святых Козма и Дамъян, повелением раба Божия Анании Куритцьского, на Кузмыдемъяне улице, на другой неделе по Велице дни. Того лета поновлена бысть святый Гегорей: покровено бысть церковь новым свинцом, при великом князи Семене Ивановичи, промыслом Божиим, поспешением святаго мученика Христова Гегоргия, замышлением архимандрита Иосифа(*). Того же лета свершена бысть церква святаа Пятница, на память Семиона столпника. Того же лета свершена бысть церква святый Козма и Демьяна, [н]а память святаго Козмы и Демьяна, весне (л.27 – об.л.27)
(*) Там же Иосафа.
ДРУГОЙ СПИСОК: В лето 6853 (1345). Заложи владыко Василей церковь святую Пятницу, что порушалась в великий пожар, повелением раба Бож[и]а Андреа, сына тысяцкого, и Павла Петриловича. Того же дни заложи владыко Василей церковь святы[х] Козма и Демиян, на Кузмодемиянской улице, на дру[го]й недели по Велице дни, повелением раб Божия Онаньи Курицкого. Свершена бысть церковь святаа Пятница, на память святаго отца Семиона столпника. Свершена бысть церка святыи Козма и Демиян, на память святых Козма и Димияна, на весне (л.123 – об.л.123).
ИНОЙ СПИСОК: В лето 6853 (1345). Заложи Онцифор Жабин святаго Спаса на Ковалеве. Того же лета поновлена бысть церковь святый Егорей: покровен бысть новым свинцом, при великом князи Семионе Ивановичи, промыслом Божиим и поспешением архимандрита Иосифа (об.л.112).
ПО ДРУГОМУ СПИСКУ: В лето 6853 (1345). Заложи Акинъф святаго Спаса на Ковалеве (л.61).
В лете 6855 (1347). Погоре Славно, от Семенова, двора, от Бескова до Нутной улици (об. л. 27).
В лето 6858 (1350). Того же лета ходиша Новгородци в Юрьев, и разменишася Немци, что поимали в Ореховом Свею, на Аврама, и на Козму, и на Александра, и на Ондрея, и на дружину их, и то были за морем у Свийского короля у Магнуша; [и приехаша в Новород вси здрави](*) милостю Божиею, силою креста честнаго, нань же уповаша, и приидоша месяца июня в 9 день, на паметь святаго мученика Александра. Сего же месяца в 16 день, и отъяша посадничество у Федора у Данилова сына, и даша Онцыфору Лукину. Того же лета владыко Василей поставил полату камену у себя на дворе, подле Рожества. Того же лета выгнаша Новгородцы из Новагорода Федора посадника, и брата его Михаила, и Юрья, и Андреяна, и домы их разграбиша, и Прускую улицу всю пограбиша; и Федор, и Михайла, и Юрьи, и Андреян побегоша во Плесков, и мало побывши поидоша в Копорию (об.л.27 – л.28).
(*) Слова: и приехаша ....здрави взяты из Полн. Собр. Русск. Лет., т. lll, стр. 85.
В лето 6860 (1352). Бысть мор силен велми во Пскове. Того же лета постави владыка Моисей церковь камену, во имя святыа Богородица Успение, на Волотове (л.28).
ИНОЙ СПИСОК: В лето 6860 (1352). То[го] же лета постави владыко Моисей церковь камену, во имя святыа Богородица Успение, на Волотове (л.120 – об.л.120).
В лето 6861 (1353). Савин приезд изо Царяграда; пославание. Сава, приехал из Царяграда, от патрарха Филофиа и от царя Греческого Ивана Кантикузина привез грамоты з золото[ю] печатью (об. л.112) и ризы с кресты владыце Моисею и всему Новугороду благословение(*). Того же лёта поставлени быша 2 церкви камены: [Знамение] святей Богородицы на Иль[и]не улице, святый Дмитрей на Лубеной улици; а церква 40 [Мученик] паде; а людие имаша рыбы у брега руками (л.50).
(*) Это событие в одних летописях показано под 6862-м, а в других – под 6863-м годом.
В лета 6862 (1364). Поставиша Знамение святыя Богородица, на Иль[и]не улици (л. 61 — об.л.61)
В лето 6863 (1355). Постави владыка, Моисей церковь камену святаго Михаила архангела на Сковородки (об.л. 65 —л. 66).
В лето 6865 (1357). Постави владыка Моисей церковь камену Сшествие Святаго Духа монастырь (л. 77)
В лето 6866 (1358). Постави Лазута церковь камену святый Иоанн, у Немецкого двора (л.79).
В лето 6867 (1359). Постави владыко Моисей церкву камену святаго Прокофиа, на княжи двори. Того лета архепископ Новгородъцкй владыко Моисей соиде со владычества, по своей воли, немощи деля своеа, на память святаго отца Моисея; много [мо]лиша его с поклоном весь Новгород, и не послуша их, и сице благослови, тако рек им: «изберите себе мужа, егоже вам Бог дасть». И много [га]давше посадники и тысячники, игумены и попове, и не изволиша, себе от человек [избраниа сътворити, ни изволиша себе](*) от Бога приати извещение и уповати на милость его, кого Бог похощет и святаа Софиа, [того знаменает; и избраша себе три мужи: Алексеа черньца ключника дому святыа Софиа](*), и Саву игумена Антонова манастыря, [и] Ивана попа святыа Варвары; и положиша три жребии на престоле святыа Софиа, и утвердивше собе слово, егоже восхощет Бог и святаа Софиа, Премудрость Божиа, своему престолу служебника имети, того жребий да остави[ть] на престо[ле] своем; и избра Бог [и] святаа Софиа святителем [и] пастуха словесным овцам, мужа добра, з[н]аменита, разумна же о всем, расмот[ре]лива, че[р]нца именем Алексея, и паки остави Бог жребий его на престоле; и абие`возведоша [и] на сени честно, месяца сентября 15, на паметь святаго мученика Никиты, и посади[ша] его, сице глаголя: дондеже призовет его митрополит на поставление; бяше бо тогда митрополит в Киеви, и послаша к нему послове (л. 91 — л. 92).
(*) Слова: избраниа…себе взяты из Полн.Собр.Русск.Лет., т. lll, стр. 86. (**)Слова: того знаменает.... Софиа взяты из Полн. Собр. Русск. Лет., т. lll, стр. 86.
В лета 6868-е (1360). В то же лето Семнон Андреевичь, с материю своею боголюбивою Натальею, заложиша церковь камену святый Феодор, на Федоровой улици (л. 79).
ИНОЙ СПИСОК: В лета 6868(*)(1360). Того же лета, в Филипово говение, бысть знамение в месяци: аки темною кровию покровено, [на чисте небе]. Да того же лета погоре Корелской город напросно, и много пакости сотворися доспеху и животу; а городчане толко душею осташася. Той же весны, в великое говенъе, аки огненая заря явися, от востока восходя чрез небо. И бысть мятеж силен в Орде: мнозя цари, и царевичи и рядци исцекошася меж собою (об. л. 78).
(*) Там же: 6870; лунныя затмения, видимыя в Европе, были 5 декабря 1359 года и 23 ноября 1360 года.
В лето 6869(1361).Свершиша церковь камену святый Феодор, на [Фе]доровой улици (л. 79).
В лето 6871(1363). И подписана бысть церковь святыа, Богородица на Молоткове(*), в Моисееви монастыри, повелением боголюбиваго архиепископа Новгородцкого Алексеа (об. л. 120).
(*)В Полн. Собр. Русск. Лет., т. lll, стр. 88. на Волотове.
В лета 6873(1365). Бысть знамене о[т] иконы святыа Богородица во церкви Петра, в Славне: идяше аки роса. Бысть мор в Торшку (об. л. 122).
ПО ИНОМУ СПИСКУ: В лето 6873 (1365). А Югорци заложиша церковь каменую святую Троицу, на, Редятине улици (об. л. 67).
В лето 6875 (1367). Заложи Лазута церковь камену святаго Петра, конец Славна. Новгородци же со Псковичи взяша одиначество (л. 66).
В лето 6876(1368). месяца маиа в 12 день, на паметь святаго мученика Епифаниа, пожар зол бысть в Новигороди: погоре Детинец весь, и владычень двор, и святая Софиа огоре, Неревский конец до Данславли улици, и Плотницкий конец весь от святаго Никиты д[о] Радоговичь; и церкви погореша, и людей николико погоре (об. л. 120).