Кликни на квадрат справа, чтобы открыть вкладки сайта
Перепечатка в интернете разрешена при условии наличия активной ссылки на сайт " Святая София и Великий Новгород: История и современность".
НОВГОРОДСКАЯ ВТОРАЯ ЛЕТОПИСЬ
(по сборнику Архивского)
В лето 6808 (1300). Той же осени заложиша церковь камену святаго Михаила на Михайлови улици (л. 95).
В лето 6809 (1301). Взял князь Андрей, с Ноугородци, Немецький [город] Венец (л. 60).
В лето 6810 (1308). Заложиша город камень Новугороду. Того же лета заложша церковь камену святаго Бориса и Глеба, которая порушалася. Того же лета свершиша церковь святаго Михаила на Михайлови улици (л. 95).
В лето 6811(1303): Срубиша 4 церкви: святый Егорей в торгу, и святаго Ио[ан]на, и святаго Козму и Демияна на Холопии улици [и святаго Георгия на Боркове улици] (л. 95).
В лето 6815(1307). Сойде Феок[ти]ст со владычества, не здрав бысть, и благослови в свое место Давыда (л.60).
ИНОЙ СПИСОК: В лето 6815(1307). Того же лета, на зиму, архиепископ Новгородцкий Феоктист выйде изо владычна двора, по своей воли, своего диля (ради) нездравиа; благословил Новгород, иде в монастырь святыа Богородица [к] Благовещению, изволив молчаное житие, в немощи будя. Новгородци же возлюбиша Богом избранна и святою Софиею отца, его духовного именем Давыда, с поклоном и с ч[ес]тию посадиша его во владычне дворе, а Феоктист благослови его в свое место, и посла его к митропо[ли]ту ставитися (л.136).
В лето 6817 (1309). Поставлен бысть в Володимере архиепископ Новугороду Давыд митрополитом Петром, месяца июня в 5 день; и приде в Новгород месяца июля 20, на Ил[ь]ин день, и усретоша у святаго Ил[ь]и попове и весь Но[в]город, со кресты и песнми и хвалами, и сотвориша, празник светел, и посадиша на столе, и ради быша Новгородци своему владыце (л. 65).
В лета 6818 (1310). Постави архимандрит Кирил святую Троицу, а Шил постави святую Богородицу на Лубяници. Того же лета постави владыко Давыд святаго Володимера (л.60).
ИНОЙ СПИСОК: В лето 6818 (1310). Того же лета постави церковь камену на Коломъцах архимандрит Кирил, во имя святыа Богородица Успениа, а другую постави церковь камену, во имя святыа Богородица Покрова, стяжанием раба Божиа Олония мниха, нарицаемого Шила; и бысть монастырь, а христианом прибежище. Того же лета, на зиму, преставися блаженный архиепископ Новгородций Феоктист, месяца декобря 23, на паметь святых Мученик 10 иже во Крите (л. 65 — об. л. 65).
В лета 6821 (1313). Постави владыко Давыд святаго Николу, в Неревском конъци (л. 60).
В лето 6829 (1321). Того же лета, месяца июня 26, в 3 час дни, погибе солнце и бысть аки двою дней месяц, и тма бысть аки в зимнюю нощь, и но едином часе паки наполнися, и ради быхом. Мор бысть на люди. Преставися князь Борис Даниловичь; и на зиму преставися Ярославльский Давыд (об. л. 77).
В лето 6830 (1322). Того же лета преставися князь Афонасей, брат Юрьев; постригся в че[р]нци, и положи[ша] у святаго Спаса в Нередицах (л. 120).
В лето 6832 (1324). Той же зимы преставися владыко Ноугородцкой Давыд, месяца февраля в 5, на паметь святыа мученици Агафьи; и положиша его во притворе во святей Софии, по сторонь владыки Климента; тогда же здумавши Новгородци, и попове [и] игумены и чернци, и весь Великий Новгород, возлюбиша вси Богом назнаменана Моисиа, преже бывша, архимандритом у святаго Егоргиа — потом бяше вышел, по своей воли, ко святей Богородици на Коломъци в свой манастырь — и взведоша его на сени, и посад[иш]а во владычне двори, дондеже позоветь его митрополит (л. 95 — об. л. 95).
ИНОЙ СПИСОК: В лето 6832 (1324). Той же зимы преставися владыко Новгородцкой Давыд, месяца февраль в 5 (об. л. 65).
В лето 6834 (1326). Преставися владыко Давыд(*), и поставиша владыкою Моисея(**) (л. 60).
(*) Архиепископ Давид скончался в 6832 году; см. выше. (**)Далее за этим в рукописи, под данным годом, записаны следующее события, взятые без разбора из разных мест летописи и относящиеся к разным годам: И того лета постави княгиня Анна святую Богородицу на Тору. Того же лета приидоша Тотарове на Рускою землю, и бысть побоище на реки на Леси (?), и о(т)идоша Тотарове; и потом пособи Бог князем Русским, и поиде князей 11, а вой безчислено, а иных князей поимал. Се же бысть зло июня в 17 день (л. 60 — об. л. 60).
В лето 6838 (1330). Поставлена церковь камена святый Спас, на Москве. Того же лета поставиша Псковичи Избореск городок камень на Жорове горе. Пострижеся во скиму владыко Моисей, и бывь лет, и соиде со владыч[ес]тва, в монастырь на Коломци, по своей воли; и много молиша его Новгородци, всем Новымгородом, [с] поклоном, дабы сел на своем столе, и не послуша их, но благослови весь Новгород, сице рече им: «изберите себе мужа таковаго и достойна того сану святителского, а яз вам его благословлю». Новгородци же много гадавше, и пребывше без владыки 8 месяц, и внезаапу абие возлю[би]ша весь Новгород, от ма[ла] и до велика, и игумены и попы, Богом назнамена[на]го Григорья Калику, мужа добра и богоименита в преподобстве своем, еще же кротка и смирена, ерея бывша святых безеребреник Козма и Демъяна на Хо[ло]пии улицы; и повелша ему приати святый ангелский образ, месяца, генваря в 1, и наречен бысть именем Василей, и посадиша во владычне дворе, дондеже пошлют к митрополиту (л. 66 —л. 67).
В лето 6839(1331). И бысть помрачение солнцу. Преставися князь Ростовский Федор Васильевичь. Заложи владыко Василей город камен, от Володимера святаго до Богородици и до Бориса и Гльба (л. 67).
В лето 6843(1335). Заложи владыко церковь святую Богородицу во Зверинци, а владыка Моисей заложи церковь камену святаго Въскресениа на Деревяници монастырь (об. л. 65).
В лето 6844 (1336). Заложи владыко Василей Вход [в] Иерусалим; и бысть на другое лето велика [во]да, и мосту велико[го] вынесе 17 городней (л. 61).
ИНОЙ СПИСОК: В лето [6844] (1336). Боголюбивый архиепископ Василей [у] святей Софии двери медены золочены устрои (об. л. 65).
В лето 6848 (1340). Преставися князь Иван. Того лета пожар бысть велики в Новегороде, и погоре весь город по обе стороны, и великого мосту выгоре 9 городней, и святаа София, а горе от Неревского конца; а церквей 40 и 3 огорело [и] людей безчислено. И того лета ходил князь [Семен] в орду, и взял великое княжение (л.61).